Read Sangir PĚNDARIADI 3 Bible Online

PĚNDARIADI 3 - Sangir bible

PĚNDARIADI 3

¹ Těmpu e kai binatang manandụ, kontiang, bọu haghim binatang kụ nikoạ u Mawu Ruata e. Těmpu e nakiwal᷊o su tau wawine ene, ”Kahěngang bue tangu Mawu Ruata mẹ̌sěding i kamene kumaěng kal᷊awọu wuang kalu su winal᷊aeng ini?”

²”I kami e wotonge wue kumaěng walạewe apam buang kalu su ral᷊ungu winal᷊aeng ini,” e angkuěng u wawine ene,

³”tabeạu katewe kalu sutal᷊oarang binal᷊aeng e. Duata e měsẹ̌sěding i kami kumaěng buang kalu ene arau měnenggehẹ̌ e; watụ u kamagengu i kami e mang mẹ̌koạ ene ute, i kami e sarung mate.”

⁴Těmpu ene simimbang, ”Hal᷊ẹ̌be konti ene; i kamene tawe mate.”

⁵Mawu Ruata e něhengetang kerene ual᷊ingu i Sie masingkạ u kereu i kamene kumaěng buang kalu ene, tiněnnang kamene e sarungbe matal᷊uahẹ̌; kụ i kamene sarung makoạ kere Ruata[9] kụ makakasingkạ u apang mapia ringangu apan dal᷊akịsẹ̌.[10]

⁶Bawine ene nakasilo u kalu ene kai mal᷊ěnggihẹ̌, dingangu wuane měngkate mal᷊ahuwusẹ̌ kahěngang. Kụ i sie něngěnna u kai apạe kapia kereu i sie mapelesa. Tangú i sie nanipọ e wuang kalu ene, bọu e nịkakaěnge, kụ nionggotange lai kawinge, kụ kawinge mal᷊aing kimaěng dingang.

⁷Ta nararěnnạ wọuten kimaěng buang kalu ene, tiněnnan sire natal᷊uahe kụ nakahěngangke i sire u i sire kawe nạung těntol᷊e. Ual᷊ingu ene tangu i rẹ̌dua e něhěmbungke wadang i rẹ̌dua e ringangu raukalung ara nipẹ̌tatakidẹ̌.

⁸Bawěllo ene tangu i rẹ̌dua e nakaringihe Mawu Ruata mědẹ̌daral᷊eng su ral᷊ungu winalangeng e kụ i rẹ̌dua nẹ̌kěmbuni su wěllạu manga kakaluang e mědeạu tawe ikasilong MAWU.

⁹Kaiso MAWU Ruata e něnggọ e su tau esẹ e, ”Kai suapa i kau e?”

¹⁰Tau esẹ e simimbang, ”Iạ e nakaringihẹ̌ si Kau su winal᷊aeng; kai iạ e natakụ, kụ iạ e nẹ̌kěmbuni ual᷊ingu iạ kawe těntol᷊e.”

¹¹”I Sai tangu naul᷊ị u i kau kawe těntol᷊e?” ungkuěng u Mawu Ruata. ”Kụ kai nikaěngu wuang kalu Takụ isẹ̌sẹ̌ding kumbahang kanengang tangu?”

¹²Tau esẹ e simimbang, ”Tau wawine nionggọu apạtaking si siạ e, seng nangonggọu wuang kalu ene si siạ, kụ bọu ene nikaěngku.”

¹³ MAWU Ruata e nakiwal᷊o su tau wawine ěndaị e, ”Unụe i kau nẹ̌koạ kerene?” Angkuěnge, ”Iạ e kai niakal᷊engu těmpu, hakịeweng iạ kimaěng buang kalu ene.”

¹⁴Samuring ene tangu MAWU Ruata e něhengetang su těmpu ene, ”I kau sarung ihukung ual᷊ingu kakanoạu ene; bọu kal᷊awọu haghim binatang ute kětạeng i kau sarung měnal᷊udẹ̌ ane ěndaị ini: Maněta bọu ini i kau sarung tumondon tiangu, ringangu kumaěng awul᷊ẹ̌ kanandung pẹ̌bawiahu.

¹⁵ I kau ringangu tau wawine ěndaị e sarung mahamběnsingang kụ hitene ringangu hitenu e sarung hanesẹ̌ měsẹ̌sitori. Hitene sarung mananumạ těmbọu ringangu i kau e sarung měngiki kal᷊entọ i sire.”

¹⁶Bọu ene angkuěng u MAWU su tau wawine ěndaị e, ”Iạ sarung mapahuntinambang likibe těntal᷊ang i kau e měbẹ̌bawa kapapia ringangu su tempong i kau e měhěnding. Kaiso maningbe kerene, i kau e mang piạ sahigu su kawingu, kai i kau e sarung dumaringihẹ̌ si sie.”

¹⁷ Bọu ene angkuěng u MAWU su tau esẹ ene, ”I kau e rimaringihẹ̌ bawerang kawingu kụ bọu ene kimaěngbe wuang kalu Takụ isẹ̌sěding si kau kumbahang kanengangu. Ual᷊ingu kakanoạ u ene ute, katula su ěntana. I kau měhal᷊ẹ̌ mawěhạ kanandung biahu, tadeạu ěntana ini e wotongewe makaual᷊i pẹ̌bawiahẹ̌ mědẹ̌dal᷊embo waugʼi kamene.

¹⁸Kal᷊awọu rěmpugẹ̌ dingangu manga sumpinị apatuwo wọu ěntana ini waugʼi kamene e ringangu kal᷊awọu sasuang tawe kal᷊ahěnganeng e sarung makoạ kaěngu.

¹⁹I kau e sarung měhal᷊ẹ̌ masěga-sěgadẹ̌ dingangu marenọ u liagha mědeạu makariadi ěntana ini sorong mẹ̌gěsi, sarangkewe i kau mẹ̌sul᷊e kapia su ěntana, batụu kai wọu ěntana i kau e niluhudẹ̌. I kau nikoạ bọu ěntana, kụ sarung lai mẹ̌sul᷊e su ěntana e kạpia.”

²⁰I Adam[11] e nẹ̌sěba u kawinge si Hawa,[12] ual᷊ingu wawine ene e nakoạ inang u patikụ umatẹ̌ e.

²¹Tangu MAWU Ruata e nẹ̌koạ pakeang bọu pisim binatang baugʼi Adam dingangu kawinge, bọu e niluhene si rẹ̌dua.

²² MAWU Ruata e něhengetang, ”Orasẹ̌ ini e taumata e seng nakoạ kere i Kitẹ dingangu piạ kasingkạ e mẹ̌kiral᷊a mapia ringangu ral᷊akị. Kụ hinong petokang i sie kumaěng buang kalu makaonggọu pẹ̌bawiahẹ̌, tadeạu kumbahang i sie mẹ̌biahẹ̌ sarang marěngụ-děngụ.”

²³Tangu MAWU Ruata e nanokol᷊ẹ̌ taumata wọu winal᷊aengu Eden, kụ nangoro pẹ̌kẹ̌karadiahang ěntana kụ nakoạ pinẹ̌buakenge.

²⁴Bọu e su sěmběkan daki wọu winal᷊aeng ene tangu, su těngọeng tukadẹ̌ sasuẹ̌kang MAWU Ruata e naměllọeng manga kerub,[13] ringangu peda sěmbua rěllị e mětẹ̌tatěnung walạewe sarang pungu anging sude, waugu ipěndiagạ dal᷊eng mẹ̌timona kalu makạonggọu pěbawiahẹ̌ ene. Ual᷊ingu kerene tangu, tawẹu sarang sěngkatau makakasuẹ̌ humaung kalu ene.