Read Sangir PĚNDARIADI 30 Bible Online

PĚNDARIADI 30 - Sangir bible

PĚNDARIADI 30

¹Arawe i Rahel e měngkate wědang tawe nakạdeạ anạ e. Ual᷊ingu ene tangu i sie nananoi su tuhange, kụ nẹ̌bera si Yakub, ”Onggotengkong anạ iạ e, mạeng u tala, ute iạ mapiawe mate.”

²I Yakub nẹ̌pědu si Rahel kụ nẹ̌bera, ”Iạ ini e wal᷊inewe Ruata. I sie e napakariading kau e tawe nakaěba anạ.”

³Mase angkuěng i Rahel, ”Endaị ěllangku i Bilha; kụ pẹ̌tikị e ringange tadeạu i sie měhěnding namantelẹ̌. Kụ iạ e hědo makoạ i ninangu rariọ e wọu anun sie.”

⁴Mase nighěllị e i Bilha su kawinge, kụ i Yakub e riměduhe su ěllang ene.

⁵I Bilha tangu piạ kal᷊uwaenge, mase něhěndingu sěngkatau anạ esẹ.

⁶I Rahel nẹ̌bera, ”Duata e seng namewẹ u tul᷊idẹ̌ku. Niraringihange kakal᷊iomanengku kụ nighěllirange anạ e esẹ sěngkatau e si siạ.” Mase nisěbạ e anạ e ene si Dan.[62]

⁷I Bilha saụewe piạ kal᷊uwaenge kụ něhěndingu sěngkatau anạ esẹ.

⁸Angkuěng i Rahel, ”Iạ seng něhawạ kahěnga-hěngang dimokạ tuhangku, kụ iạ e nakauntung,” ual᷊ingu ene anạ e nisěbạ e si Naftali.[63]

⁹Piạ e i Lea nakahěngangke u i sie kai seng tawe saụ makareạ anạ e, tangu nionggọ e ěllange i Zilpa si Yakub niapakakoạ kawinge.

¹⁰I Zilpa e tangu namantelʼu sěngkatau anạ esẹ.

¹¹I Lea nẹ̌bera, ”Untungbe apa si siạ!” Kụ anạ e nisěbạ e si Gad.[64]

¹²I Zilpa e saụewe namantelu sěngkatau anạ esẹ kapia

¹³kụ i Lea nẹ̌bera, ”Kai karal᷊unsemahẹ̌ si siạ e! Kụ kěbị manga wawine e mambeng makawera u iạ e mal᷊unsemahẹ̌.” Ual᷊ingu ene anạ ene nisěbạ e si Asyer.[65]

¹⁴Su tempom pamaměnsạ gandung, i Ruben nakoạ sol᷊ong kěhu, kụ kinaěbakenge paịsene děmpugẹ̌ sěmbaụ kakoạ undang[66] kụ niwawane su anung Lea, i ninange. I Rahel nẹ̌berạ si Lea, ”Onggoteko iạ kadodọ děmpugẹ̌ kakoạ undang kụ nạung nikaěbakengu anạ u e.”

¹⁵Angkuěng i Lea u, ”Kai wědang kadodọ, i kau nangal᷊ạ kawingku e tangu? Kụ ini e relaim bědang mangal᷊ạ děmpugẹ̌ kakoạ undang nạung nikaebakengu anạku e.” Angkuěng i Rahel, ”Mạengu i kau e mapulu měgěllị u rěmpugẹ̌ undangu anạ u si siạ e, tangu i kau e wotonge mẹ̌tikị dingangʼi Yakub sěhěbi ini.”

¹⁶Piạ i Yakub napul᷊ẹ sol᷊ong bal᷊e wọu rarukutange sěngkawawěllo ene, i Lea e naněnsomahẹ̌ apidu kapẹ̌berane, ”Damahikowe pẹ̌tikị dingangku sěhěbi ini, batụu ene kai seng takụ niwaehang u rěmpugẹ̌ undang bọu anạku.” Tangu i Yakub e rimal᷊okạ e ringang i sie sěhěbi ene.

¹⁷Mawu Ruata e rimaringihẹ̌ kakal᷊iomaneng i Lea e, kụ i sie piạ ete kal᷊uwaenge kụ bọu ene namantelu anạ e kal᷊imane.

¹⁸Angkuěng i Lea, ”Ruata e seng nangonggọu tatendenge si siạ batụu iạ seng nangonggọ i Zilpa su kawingku,” ual᷊ingu ene tangu anạ ene nisěbạ e si Isakar.[67]

¹⁹I Lea e saụewe piạ kal᷊uwaenge kụ namantelu anạ e kaěnnunge.

²⁰Angkuěnge, ”Mawu Ruata e saụ nangonggọ u gaghěllị mal᷊ěnggihẹ̌ tawẹ sihinge si siạ e. Ini e kawingku sarungbe mangarěgang iạ, batụu iạ seng namantelu anạ esẹ ěnnungʼu katau,” hakịu anạ ene nisěbạ e si Zebulon.[68]

²¹Bọu ene i Lea relain namantelu sěngkatau anạ bawine kụ nisěbạ e si Dina.

²²Mase nakatahěndungke Mawu Ruata e si Rahel; kụ Duata rimaringihe kakal᷊iomanenge kụ napakariadin sie namantelu anạ e.

²³Tangú i Rahel něpohiama e kụ namantelu anạ esẹ. Angkuěng i Rahel, ”Mawu Ruata e napakapunasu kasasamedẹ̌ku e.

²⁴Karimạko MAWU e měgěllị si siạ sěngkatau anạ esẹ kạpia.” Ual᷊ingu ene nisěbạ e anạ e ene i Yusup.[69]

²⁵Bọuten i Rahel namantelʼi Yusup, i Yakub nẹ̌bera si Laban, ”Iạ balạ e aparal᷊eng, mědeạu iạ makapẹ̌bal᷊ị sol᷊ong anung kami, ringangu sol᷊om banuaku.

²⁶Balako iạ deng tamai manondang kawingku rarua e ringangu manga anạku. I sire kěbị e kai takụ kinaěbakeng ual᷊ingu pěmamunaraku su anung mahuaneng mamạku. I kau gaghurang masingkạ, u iạ seng nẹ̌těngkasaghedẹ̌.”

²⁷I Laban nẹ̌bera si sie, ”Daringihẹ̌ko kal᷊imona: Iạ e makạsipirẹ̌ u MAWU e seng něngal᷊amatẹ̌ si siạ ual᷊ingu i kau.

²⁸Pẹ̌berạ e kai pirạ e rẹ̌dorongangu.”

²⁹Angkuěng i Yakub, ”I kau ghaghurang hala e masingkạ u iạ seng něhal᷊ẹ̌ masěgadẹ̌, kụ manga binatang i tatạ seng nahuntinambang kal᷊awọe ual᷊ingu pělahikingku e.

³⁰Těntal᷊ang iạ e reng tawe nạděnta, darotong i kau ghaghurang e tawe sěngapa, arawe ini e i kau ghaghurang kai seng kalạ. MAWU e kai seng nangal᷊amatẹ̌ si kau e ual᷊ingu iạ.[70] Kụ ini seng tempone iạ měmunara waugu ral᷊ohom bal᷊eku.”

³¹Angkuěng i Laban, ”Kụ kai apa hinong takụ ighěllị si kau?” I Yakub simimbang, tangu, ”Tawahal᷊uasu i kau ghaghurange měgěllị u apa. Iạ mang těbe saụ mangahạ dingangu mělukadẹ̌ binatang i kau ghaghurange kereu i kau ghaghurange mal᷊uasẹ̌ su kapuluku ini:

³²Apakawalako iạ sěhěllo ini e reng lumuhu kal᷊awọu ghapaěngu kambing dingangu dombang kau ghaghurange, kụ deng mangal᷊ạ apang anạ u domba kụ mal᷊aitung,[71] dingangu apang kambing mangangudạ punturang arau piạ tuntude. U tumbạ u ene tatendenge takụ ilẹ̌enning.

³³Kụ su ěllo ramahi e sarungbe makakasingkạ mal᷊ahẹ měnsang iạ e matul᷊idẹ̌ bue naungku. Kereu i kau gaghurang duměnta mẹ̌kakělla tatendeng si siạ e, kụ makasilo kambing bal᷊inewe punturang arau bal᷊inewe pantareng, arau domba kụ bal᷊inewe mal᷊aitung e tangu, nal᷊ahẹu i kau gaghurange seng masingkạ u binatang ene e kai seng takụ nitako.”

³⁴I Laban simimbangu, ”Kerenẹ e! I kitẹ sarung mẹ̌koạ kere niweranu ene!”

³⁵Kai su ěllo ěndaị e i Laban mapẹ̌dal᷊ahaeng kal᷊awọu kambing esẹ punturang arau pantareng e ringangu kěbịewe kambing bawine apan punturang arau pantareng arau apạewem piạ mawirane pẹ̌kadodọ; dingangu i sie lai měhae kěbị apan domba mitung. Bọu ene nirolohe manga anạ e pinẹ̌lukadẹ̌ manga binatang ene,

³⁶mase nahundal᷊engke i sire ringangu manga binatang ene kụ nẹ̌těngkagheang bọu anung Yakub, karaun těllu ěllo karěngụ e rumal᷊eng. Apạeweng lěmbeng gapaěng u kambing dingangu domban Laban tangu nịlahikingken Yakub.

³⁷Bọu ene i Yakub něngal᷊ạ e manga lelangu kalung hawar, lěhi ringangu sal᷊ise kụ bědang melong kụ mělěkabẹ̌ pisine sěnggạ sarangkewe mẹ̌punturang.

³⁸Nipěllọ e manga lelange ene su těngong gapaěngu kambing ene, su ral᷊ungu dulangu pěnganginungange, batụu manga binatang ene kai puluang mẹ̌tatimuhẹ̌ su piạ loahʼu i sire měmpanginung.

³⁹Kụ kamagengu manga kambing ene mẹ̌tatimuhẹ̌ su těngom manga lelangu kalu ene ute awạ u anạ e makoạ běhisang arau punturang arau mẹ̌pantareng.

⁴⁰Bọu ene i Yakub něngal᷊ạ e manga domba niapatatěngone suapạeweng manga kambing punturang dingangu mitung. Kụ ual᷊ingu kakakoạ e kerene tangu i sie nakareạ e ghapaěngu binatang e hala kụ nịlahaene wọu manga ghapaěngu binatang i Laban.

⁴¹Kụ kereu binatang katatoghasenge matarang děntaěngu idal᷊e kụ mẹ̌tatimuhẹ̌ e tangú i Yakub měmělọeng manga lelangu kalu apang niwěnị e su těngon sire, su ral᷊ungu dulangu pěnganginungang i sire e.

⁴²Kai manga lelange ene nipapěllọ e su l᷊antehu apang binatang lome. Kụ kěbịewe apam binatang kụ mawira e ute lome, kụ seng ene rarotong i Laban, arawe kal᷊awọu binatang mal᷊aitung, punturang dingangu piạ manga tuntude ene ute matoghasẹ̌ bue, kụ seng ene rarotong i Yakub.

⁴³Ual᷊ingu kawe kerene tangu i Yakub nakoạ taumata kalạ tawẹ sihinge. I sie managhuang gapaěngu kambing, domba, onta, kalide ringangu manga ěllang.