Read Sangir PĚNDARIADI 32 Bible Online

PĚNDARIADI 32 - Sangir bible

PĚNDARIADI 32

¹I Yakub naněpaseng daral᷊enge. Kutẹu kai piạ malaekatẹ̌ pirang katau riměnta mẹ̌sombang sie.

²Ene i Yakub nakasilọ e si sire, i sie nẹ̌bera, ”Ini e kai pẹ̌bawal᷊eěngu Ruata e,” ual᷊ingu ene tangu tampạ ene nisěbạ e Mahanaim.[77]

³Bọu ene i Yakub nangorọ e manga rarolohang manga pirang katau niparal᷊eng piněngal᷊imona si sie sol᷊ong soang Edom apẹ̌sẹ̌sombang i Esau e tuhange.

⁴I Yakub nẹ̌bera si sire, ”Paul᷊ịko su tuhangku i Esau e kere ini, ’Iạ e i Yakub ěllangu. Sarang orasẹ̌ ini iạ seng mětẹ̌tanạ su anung Laban.

⁵Kụ ini e iạ piạ sapiku, kalide, domba, kambing dingangu manga ěllangku. Iạ e seng něndingọ u habarẹ̌ su mawuku, kụ mal᷊owọko mawuku e mal᷊uasẹ̌ bue.’ ”

⁶Ene sarangke manga rarolohang saụ nẹ̌bal᷊ị kapia sol᷊ong anung Yakub, i sire nẹ̌bera, ”I kami seng bọu anung Esau tuhangu, kụ ini e i sie seng su raral᷊engang damahi maněnsomahẹ̌ si Tuang. I sie ramahi, ringangu ěpạ u hasụ su kataune.”

⁷Nakaringihẹ̌ ene tangu i Yakub apạ e natakụ-takụ dingangu ghụgěnggang. Mase manga ringangu nipahiạ e ruang kamonaěng, kerene lai dombane ringangu kambinge, sapi ringangu ontane.

⁸Su tiněnnane, ”Mạengu i Esau ruměnta kụ měngalo sěngkamonaěng humotong, tangu kamonaěnge karuane rembeng makatal᷊ang.”

⁹Bọu ene i Yakub nẹ̌kal᷊iomaneng, ”O Mawu Ruata, sẹ̌sěmbaěng i upungku i Abraham, dingangu i amangku i Ishak, daringihẹ̌ko siạ! MAWU seng něndolohu iạ pinakapul᷊ẹ sol᷊om banuaku sol᷊ong anung manga anạ u sěmbaụku. Ringangu MAWU e nẹ̌kědo sarung měhundugẹ̌ patikụ sabarang pakapia waugu iạ.

¹⁰Iạ e tawe hinone makatarimạ kal᷊awọu kakěndage dingangu kasasatia kụ seng nitodẹ u MAWU si siạ. Piạ e iạ nạung l᷊imiu Sal᷊ụ u Yordan, iạ e tawe nẹ̌bawa apa-apa tumbạewen těkingku e. Kụ ini e iạ seng diměnta kapia ringangu nakoạ gapaěng darua.

¹¹Iạ mědẹ̌dorong sěngapam botonge, ambange wue iạ bọu l᷊iman tuhangku i Esau. Iạ mạtakụ kiwuạ u i sie ruměnta měngalo ringangu měnilakạ si kami kěbị, baẹbe manga wawine ringangu manga rariọ.

¹² Pẹ̌tahěndungko, watụ u MAWU e seng nẹ̌kedo sarung měhundugẹ̌ patikụ sabarang pakapia waugu iạ dingangu mangonggọ u hiteku pakal᷊awọ. Tawẹu sarang sěngkatau makarekeng kahiang kal᷊awọe mẹ̌sul᷊ungu ěnne su apeng.”

¹³Bọuten natikị sěhěbi sene, i Yakub nangal᷊ạ e sěmbahageang bọu manga binatang e mědeạu ikoạ gaghěllịe si Esau. Gaghěllị ene ute kai kambing bawine rua hasụ e su waụ e, ringangu kambing měndangeng duam pul᷊o, domba wawine rua hasụ su waụ e, domba měndangeng duam pul᷊o, onta mal᷊ahanạ těllum pul᷊o su waụ e ringangkeweng anạ e, sapi wawine ěpạ u pul᷊o, sapi esẹ mapul᷊o, kalide wawine ruam pul᷊o, ringangu kalide esẹ mapul᷊o.

¹⁶Nipẹ̌dal᷊ahaenẹete manga binatang ene nakoạ pirang kamonaěng mase sěngkamonaěng-sěngkamonaěng e nisarakange su ěllange pẹ̌sěngkatau. Angkuěnge si sire, ”Dal᷊engke pěngal᷊imona wọu iạ, dingangu ghělireng be wěllạ e sutal᷊oarang kamonaěng sěmbaụ dingangu kamonaěng tuhụ e.”

¹⁷I Yakub nangoro su ěllange humotong, ”Kereu tuhangku i Esau nẹ̌sombang dingangu, kụ makiwal᷊o, ’I sai mawune tangu? Kai makoạ sol᷊ong apa tangu? Kai i sai taghuangu manga binatang kụ lẹ̌ahakeng i kamene ene?’

¹⁸Tangu simbangko, ’Tataghuanengu ěllangu i Yakub. I sie něndingọ ini e al᷊ingkai sasěmba si Esau, mawune. Ěllangu i Yakub hala e makatol᷊e si kami.’ ”

¹⁹Su ěllange karuane, katěllune ringangu kal᷊awọu taumata apang ipělẹ̌lukadẹ̌ apang gapaěng e, nionggotangu parenta mẹ̌sul᷊ung. Batụu i Yakub mạngěnna u i sie makaologẹ̌ bue si Esau ringangu sasěmba ene, kụ kereu mẹ̌sombang tangu, i Esau e mapulu mẹ̌gěllịu ampung si sie.

²¹Kụ i sie něndohọeng sasěmba ene kal᷊imona, arawe i sie hala e nẹ̌tikị e su pẹ̌darasengang.

²²Su hěbịewe ene tangu, i Yakub nẹ̌bangung kụ bọu ene nangal᷊ạ kawinge rarua, dingangu rokạ e rarua, ringangu anạ e esẹ i sire mapul᷊o ěsa, limiu Sal᷊ụ u Yabok.

²³Bọuten napal᷊ebạ i sire, i sie nẹ̌sul᷊e, kụ apạewen darotonge ute nasuen dingọ e sol᷊ong pai sěmběka.

²⁴ Arawe i sie ute nẹ̌těngkatěntang sẹ̌sane. Tangu narěntạ e tau esẹ sěngkatau něhawạ dingangʼi Yakub sarạeweng nanětạ e mạbira.

²⁵Sarạeng tau esẹ nakapěndang u i sie kai tawe makawatạ su pẹ̌dal᷊ahawạ ene tangu, niwěbahe i Yakub su pěnade sarangkewe ruhing běngkile napeho su lensorange.

²⁶Ene něberạ e tau ene u, ”Pěllọ e iạ; měntěhang matangěllo e seng ta mararěnna suměpụ.” Angkuěng i Yakub, ”Iạ e tawe měměllọ i Tuang, tabeạu katewe i Tuang měngal᷊amatẹ̌ si siạ.”

²⁷”I sai arengu?” angkuěngu tau ene. ”I Yakub, ” Sasimbange.

²⁸ Tau ene nẹ̌bera, ”Arengu seng bal᷊inewe i Yakub. I kau kai seng něhawạ u Ruata ringangu taumata, kụ i kau kai seng nakauntung kụ ual᷊ingu ene tangu arengu kai seng nakoạ Israel.”[78]

²⁹ I Yakub něbera, ”Kụ paul᷊ịko kai i sai areng i Tuang.” Kai tau ene simimbang u, ”Tawahal᷊uasu i kau makiwal᷊o i sai arengku!” Mase nial᷊amatenge i Yakub.

³⁰Bọu ene i Yakub něbera u, ”Iạ e seng bọu nakapẹ̌sombang u Ruata, ghati ringangu ghati, kụ iạ e mang dem biahẹ̌.” Ual᷊ingu ene tampạ ene nisěbạ e Pniel.[79]

³¹Su tempong matangěllo siměbang, i Yakub naněntang u Pniel, kutẹu i sie kai kempal᷊ẹ̌, ual᷊ingu lensorangu wěngkile nẹ̌gaghal᷊isa.

³²Sarang orasẹ̌ ini hiten tau Israelẹ̌ mang tawe kumakinạ ihạ u wěngkilẹ̌ su wowon tueʼm běngkilʼu binatang batụu i Yakub kawe nikahinongu wawěbahẹ̌ su wěngkile.