Read Sangir PĚNDARIADI 34 Bible Online

PĚNDARIADI 34 - Sangir bible

PĚNDARIADI 34

¹Piạ su sahěllo, i Dina anạ i Yakub bawine rěduang Lea, němpẹ̌tiwoko si sire manga wawineng Kanaan pirang katau.

²Piạ e i Sikem, anạ i Hemor tau Hewi nakoạ datu su wanua ene nakasilo si Dina, kụ tinangehe rariọ mahuala ene, kụ pinẹ̌tingkaitange.

³Kutẹu i sie kai masaria naunge si Dina, kụ mamben nẹ̌tatal᷊ahino si sie, kụ mẹ̌tẹ̌tawakal᷊i tadeạu wawine ěndaị e mal᷊aing mapulun sie.[82]

⁴Angkuěng i Sikem si amange, ”Mal᷊owọko i amang deng tamai rumal᷊engu werang iạ su rariọ bawine ene. Iạ kai mapulu mẹ̌kawing dingange.”

⁵I Yakub nakaringihẹ̌ u i sie kai seng nakagholọ anạ e i Dina; watụ u manga anạ esẹ e kai nạung su pěngangahakeng u kal᷊awọu binatang e tangu, i sie měngkatewe tawẹ kěndị e sarang kawawal᷊ị i sire.

⁶I Hemor, i amang i Sikem, diměntạ e sol᷊ong anung Yakub kụ mẹ̌dal᷊ahintaun sie.

⁷Nẹ̌sarětạ u su tempo ene manga anạ i Yakub esẹ e něngkapul᷊ẹ bọu lantang. Nakaringihe hal᷊ẹ̌ ene, i sire němpẹ̌hěkose kụ měngkate apa němpẹ̌bawal᷊uang. Batụu ual᷊ingu nẹ̌kabasarang anạ i Yakub ene, i Sikem kai nakasamedẹ̌ kal᷊awọu tau Israel.

⁸Angkuěng i Hemor si Yakub, ”Anạku i Sikem kai seng nẹ̌těnděkạ u naunge kahěngang su anạ u wawine e; kụ iạ mělẹ̌harapẹ̌ u mapakawala wue anạku e ipẹ̌kawing dingange.

⁹Kụ mapiawe i kitẹ e mẹ̌koạko pẹ̌kakakire u bansanu ringangu bansang kami e wotonge mahandatingang.

¹⁰Tangu i kamene manga anạ u sěmbaụ e wotonge mẹ̌banua ringang i kami e su wanua ini; walạewe kapulung kamene, měnsang suapa. Manga anạ u sěmbaụ e walạewe i kamene měnsang mahumbal᷊ụ arau managhuangkewe arětạ.”

¹¹Bọu ene i Sikem nẹ̌bera si amangʼi Dina ringangu manga tuhange, ”Karimạko i kamene tumal᷊ěntubeng iạ su rorongku ini e, kụ iạ tangu sarungbe měgěllị u apang kapulung kamene.

¹²Měngkate paul᷊ị měnsang kai laěking apa tuhụ kapulung kamene, ringangu měngkate sauneng pakasahẹ kasariang bul᷊aeng u pẹ̌kakawing. Iạ sarung měngonggọu apạewen dorongang i kamene sumbal᷊ikate i kamene mangonggọu rariọ mahuala ěndaị e pẹ̌kawing dingangku.”

¹³Ual᷊ingu i Sikem kai seng nakagholọ kawantugu wawinen sire i Dina, tangu manga anạ i Yakub kai tawe něhabarẹ̌ kahěngang si Sikem dědua tahiamang.

¹⁴Angkuěng i sire si rẹ̌dua ene, ”I kami kai mamea mangonggọu wawineng kami ipẹ̌kawing u esẹ kụ tawe nisẹ̌sunatẹ̌ e.

¹⁵I kami kětạeweng makatarimạ dorongu e kereu makaitụ tundung kami; mangal᷊ene ute kěbị apang manga esẹ sutal᷊oarang kamene e hinong isunatẹ̌.

¹⁶Bọu ene i kami sarung kumire tonengu su hal᷊ẹ̌ u pẹ̌kakawing kal᷊aukang ene. I kami e sarung měngindunụ mạtanạ sutal᷊oarang kamene dingangu makoạ bansa sěmbaụ dingang i kamene.

¹⁷Kai kamagengu i kamene tawe mapulu tiahang kami e, ringangu tawe mapulu sunateng, saụ ul᷊enang i kami mahuala ěndaị e mase rumal᷊eng bọu ini e.”

¹⁸I Hemor rěduang anạ e i Sikem měpẹ̌pěndang u tiaha ene mambeng hinone wue,

¹⁹kụ i Sikem sadia wue měngganapẹ̌ kěbị tiahane ene watụ u i sie mapulun Dina. Bọu tal᷊oarang kal᷊awọu walagu anạ u sěngkatau e, seng i Sikem limembong lẹ̌lahunggeětang.

²⁰Bọu ene i Hemor děduang Sikem nakoạ e sol᷊ong pasěllangengu soan sire e, kụ němpẹ̌berạ e su kal᷊awọu taumata tamba soan dẹ̌dua e angkuěng,

²¹”Tau Israel ene e kai hapị i kitẹ. Kụ balạekere i sire pẹ̌tanạ e su soa ini ringangʼi kitẹ mase měngkate wala i sire měnsang sol᷊ong apa kapulun sire. Banua ini e mal᷊oahẹ̌be lai waugʼi sire. I kitẹ e wotonge lai makapẹ̌kawing dingangu manga wawineng sire, mase i sire wotonge lai makapẹ̌kawing u wawineng kitẹ.

²²Kaiso i sire ene kětạeweng mapulu mẹ̌tanạ dingang i kitẹ kụ makoạ bansa sěmbaụ dingang i kitẹ e kụ piạ tiahane sěmbaụ kụ kai kěbị esẹ sutal᷊oarang kitẹ e kai harusẹ̌be pakisunatẹ̌ kerẹewe lai i sire.

²³Kụ hědọewe kěbị gapaěngu binatang i sire, ringangu kal᷊awọu arětạ i sire tangu makoạbe tataghuaneng i kitẹ. Kụ mahịe i kitẹ e kumire e rorong i sire e tadeạu i sire matanạ sěngkapẹ̌tanạ dingang i kitẹ.”

²⁴Kal᷊awọu tumanạu soa kụ apan natampung ene rimaẹ těgung Hemor děduang Sikem, kụ bọu ene kal᷊awọeweng manga esẹ matěllang su soa ene nasuẹ e nakisunatẹ̌.

²⁵Kutẹu su katěllụeng ěllone, těntal᷊ang manga esẹ deng mětẹ̌tatahangu lěntihʼu sunatẹ̌ e, anạ i Yakub duang katau mahuaneng Dina isẹ̌sěbạ si Simeon děduang Lewi, něngal᷊ạ e pedang dědua, kụ bọu ene nahunsuẹ̌ marěmma-rěmmasẹ̌ sol᷊ong dal᷊ungu soa e. Bọu ene i rẹ̌dua němpamatẹ e kal᷊awọu manga esẹ apang ene sene,

²⁶kụ i Hemor děduang Sikem pinaten dědua l᷊ai. Mase i rẹ̌dua něngal᷊a e si Dina bọu wal᷊en Sikem kụ němpẹ̌dal᷊eng.

²⁷Bọuten namihua e, manga anạ i Yakub lai wal᷊ine e němpěhampasẹ̌ soa ene, piněmal᷊isẹ̌ si sire nẹ̌tingkaị bawinen sire.

²⁸I sire němpangal᷊ạ gapaěngu kambing, domba, sapi, kalide, ringangu kěbịewe sabarang su ral᷊ungu soa e ringangu su manga wawurasenge.

²⁹I sire němpangal᷊ạ kal᷊awọu apal᷊iwụ maral᷊ěgadẹ̌, mělẹ̌hiudẹ̌ kal᷊awọu manga wawine ringangu manga rariọ, dingangu měmpěmẹ̌mul᷊aho kal᷊awọewen dal᷊ohong apam bal᷊e su soa ene.

³⁰I Yakub nẹ̌bera si Simeon děduang Lewi, ”I kamene nanịgěsạbe si siạ. Orasẹ̌ ini e tau Kanaan dingangu tau Feris dingangu patikụewen tumanạu soa ini e sarung mẹ̌binsị u iạ. Taumatang kitẹ e tawe tumanịu lawọ; kereu tumanạ e ene kěbị sěnsunduang dumokạ dingangu měngalo si siạ; kakěpal᷊u anạ u sěmbaụ i kitẹ e sarung gagholokang.”

³¹Arawe i sire němpẹ̌simbangu, ”I kami tawe mapakawalan bawineng kami koateng kere wawine tahapẹ̌sundal᷊ẹ̌ e.”