Read Sangir PĚNDARIADI 35 Bible Online

PĚNDARIADI 35 - Sangir bible

PĚNDARIADI 35

¹ Piạ su sahěllo Mawu Ruata e něhengetang si Yakub, ”Kai Iạ e Ruata kụ nẹ̌těngkatodẹ si kau piạ i kau nạung tụtal᷊ang bọu anun tuhangu i Esau. Dakọko lighạ kakoạ sol᷊ong Betel. Katanạ e sene kụ pělanging pananěmbaěng baugu Iạ e.”

²Mase i Yakub nẹ̌bera su manga anạ u sěngkataune ringangu su kěbị taumata apạeweng dingange u, ”I kitẹ e kai sarung mědariahi měbuạ bọu ini kụ makoạ sol᷊ong Betel. Sene iạ sarung měndarisị pananěmbaěng baugu Mawu Ruata kụ seng nẹ̌tul᷊ungu iạ su tempong kasasěsẹ̌ku ringangu seng naněntanudẹ̌ si siạ balạewe iạ měnsang sol᷊ong apa. Kụ děmmẹko tul᷊adang manga ruata raghị si kamene kụ pěmpamurěsiko watangeng i kamene, kụ pěmpẹ̌luhen pakeang burěsi.”

⁴Mase i sire němpanarakangkeng kal᷊awọu tul᷊adan duata raghị apạeweng piạ si sire ringangu lai manga anti-antin sire si Yakub. Kal᷊awọu kěbị apal᷊iwụ tamai ene nasueng lěbing e si Yakub su al᷊ungu kalu ghẹ̌guwạ maranin soang Sikem.

⁵Su tempo ene i Yakub dingangu wuntuangu walage němpẹ̌buạ, kụ Mawu Ruata e napahombangu takụ su kal᷊awọu taumata tumanạ u kěbị soa mạngělikụ e, hakịu i sire tawe němpěnahusu si Yakub dingangu manga wuntuange.

⁶Tangu narěntạ e i sire su ěntanang Kanaan su soam Betel kụ nạung kal᷊imona e isẹ̌sẹ̌bạ Lus.

⁷Sene i Yakub něndarisị u pananěmbaěng, kụ nisěbạ e tampạ ene, ”El-Betel”, ual᷊ingu Mawu Ruata e seng nẹ̌tẹ̌ngkatodẹ u watangengʼE si sie sene piạ i sie kạtal᷊ange wọu anun tuhange.

⁸Sene lai kinapateěng i Debora, nạung napasusun Ribka e, kụ nilěbing su al᷊ungu kalu ghẹ̌guwạ su sěmběkan timuhẹ̌ bọu soa ene. Ual᷊ingu ene hakịu kalu ene nisěbạ e, ”Kalun Sasangitang”.

⁹Sarạeng i Yakub nawal᷊ị kapia wọu Mesopotamia, Mawu Ruata e nẹ̌těmpasilom batangengʼE kapia si sie ringangu něngal᷊amatẹ̌.

¹⁰ Angkuěngu Mawu Ruata e si sie, ”I kau e seng tawe saụ isěbạ si Yakub, kaiso kai Israel.” Kerene Mawu Ruata e něsẹ̌bạ i sie Israel.

¹¹ Mase angkuěng u Mawu Ruata kapia, ”Iạ e kai Ruata Kasěllahenge, kawasam patikụ. I kau e mangkewen pěhite pakal᷊awọ! I kau e sarung měhiteng kal᷊awọu wansa e, ringangu makoạ i upungu mararatu.

¹²Banua kụ Takụ nionggọ si Abraham děduan Ishak, sarung Takụ ionggọ si kau ringangu su hitenu.”

¹³Bọu ene Mawu Ruata e naněntang i Yakub.

¹⁴ Su tampạ kụ suapang Mawu Ruata e mělẹ̌hengetang si Yakub, i sie napararisị u watu sěmbaụ kinoạ e tatiala. Mase watu ene nikoạ e sasěmba su Mawu Ruata kụ naněbohu anggorẹ̌ dingangu lanang zaitun su wowone.

¹⁵Tampạ ene siněbạ e, ”Betel”.

¹⁶Bọu ene i Yakub dingangu wuntuange naněntangu Betel. Piạ i sire nạung deng diọ marau wọu Efrata, ene nịdatingken tempone i Rahel seng mamantelẹ̌. Kaiso rariọ kawe masusa iědihẹ̌.

¹⁷Ene kal᷊ikine kạpěnẹ̌nědụ e, nẹ̌berạe biang ene si sie u, ”Pakatarimạ bue naungu e Rahel, anạ u e kai saụ esẹ.”

¹⁸Arawe i Rahel kai seng kakạdanineng maminsul᷊ẹ̌ singongone, kụ piạ e i sie maminsul᷊ẹ̌ singongone, tangu nisěbạ e rariọ ene si Ben-Oni,[83] kutẹu i amange kawe nẹ̌sẹ̌bạu arenge si Benyamin.[84]

¹⁹Sarạeng i Rahel nairị, i sie nilěbing su wiwihu ral᷊eng makoạ sol᷊ong Efrata e kụ nạung orasẹ̌ ini e kawe nisěbạ Betlehem.

²⁰I Yakub napararisị u watu tatiala sene, kụ sarang ěllo ini kubul᷊i Rahelẹ̌ e wědang tẹ̌tialangu watu ene.

²¹Nal᷊iu wọu ene i Yakub naněpasu raral᷊enge, mase nangětingu tentane su tampạ sěmpalang sumaheng měnarang Eder.

²² Tangú piạ e i sire ene su tampạ ene i Ruben nẹ̌tikị sěngkapẹ̌tikị i rěduan Bilha, kapapuěng i amang e. Kụ ene tangu kinaringihʼi Yakub, kụ i sie mangkewen limangehẹ̌ marasai.[85] I Yakub piạ anạ e esẹ i sire mapul᷊o dua su kataune.

²³Anạ si Lea ute kai i Ruben (anạ i Yakub kaiakanenge), i Simeon, i Lewi, i Yehuda, i Isakar ringangʼi Zebulon.

²⁴Anạ si Rahel ute kai i Yusup dẹ̌duan Benyamin.

²⁵Anạ si Bilha ěllangʼi Rahel i Dan dingangkewen Naftali.

²⁶Anạ si Zilpa ěllangʼi Lea ute kai i Gad děduang Asyer. Manga rariọ ene ute piněhending su Mesopotamia.

²⁷ Mase nahumpạ e i Yakub su anung Ishak i amange, su tampạ katatanakenge su Mamre maraning Hebron. (Nạung su tempo tamai i Abraham i upunge, mal᷊aing mạtanạ sene.)

²⁸I Ishakẹ̌ e naminsul᷊u singongone seng maghurang-gurang, nịdatingu mahasụ ual᷊um pul᷊o su taunge, kụ bọu ene nilěbing i Esau rěduan Yakub anạe.