Read Sangir PĚNDARIADI 36 Bible Online

PĚNDARIADI 36 - Sangir bible

PĚNDARIADI 36

¹Ini rol᷊ẹ̌ u pal᷊ahěntong Esau kụ isẹ̌sěbạ lai si Edom.

² I Esau nẹ̌kawingu manga wawineng Kanaan, i sire těllu i Ada anạ i Elon tau Het; Oholibama, anạ i Ana ringangu pulung i Zibeon[86] tau Hewi;

³ i Basmat anạ i Ismael dingangu tuaring Nebayot.

⁴I Ada němantelʼi Elifas, i Basmat němantelʼi Rehuel,

⁵dingangu Oholibama němantelʼi Yeus, Yaelam dingangʼi Korah. Kal᷊awọu manga rariọ niwantelẹ̌ su wanuang Kanaan.

⁶Bọu ene i Esau naněntang i Yakub kụ nakoạ sol᷊ong banua wal᷊ine namaringangu kal᷊awọu kawinge, anạ e, ringangu kěbịewe taumata ral᷊ohom bal᷊ene, ringangu kal᷊awọu binatange ringangkeweng kěbị darotonge kụ seng kinaual᷊ine su wanuang Kanaan.

⁷I Esau nẹ̌těngkagheang bọu anung Yakub ual᷊ingu arětạ i sire e kai tawẹ sihinge kal᷊awọe hakịu i rẹ̌dua e tawe nakakatanạ sěngkapẹ̌biahẹ̌ sene. Tapengu l᷊ai su wanua kẹ̌katanakeng i sire ene tawe makasukụ pẹ̌deakeng arau mapakaěngu binatang i sire e kahiang kakěpal᷊e ene.

⁸Tangú i Esau kụ lai isẹ̌sěbạ si Edom, nangindunụ nẹ̌banua su wawul᷊urangu Seir.

⁹Ini e kai pal᷊ahěntong Esau, i upungu tau Edom.

¹⁰Kawing i Esau isẹ̌sěbạ si Ada e namantelʼu rariọ esẹ, kụ nisěbạ si Elifas. Dingangu i Elifas e piạ anạ e esẹ limang katau kụ i Téman, i Omar, i Zefo, i Gaetam dingangu i Kenas. I Elifas piạ kapapuěnge kụ nisěbạ si Timna. I sie něhěnding u anạ e esẹ kụ nisěbạ e si Amalek. Kawingʼi Esau isẹ̌sẹ̌bạ si Basmat, něhěndingu rariọ esẹ arenge i Rehuel, kụ i Rehuel piạ anạ e esẹ ěpạ u katau, i Nahat, i Zerah, i Syama ringangu i Miza.

¹⁴Kawingʼi Esau kụ isẹ̌sẹ̌bạ si Oholibama kụ kai anạ i Ana ringangu pulung i Zebeon,[87] namantelʼu anạ e esẹ těllung katau, kụ i Yeus, i Yaelam dingangu i Korah.

¹⁵Seng ini e manga kul᷊ano hiteng Esau: i Elifas, anạ i Esau i akang, kai i upung hiteng sire ini: I Téman, i Omar, i Zefo, i Kenas,

¹⁶i Korah, i Gaetam, dingangu i Amalek. I sire kěbị e kai hěnton Ada, kawingʼi Esau.

¹⁷I Rehuel, anạ i Esau, kai i upungu manga hiten: Nahat, i Zerah, i Syama ringangu i Miza. I sire kěbị e kai hiten Basmat, kawingʼi Esau.

¹⁸Kal᷊awọu hěnto apan tuhụ e ini ute kai hěnton Esau wọu kawinge isẹ̌sẹ̌bạ si Oholibama anạ i Ana, kụ i Yeus, i Yaelam, dingangu i Korah.

¹⁹Patikụ kawanua ene kai hěntong Esau.

²⁰Tumanạ u ěntanang Edom patutune nipahiạ suapạeweng kawanua hěnton Seir, tau Hori. Apạeweng kawanua ene ute kai kawanuang: Lotan, Syobal, Zibeon, Ana, Disyon, Ezer, dingangu Disyan.

²²I Lotan e kai i upungu ghal᷊ipohong Hori ringangu i Heman. (I Lotan e kai piạ bawinene i Timna.)

²³I Syobal e ute kai i upung u ghal᷊ipohong Alwan, Manahat, Ebal, Syefo ringangʼi Onam.

²⁴I Zibeon piạ anạ e esẹ duang katau, i Aya rěduang Ana. (I Ana ini e kai nakaěbạ kal᷊awọu simbul᷊u akẹ matětị su wanua tạ taune, piạ i sie kapělẹ̌lukade kal᷊awọu kalideng amange.)

²⁵I Ana ute kai i amangʼi Disyon, dingangu i Disyon e kai i upungu ghal᷊ipohong Hemdan, Esyban, Yitran dingangu i Keran. I Ana e mal᷊aing piạ anạ e wawine sěngkatau, arenge i Oholibama.

²⁷I Ezer i upung u ghal᷊ipohong: Bilhan, Zaawan dingangu i Akan.

²⁸I Disyan i upungu ghal᷊ipohong Us dingangu i Aran.

²⁹Seng ini e manga ghal᷊ipohong Hori su wanuang Edom: Lotan, Syobal, Zibeon, Ana, Disyon, Ezer dingangu i Disyan.

³¹Kal᷊imonang datu nẹ̌parenta su Israel, mararatu apan tuhụ e ini e měpẹ̌parenta su ěntanang Edom měbẹ̌bawěllasẹ̌: I Bela anạ i Beor bọu Dinhaba. I Yobab anạ i Zera bọu Bozra. I Husyam bọu wanuang Téman. I Hadad anạ i Bedad bọu Awit (seng i sie e nakawatạ tau Midian su ral᷊ungu pẹ̌sasekẹ su ěntanang Moab). I Samla wọu Masreka. I Saul bọu Rehobot su wiwihu sal᷊ụ. I Baal-Hanan anạ i Akhbor. I Hadar wọu Pahu (kawinge arenge i Mehetabeal anạ i Matred dingangu pulung i Mezahab).

⁴⁰I Esau e kai i upungu kal᷊awọu pal᷊ahěntong Edom ini e: i Timna, i Alwa, i Yetet, i Oholibama, i Ela, i Pinon, i Kenas, i Téman, i Mibzar, i Magdiel, dingangu i Iram. Apạeweng hite tangu mạngonggọu arenge su wanua kẹ̌katanakenge.