Read Sangir PĚNDARIADI 4 Bible Online

PĚNDARIADI 4 - Sangir bible

PĚNDARIADI 4

¹Bọu ene i Adam nẹ̌sěngkawadang dingangʼi Hawa kawinge, kụ piạ e kal᷊uwaenge wawine ene e. I sie něhěndingu sěngkatau rariọ esẹ kụ nẹ̌bera, ”Ual᷊ingu tul᷊umangu MAWU e tangu iạ nakahombang sěngkatau anạ esẹ.” Tangu nisěbạ e rariọ ene si Kain.[14]

²Mase i Hawa e něhěndingkon l᷊ai sěngkatau anạ esẹ arenge i Habel. I Habel kai nakoạ měngangahạ domba, arawe i Kain tangu nakoạ mělahěnsinuang.

³Piran tempo samuring ene, i Kain něngal᷊ạ e sěngkamonaěng bọu kaěng sasuange wọu e nisěmbane su MAWU.

⁴ Mase i Habel něngal᷊ạe anạ u domba kaiakanenge wọu tal᷊oarang manga dombane, pinotọe kụ nionggọ sasěmba kapiaěnge wọu kěbị sasěmba e waugu MAWU. MAWU e lụl᷊uasʼi Habel dingangu sasěmbane,

⁵kai tawe nanarimạ i Kain dingangu sasěmbane. I Kain limangehẹ̌ marasai, kụ měngkate sědung gatine.

⁶Tangu něhengetangke MAWU e si Kain, ”Unụe i kau e limangehẹ̌? Unụe ghatinu e měngkai sedung?

⁷Mạengu i kau e mẹ̌koạ mapia, nal᷊ahẹ u i kau e měngkai lụhěming;[15] kai mạengu i kau e mẹ̌koạ dal᷊ai e tangu rosa e kai mạhědo mědeạu sumuẹ̌ su ral᷊ungu naungu. Dosa e mẹ̌karadiahang su watangengu, kai i kau e harusẹ̌ mamatạ i sie.”

⁸ Ene angkuěng i Kain su tuarine i Habel, ”Bọete i kitẹ makoạ sorong dahami.”[16] Ene i sire nahumpạe sene, tangu i Kain měngkatewe timěmbo kụ němate tuarine i Habel.

⁹MAWU e nakiwal᷊o si Kain, ”Kai suapa i Habel tuarinu?” I Kain simimbang, ”Iạ běga wue. Kai měndal᷊ukadẹ̌ tuariku iạ e tangu?”

¹⁰ Bọu e MAWU něhengetang, ”Unụ e i kau někoạbe hal᷊ẹ̌ makạbawintogẹ̌ e? Dahan tuarinu e gụgahiorọ si Siạ bọu ral᷊ungu ěntana, kere tingihu mẹ̌gausẹ̌ bawal᷊ise.

¹¹I kau e kai nituhungangu ane hakịu selain tawe makamunara ěntana. Ěntana ene seng naněsụ dahan tuarinu, tabidạu něhengẹ mohonge nanelohẹ̌ dahan tuarinu e piạ i kau měmate si sie.

¹²Mạeng u i kau e mahěnsinuange, ěntana e tawe mẹ̌gěllịu wuane apa-apa; i kau e sarung makoạ mẹ̌papalilị kụ tawẹ pẹ̌tanakenge su dunia ini.”

¹³Tangú angkuěng i Kain su MAWU e, ”Hukumangu e tumanịu mawěhạ kụ iạ e tawe makatul᷊ung ene.

¹⁴I kau e nanokol᷊u iạ bọu ěntana ini, marau wọu rarěntanʼU e. Iạ e sarung makoạ lěhigẹ̌ tawẹu pětanakeng su dunia, kụ iạ e sarung pateěng i saing makaěba si siạ.”

¹⁵Kai MAWU e něhengetang u, ”Tala. Kereu i kau e pateěng, tangú makoạ bawalare ute pitung katau ringangu i sain namate si kau e sarung lai pateěng.” Bọu ene MAWU e naměllọu tialane si Kain, tadeạu walạewe měnsang i sai mẹ̌sombang i sie kumbahang měmate.

¹⁶Tangu němehọe i Kain bọu těngom MAWU e kụ nẹ̌tanạ su wanua isẹ̌sẹ̌bạ, ”Pẹ̌papalilikang” su sěmběkan daki wọu Eden.

¹⁷I Kain dingangu kawing e nakaěbạ anạ i rẹ̌dua esẹ isẹ̌sěbạ si Henokh. Bọu e i Kain němangung soa gẹ̌guwạ sěmbaụ, kụ nisěbạe timuhụ arengu anạ e.

¹⁸I Henokh i amang i Irad. I Irad i amang i Mehuyael. I Mehuyael i amang i Metusael, dingangu i Metusael e i amang i Lamekh.

¹⁹I Lamekh kinawinge ruang katau, i Ada rẹ̌duan Zila.

²⁰I Ada něhěnding i Yabal, dingangu hiten Yabal e kai bansa mělahiking binatang kụ mạtanạ su ral᷊ungu selo.

²¹Tuarine isẹ̌sẹ̌bạ si Yubal, ringangu hiten Yubal e kai měnanalang u kěcapi ringangu suling.

²²I Zila anạ e i Tubal-Kain, ringangu hitene měnaněsal᷊ẹ̌ haghing apal᷊iwụ[17] nikoạ bọu tambaga ringangu uase. Bawineng Tubal-Kain tuari e isẹ̌sěbạ si Naama.

²³Nẹberạ e i Lamekh su kawinge rarua, ”Ada ringangu i kau Zila, daringihẹ̌ko i rua! Umbaseng sěngkatau takụ nipate ual᷊ingu i sie nělimadẹ̌ si siạ.

²⁴Kereu pitung katau nipate waugu pinamalarẹ̌ pěmamate si Kain, tangú iạ sarung měmate pitung pul᷊o pitu su kataune takụ pateěng kereu iạ kawe pateěng.”

²⁵I Adam dẹ̌dua sěngkawingang nakareạ e anạ i rẹ̌dua esẹ kapia sěngkatau. Angkuěng i Hawa, ”Ruata e seng nangonggọu anạ esẹ piněngaweng si Habel, nạung seng nipateng Kain.” Ual᷊ingu ene i Hawa e něsẹ̌bạe areng u rariọ e i Set.[18]

²⁶I Set piạ anạ e esẹ kụ nisěbạ e si Enos. Seng su tempo ene taumata nanětạ e mẹ̌sẹ̌bạ arengu MAWU kereu mẹ̌suba e.