Read Sangir PĚNDARIADI 40 Bible Online

PĚNDARIADI 40 - Sangir bible

PĚNDARIADI 40

¹Samuring kal᷊awọu hal᷊ẹ̌ tamai ene, tangu ruang katau mẹ̌tatangkiangu ratum Misirẹ̌ e, těmbonangu mamamingihẹ̌ anggorẹ̌ dingangu těmbonangu mẹ̌kakoạ simokol᷊ẹ̌ e kai nẹ̌koạ pẹ̌sasal᷊an dědua su těngon datu.

²Tangú nẹ̌pědụ e ratu e si rẹ̌dua mẹ̌tatangkiang ene e,

³bọu ene nisuẹ̌ e karạ e i rẹ̌dua su ral᷊ungu tahungkụ su wal᷊en těmbonang u měndal᷊ukadẹ̌ bal᷊en datu e su piněnahungkutangʼi Yusup.

⁴Diọ l᷊ai piạ kararěngụ e i rẹ̌dua e su ral᷊ungu tahungkụ ene, mal᷊aaresẹ̌, kụ těmbonangu měndal᷊ukadẹ̌ bal᷊en datu e nẹ̌ngoro si Yusup apẹ̌tẹ̌tangkiang si sire.

⁵Piạ sěhěbi těmbonangu měmamingihẹ̌ inumang dingangu těmbonangu mẹ̌kakoạ simokol᷊ẹ̌ e sěngkatau-sěngkatau e kai nipi. Kụ mangal᷊eng ipin dẹ̌dua e wal᷊inewe mẹ̌sul᷊ung.

⁶Piạ i Yusup diměnta su anun dědua sěngkariọěllone mal᷊ukadẹ̌ e, i rẹ̌dua e kakěllaěng měngkai lụlahunsusa.

⁷Bọu e i sie nakiwal᷊o, ”Kawe unụe i rua měngkate apa masusa naung i rua su sahěllo ini?”

⁸Sasimbang i rẹ̌dua e, ”Mẹ̌kalaeng ini e, i kandua nipi, kụ tawẹ u sarang sěngkatau e nakapitua mangal᷊ene.” Angkuěng i Yusup, ”Kětạembeng Duata makakariadin taumata makapitua mangal᷊eng ipi. Kụ kěnangko pẹ̌běkeng ipin dua ene.”

⁹Měmamingihẹ̌ inumange nẹ̌bera u, ”Su ipiku tangu iạ kai nakasilo piạ kalung anggorẹ̌ su těngoku.

¹⁰Kalu ene nělelang tatěllu. Buhụewe lai lelange lẹ̌hětikang u raunge, ene manga wurạ e měngkatewe masahawụ němpaměsị, mase wuane něngkasasạ.

¹¹Su tempo ene iạ e kai měngẹ̌ngumpaedẹ̌ galasẹ̌ panganginungangu ratu, kụ iạ měngkai mangal᷊ạ buang anggorẹ̌ ene kụ takụ nipěhụ su ral᷊ungu galasẹ̌ u ratu, wọu ene takụ nisiliwirẹ̌ si sie.”

¹²I Yusup nẹ̌bera, ”Ini e pituane: Lelange tatěllu e mangal᷊ene těllu ěllo.

¹³Su ral᷊ungu těllu ěllo ini e datu sarung měliwirʼi kau, i sie sarung mẹ̌gěllị u ampung si kau ringangu manul᷊eng kau su diabatangu e kal᷊imona. I kau e sarung ipěniliwirẹ̌ u galasẹ̌ u panganginumang su ratu e kere nạung kal᷊imona.

¹⁴Kaiso pẹ̌tahěndung bue si siạ kereu kakakoạu e seng mapia. Tul᷊ungko habarẹ̌ kakakoạku su ratu e tadeạu iạ iapasěbang bọu tahungkụ ini.

¹⁵Batụu tumuhụ hinone nạung kal᷊imona iạ e kai nitako wọu wanuan tau Ibrani, kụ sini su Misirẹ̌ ini e iạ mal᷊ain tawe nẹ̌kẹ̌koạ dal᷊akisẹ̌ kụ hinong sarung isuẹ̌ su ral᷊ungu tahungkụ.”

¹⁶Sarangke mẹ̌kakoạ borotẹ̌ e nasingkạ u mangal᷊eng iping měmamingihẹ̌ inumange kawe mapia wue, ute i sie mal᷊aing mẹ̌bera si Yusup, ”Iạ e mal᷊aing nipi u, iạ e kai měnẹ̌nuěng pangisangu borotẹ̌ těllum baụ su wowon těmbọ mědẹ̌dal᷊ensung.

¹⁷Su ral᷊ungu pangisang karangetange piạ haghing kukisẹ̌ baugu ratu, kutẹu kai nirěntaěng u manụ u winalangeng kụ němpẹ̌nemọ kal᷊awọu kukisẹ̌ ene.”

¹⁸Sasimbang i Yusup, ”Kai ini pituang ipi ene: Pangisang tatěllu e mangal᷊ene ute kai ěllo tatěllu.

¹⁹Su ral᷊ungu těllu ěllo ini e datu sarung dumolohu taumata ipěmotọ těmbọ u e kụ bọu ene ipěmiting u bal᷊unangu wadangu su kalu papasị sěmbua, kụ manga manụ u winalangenge sarung měmpěnemọ gěsinu e.”

²⁰Těllu ěllo samuring ene e ute kai ěllong kal᷊aiwantelu ratu, kụ i sie tangu kai mamangung sal᷊iwang masaria waugu kěbị mělahal᷊ẹ̌ e. I sie něngoro tadeạu měmamingihẹ̌ inumang dingangu mẹ̌kakoạ borotẹ̌ apasěbang bọu tahungkụ kụ iapẹ̌těngong kal᷊awọu mělahal᷊ẹ̌ u istana.

²¹Mẹ̌sasiliwirẹ̌ u inumang seng saụ nisul᷊e kapia su diabatange kal᷊imona.

²²Arawe mẹ̌tatangkiang borotẹ̌ e kawe nihukungu papate. Kěbị ene nariadi e natuhụ e kere pinẹ̌berang Yusup.

²³Arawe mẹ̌sasiliwirẹ̌ inumange semben tawe nakatahěndung lai i Yusup. I sie měngkatewe seng tawe nakatahěndu-hěndung si sie.