Read Sangir PĚNDARIADI 43 Bible Online

PĚNDARIADI 43 - Sangir bible

PĚNDARIADI 43

¹Karal᷊unusẹ̌ su Kanaan mangken nanědụ, kụ sarạeng gandung nial᷊ạ i sire wọu Misirẹ̌ e sen nasuẹ e, tangu i Yakub nẹ̌berạe su manga anạ u, ”Dakọko saụ tamai sol᷊ong pai ene kụ pamělliko gandung baugʼi kitẹ.”

³Mase i Yehuda e nẹ̌bera si sie, ”Guběrnurẹ̌ u Misirẹ̌ seng něngonggọu tatal᷊umbaghẹ masěgadẹ̌ u i kami e tawe wotonge mẹ̌těngon sie, kereu i kami e tawe mẹ̌bawa tuaring kami ene.

⁴Kereu i Amang i kami e mapakawalan tuaring kami ene apatol᷊e, u i kami e kai mapulu tamai mamělli kaěng.

⁵Kai kereu tawe mapakawalan Benyamin tumol᷊e, tangu i kami e tawe tamai, batụu guběrnurẹ̌ e kai seng nẹ̌bera u i kami e tawe wotonge mẹ̌těngo kereu tuaring kami e tawe tumol᷊e.”

⁶Angkuěng i Yakub, ”Kawe unụe i kamene napakasusang iạ e kụ měhabarẹ̌ su tau ene u i kamene kai wědang piạ tuaring kamene?”

⁷Angkuěng i sire, ”Tau ene měngkate hanesẹ̌ makịbal᷊ong kami ringangu mạanụeweng anạ u sěmbaụ i kami e, angkuěng e, ’Bědang biahẹ̌ tangu i amang i kamene? Delaim piạ tuaring kamene esẹ bal᷊ine?’ I kami e katewe nasihasa simimbahẹ̌ kal᷊awọu apạeweng kakiwal᷊one. Kụ kereapa wue i kami e makatikạ u i sie sarung dumolohʼi kami e apẹ̌bawa tuaring kami ene?”

⁸Bọu e angkuěng i Yehuda si amange, ”Dariọ e walạ e apatanaẹ dingangku, hědọeng iạ mangaku makoạ papal᷊ese waugʼi sie. I kami e hědọ e lighạ mẹ̌bawal᷊ikěkasẹ̌ mẹ̌buạ, tadeạu kumbahangbe piạ u sarang sěngkatau wọu i kami e mateng karal᷊unusẹ̌.

⁹Seng iạ e makoạ papal᷊ese, ringangu i Amangku e hědọe pẹ̌deạ si siạ. Kereu i sie tawe takụ ipakisul᷊e ringangu maambang, ute hědọeng iạ měnal᷊udẹ̌ hukumange kanandụewen biahẹ̌ku e.

¹⁰Kai manga i kitẹ tawe měngampal᷊ẹ̌ kerene karěngụ e, nal᷊ahẹu kere ini i kami e sen duan sul᷊e nẹ̌kakuwal᷊ị.”

¹¹Bọu e i amang i sire nẹ̌bera, ”Kereu mambeng hinong kerene, ute wawako kapapiaěngu ghěsim banua ini e su ral᷊ungu karong i kamene kere gaghěllị baugu guběrnurẹ̌ ene: Kere manga kismisẹ̌, gul᷊a madu, dampa, buang kamiri, buang lěhi.

¹²Pẹ̌bawako lai roitẹ̌ manga ruan sul᷊e kakěpal᷊e, batụu roitẹ̌ kụ kaěbakeng i kamene su ral᷊ungu karong i kamene e harusẹ̌be sul᷊eng kamene. U aramanung kai nẹ̌sal᷊a taho.

¹³Kụ bawạ e tuarinu ene, kụ lighạbe ěndaị pẹ̌sul᷊e.

¹⁴Mal᷊owọko Mawu Kasěllaheng e mẹ̌karadiahang su naung u guběrnurẹ̌ ene kụ kumoho u tatal᷊ěntụ e si kamene, sarang i sie mapulu manul᷊em Benyamin dẹ̌duang Simeon si kamene. Arawe mạanung iạ ini ute, kereu iạ mambeng hinong ikatạdiseng manga anạku e, ute koatengbe kereapa.”

¹⁵Bọu ene manga anạ u sěmbaụ i Yusup němpẹ̌bawạ e manga ghagěllị ene, dingangu roitẹ̌ duan sul᷊e kal᷊awọe, mase wọu ene nakoạ sol᷊ong Misirẹ̌ dingangu tuarin sire i Benyamin. Nahumpạ e paị sene, i sire nẹ̌těngọen Yusup.

¹⁶Ene i Yusup nakasilọ e si Benyamin dingangu manga tuhange, nẹ̌berạe i sie su mẹ̌tatangkiange kụ masasingkạ u ral᷊ohon bal᷊ene, ”Paringangko i sire ini sol᷊om bal᷊eku. I sire kai kumaěng sěngkakaěng dingangku ěllo rangẹ, kụ pěmotọko sěmbaụ bọu binatang ene kụ sadiako ene.”

¹⁷Ěllang ene e timuhụ e parenta ene kụ němaringangke manga tuhang i Yusup sol᷊ong dal᷊ungu wal᷊eng guběrnurẹ̌.

¹⁸Ene piạ e i sire niwawa sol᷊ong dal᷊ungu wal᷊eng Yusup, i sire něngkatakụ e kụ mẹ̌tẹ̌tiněnna, ”I kitẹ e niwawa sol᷊ong ini, ual᷊ingu roitẹ̌ kụ seng nikaẹ̌bakeng i kitẹ e su ral᷊ungu karong i kitẹ su raramahing kitẹ e. I sire sarung sěngkianu měnamẹ si kitẹ mase měngaho kalideng kitẹ e kai i kitẹ e koateng ěllang i sire.”

¹⁹Ual᷊ingu ene, su rěduhu tukadu wal᷊eng Yusup, i sire němpẹ̌bera su sadaham bal᷊en Yusup,

²⁰”Ampunge wue Tuang, i kami e kai sem bọu naramahi sol᷊ong ini e namělli laidopẹ̌.

²¹Piạ i kami e kạdal᷊enge mapul᷊ẹ, kụ měnaungke kahěbiang, ute i kami e namukạ e karong i kami e. Kutẹu sěngkakakěllane kal᷊awọewen doitʼi kami wawělli gandung e ene su wowone. I kami e wěga wue měnsang i sai nẹ̌tahon doitẹ̌ ene. Kụ ini e sen niwawang kami e kapia su anun Tuang sul᷊iung ene tangu, i kami e wědang lai nẹ̌bawa roitẹ̌ kụ mal᷊aing ipẹ̌mělli laidopẹ̌.”

²³Ěllang ene e nẹ̌bera, ”Abe katakụ. Duatanu, kụ Duata e sẹ̌subaěng i amangu e, kụ seng i Sie e nẹ̌tahon doitẹ̌ ene e su ral᷊ungu karong i kamene. Iạ e sen dimaẹ bawaehẹ̌ gandung i kamene ene.” Bọu ene i Simon niparingange sol᷊ong anun sire.

²⁴Mase niahạ e i sire sol᷊ong dal᷊ungu wal᷊e. I sie něngonggọeng akẹ baugu ipěnguhasẹ̌ laedẹ̌, dingangu kaěng u kaliden sire.

²⁵Bọu ene i sire něndiahiko l᷊ai ghaghěllị baugʼi Yusup kereu i sie marěnta ěllo rangẹ, batụu i sire kai sen nihabareng u i sire lai sarung kumaěng sěngkakaěng dingange.

²⁶Piạ i Yusup nidatingkem bal᷊e, i sire němpẹ̌gěllịeng manga laonggọ ene si Yusup apidu nẹ̌suba si sie.

²⁷I Yusup nakiwal᷊ong kakakoạ i sire, kụ nẹ̌bera, ”I kamene sem bọu nẹ̌běkeng amang i kamene si siạ, u i amang i kamene kai sem maghurang. Kụ kereapạ e? Mapia wue ngae?”

²⁸Kụ angkuěng i sire, ”Ěllang i Tuang, kụ i amang i kami e, mapia wue.” Bọu ene i sire tangu nẹ̌suba si sie.

²⁹Ene i Yusup nakasilọ e si Benyamin tuarine, nẹ̌berạ e i sie, ”Kụ seng ini e katuariang i kamene e, nạung měngkate ipẹ̌paul᷊ị i kamene e si siạ e? Mal᷊umbạko Mawu Ruata e měngal᷊amatẹ̌ si kau anạku.”

³⁰Naung i Yusup měngkate nẹ̌papinunụ u kakěndagẹ̌ su tuarine. I sie sem maranin tawe makakědang u watangenge, kụ ual᷊ingu ene e i sie měngkatewe sěngkianu nangensọ bọu ěndaị ene kụ simuẹ̌ su ral᷊ungu kamarẹ̌ kụ bọu ene simangị.

³¹Masene wuhụewe něnděmusẹ̌ gatine, bọu ene saụ siměbang, kụ měngkatewe mětẹ̌tingkědang sěngapam botonge, kụ bọu ene něngorong paměllọ u kaěng.

³²I Yusup tangu kimaěng su medane sẹ̌sane, arawe manga tuhange ute su medawe wal᷊ine. Tau Misirẹ̌ apang ěndaị sene tangu nahungkaěng su meda lai wal᷊ine, watụ u i sire kai nakapěndang u tawe sěmbewe kereu kumaěng sěngkakaěng dingangu taumatang Ibrani e.

³³Manga tuhang i Yusup nipakaiang su meda mẹ̌tẹ̌těngon Yusup, tuhụewe umburʼu sěngkatau-sěngkatau e wọu kaiakanenge sarang katuariange. Ene i sire nakasilọ e kakakoạ u pal᷊ahungkaiang ene tangu, i sire mangkewen naral᷊ingu, kụ němpẹ̌papanda sěmbaụ dingangu wal᷊ine e.

³⁴I sire tangu makạẹ̌bạ kaěng kai wọu medang i Yusup, dẹ̌duam Benyamin kụ sẹ̌siliwirẹ̌kang liman sul᷊e limembong kal᷊awọe wọu kaẹngu manga tuhange. Tangú němpẹ̌kaěngke ringangu němpanginungke i sire ringangʼi Yusup sarangkewe něngkasahe.