Read Sangir PĚNDARIADI 44 Bible Online

PĚNDARIADI 44 - Sangir bible

PĚNDARIADI 44

¹Bọuten i Yusup nangoro su sadaham bal᷊ene angkuěng, ”Tahoiko karong i sire ene ringangu gandung, kal᷊awọeweng ikaumal᷊i sire, mase tahoko roitʼi sire sěngkatau-sěngkatau su karong i sire e su wowong gandung ene.

²Tahoko l᷊ai lainumangku sal᷊aka su ral᷊ungu karongu tuarin sire kahembokange, kụ taho sěngkataho ringangu roitʼi sire bawaehẹ̌ gandung.” Ěllang ene timuhụ parenta ene.

³Sěngkariọěllone mal᷊uka-l᷊ukadẹ̌, i Yusup nẹ̌tal᷊ei ringangu manga tuhange, kụ němpẹ̌buạ e ringangkeweng kaliden sire.

⁴Kutẹu rem bědang tawe nạdau wọu soa ene e, piạ e i Yusup nẹ̌bera su sadaham bal᷊ene, ”Lighạko sahusue i sire tamai kụ mạeng seng kinarahiuang ute, pẹ̌berako si sire u, ’Kawe unụe i kamene měmal᷊isẹ̌ kapia e ringangu karal᷊aị ěng?

⁵Kawe unụ e i kamene nẹ̌tako bokori tuangku sal᷊aka?[95] Bokorẹ̌ ene kai nikoạ e pěnganginumange ringangu kai nakoạ apal᷊iwụ ipěmatehẹ̌. I kamene kai sen nẹ̌koạ pẹ̌sasal᷊a gẹ̌guwạ!’ ”

⁶Piạ e ěllang ene nahumpạ u anung manga tuhang i Yusup, i sie naul᷊ịeweng apan niorong Yusup.

⁷Angkuěngkewen sire si sie, ”Kai apạe ngae timonan tuang ho? I kami e mẹ̌salu u i kami e tawe nẹ̌koạ kerene!

⁸I Tuang hala masingkạ u roitẹ̌ kinahombangeng i kami e su ral᷊ungu karong i kami su wowong gandung ene, seng nisul᷊eng kami kapia si Tuang, kụ mamben tawe mariadi i kami e mẹ̌tako sal᷊aka arau wul᷊aeng bọu wal᷊eng guběrnurẹ̌ e!

⁹Tuang, kai mangạewe apal᷊iwụ ene kaẹ̌bakeng su sěngkatau wọu tal᷊oarang kami e, ute walạe i sie pakihukung u papate, mase i kami wal᷊ine e makoạ e ěllang i Tuang kěbị.”

¹⁰Ěllang ene nẹ̌bera, ”Ho makoạ kere; kai kětạeweng kamageng piạ u kaěbakeng si sie piạ lainumang ene ute, seng makoạ ěllangku; kụ apạewem bal᷊ine ute sem botonge měngkapul᷊ẹ.”

¹¹Kụ bọu ene sěngkatau-sěngkatau e měngkate nasịilasẹ̌ dingangu nasịbukang karonge.

¹²Ěllang i Yusup tangu něnahěside manga karong ene pinakiwuka nanětạ bọu anung kaiakanenge sarang anung katuariange, kụ sěngkakakěllane lainumang ene kawe su ral᷊ungu karong i Benyamin.

¹³Manga tuhange měngkawe apạe masusa naung i sire, hakịu i sire měmpananingkasẹ̌ pakeang i sire. I sire měngkai nasịduị karong i sire su wowong onta mase němpẹ̌sul᷊e sol᷊ong soa e.

¹⁴Piạ i Yehuda ringangu manga tuhange nahumpạ su wal᷊eng Yusup, i sie wědang ene sene, kụ i sire němpẹ̌tumpěkuhẹ̌ su těngone.

¹⁵Tangu nẹ̌berạ e i Yusup, ”Kai apạe nikoạ i kamene ene? Kai wěga i kamene u taumata kere iạ ini e kai makạkasingkạ u kakanoạ i kamene ral᷊akisẹ̌ e ringangu masingkạ mẹ̌patehe tangu?”

¹⁶”Kai mẹ̌berạeng apa i kami e su mawum batangeng?” angkuěng i Yehuda. ”Kai makakarendehẹ̌ kereapa ringangu makatondan tul᷊idʼi kami kereapa tangu? Mawu Ruata e sen naněbal᷊u pẹ̌sasal᷊ang kami. Orasẹ̌ ini e i kami kěbị kai ěllangʼi tuang, kụ bal᷊inewe tumbạu i sie kụ piạ lainumang kinaěbakeng si sie.”

¹⁷Angkuěng i Yusup, ”Tala! Iạ e tawe mapulu mẹ̌koạ kerene! Kětạeweng i saim piạ lainumang kinaěbakeng si sie ene sarung makoạ ěllangku. Arawe apam bal᷊ine e wotonge měngkapul᷊ẹ sol᷊ong anung amang i kamene tạ sungkal᷊ene apa.”

¹⁸I Yehuda himaungke si Yusup kụ nẹ̌bera, ”Kereu wotonge, mawum batangeng, ěllangu e apẹ̌berangkong sěngkamohong su mawum batangeng. Kụ den tawe lumangehẹ̌ su ěllangu; mawum batangeng kai mẹ̌sul᷊ungu ratum Misirẹ̌ e hala.

¹⁹Mawum batangeng e kai seng nakiwal᷊o si kami ini, ’I kamene rem piạ i amang i kamene arau anạ u sěmbaụ bal᷊ine tangu?’

²⁰I kami simimbang, ’I Amang i kami e kai sem maghurang, dingangu tuaring kami niwantelẹ̌ su tempong i amang i kami e seng maghurang. Tuhang kụ tamba inang dingangu tuaring kami e kai sen nairị, kụ orasẹ̌ ini e seng kate i sie sẹ̌sane rem biahẹ̌ bọu i rẹ̌dua, kụ i amange měngkate mapia-pia si sie.’

²¹Mawum batangeng e rimolohʼi kami pinẹ̌bawa si sie ramahi, tadeạu mawum batangeng makakạsilo wue ene,

²²kụ bọu ene i kami simimbahẹ̌ u rariọ ene e tawe makakoạ mẹ̌tal᷊ei wọu anung amange; kereu i sie mẹ̌tal᷊eing amange, nal᷊ahẹu i amange kai mate.

²³Bọu ene mawum batangeng něhengetang, ’I kamene tawe wotonge saụ mẹ̌těngon iạ, kereu i kamene tawe mamaringang tuaring kamene ene.’

²⁴Su tempong i kami nẹ̌sul᷊e kapia su anung amang i kami, i kami e sen naul᷊ị u ene si amang i kami waweram mawum batangeng ene.

²⁵Bọu ene i amang i kami e rimolohʼi kami e niaparěnta kapia ramahi apěmělli laidopẹ̌.

²⁶I kami e simimbahẹ̌ u, ’I kami e tawe makatamai, batụu i kami e tawe makapẹ̌těngong guběrnurẹ̌ kereu tuaring kami kahembokange tawe patol᷊e. I kami makatamai wue kereu i sie tamai wue lai.’

²⁷Bọu ene i amang i kami e nẹ̌bera, ’I kamene masingkạ u i Rahel kawingku e kětạeng namantelu anạ esẹ darua.

²⁸Kaiakanenge tangu sen naněntangu iạ. Sen nal᷊ahẹ u i sie seng nitěmboěngu binatang dul᷊u, batụu sarang orasẹ̌ ini e iạ seng tawe makasasilo kapia.

²⁹Kereu i kamene kawe měngal᷊ạ anạku katuariange ini e wọu anuku, kụ piạ u kereapa tangu, susa naung kinoạ i kamene si siạ e pakapiawe makapate si siạ, u iạ e kai sem maghurang.’ ”

³⁰”Ual᷊ingu ene, Mawum batangeng,” angkuěng i Yehuda si Yusup, ”kereu ěllange mẹ̌sul᷊e su anung amang i kami e tawẹ tuaring kami ene tangu, nal᷊ahẹ u i amang i kami e sarung mapinsul᷊ẹ̌ singongone. Niawane kawe mạl᷊aunsarehẹ̌ su rariọ ene, kutẹu i sie lai seng enẹ e kaghurange, hakịu susa naung kụ seng kinoạ i kami si sie e kawe makapate si sie.

³²Tapengu l᷊ai, ěllangu e sen nẹ̌kedo si amangku, u ěllangu e makoạ dal᷊uangu rariọ ene. Iạ e nẹ̌bera si sie, u kamageng iạ tawe mẹ̌bawa kapia rariọ ene si sie, ute iạ ini e sarung makoạ měnanal᷊udẹ̌ hukumangu kanandum pẹ̌bawihẹ̌.

³³Kụ kereu karorongang ute, iạ e mẹ̌tanạ sini makoạ ěllang u mawum batangeng mangal᷊uang tuaring kami ini e; kụ balạe i sie apakapul᷊ẹ dingangu manga tuhange.

³⁴U iạ kawe makapẹ̌sul᷊e kereapa sol᷊ong anung amang i kami e, kereu rariọ e tawẹ dịe ringangku? Iạ e tawe makakědang makasilo susa naung kụ sarung humombang si amang i kami e.”