Read Sangir PĚNDARIADI 47 Bible Online

PĚNDARIADI 47 - Sangir bible

PĚNDARIADI 47

¹Bọu ene i Yusup němaringang u limang katau wọu manga tuhange kụ mẹ̌těngon datu. Angkuěnge, ”I amangku ringangu manga tuhangku seng němpẹ̌děnta wọu Kanaan dingangu manga ghapaěngu kambing domba, sapi ringangu kal᷊awọu tataghuaneng i sire. Ini e i sire seng su wanuang Gosyen.” Mase nitodẹ e manga tuhange su ratu.

³Datu e nakiwal᷊o si sire, ”Kai apa munarang kamene?” I sire simimbang, ”I kami ini e kai měndal᷊ukadẹ̌ domba kerẹewe manga i upung i kami e.

⁴I kami e riměnta waugu mẹ̌tanạ su wanua ini, ual᷊ingu su ěntanang Kanaan kai piạ karal᷊unusẹ̌ masaria, hakịewen seng tawẹ lai rěmpugẹ̌ baugu ghapaěngu kambing dingangu manga dombang kami. Kụ dorongang kereu wotonge i kami e reng matanạ su wanuang Gosyen.”

⁵Mase ratu e něhengetangke si Yusup, ”Ini e i amangu ringangu manga tuhangu e sembeng ene sini.

⁶Koạ e wanuang Misirẹ̌ kere wanuanu e hala. Balạ e kere i sire apẹ̌banua su wanuang Gosyen, banua e kal᷊ěnggihange sini e. Ringangu pẹ̌parentako su taumata apam pelesa měhal᷊ẹ̌ kụ apẹ̌tangkiang kal᷊awọu manga binatangku.”

⁷I Yusup tangu mal᷊aing napatodẹ i amange su ratu. I Yakub tangu něngal᷊amatẹ̌ datu e.

⁸Kụ datu e nakiwal᷊o si sie, ”Kai pira umburi amang?”

⁹I Yakub simimbang, ”Ěllangu sen nẹ̌biahẹ̌ karẹ̌ngụ u mahasụ těllum pul᷊o su taunge nakoạ mẹ̌papalilị. Pẹ̌bawiahu ěllang e napenẹ u sigěsạ dingangu mal᷊ighạ kereu iwanding su umburu manga i upungu ěllang nạung mẹ̌papalilị.”

¹⁰Nal᷊iu wọu ene tangu i Yakub nẹ̌katạ dingangu něgěllị u al᷊amatẹ̌ su pẹ̌tatal᷊ei ringange.

¹¹I Yusup měnẹ̌nongkạ si amange ringangu manga tuhange kụ seng nẹ̌banua su Misirẹ̌ e. I sire nighěllirangkeng ěntana kere tataghuaneng i sire e su sěmpalang kal᷊ěnggihange su wanua ene, marěduhu soang Rameses, natuhụ kere su parentan datu.

¹²Kụ i Yusup nanukụ diahing laidopẹ̌ baugʼi amange, tuhange, manga anạ u sengkataune sarạeweng kangudakenge.

¹³Karal᷊unusẹ̌ e enẹ e nanuosẹ̌, hakịu suapang tampạ e man seng tawẹ kadiongeng kẹ̌kaěbakeng kaěng. Kawanuang Misirẹ̌ e ringangu kawanuang Kanaan němpẹ̌lome ringangu seng tawe makakoạ apa kahiang lunusẹ̌ e.

¹⁴Sěntiniạ balạewe i sire měmpamělli gandung, i Yusup něnampungke roitẹ̌ bawělli gandung ene, bọu ene niresọ e su wal᷊en datu.

¹⁵Ene nasuẹ e roitẹ̌ su Misirẹ̌ dingangu su Kanaan, tau Misirẹ̌ e riměntạ e su anun Yusup kụ nẹ̌bera, ”Tul᷊ungko ghělireng kaěng i kami e! Abe pakapate i kami e. Doitʼi kami e kai sen nasue.”

¹⁶I Yusup simimbang, ”Kamagengu roitʼu e sen nasue, ute pěmpangonggọ e binatang i kamene; kụ hědọeng měngonggọ u kaěng si kamene.”

¹⁷Bọu ene i sire něngonggọ e binatang kụ i sie něngonggọeng kaěng i sire pinanal᷊iuẹwe kawal᷊o, domba, kambing, sapi ringangu kaliden sire. Su taung ene, i Yusup něngonggọ u kaěng si sire dingangu i sire němpěmaehẹ̌ dingangu binatang.

¹⁸Su taung tuhụ e i sire saụ diměnta kapia su anune kụ nẹ̌bera, ”I kami e měngkate seng maul᷊ị pakatualagẹ̌ si Tuang, u roitʼi kami e kai seng nasue ringangu binatang i kami e kai seng nakoạ tataghuaneng i Tuang. I kami seng tawẹ apa-apa kụ hinong ikaonggọ i kami e si Tuang sul᷊ium batangeng i kami hala e ringangu ěntanang kami.

¹⁹Abe wala pakapate i kami e! Abe wala kal᷊awọu rahaming kami e pakal᷊inggi. Běllị e i kami ringangu ěntanang kami kụ baehẹeng gandung. Balạ e i kami ringangu ěntanang kami e makoạ tataghuaneng u ratu. Gěllirẹeng gandung i kami e mědeạu ipaněmpụ pěbawiahʼi kami e ringangu mangạe wine mědeạu sawuhang su rahaming kami e!”

²⁰Bọu e i Yusup naměllị e kal᷊awọu ěntana su Misirẹ̌ e waugu ratu. Apạeweng tau Misirẹ̌ e katewe mạsihasa měmpẹ̌bal᷊ụ u ěntanan sire, ual᷊ingkewen tempong karal᷊unusẹ̌ e enẹewe něnuosẹ̌, kụ kal᷊awọu ěntana su Misirẹ̌ e nakoạ tataghuaneng u ratu.

²¹Kal᷊awọu taumata kawanuang Misirẹ̌ e nikoạ e ěllang kahiang Yusup.

²²Tumbạeweng ěntana sěmbaụ tudẹ kụ tawe nịbawělliange ute ěntanang manga imang. I sire ta wahal᷊uasu měmpẹ̌bal᷊ụ ěntanan sire ual᷊ingu kawe lẹ̌onggotangu wiratu tatapẹ̌ kahian datu e waugu pẹ̌bawiahʼi sire.

²³I Yusup nẹ̌bera su kawanuan ene, ”Kakěllạ e, i kamene ringangu ěntanang kamene e sen takụ niwělliang baugu ratu. Kụ seng ini e wine kụ sarung ikasawuhʼi kamene su rahaming kamene.

²⁴Su tempọeng pěmaměnsạ e, i kamene hinong mẹ̌gěllịu sěngkal᷊imam bahageange waugu ratu. Lembone tangu wotonge wue koateng i kamene wine arau kaěng i kamene ringangu waugu ral᷊ohong bal᷊eng kamene.”

²⁵Angkuěng i sire, ”I Tuang seng něngambang si kami, kụ i kami e makitarimakasẹ. I kami e sadia makoạ ěllangu ratu.”

²⁶Bọu ene i Yusup napakariading hal᷊ẹ̌ ene tiaham banuam Misirẹ̌ e, kụ sěngkal᷊imam bahageange wọu ghẹ̌sing pěmaměnsạ e ute hinong makoạ bahageangu ratu. Kụ sarang orasẹ̌ ini e lulu ene man těbe kẹ̌koateng. Kětạeweng ěntanang manga imang e tawe ikakoạ tataghuaneng u ratu.

²⁷Kerene kakakoạ u tau Israel kụ nẹ̌banua su Misirẹ̌ e su ěntanang Gosyen. I sire něngkakalạ, dingangu něhanạ nẹpulung mal᷊awọ sene.

²⁸I Yakub deng nẹ̌biahẹ̌ mapul᷊o pitu su taunge su Misirẹ̌ sarang umbure nakoạ mahasụ ěpạ pul᷊o pitu su taunge.

²⁹ Ene seng maraning tempone mairị, nikuiange i Yusup anạ e ene, kụ nẹ̌bera si sie, ”Limanu e pěllọko su wěllạu pungu palangku mase pẹ̌salu u i kau tawe sarung mělěbingu iạ su Misirẹ̌ ini.[96]

³⁰Iạ kai mapulu ilěbing su tampạ u manga i upungku, kụ bawa wue wal᷊unangu wadangku e bọu wanua ini kụ lěbing su ral᷊ungu pěndal᷊ebingang i sire.” Kụ bọu ene i Yusup simimbang, ”Iạ e sarung měkoạ apang kụ niwerang Amangku e.”

³¹Angkuěng i Yakub, ”Pẹ̌salụ e u i kau e sarungbe měndal᷊engu ene.” I Yusup nẹ̌salu, ringangu i Yakub nakitarimakasẹ su raral᷊okaěnge.