Read Sangir PĚNDARIADI 49 Bible Online

PĚNDARIADI 49 - Sangir bible

PĚNDARIADI 49

¹Ene i Yakub nakireạu manga anạ e kụ nẹ̌bera, ”Pẹ̌komol᷊ẹ̌ko sini su rěduhẹ̌ku. Sarung takụ ihabarẹ̌ si kamene apan sarung kahombangeng i kamene su ěllo samuri:

²Pěmpẹ̌komol᷊ẹ̌ko e manga anạ i Yakub, pěmpẹ̌daringihẹ̌ko si Israel, i amang i kamene.

³I Ruben anạ e kaiakanenge, seng i kau e katatoghasẹ̌ku, wuan saghedẹ̌ku kahumotongange. I kau e kal᷊ěnggihange ringangu katoghasenge wọu tal᷊oarang kěbị anạku.

⁴I kau e mal᷊ighạ mẹ̌golang kere akẹ, hakịu wal᷊inewe lai kahumotongange; batụu i kau e nẹ̌tikị dingangu kapapuěngku, i kau e napakaturạ u ral᷊okaěng i amangu e.

⁵I Simeon dingangu i Lewi tamahuari e, aghidʼi sire ute kai aghidu tatingkaị.

⁶Iạ tawe mitụ su pẹ̌dararụdaton sire, dingangu l᷊ai su ral᷊ungu pẹ̌kakomol᷊i sire e. Batụu i sire kai mamate ringangu abul᷊in sire, ringangu mapakaěnsum banteng baugu makapia ihạ.

⁷Kakutu sural᷊angehʼi rẹ̌dua e kahiang katědụ e. Kakutu su ětohi rẹ̌dua kahian tingkaị e. Iạ e sarung mapẹ̌sal᷊iawuhi sire su kasěllahu Israel. Iạ e sarung mapakasal᷊iawuhʼi sire sutal᷊oarang kěbị umatẹ̌.

⁸I Yehuda, i kau e sarung maněngal᷊ẹ̌ pol᷊ohu rokạ u; manga tuhangu e sarung mẹ̌dalo si kau ringangu mẹ̌suba su tẹ̌ngonu.

⁹ I Yehuda e mẹ̌sul᷊ungu singa kawuhuang; i sie měmate kinaěnge mase mẹ̌sul᷊e su rěmunge; i sie nẹ̌těngkahatedẹ̌ bọu e rimal᷊oka, kụ tawẹu sarang sěngkatau wahani mělangehẹ̌ si sie.

¹⁰I Yehuda sarung mangumbelẹ e těkingu kararatuang, hitene sarung mẹ̌parenta sarang marěngụ-děngụ. Manga wansa e sarung měmpẹ̌bawa ghaghěllị[98] baugu ratu mase mẹ̌tumpẹ̌kuhẹ̌ kụ mẹ̌suba su těngone.

¹¹Pěgol᷊u kalidene ikitange su kalu, kalụeng anggorẹ̌ kal᷊enggihange. I sie měngunsạ pakeange ringangu akẹ u anggorẹ̌ mahamụ mal᷊undaha.

¹²Kahamụ u matane e kere nanginung anggorẹ̌, kawirang isine kai ual᷊ingu manginung susu.[99]

¹³I Zebulon sarung mẹ̌banua su wiwihu apeng; manga kapal᷊ẹ̌ sarung měmpẹ̌mal᷊ango su ligharenge; sarangkewe pẹ̌saraěnge su Sidon.

¹⁴Isakarẹ̌ e kai tabidạu kalide matoghasẹ̌ rụdal᷊oka su wěllạ u tatahoěngu wawawaěnge.

¹⁵Nikasilone kai apạe mal᷊ěnggihẹ̌ tampạ ene ringangu kaholẹ e wanuane, kụ i sie měngkatewe namengehẹ̌ běmbange mědeạu pakilěngkanengu wawawaěng, dingangu nisihasa pělẹ̌hal᷊ẹ̌ kere ěllang.

¹⁶I kau Dan, sarung měhukungu kawanuanu, i kau makoạ kawanua, kere kawanua wal᷊ine su Israel.

¹⁷I kau e kere těmpu su wiwihu ral᷊eng, těmpu mawawisa su wiwihu ral᷊eng darodọ, kụ měngẹ̌ngiki kal᷊entọ u kawal᷊o sarang mẹ̌kẹ̌kal᷊imbahung sumasakene.

¹⁸MAWU Kasěllahenge, kasasal᷊amatẹ̌ ighẹ̌gěllị u e, kai ene takụ lẹ̌ampal᷊eng.

¹⁹Gad, i kau e sarung sahẹ̌sekangu mẹ̌sasekẹ, kaiso i kau mawal᷊ị mẹ̌nahěsẹ si sire.

²⁰Asyer, kaěngu e mẹ̌dal᷊embong kal᷊ěnggihe, i kau e sarung měnadiang simokol᷊u manga ratu.

²¹I Naftali e tabidạu rusa nakapěllọ, apạe masasadadạ manga anạ e.[100]

²²I Yusupẹ̌ e tabidạu kalide kawuhuang, kalide maghaěng su rěduhu simbul᷊u akẹ, mẹ̌tẹ̌tatal᷊ang su manga wěntihe.[101]

²³Manga sekẹ měmpěngalo marasai, měmpěnahusu ringangu naěnakeng dingangu horom papitị.

²⁴Kai arawe i Yusup man těbe matoghasẹ̌ takiahe,[102] papitị e matětogẹ̌, ual᷊ingu kawasang Měndal᷊ukadẹ̌ Kasěllahenge, Duatang Yakub, Mananěntanudẹ̌ Israel.

²⁵Duatang amangu e mẹ̌tul᷊ung i kau; Kawasang patikụ e měngal᷊amatẹ̌ si kau, dingangu tahiti wọu langị ore lai akẹ bọu al᷊ungu ěntana. Ringangu anạ, dingangu sapi,

²⁶gandung dingangu bungang.[103] Barakatin Duatang amangu mạmal᷊iu kal᷊awọu kakalạu manga wul᷊ude kụ tumanịu marěngụ ene.[104] Mal᷊owọko kal᷊awọu al᷊amatẹ̌ ene e matěntung su wowom těmbọ i Yusup su wowon děhụ e. Seng i sie ene nangělembong kapiaěnge wọu tal᷊oarang manga anạ u sěmbaụ e.

²⁷I Benyamin tangu kai ral᷊ugẹ̌ marangěngisẹ̌. Kamal᷊ukarenge i sie mẹ̌němbo kinaěnge. Su tempong hěbi e i sie mạmahiạ kinaěnge kụ naal᷊ạ si sie.”

²⁸Kụ ene kěbị e tangu hěntọeng Israel mapul᷊o dua e kụ apạeweng bawera kụ pinẹ̌berang amang i sire piạ e mẹ̌kẹ̌katạ i sire e sěngkatau-sěngkatau.

²⁹ Bọu ene i Yakub timanata su manga anạ e, ”Sen tawe kararěnane lai iạ maněntangu wowon dunia ini kere manga i upungku. Kụ lẹ̌bingkong kamene iạ e surěduhʼi sire su ral᷊ungu liang su Makhpela, sěmběkang daki wọu Mamre su ěntanang Kanaan. I Abraham kai sen němělli liang ene ringangu winal᷊aeng mạngělikụ e bọʼi Efron tau Het tadeạu koateng pěndal᷊ěbingang.

³¹ Su tampạ ene i Abraham dẹ̌duan Sara, i Ishak dingangu i Ribka; kụ mal᷊aing sene iạ měnampạ i Lea.

³²Binal᷊aeng dingangu liang sene kai sen niwělliang bọu tau Het. Lẹ̌bingke iạ sene.”

³³ Ene i Yakub e nasuẹen tatanatane su manga anạ e tangú, rimal᷊okạ e i sie kụ bọu ene naminsul᷊ẹ̌ singongone.