Read Sangir PĚNDARIADI 5 Bible Online

PĚNDARIADI 5 - Sangir bible

PĚNDARIADI 5

¹ Ini e kai rolẹ̌ u hiten Adam. [Su tempon Ruata e něndiadi taumata, nikoạ e i sire kere Ruata sẹ̌sane.

² KinoạʼE i sire esẹ dingangu wawine. Nial᷊amatengʼE i sire mase nisěbạʼE i sire, ”Taumata”.]

³Ene i Adam e natimụ e umure 130 su taunge, i sie nakareạ e anạ e esẹ měpẹ̌pul᷊awẹ i sie, kụ nisẹ̌bạe si Set.

⁴Wọu ene i Adam deng nẹ̌biahẹ̌ 800 su taunge kạpia kụ nakaěbạe manga anạ e wal᷊ine.

⁵I sie nairị nẹ̌kětạu umure 930 su taunge.

⁶Su tempong i Set umure 105 su taunge, i sie nakaěbạ anạ e esẹ arenge i Enos.

⁷Bọu ene i Set deng něbiahẹ̌ 807 su taunge kapia kụ deng nakaěbạ manga anạ e lai wal᷊ine.

⁸I sie nate, umure 912 su taunge.

⁹Su tempong i Enos nahětibẹ̌ 90 su taunge, i sie nakaěbạ anạ e esẹ isẹ̌sěbạ si Kenan.

¹⁰Bọu ene i Enos deng nẹ̌biahẹ̌ 815 su taunge kapia kụ deng nakaěbạ anạ e lai wal᷊ine.

¹¹I sie nate natimu 905 su taunge.

¹²Su tempong i Kenan natimu 70 su taunge, i sie nakaěbạ anạ e esẹ, arenge i Mahalaleel.

¹³I Kenan seng nẹ̌biahẹ̌ 840 su taunge lai kụ deng nakareạ manga anạ e wal᷊ine.

¹⁴I sie nate umure 910 su taunge.

¹⁵Su tempong i Mahalaleel 65 su taunge umure, i sie nakaěbạ anạ e esẹ arenge i Yared.

¹⁶Bọu ene i Mahalaleel relaing nẹ̌biahẹ̌ 830 su taunge kapia kụ nakareạ manga anạ e lai wal᷊ine.

¹⁷I sie nate umure 895 su taunge.

¹⁸Su tempong i Yared natimu 162 su taunge, i sie nakaěbạ anạ e esẹ, arenge i Henokh.

¹⁹Bọu ene i Yared deng nẹ̌biahẹ̌ 800 su taunge lai kụ nakareạ manga anạ e lai wal᷊ine.

²⁰I sie nate, umure 962 su taunge.

²¹Su tempong i Henokh umure 65 su taunge, i sie nakaěbạ anạ e esẹ arenge i Metusalah.

²²Bọu ene i Henokh nẹ̌biahẹ̌ su ral᷊ungu kasasěmbaụ dingangu Mawu Ruata karěngụe 300 su taunge. I sie nakaěbạ manga anạ e lai wal᷊ine,

²³kụ natimu 365 su taunge.

²⁴ Ual᷊ingu i Henokh měngkate marěkạ dingangu Mawu Ruata e, i sie naghěngging ual᷊ingu nial᷊ạ u Mawu Ruata.

²⁵Su tempong i Metusalah umure 187 su taunge, i sie nakaěbạ anạ e esẹ i Lamekh.

²⁶Bọu ene i Metusalah reng nẹ̌biahẹ̌ 782 su taunge lai kụ nakareạ manga anạ e wal᷊ine.

²⁷I sie nate natimu 969 su taunge.

²⁸Su tempong i Lamekh umure 182 su taunge, i sie nakaěbạ anạ e esẹ.

²⁹I Lamekh nẹ̌bera, ”Dariọ ini sarung makahaěng su tempong i kitẹ e mělẹ̌hal᷊ẹ̌ masěgadẹ̌ mẹ̌kẹ̌karadiahang ěntana wọu nianeng MAWU e.” Ual᷊ingu ene i Lamekh nẹ̌sẹ̌bạ u arengu rariọ ene e si Noakẹ̌.[19]

³⁰Bọu ene i Lamekh deng nẹ̌biahẹ̌ 595 su taunge lai. I sie nakaěbạ manga anạ e wal᷊ine,

³¹kụ nate su ka 777 su taunge umure.

³²Sarangke i Noakẹ̌ umure 500 su taunge, i sie nakaěbạ e anạe esẹ tatěllu, kụ i Sem, i Yafet dingangu i Ham.