Read Sangir PĚNDARIADI 50 Bible Online

PĚNDARIADI 50 - Sangir bible

PĚNDARIADI 50

¹I Yusup měngkatewe rimarěmmạ su ghating amange apidu kạsangị e, kụ diměngu si sie.

²Bọu e i Yusup nangoro manga ěllange tahaundang e apẹ̌děndampa bal᷊unangu wadang i Yakub.

³Hal᷊ẹ̌ ene tangu hědo masaghial᷊ạ samuring ěpạ u pul᷊o su ěllone karěngụ e, karěngụewen tempo ipěndampa maietẹ̌. Tau Misirẹ̌ e nělutu si Yakub karěngụ u pitum pul᷊o su ěllone.

⁴Ene napaghohe tempong pěndal᷊utu e něberạ e i Yusup su manga sawohị u ratu, ”Habarẹ̌ko tatanata ini su ratu,

⁵ ’U su tempong i amangku e sem maraning maminsul᷊ẹ̌ singongone, niorone iạ e pinẹ̌kědo si sie, tadeạu iạ e pělěbing i sie su ral᷊ungu pěndal᷊ebingang nạung seng niriahine su ěntanang Kanaan. Ual᷊ingu ene tangu, apakawalako iạ deng mělěbing i amangku e. Mal᷊iung ene iạ buhụewe mẹ̌sul᷊e.’ ”

⁶Bọu e nẹ̌berạ e ratu, ”Dakọ e tamai pělěbing i amangu e tuhụewe seng nikědonu e si sie.”

⁷Bọu ene tangu tamaị e i Yusup mělěbing i amange. Kal᷊awọeweng sawohị u ratu, matatimadu istana, ringangu kěbịeweng apang těmbonang u Misirẹ̌ e tamai rimal᷊eng dingang i Yusup.

⁸Balagě manga tuhange, ringangu manga anạ u sěngkataune lai wal᷊ine mal᷊aing němpẹ̌tamai. Kětạeweng manga rariọ darodọ dingangu manga binatang i sire e nitěntang su wanuang Gosyen.

⁹Gihingangu sumasake kareta ringangu kawal᷊o e mal᷊aing němpẹ̌tol᷊e, kụ nakoạewe ghihingange manandụ-nandụ.

¹⁰Ene sarangke i sire nahumpạeng tampạ u taumata měmpělutạ gandung su Goren-Haatad, su sěmběkan daki wọu Sal᷊ụ u Yordan, i sire mẹ̌kẹ̌kiaratagẹ̌ dingangu susa naung piạ tingihe mal᷊aihạ. I Yusup nělutu ghěnnangu pitu ěllo karěngụ e.

¹¹Piạ e tau Kanaan nakasilo pělalutu su Goren-Haatad e, něberạ e i sire u, ”Kai pal᷊ahunsangị kasaria nariadi su tau Misirẹ̌ ěndaị e!” Ual᷊ingu ene tangu sěmpalang ene nisěbạ e Abel-Mizraim.[105]

¹²Kerene kakakoạ u manga anạ i Yakub měděndal᷊eng u apang nạung nitanatang Yakub si sire.

¹³ I sire němpěhengkẹ bal᷊unangu wadange sol᷊ong Kanaan kụ nilěbing i sire su ral᷊ungu liang u Makhpela su sěmběkan daki wọu Mamre, su rahami nạung seng niwělliang i Abraham bọu Efron tau Het ene, mědeạu koateng pěndal᷊ěbingang.

¹⁴Bọuten i Yusup nělěbing i amange, i sie e nẹ̌sul᷊e sol᷊ong Misirẹ̌ e dingangu manga anạ u sěngkataune ringangkewelain taumata apang němpẹ̌tol᷊e si sie nẹ̌lebing i amange ene.

¹⁵Sarangke i amang i sire e nairị, ute manga tuhang i Yusup něberạ e, ”Kereapạ e ngae manga andene i Yusup něngune kụ mamal᷊isẹ̌ karal᷊akị i kitẹ e nạung kal᷊imona?”

¹⁶Ual᷊ingu ene i sire naul᷊ị u tatanata kere ini si Yusup, ”Těntal᷊ang i amang i kitẹ e wědam biahẹ̌,

¹⁷i sie rimolohʼi kami apạul᷊ị si kamene kere ini, ’Ampunge wue pẹ̌sasal᷊a nạung kal᷊amona nikoạ u manga tuhangu e si kau.’ Kụ, kerẹewe manga ěllangu Ruata e kụ dẹ̌daloěng i amang i kitẹ e, i kami e ghụgahiorọ u, ampunge wue pẹ̌sasal᷊a nạung seng kinoạ kami e.” I Yusup tangu simangị e sarang nakatarimạ tatanata ene.

¹⁸Bọu ene manga tuhange hala e nahunděnta mase němpẹ̌suba su těngone, apidu kạpẹ̌bẹ̌berane, ”Kami ini e manga ěllangu.”

¹⁹Arawe i Yusup kai nẹ̌bera si sire u, ”Abe kěngkatakụ; u iạ e tawe makakoạ kere karadiahangu Mawu Ruata.

²⁰I kamene e sembem bọu němpẹ̌dal᷊ahintau mědeạu měkoạ dal᷊akị si siạ, kai arawe Mawu Ruata e kawe měmal᷊ui karal᷊akisẹ̌ e makoạ mapia, tadeạu ringangu apang nariadi nạung kal᷊imona e, lawọ taumata e měbẹ̌biahẹ̌ su orasẹ̌ ini e wotonge ipakasal᷊amatẹ̌.

²¹Kụ abe kěngkatakụ. Iạ e mapakasukụ u apang gẹ̌gausang i kamene ringangu manga anạ i kamene e.” Kerene kakakoạ e i sie napakal᷊enehu naung i sire ringangu wawerane ipẹ̌nẹ̌nahionge, hakịu i sire mangkeweng měngkahiborẹ̌.

²²I Yusup měngkai těbe mạtanạ su Misirẹ̌ dingangu manga anạ u sěngkataune; i sie něbiahẹ̌ sarang umburẹ̌ nidating u mahasụ mapul᷊o su taunge.

²³I sie reng nakapahědo namanda manga anạ pulung i Efraim. I sie reng nakapẹ̌tahanạ manga anạ i Makhir ute kai pulung i Manasye, kerẹewe anạ e sěsane.

²⁴Angkuěnge su manga tuhange, ”Iạ e sem mal᷊ighạ mate, kai Mawu Ruata e mang nal᷊ahẹ u sarung měpadul᷊i si kamene ringangu měngahạ i kamene měmpahunsěbang bọu wanua ini, makoạ sol᷊om banua nạung nikědonʼE piạko salune si Abraham, Ishak dingangʼi Yakub.”

²⁵ Mase tangu i Yusup rimolohu manga anạ u sěngkataune kěbị e niapẹ̌salu, angkuěnge, ”Pěmpẹ̌kědọ e si siạ, u kereu Mawu Ruata e měngahạ i kamene sol᷊ong banua ene, tangu i kamene mal᷊aing sarung měmpẹ̌bawa maietẹ̌ku.”

²⁶Bọu ene napohongke i Yusup su Misirẹ̌ e su piạ e umbure naghanapẹ̌ mahasụ mapul᷊o su taunge. I sire němpěměngi wal᷊unangu wadange, kụ bọu ene nitahon sire su ral᷊ungu petin tau nate.