Read Sangir PĚNDARIADI 6 Bible Online

PĚNDARIADI 6 - Sangir bible

PĚNDARIADI 6

¹Sarangke taumata e kạpahuntinambaneng kal᷊awọe ringangu nakeke su kasěllahu dunia e, kụ manga anạ bawine e piněhěnding,

²tangu manga riadikang maruata e,[20] nakasilọ e u manga mal᷊ahuala ene měngkate mal᷊aholẹ-holẹ. Bọu e i sire němpẹ̌kawingkeng manga mahualạewe ikẹ̌kapulung sire.

³Tangu MAWU e něhengetangke, ”Iạ e tawe mapakawalan taumata e mẹ̌biahẹ̌ sarang marěngụ-děngụ; i sire e kai riadikang piạ kětakenge kụ sarung mate. Manětạ bọu orasẹ̌ ini umurʼi sire e tawe mangělembo wọu 120 su taunge.”

⁴ Su tempo ene, ringangu l᷊ai mal᷊iu wọu ene, piạ taumata ansuang su dunia. I sire tangu kai hiteng manga mal᷊ahuala němpẹ̌kawingu manga riadikang mạduata. Kal᷊awọu ansuang tamai ene tangu kai mol᷊ensekẹ dokol᷊e dingangu taumata apan timeleng mapia nạung dongkeng tamai-tamai.

⁵ MAWU e nakasilo, kai apạe karal᷊akị taumata su dunia e; kakěpal᷊ewen tiněnnan sire e sěntiniạ mang dal᷊akị.

⁶I sie mal᷊aing nẹ̌sasěsilẹ̌ u kawe něndiadi si sire ringangu naměllọ i sire su dunia e. I sie nasusa naunge,

⁷hakịu něhengetang, ”Sarung Takụ iapakawinasa taumata kinoạ e, ringangu l᷊ai kal᷊awọu manụ u kinoaěng ringangkewelain manga binatang bal᷊ine e, u Iạ e kai nẹ̌sasaul᷊e něndiadi si sire.”

⁸Arawe i Noakẹ̌ e tangu nakal᷊uasẹ̌ naungu MAWU.

⁹ Kai ini e wẹ̌ken Noakẹ̌. I sie piạ anạ e těllung katau kụ arenge, i Sem, i Yafet dingangu i Ham. I Noakẹ̌ e tawẹ běke kụ deng nẹ̌koạ pẹ̌sasal᷊a, kụ samatang i sie taumata kụ mapia e su tempon sie. I sie měbẹ̌biahẹ̌ maranin Duata.

¹¹Arawe kal᷊awọu patikụ taumata e ral᷊akisẹ̌ su těngon Duata, mase su hal᷊ẹ̌ u katatingkaị e měngkawe mạdiadi suapan tampạ.

¹²Mawu Ruata e tụtatingang dunia e ute kětạembeng makạsilo karal᷊akisẹ̌ samatang, batụu kěbị taumatae ral᷊akị lulune.

¹³Bọu e něhengetangke Ruata e si Noakẹ̌, ”Iạ e seng manilakehu mapakasueng pẹ̌bawiahu patikụ diadikang. Iạ sarung mapakaupung sire ringangu dunia, batụu runia e kai napenẹ u katatingkaị i sire.

¹⁴Pěkoạko kapal᷊ẹ̌ kalu matoghasẹ̌ baugʼi kamene; kụ koạko piạ e huange su ral᷊ungu wọu ene laburengkon terẹ̌ dal᷊unge ringangu likude.

¹⁵Kapal᷊ẹ̌ ene harusẹ̌ 133 su metere nandune, běnahe 22 su metere, mase rangẹ e 13 su metere.

¹⁶Kapal᷊ẹ̌ ene atukeko kụ koateko wělla e wọu atụ[21] sarang darěndunge ghěnangu 44 su sentine. Kụ kapal᷊ẹ̌ ene koạko těllu haweng, bọu e koạko tukadẹ̌ sěmbaụ su sěndihange.

¹⁷Iạ e kai sarung maparal᷊engu lěba ipaminasa apang diadikang biahẹ̌ su dunia. Kal᷊awọu haghim patikụ su dunia e sarung mate,

¹⁸arawe ringangu e tangu Iạ kai mẹ̌taingu pẹ̌kakakědo. Suẹ̌ e sorong dal᷊ungu kapal᷊ẹ̌ ene kụ sěngkakasuẹ̌ dingangu kawingu ringangu manga anạ u ringangkeweng kawingʼi sire sěngkatau-sěngkatau e.

¹⁹Kụ pẹ̌bawako sarang dal᷊ungu kapal᷊ẹ̌ esẹ sěmbaụ dingangu wawine sěmbaụ, bọu apang gahị u manụ u kinoaěng ringangu manga ghahị u binatang bal᷊inẹ, tadeạu i sire tawe mawinasa ringang.

²¹Pẹ̌bawako l᷊ai kal᷊awọu haghing kaěng baugʼi kamene ringangu manga binatang ene.”

²² I Noakẹ̌ e mẹ̌kẹ̌koạewe kal᷊awọu apang ilẹ̌orong Mawu Ruata e si sie.