Read Sangir PĚNDARIADI 8 Bible Online

PĚNDARIADI 8 - Sangir bible

PĚNDARIADI 8

¹Ruata e tawe miwu len Noakẹ̌ dingangu kal᷊awọu binatang apạewen dingange su ral᷊ungu kapal᷊ẹ̌ ene. Ruata e napatịu u anging, hakịu akẹ e nanětạ e nohọ.

²Kal᷊awọu simbul᷊u akẹ bọu al᷊ungu wanua ringangu kal᷊awọu tukadu akẹ su l᷊angị e nihěpingʼE. Tahiti e nawaesẹ̌,

³dingangu akẹ e mangkeng kạkaohọ e. Nal᷊iung 150 su ěllone tangu, akẹ e seng tawe tumanịu marangẹ.

⁴Su tanggalẹ̌ kapul᷊o pitune su wul᷊ang kapitune, kapal᷊ẹ̌ e nasilade su pusungu wul᷊udu Ararat.

⁵Akẹ e měngkatewe nohọ kụ su tanggalẹ̌ humotong su wul᷊ang u liwugẹ̌, manga pusungu wawul᷊urange nanětạ e himobẹ.

⁶Nal᷊iung ěpạ u pul᷊o su ěllone, i Noakẹ̌ e nanopẹ e těbangeng u kapal᷊ẹ̌ e,

⁷kụ napatěllạ u manụ gaga sěmbaụ. Manụ ene tawe nẹ̌sul᷊e sarang kapal᷊ẹ̌, kaiso měngkate tụtěllạ tamai-ramahi sarang dalulung e namara-mara.

⁸Bọu e i sie naměllọ u paluma sěmbaụ, pinẹ̌kakěllaěng, měnsang akẹ e seng nohọ.

⁹Kai ual᷊ingu akẹ limẹ̌bạ su kaguwạu dunia tangu paluma ene tawe nakạdeạ darorokange. Tangu nẹ̌sul᷊e kapia sorong kapal᷊ẹ̌ i sie; kụ i Noakẹ̌ e měngkatewe nangogoru limane ringangu něngal᷊ạ paluma e nisuẹ̌ su kapal᷊ẹ̌.

¹⁰I Noakẹ̌ e rel᷊ain nangampal᷊ẹ̌ pitu ěllo karěngụ e, kụ bọu e saụko naměllo u manụ u paluma.

¹¹Nawawěllọe tangu, paluma ene nẹsul᷊e su anune piạ daungu zaitun melong su mohonge. Ene kinaěnnaěng i Noakẹ̌ u akẹ e seng saụ nohọ.

¹²Bọuten nangampal᷊ẹ̌ pitu ěllo kapia, i sie saụewe napatěllạ u paluma sěnsul᷊ẹ kapia; kụ sěnsul᷊e ene tangu manụ ene semben tawe nẹ̌bal᷊ị su anune.

¹³Su tempong i Noakẹ̌ umure 601 su taunge, su tanggalẹ̌ humotong bul᷊ang humotong, akẹ e seng naohọ. I Noakẹ̌ e nělekesẹ̌ atụ u kapal᷊ẹ̌ e, kụ bọu ene nakasilọ e runia nangělikụ e. I sie nakasilo nạung bowon dunia e seng namara.

¹⁴Su tanggalẹ̌ karuam pul᷊o pitune wul᷊ang karuane, ěntana e namarạ e kahěnga-hěngang.

¹⁵Bọu e Mawu Ruata e něhengetangke si Noakẹ̌,

¹⁶”Sěbangke wọu kapal᷊ẹ̌ ene e i kau ringangu kawingu, ringangu manga anạu ore lai manga kawingʼi sire e.

¹⁷Apasěbangko kěbị kal᷊awọu manụ u kinoaěng dingangu binatang bal᷊ine e, gaghuwạ arau lai rarodọ, tadeạu i sire wotonge měhite mělanagẹ̌ mal᷊awọ su kasěllahu dunia e.”

¹⁸Ene timumpạ e i Noakẹ̌ bọu kapal᷊ẹ̌ ene ringangu manga anạ e ringangu manga anạ e ringangkewen kawingʼi sire sěngkatau-sěngkatau.

¹⁹Kal᷊awọu manụ u kinoaěng, dingangu binatangu rul᷊unge, nasuẹ e nahunsěbang bọu kapal᷊ẹ̌ ene, tuhụewe komol᷊angu asal᷊ʼi sire.

²⁰I Noakẹ̌ e nẹ̌koạ pananěmbaěng baugu MAWU. I sie nangal᷊ạ pẹ̌sěmbaụ bọu apang haghing manụ u kinoaěng, dingangu manga binatang bal᷊ine kụ mawal᷊iri e, mase piněllọe su pananěmbaěnge, nikoạ sasěmba tẹ̌tutungang su wowom pananěmbaěnge.

²¹Dal᷊uru mawěngi wọu sasěmba ene e makal᷊uasẹ̌ naungu MAWU e, hakịu i Sie něhengetangke su ral᷊ungu naunge, ”Iạ seng ta mẹ̌saụ mangane dunia e ual᷊ingu kakanoạ u taumata; Iạ masingkạ u roken deng mangudạ, sipirang u taumata e ral᷊akị. Kụ Iạ e semben tawe saụ mamate kal᷊awọu apan diadikang biahẹ̌, kere wuhu Takụ nikoạ e.

²²Karěngụewen dunia ini wědang ene, sěntiniạ mang piạ musungu pěngangasị, musungu maměnsạ, musungu matěho, musungu matětị, musungu tahiti, ěllo ringangu hěbi.”