Read Sangir SAMUEL KARUANE 1 Bible Online

SAMUEL KARUANE 1 - Sangir bible

SAMUEL KARUANE 1

¹Sarětạeng i Saul napohong, i Daud, e nẹ̌bal᷊ị bọu pẹ̌seketang němatạ tau Amalek, kụ natanạ su Ziklag dua ěllo karěngu e.

²Susěngkariěllone narěntạ e sěngkatau umbaseng, bọu pědarasengang i Saul. Nakoạ kere tatialang pěndal᷊utu e, ute i sie měngkatewe nẹ̌nggaghehẹ pakeang e, ringangu nělěngkang u ěntana su těmbọe, i sie nakoạ sol᷊ong anun Daud dingangu nẹ̌suba su těngone.

³I Daud nakiwal᷊ọe si sie, ”Kai wọu apạ i kau e?” Sasimbahe, ”Ěllang nakal᷊ěsọ bọu pẹ̌darasengang u tau Israel.”

⁴Angkuěng i Daud u, ”Pẹ̌běkengkong apan seng nariadi!” Umbaseng ene naul᷊ị e u, ”Sordadong kami e kai timal᷊angu, watangenge wọu pẹ̌seketang, dingangu kai lawọ nate, sarạeweng lai i Saul dingangu i Yonatan.”

⁵”Kereapa i kau nasingkạ?” angkuěng i Daud si sie.

⁶ Sasimbahe, ”Mambeng nẹ̌saretạ, piạ ěllang su Wul᷊udu Gilboa e, kụ nakasilo si Saul mẹ̌ngunsarehẹ̌ su wěngkone, arawe manga kěreta ringangu sordadong sekẹ su kawal᷊o, seng nẹ̌těngkarani kụ němpěliwung.

⁷I Saul nẹ̌bihụ e sol᷊ong likudẹ̌, nakasilọ e ěllang, mase ěllang nikuiange, kụ ěllang simimbangke u, ’O, Tuang.’

⁸I sie nakiwal᷊o, kai i sai ěllang, mase ěllang nakasingkạ e si sie, u ěllang kai tau Amalek.

⁹Tangú i sie nẹ̌berạ e u, ’Mahiko, patẹ e iạ! Iạ e kai nal᷊esẹ dingangu seng maraning mate.’

¹⁰Tangú ěllang dimani e si sie, kụ takụ nipate, batụu, ěllang seng nasingkạ u, kereu i sie manawo ual᷊ingu seng lome rumarisị, i sie mambeng sarung mate. Bọu e takụ nipoesẹ̌ sakapeti wọu těmbọ e ringangu wukal᷊ạ su takiahe, mase ěllang nẹ̌bawa ramahi sarang anung Tuangku.”

¹¹Nakaringihẹ̌ ene, i Daud něnenggehẹ̌ pakeange ual᷊ingu susanaung e, ringangu kěbị apan dingange němpěkoạ l᷊ai kerene.

¹²I sire němpẹ̌kěndung dingangu němpělutu apidu nẹ̌puasa sarang nahěbi waugi Saul dingangi Yonatan, ringangkewe lai kawanuang Israel, taumatang MAWU, batụu kai lawo kahěngang nate su pẹ̌seketang ene.

¹³Bọu e i Daud nakiwal᷊ọe su umbaseng kụ nẹ̌bawa habarẹ̌ ene u, ”Kai wọu apa asal᷊u?” Sasimbahe, ”Ěllang e kai tau Amalek, sěngkatau taumata ragang su soan Tuangku.”

¹⁴I Daud nẹ̌berạ e, ”Mambeng kawahanine i kau němate ratu pinileng MAWU.”

¹⁵Mase i sie nẹ̌kuị e sěngkatau wọu manga ringange kụ něparenta, ”Patẹ e i sie!” Tau ene něnggaghaisẹ̌ umbaseng u Amalek ene sarạeweng nate.

¹⁶Angkuěng i Daud su umbaseng u Amalek ene, ”I kau sẹ̌sanu mapakanawong hukumang ini su watangengu, ual᷊ingu i kau něngaku piạ i kau němate ratu pinileng MAWU!”

¹⁷Bọu e i Daud nẹ̌kantarị eng kakakěndung baugu i Saul dingangi Yonatan,

¹⁸ ringangu něpauntạ takạdeạ u kakantarị ini[1] nitěntiro su ghal᷊ipohong Yehuda. (Kakantarị ini kabawohẹ su Bukẹ̌ u Yasar.)

¹⁹”Israel su wawul᷊urange pai marau, něngkahondose mol᷊ensekẹ, manga kal᷊endesang u wanua, naghoghahe i sire kere bungang u kawanua.

²⁰Mal᷊umbạko manga tau Gat tawe nakaringihẹ̌ habarẹ̌ ene. Mal᷊umbạko manga pasěllangeng u Askelon tawe nakahombang habaru ene. Kumbahang sarang mandehokang u Pilistin mahul᷊uasẹ̌, kumbahang sarang manga wawineng kapirẹ̌ maghahẹu pěmamansagẹ̌.

²¹E! manga wawul᷊urang u Gilboa, daringihẹ̌ko kakahiorọku: Kumbahang be namuhẹ̌ dingangu tahiti měholo si kau. Balako apakamara ringangu apakahusụ baelẹ̌ dingangu pẹ̌bawaelangu. Batụu kai sene kasasampelangu kěllung u wawahani. Dingangu kěllung i Saul, mal᷊aing piạ taine, dingangu nilanaěng kapia.

²²Papitị i Yonatan makapate. Pedan Saul bẹ̌gang kakěndagẹ̌ e měmate rokạ mapakạbinasan dokạ.

²³I Saul deduan Yonatan kereng kahimumune, ringangu i kẹ̌kendagẹ̌; sěntiniạ mạsěmbaụ balạewe wiahẹ̌ dingangu nate; i sire něngalembong kasahawụ e wọu manụ gahudạ, něngalembong katoghase wọu singa kawuhuang.

²⁴E! manga mandehokang u Israel, kěndung kon Saul ratu e! Kụ naningkaing i kau ringangu u hekạ mahamụ mal᷊ěnggihẹ̌, dingangkeweng i kamene nilěgaheng u wul᷊aeng maholẹ.

²⁵Seng nahondosẹ̌ manga mol᷊ensekẹ, su pẹ̌seketang dingangu su manga wukide mal᷊ingungu Yonatan nawatedẹ̌ matětogẹ̌.

²⁶Yonatan, e, anạ u sěngkatauku, naungku kimondọ, batụu i kau e kai maarěga si siạ. Kakěndagu mambeng mawantugẹ̌ sarang be něngalembo wọu kakěndagu sěngkatau wawine.

²⁷Seng něngkahondosẹ̌ manga mol᷊ensekẹ u kawanua. Mamben tawẹ kěhase aghidi sire!”