Read Sangir SAMUEL KARUANE 10 Bible Online

SAMUEL KARUANE 10 - Sangir bible

SAMUEL KARUANE 10

¹Su piran tempo nal᷊iu, i Nahas Datụeng Amon kai nate, kụ i Hanun ahuse nariadi e ratu.

²Bọu e něberạe Ratu i Daud, ”I Nahas kai hapịku masatia. Tangú iạ e kai hinon mẹ̌dal᷊ahapị lai ringangi Hanun anạ e.” Ual᷊ingu ene i Daud něndingọ en darolohang sol᷊ong soang Amon apělẹ̌hiborẹ̌ si Hanun su kakateng amange.

³Sarạeng i sire nawunạ su soang Amon, manga těmbonangu soa něberạ e su Ratu i Hanun u, ”Kumbahang be i kau měngěnna u i Daud něndingọ u rarolohang e tadeạu i sie mapulu měngadatẹ̌ si Amangu! i sie něndingọ u taumatane sol᷊ong ini e kai pẹ̌pẹ̌pahimang kụ pěnanesui soa ini, tadeạu kai pul᷊ahoěng e.”

⁴Bọu e i Hanun něnamẹ e manga rarolohang i Daud ene, mase wianggụ i sire nikěhudẹ̌ sěmběka, pakeangi sire nipotọ sarang kimbụ i sire kanibụ e, kụ i sire nirolohe.

⁵Kai tangú i sire e mamea mapul᷊e sol᷊ong soan sire. Su tempọe hal᷊ẹ̌ ene nipaul᷊ị e si Daud, i sie něndohon tatanata u, manga rarolohang pakatanạ su Yerikho sarang bianggụ i sire seng saụ tumuwo.

⁶Bọu ene tau Amon nakakiral᷊a u kakanoạ i sire kai nakakariạding pěndarokạ i Daud si sire. Ual᷊ingu ene i sire němpěnewa 20.000 su kataune tahapẹ̌sekẹ bọu Siria kụ mạtanạ su Bet-Rehob dingangu Zoba ringangu 12.000 su kataune tahapẹ̌sekẹ u Tob, ringangkewe lai ratun soang Maakha ringangu taumatane sěhiwu su kataune.

⁷Sarạeng i Daud nakaringihẹ̌, i sie něndoloheng i Yoab dingangu kal᷊awọu mẹ̌sasekẹ, kụ tamai simekẹ dokạ.

⁸Tau Amon e němpẹ̌sěbang němpẹpapangatorẹ̌ pẹ̌tatenten sire su těngon sasuěkang u Raba kasariaěng u soan sire, arawe tau Siria, Tob, Maakha e, němpẹ̌papangatorẹ̌ pẹ̌tatenten sire su rěmpugẹ̌.

⁹I Yoab nakasilo u i sie kai kạl᷊ahepesẹ̌ kareạ u wuntuangu rokạ su těngo ringangu su l᷊ikude. Ual᷊ingu ene i sie němilẹ e tahapěsekẹ u Israel kapapiaěng e, kụ nipěllọ e niapẹ̌tahatěngon tahapẹ̌sekẹ u Siria.

¹⁰Lěmbe en tahapẹ̌sekẹ u Israel e, nisarakang si Abisai tuarine, kụ něngatorẹ̌ antehang u tahapẹ̌sekẹ i sire nipẹ̌tahatěngọeng tahapẹ̌sekẹ u Amon.

¹¹I Yoab nẹ̌berạ e su tuarine, ”Kereu iạ tawe makatětehẹ̌ mẹ̌disihu tahapẹ̌sekẹ u Siria e, ute iạ e lighạ be tul᷊ung; kerene lai kereu i kau tamakatětehẹ̌ mẹ̌disihu tahapẹ̌sekẹ u Amon, ute iạ e tamai mẹ̌tul᷊ung i kau.

¹²Pakatatapẹ̌! Bọete i kitẹ mẹ̌tohạ pakawawahani, baugu wanuang kitẹ, dingangu waugu manga soan Duatang kitẹ. Mal᷊umbạko MAWU mẹ̌koạ apang i kẹ̌kapulu-Ne.”

¹³I Yoab dingangu mẹ̌sasekẹ e tamai simekẹ, sarạewen tahapẹ̌sekẹ u Siria timal᷊ang.

¹⁴Su tempone tau Amon nakasilo tahapẹ̌sekẹ u Siria e timal᷊ang, i sire mal᷊aing timal᷊ang bọu Abisai, kụ simohọ sol᷊ong dal᷊ungu soa. Bọuten simekẹ tau Amon, i Yoab e napul᷊ẹ sol᷊ong Yerusalem.

¹⁵Tau Siria nakaěnna, u i sire kai nikawatạ u tau Israel, ute i sire kimuị e kěbị měsasekẹ, tadeạu saụ pěmpẹ̌komol᷊e.

¹⁶Bọu e Ratu i Hadadezer nakikuịen tau Siria su sěmběkan daking Sal᷊ụ u Efrat, kụ nahunděntạ e sol᷊ong Helam su pěnaněmbonang i Sobakh, ul᷊ubal᷊ang u tahapěsekẹ u Ratu i Hadadezer bọu Zoba.

¹⁷Nakaringihẹ̌ ene, i Daud e nẹ̌bal᷊ikěkasẹ̌ něnampung u kěbị mẹ̌sasekẹ u Israel, bọu e liměbạ Sal᷊ụ u Yordan, mase natamaị e sol᷊ong Helam. Ěndaị sene tau Siria němpẹ̌papangatorẹ̌ barisang i sire, wọu e tamai simekẹ mẹ̌sasekẹ i Daud.

¹⁸Arawe tau Siria němpẹ̌sohọ kareạ u tau Israel. I Daud ringangu měsasekẹ e nakawihua pitu hasụ su kataune měngangul᷊ing karetaẹn pẹ̌seketang dingangu ěpạ u pul᷊o hiwung katau tahapẹ̌sekẹ u kawal᷊o sul᷊iung ene i Sobakh ul᷊ubal᷊ang u tahapẹ̌sekẹ u rokạ e kai nal᷊esẹ, kụ nate su pẹ̌seketang.

¹⁹Su tempong manga e ratu su kawasan Hadadezer nakasilo, u i sire kai nikawatạ u tahapěsekẹ u Israel e, ute i sire nẹ̌dorong mẹ̌dame, wọu ene kimakohọ e su tau Israel. Nanětạ bọu ene tau Siria e seng tawe saụ l᷊ai nẹ̌tumbahani nẹ̌sumbala tau Amon.