Read Sangir SAMUEL KARUANE 11 Bible Online

SAMUEL KARUANE 11 - Sangir bible

SAMUEL KARUANE 11

¹ Biasane manga ratu němpẹ̌sekẹ e kai su tempọ eng pẹ̌gaghantin taung. Su pěgaghantin taung ene, i Daud něndolohi Yoab tamai pẹ̌sẹ̌sekẹ dingangu kěbị tahapẹ̌sekẹ u Israel ringangkeng manga těmbonang e; kụ i sire e nakawatạ tau Amon mase i sire nělikụ e soan Raba. Arawe i Daud natanạ su Yerusalem.

²Sěngkawawěllo piạ i Daud nẹ̌bangung bọu nẹ̌tikị, i sie mẹ̌dẹ̌daral᷊eng su wowong atụ u wal᷊ene matene. Bọu ene i sie nakasilo sěngkatau wawine maholẹ kạdenọ e.

³I Daud něndolohu iạ pạkibal᷊o měnsang i sai wawine ene; kụ i sie pinaul᷊ikangke u, wawine ene kai i Batsyeba; i papạ e i Eliam, kawinge i Uria tau Het.

⁴I Daud něngorọ pěněnsomahẹ̌ bawine ene, ringangu sarangke i sie narěnta su istana, i Daud nẹ̌tikị dingange. (Batsyeba wuhụ e nasue wọu pěnganguhasu wọu niral᷊engangu raha.) Bọu e napul᷊ẹ e i sie sol᷊ong bal᷊ene.

⁵Pirạ en tempo nal᷊iu, i Batsyeba e piạ e kal᷊uwaeng e bọu e i sie něndingọ u habarẹ̌ si Daud mạanung hal᷊ẹ̌ ene.

⁶I Daud dingangu masahawụ nẹ̌parenta si Yoab, nẹ̌bera, ”Aparěntako i Uria tau Het ene su anuku.” Tangú i Yoab něndolohi Uria apẹ̌sẹ̌sombang i Daud.

⁷Su tempọ eng i Uria timatěngo si Daud, datu e nakiwal᷊o eng kakakoạ i Yoab dingangu sumasekẹ u Israel, dingangu raral᷊eng u pẹ̌seketang.

⁸Bọu e i Daud nẹ̌berạ e si Uria, ”Kapul᷊ẹ e sol᷊ong bal᷊enu kụ pengirul᷊e.” Piạ i Uria naněntang u wal᷊en datu e, i Daud něndoho eng gaghěllị su anun Uria.

⁹Kai i Uria tawe napul᷊ẹ, kaiso kai nẹ̌tikị dingangu manga l᷊ukadu ratu su těngọ en sasuěkang u wal᷊en datu.

¹⁰Niapakasingkạ e si Daud hal᷊ẹ̌ ene. Tangú i sie nakiwal᷊o si uria, ”Apạ e kawuhune i kau něbal᷊ị bọu raral᷊engangu marau, kawe unụ e i kau tawe napul᷊ẹ sol᷊ong bal᷊enu?”

¹¹I Uria simimbang, ”Tahapěsekẹ u Israel ringangu Yehuda e kai tutohạ bẹ̌gang mate, ringangu Petin Pẹ̌dariandim MAWU e, ruděndingang si sire. I Yoab ul᷊ubal᷊ang i kami ringangu manga těmbonang e nẹ̌daseng su rěmpugẹ̌ e. Tumanị u ěllang ini e mapul᷊ẹ sarang bal᷊e kumaěng, měnginung, mẹ̌tikị dingangu kawingku? Ual᷊ingu niawan Tuang dingangu niawaku, hakịeweng, iạ e tawe makakoạ kerene.”

¹²Angkuěng i Daud, ”Kuhạ e, sěhěllo ini i kau pěngirul᷊ẹe sini, riọ ěllo mal᷊ukadẹ̌ i kau takụ iapakawala rumal᷊eng.” Kụ sahěllo ene i Uria e natanạ su Yerusalem. Su ěllo tuhụ e i sie ninotẹ̌ i Daud kimaěng.

¹³Tangú kimaěngke i sie ringangu niapěnginung mal᷊awọ, hakịu niwukang. Kai sěhěbi ene i Uria tawe napulu mapul᷊ẹ, kaiso kai nětikị nangěmpahu kahiwune[24] su l᷊oahe su tampạ u l᷊ukadu wal᷊en datu.

¹⁴Sěngkariọěllone, i Daud němohẹ u suratẹ̌ si Yoab pinakiwawa si Uria.

¹⁵Bohẹ e, ”Pěllọko i Uria su horone, supiạ sekẹ něngalembong kahẹ̌gise, bọu ene sohọ e i kau su kawẹ̌gan sie, takadeạ u i sie mawihua.”

¹⁶Tangú těntal᷊ang i Yoab kạpẹ̌liwunge soa e, i Uria nirolohe sol᷊ong tampạ kụ i sie masingkạ u tampạ kasẹ̌gadenge riagatengu rokạ.

¹⁷Piạ tahapẹ̌sekẹ u rokạ siměbang bọu soa němpěnekẹ tau Yoab e, pirạeng katau manga těmbonang i Daud kinapate ringangu i Uria.

¹⁸Samurịeng ene i Yoab něndingọ u rarolohang sol᷊ong anun Daud baugu mapakasingkạ u raral᷊eng u pẹ̌seketang.

¹⁹Parentan Yoab su rarolohang ene, ”Mạeng seng datu wọu makaringihẹ̌ habaru maanụeng daral᷊eng u pẹ̌seketang ini e,

²⁰kibasinẹ u i sie kai měpědu, kụ makiwal᷊o si kau, ’Kawe unụe i kamene kerẹeng karanine wọu soa? Bal᷊inewe i kamene kai masingkạ, u sumasekẹ e kai měmpạmitị bọu wowom manga tatěndạ meselẹ̌?

²¹ I kamene kai seng niwul᷊e u i Abimelekh anạ i Gideon e kai kinapate su Tebes? Bal᷊inewe i sie nate ual᷊ingu sěngkatau wawine němahung u watung gilimang u tapoěng bọu wowon tatěnda meselẹ̌ si sie? Kụ kawe unụ e i kamene tumanị u maranịng meselẹ̌ ene?’ Kamageng i tuang datu makiwal᷊o kerene, ute paul᷊i si sie, ’I Uria pěrwiran datu mal᷊aing nate.’ ”

²²Tangú natamaị e rarolohang ene sol᷊ong anun Daud, napakasingkạ u apang niparentang Yoab si sie.

²³Rarolohang e nẹ̌berạ e, ”Rokạ i kami e kai l᷊imembong katoghase, ringangu i sire kai siměbang bọu soa simekẹ si kami su rěmpugẹ̌. Kai mamben mal᷊ěntihẹ̌ i kami nakapaněsẹ si sire apěbal᷊ị i sire saraẹng sasuěkang u soa.

²⁴Bọu e i sire měmpamitị si kami wọu wowon tatěndạ meselẹ̌, kụ pirạ eng katau wọu pěrwiran datu ringangu i Uria nawihua.”

²⁵I Daud nẹ̌berạ e su rarolohang, ”Pakatoghasẹ̌ko naung i Yoab, kụ pẹ̌beraiko i sie, tadeạu kumbahang be naunge makadodọ batụu tawe i katighadẹ̌ měnsang i sai mate sarung mate su pẹ̌seketang. Pẹ̌berako, saụ ko sekete lembong kasahawụ e soa ene, sarang i sire kumakoho.”

²⁶Su tempong i Batsyeba nakaringihẹ̌ u kawinge kai nate, i sie nělutu e.

²⁷Bọu e nasuẹ e tempong pěndal᷊utu, i Daud něngoro, pakị sěnsomahe sarang bal᷊en tau wawine ene, kụ i sie mariadi kawinge. Pira wul᷊ang nal᷊iụ e, i sie naiwanteleng sěngkatau rariọ esẹ. Kai MAWU e tawẹ dal᷊uase su kakanoạ i Daud kerene.