Read Sangir SAMUEL KARUANE 12 Bible Online

SAMUEL KARUANE 12 - Sangir bible

SAMUEL KARUANE 12

¹ Bọu ene MAWU e něndolohu Nabi Natan nẹ̌sombang i Daud. I Natan nakoạ sol᷊ong anun sie kụ nẹ̌bera, ”Piạ duang katau nẹ̌tanạ su ral᷊ungu soa sěmbaụ; sěngkatau kalạ dingangu sěngkataụ e wue kai kasiang.

²I anu kalạ e piạ binatange mal᷊awọ dingangu domba,

³arawe i anu kasiang e tangú kětạeng mạnaghuang anạu domba sěmbaụ niwělliange. Anạu domba ene nịlahikinge sarang nasaria su ral᷊ungu wal᷊ene sěngkakahiking dingangu manga anạ e. Anạu domba ene i apạkaěng bọu kaěng u tau ene, sarạewelaing manginunge wọu lainumange, dingangu mẹ̌tikị ewe su hiwane; nimbụ e kinoạ e mẹ̌sul᷊ungu anạ e wawine hala.

⁴Piạ su sěhěllo i anu kalạ e nirěntangken sake. I anu kalạ e tawe mapulu měmotọ domba arau sapine hala e mědeạu sasakeng baugu sakene. Kaiso i sie něngal᷊ạ anạ u dombang i anu kasiang ene e, kụ nisasạ e waugu sakene.”

⁵Nakaringihẹ̌ ene e i Daud nisongkaneng u pědune ual᷊ingkeng kakakoạ i anu kalạ ene kụ i sie nẹ̌bera, ”Kai apạ e kahasa tau kalạ ene! Baugu MAWU kụ biahẹ̌ e, tau ene hinong pěngaweng anạu domba ene ěpạ u sul᷊e kakěpal᷊e, kụ i sie hinong i hukungu papate!”

⁷Angkuěng i Natan si Daud, ”Seng i tuang e tau ene! Kụ seng ini e nipěhengetang u MAWU, Ruatang Israel, ’I kau e seng Takụ nihengkẹ nakoạ datu waugu Israel ringangu Takụ nipakasal᷊amatẹ̌ bọu anun Saul.

⁸Kararatuang i Saul dingangu manga kawinge sen Takụ nionggọ si kamene, sarạewen lai i kau e Takụ nihengkẹ nakoạ datung Israel dingangu Yehuda. Manga andene ene lai wědang tawe nasukụ, nal᷊ahẹ u sarung Takụ i onggọ lai si kamene kerene kal᷊awọe.

⁹Unụ e i kamene tawe rumararingihẹ̌ manga parenta-Ku e? Unụ e nịkakoạ u kararal᷊akisẹ̌ ene? I Uria e nioronu pinakipate su ral᷊ungu pẹ̌sasasekẹ; nịbawalanu i sie pinakipate su tau Amon, kụ kawingue nial᷊ạu!

¹⁰Ual᷊ingu i kau e tawe rimaringihẹ̌ si Siạ dingangu kawingi Uria e nial᷊ạu, tangú suapạeweng hitenu e mebẹ̌bawěllasẹ̌ e piạ kinapate.

¹¹ Iạ e mẹ̌salu sarung mapakaěnsạ u hombang si kamene kụ darěntane e wọu walagu e hala. Iạ e sarung měngal᷊ạ manga kawingu e su těngon matanu e hala kụ Takụ i onggọ su taumata wal᷊ine kụ sarung mẹ̌tikị sěngkapẹ̌tikị dingang i sire su ěllo mal᷊ětu.

¹²I kau e seng nẹ̌koạ pẹ̌sasal᷊a mapěni-pěnisẹ̌, susěmběkane tangú Iạ e sarung mapakal᷊ahẹ u tatumbiagẹ̌-Ku su těngong kěbị Israel.’ ”

¹³Bọu e i Daud nẹ̌bera si Natan, ”Iạ seng nẹ̌dosa su těngon MAWU.” I Natan simimbahẹ̌, ”MAWU e seng něngampung si Tuang kụ i Tuang e sarung tawe mate.

¹⁴Kai ual᷊ingu i Tuang nakahinakang MAWU ual᷊ingu kakanoạ u, ute ahusu e wuhụ e kinawantelẹ̌ e kai sarung mate.”

¹⁵Wọu ene napul᷊ẹ e i Natan sarang bal᷊ene. Ahusi i Daud kinawantelẹ̌ i Batsyeba bal᷊ung Uria e kai nasakị su kapulung MAWU.

¹⁶I Daud nẹ̌kal᷊iomanengke su MAWU, tadeạu rariọ ene iạpakaul᷊e. I sie mẹ̌pẹ̌puhẹ̌dang dingangu apang hěbi i sie mẹ̌tẹ̌tikị su lanteng kamare pẹ̌sěhěbi tiwatu.

¹⁷Tangú manga měnaněmbonang u istana nahuhaungke sorong anune, něngologẹ̌ takadeạu i sie apẹ̌bẹ̌bangung, kai i sie e kai naneheng, dingangu tawe mapuko kimaěng dingangi sire.

¹⁸Sěngkamisa nal᷊iu dariọ e nate e, kụ manga ěllangi Daud kai natakụ naul᷊ị. U angkuěng i sire, ”Su tempong dariọ bědang biahẹ̌, datu e tawe mapulu rumaringihẹ̌ kereu i kitẹ mẹ̌bisara ringange. Něngalembọ e wue dariọ e seng nate, u kumbahangbe i sie mẹ̌karaki mapakasunsarang batangenge.”

¹⁹Piạ i Daud nakasilo manga ěllange mẹ̌sẹ̌sasiang, ute nakahěngangke i sie u anạ e kai seng nate. Tangú i sie nakiwal᷊ọ e si sire, ”Unụ e rariọ e kai seng nate?” ”Seng nate,” ungkueng i sire.

²⁰Tangú nẹ̌bangungke i Daud bọu lante, kụ něndenọ mase něnaụ utạ e, něngaweng pakeang e. Bọu e i sie nakoạ sol᷊ong bal᷊eng pẹ̌tatahamawuang. Bọu ene i sie nẹ̌bal᷊ị sol᷊ong istana kụ nẹ̌dorong nakisadiang kaěng baugi sie bọu ene kimaěng.

²¹Manga ěllang e nakasilo ene, nẹ̌berạ e si sie u, ”I kami tawe nakahěngang Tuang! U těntal᷊ang dariọ e bědang biahẹ̌ i Tuang e nẹ̌tịngkẹ̌dang dingangu sụsangị baugu rariọ e, arawe sarạeng dariọ e nate, i Tuang e kawe nẹ̌bangung kụ kimaěng.”

²²”Ore,” angkuěng i Daud, ”kahěngang iạ e nětingkědang dingangu sụsangị těntal᷊ang dariọ e wẹ̌dang biahẹ̌, batụu su ěnnaku: Aramanung MAWU e kai tutal᷊ěntụ u iạ, dingangu kai mapulu rariọ kai měbiahẹ̌.

²³Arawe ini e sarětạ e seng nate, apa gunane iạ mang mětingkědang? Makawiahẹ̌ si sie iạ saụ ngae? Iạ e sarung be makoạ sol᷊ong tampạ su piạ i sie ene, arawe i sie seng tawe mẹ̌bal᷊ị sol᷊ong anuku.”

²⁴Bọu e i Daud něnal᷊iwuhẹ̌ naung i Batsyeba kawinge, kụ nẹ̌tikị dingange, i Batsyeba namantelu ahuse esẹ, kụ nisěbạ i Daud si Salomo. MAWU timal᷊ěntụ u rariọ ene,

²⁵kụ něndoloheng Nabi Natan apẹ̌sẹ̌sěbạ arengu rariọ ene si Yedija,[25] batụu MAWU e timal᷊ěntụ i sie.

²⁶I Yoab e wědang kapẹ̌sekẹ e rudokạ Raba soang Amon, kụ seng maraning i kapul᷊ahone.

²⁷Tangú i sie něndingọ eng darolohang sol᷊ong anun Daud niapěhabarẹ̌, ”U, Iạ seng simekẹ Raba, kụ nakapul᷊aho akẹ sasadiang sire.

²⁸Su tempone ini, i Tuang pangomol᷊ẹ̌ lěmbeng měsasakẹ i kitẹ, bọu e apạněmbonang pẹ̌seketang sarạeweng soa i kawatạ. Ual᷊ingu ene tawe i kawerang taumata u kai iạ nakawatạ soa ene.”

²⁹Tangú i Daud něngomol᷊ẹ̌ kěbị tahapẹ̌sekẹ kụ nanekẹ Raba, nidal᷊iwungang mase kinawatạ.

³⁰I Daud něngal᷊ạ e sapeọ bọu těmbọ u ratun sire,[26] mase nịtatakạ e su těmbo e! Makota ene wěhạ e manga e 35 su kilone, kụ piạ dal᷊ěgahe paramata maral᷊ěnggihẹ̌. I Daud e mal᷊aing nẹ̌bawa apal᷊iwụ hampasẹ̌ l᷊awọ bọu soa ene.

³¹Su l᷊iung ene, tumanạ u soa niaparal᷊eng dingange niapẹ̌bawa lahaghari, pacolẹ̌, bal᷊iung, kụ i sire niapěhal᷊ẹ̌[27] su pẹ̌kakoateng tela. Hal᷊ẹ̌ ene mal᷊aing nịkakoạ waugu tumanạ u manga soan Amon bal᷊inẹ e. Bọu ene i Daud dingangu patikụ tahapěsekẹ e nẹ̌bal᷊ị sol᷊ong Yerusalem.