Read Sangir SAMUEL KARUANE 13 Bible Online

SAMUEL KARUANE 13 - Sangir bible

SAMUEL KARUANE 13

¹I Absalom ahusi Daud e kai piạ tuarine wawine maholẹ i sẹ̌sẹ̌bạ si Tamar. I Amnon ahusi Daud su kawinge wal᷊ine e kai piạ kapulune si Tamar,

²dingangu i sie kai mapulu mẹ̌tikị dingange. Kai hal᷊ẹ̌ ene tawe mariadi, batụu i Tamar e kai tawe nẹ̌kẹ̌kawing, dingangu tawe wotonge mẹ̌dal᷊ahapị u manga esẹ. I Amnon e mang mẹ̌tẹ̌tiněnnang hal᷊ẹ̌ ene hakịeweng pangěnsueěng e nasakị.

³I Amnon e kai piạ hapị e sěngkatau pintarẹ̌ arenge i Yonadab anạ i Simea tuhangi Daud.

⁴I Yonadab nẹ̌berạ e si Amnon, ”Kawe unụ e i Tuang ahusu ratu e, apang kal᷊aěllo e mang kẹ̌kasilo mạsusa? kai piạ apa ngae?” I Amnon simimbahẹ̌ u, ”Iạ e kai piạ kapuluku si Tamar tuari eng Absalom anạ u sěmbaụku.”

⁵Bọu e i Yonadab nẹ̌berạ e si sie, ”Ene hal᷊ẹ̌ be mahaěng pẹ̌tiněnnaěng! Dal᷊oka e su pẹ̌tatikilang kụ pẹ̌koạ e kere awẹ u masakị. Kereu i amang u ruměnta měmanda, pẹ̌berạ e u, ’Amang, apakawalako i Tamar apěnondang kaěngku. Batụu kereu iạ makasilo si sie mědapuhang kaěng ene sini, ute iạ e makakaěng.’ ”

⁶Samuring ene, ute i Amnon dimal᷊oka e su pẹ̌tatikilang kụ něngawẹ masakị. Sarạeng Ratu i Daud nakasilọ e, i Amnon e nẹ̌berạ e si sie, ”Amang, apakawalako i Tamar aparěnta apěnasạ kukisẹ̌ su těngoku sini, měntěhang iạ e reng mapulu kumaěng.”

⁷Bọu ene i Daud timanata si Tamar su istana, angkuěnge, ”Kakoạko sol᷊ong anun tuhangu i Amnon, kụ pẹ̌koạ kaěng baugi sie.”

⁸Bọu e i Tamar natamaị e kụ sěngkakěllane i Amnon e kạtikị e su ral᷊okaěng. I Tamar něngal᷊ạ e ghol᷊opung kụ nẹ̌tongkạ e kukisẹ̌ su těngong Amnon.

⁹Bọu ene nịlaaungke kukisẹ̌ bọu wohogẹ̌ ku nisadiane. Kai i Amnon tawe mapulu kumaěng. I sie nẹ̌berạ e, ”Apasẹ̌bangko kěbị taumata e bọu ini.”

¹⁰Sarạeng taumata nasẹ̌bangke kěbị, nẹ̌berạ e i Amnon si Tamar, ”Bawako ramahi manga kukisẹ̌ ene sarang daral᷊okaěngku, kụ těnggungko siạ.” I Tamar timuhụ e.

¹¹Kai su tempong Tamar něgěllị u kukisẹ̌ ene si sie, i Amnon e měngkawe něhěgo mahuala ene kụ nẹ̌berạ u, ”Tuari, pẹ̌tikịko ringangku.”

¹²”Oh kumbahang bue kakạ!” angkuěng u mahuala ene, ”Abe pěnihasa si siạ mẹ̌koạ hal᷊ẹ̌ kotorẹ̌ ene! Hal᷊ẹ̌ kerene e tawe kakoateng su Israel.

¹³Kereu mariadi kerene, ute iạ e kai hinong měkembuni suapa? Kerene lai i kau e sarung kahinakaneng u tau Israel e. Mapiaěng be i kau e pẹ̌bisarạeng datu, u ratu e mang matuhụ u iạ e makoạ kawing u.”

¹⁴Arawe i Amnon tawe mapulu tumuhụ, kụ ual᷊ingu i sie kawe limembong katoghase, nisihasang tuarine ringangu mahasa, mase niliange.

¹⁵Sarạeng bọu ene i Amnon e nawěnsing i Tamar, kụ kawawěnsing e něngalembon kasariane bọu kapulune kal᷊amona. Bọu ene i sie nẹ̌bera su tuarine u ”Sẹ̌bangke!”

¹⁶I Tamar simimbahẹ̌ u, ”Oh, kawe unụ e kerene kakạ. Kereu i kau e manokol᷊u iạ, karal᷊akị ene lembong kasariane[28] wọu apang nikoạ u kanini!” Kai i Amnon tawe rimaringihẹ̌.

¹⁷I sie nẹ̌kuị e sadaha e kụ nẹ̌berạ, ”Bawa e sẹ̌bang sol᷊ong l᷊ikude wawine ini, mase kunsị e tukadẹ̌!”

¹⁸Sadaha e nẹ̌koạeweng apang niparentane. Pakeang i Tamar e kai manandụ, kahokọ e manandụ.[29] Pakeang kerene kai nakoạ pakẹ u apang mal᷊ahuala su tempo ene.[30]

¹⁹Bọu e i Tamar něnawuheng awul᷊ẹ̌ su těmbọ e ringangu něnggaghehẹ lakụ e, kụ něbuạ dimal᷊eng apidu mẹ̌nakạ u l᷊imane su ghatine kụ simangị.

²⁰I Absalom nakasilo, nakiwal᷊ọ e, ”Bal᷊inewe nigagholọ i Amnon kasasiliang u? Balạ e tuari! manịeng tawe tahěndungang, u i sie kawe tuhang u, kụ manịeng tawe ipẹ̌bawěke si sai-sai hal᷊ẹ̌ ene.” I Tamar i nẹ̌těngkahaẹ em batangeng e su wal᷊en Absalom, kụ i sie mambeng nasusa ringangu rụdal᷊ahae.

²¹Ratu i Daud nakaringihẹ̌ hal᷊ẹ̌ nariadi ene, kụ měngkatewe limangehẹ̌ marasai.

²²I Absalom mạngindorẹ si Amnon, mase lai tawe měmamisara, batụu i sie kawe někoạ hal᷊ẹ̌ dal᷊akị si Tamar tuarine.

²³Samuri en dua taung, i Absalom e někoạ sal᷊iwang u pělahata rukụ u domba su Baal-Hazor, su maraning soang Efraim, kụ něnotẹ̌ u kal᷊awọu ahusu ratu.

²⁴I sie timatěngon Datu i Daud nẹ̌berạ e u, ”Amang, iạ kai měkoạ sal᷊iwang u hatang dukụ u domba; kụ kapuluku e i Amang dingangu manga měnaněmbonang u istana ruměnta su sal᷊iwang.”

²⁵Kai ratu simimbang, ”Kumbahang bue Anạku, u watụ u mạeng i kami ruměnta kěbị kai makasusa si kau.” I Absalom mang nẹ̌nahěsẹ, kai i amang e mạtatanạ mạdiri ruměnta. I sie kětạ mapakawala mẹ̌koạ sal᷊iwang.

²⁶I Absalom nẹ̌berạ u, ”Kamageng kerene ute, mẹ̌paramisikon anạ u sěngkatauku i Amnon patol᷊e ringangi kami.” Kai ratu e nẹ̌berạ u, ”Balạe abe apatol᷊e i sie.”

²⁷Kai ual᷊ingu i Absalom mang mẹ̌nahěsẹ, ute i Daud napatol᷊ẹen Amnon dingangu manga anạ e wal᷊ine, timol᷊e ringang i Absalom. [I Absalom něnadiạ en pẹ̌babawiahẹ̌ maral᷊ěnggihẹ̌.][31]

²⁸I sie nẹ̌parentạ e su manga ěllang e, ”Pakatitike pakapia-pia, kamageng i Amnon seng niwukang u anggorẹ̌ e, ute iạ mẹ̌gěllị u tandane, kụ pěmate si sie. Abe kěngkatakụ. U hal᷊ẹ̌ ene e kai tanggunangku. Koạ e pakawawahani manịeng tawe ghumoẹ̌.”

²⁹Manga ěllang e někoạ ewe kere niparentang Absalom, kụ i Amnon e nịpapate. Manga anạ i Daud bal᷊ine nakasilọ e kawe kerene, i sire měngkatewe němpẹ̌awi su wagal᷊u sěmbaụ-sěmbaụ kụ nahuntal᷊ang.

³⁰Těntal᷊ang i sire wẹ̌dang kạdal᷊enge mapul᷊ẹ̌, ute kai piạ taumata něhabarẹ̌ si Daud u, ”Kěbị apang anạ i Daud e kai nipateng Absalom — kụ tawẹ u sarang sěngkatau wiahẹ̌!”

³¹Datu e nẹ̌pětị e kụ něnggaghehẹ pakeange ual᷊ingu susanaung e, mase nẹ̌těngkahaka su lante. Kěbị apang mělahal᷊ẹ̌ e timol᷊e něnggaghehẹ pakeangi sire.

³²Arawe i Yonadab anạ i Simea tuhangi Daud nẹ̌berạ, ”Manịeng ta ghuměnggang i Tuang kumbahang be mětiněnna u kěbị anạ Tuang seng nate. Tumbạ i Amnon nate, u mambeng nal᷊ahẹ u mang kětạ u i sie tẹ̌timonaěng i Absalom, nanětạ piạ i Tamar tuarine nipẹ̌koateng dal᷊akisẹ̌ kareạ i Amnon.

³³Kumbahang be měngimang u ahusi Tuang e kawe nasue nate, u nawihua e mang kẹ̌tạ eweng i Amnon.”

³⁴Těntal᷊ang kerene ute, i Absalom tangú timal᷊ang keng batangenge. Manga měndariagạ istanan Daud e nakasilọ e taumata l᷊awọ mạhunděsung bọu bul᷊ude bọu Horonaim.[32] Tangu něngkakoạ e sol᷊ong anun datu naul᷊ị u hal᷊ẹ̌ ene.[33]

³⁵Bọu e i Yonadab nẹ̌berạ si Daud, ”Ené manga ahusi Tuang! Těngadẹ̌ kerẹewe takụ pinẹ̌bera kanini.”

³⁶Buhụ ewe nasueng bisarane, nahunsuẹ̌ e manga ahusi Daud sarang loahe su ral᷊unge. Kụ i sire němpanětạ e nahunsangị, kụ i Daud dingangu manga ěllange mal᷊aing nahunsangị.

³⁷ I Absalom timal᷊ang sarang istanang datu su soang Gesur, i Talmai anạ i Amihur. I sie nẹ̌tanạ sene těllu taung karěngụ e. I Daud e nẹ̌tingkẹ̌dang marěngụ, nělutu waugi Amnon,

³⁹kai sarang susanaung i Daud naědọ e, ute i sie mambeng dụdareạ i Absalom.