Read Sangir SAMUEL KARUANE 14 Bible Online

SAMUEL KARUANE 14 - Sangir bible

SAMUEL KARUANE 14

¹I Yoab masingkạ u Ratu i Daud e kai rụdareạ i Absalom,

²ual᷊ingu ene i sie něndolohẹ̌, apẹ̌tẹ̌těgạ sěngkatau tau wawine pande bọu Tekoa. Sarạeng tau wawine nasongọ e, i Yoab e nẹ̌berạ e si sie, ”Wawụ! I kau pẹ̌těngkakoạko kere tau kinasusaěng; pěluhe eng pakeang u susa ringangu kumbahang mẹ̌pakẹ u l᷊ana mawěngi. Pẹ̌těngkakoạko kere sěngkatau wawine kụ sụsangị u anạ e i kekěndagẹ̌ nạung nate seng marěngụ.

³Bọu e kakoạko sol᷊ong anun datu kụ pẹ̌berako si sie kerei.” I Yoab e naul᷊ị eng bawera hinong pakịpẹ̌berane.

⁴Tangú tau wawine nakoạ e sol᷊ong anun datu, kụ nẹ̌tumpěkuhẹ̌ su těngone apidẹ̌ nẹ̌berạ, ”I Tuangku Mawantugẹ̌, tul᷊ungko ěllangu!”

⁵”Kai piạ a?” angkuěng u ratu. Tau wawine simimbahẹ̌, ”Ěllang ini e kai sěngkatau wawine wal᷊u masusa. Kawingu ěllang e kai seng nate.

⁶Ěllang mạnaghuang anạ esẹ darua, kụ piạ susahěllo i rẹ̌dua e kai nẹ̌darendehẹ̌ su kěhu. Ual᷊ingu tawẹ u nakaseho si rẹ̌dua e ute sěngkatau wọu tal᷊oaran dẹ̌dua e kai nawihua.

⁷Kěbị anạ u sěngkataung ěllang e, němpěndokạ si siạ dingangu měnẹ̌nětal᷊ẹ̌ tadeạu iạ pěnarakangu anạku kụ němate ene si sire, tadeạu i sire měhukung i sie ringangu hukumangu papate; batụu i sie kawe němate anạu sěmbaụe. Kereu iạ měnarakangu anạku, ute nal᷊ěmbe kate sẹ̌saku hala. I sire e sarung mẹ̌gagholọ u pělaharapẹ̌ku e mang sěmbaụ, dingangu tawe makapěněntangu sěngkatau anạ esẹ baugu kawingku e mědeạu makapěněpasu pal᷊ahitene.”

⁸”Kapul᷊ẹ e,” angkuěng u ratu, ”hědọeng takụ i urusẹ̌ hal᷊ẹ̌ ene.”

⁹”I Tuangku Mawantugẹ̌,” angkuěng u tau wawine, ”apang kụ koateng i Tuang e, mang hinong i katarimạ i kami anạ u sěngkatau e samurine; arawe i Tuang dingangkeweng anạ u sěngkataun Tuang e mambeng tawẹ pẹ̌sasal᷊ane.”

¹⁰Datu e simimbang, ”Kereu piạ taumata mamatakụ si kau e, i sie měngkate wawa ramahi, tadeạu pananahaghen sie si kau e seng tawe i sie patěpasẹ̌.”

¹¹Angkuěngu tau wawine, ”Milumbạko i Tuang seng mẹ̌kal᷊iomaneng su MAWU Ruatan Tuang, u mạdiring i sire mẹ̌koạ něngalembong kahẹ̌gise kụ měmpamate anạku sěmbaụ suwụ u pěmamal᷊isi sire piạ měmpamate anạku.” I Daud simimbang u, ”Su MAWU Ruata wiahẹ̌, anạ u e tawe mẹ̌kapura sarang kadodọ.”

¹²Angkuěng u tau wawine, ”I Tuangku Mawantugẹ̌, apakawalako ěllangu e mẹ̌bisarako l᷊ai kadodọ.” ”Mapia,” angkuěngu ratu.

¹³Tau wawine nẹ̌bera, ”Dingangu apan niweran Tuangku kerene, i Tuangku seng něngaku, u i Tuangku sẹ̌sane nẹ̌sal᷊a, batụu i Tuangku e tawe napakawalang ahusi Tuangku niapakapul᷊ẹ bọu rarạganeng. Kawe unụ e i Tuangku nẹ̌koạ pẹ̌sasal᷊a kerene su těngon taumatan Mawu?

¹⁴I kitẹ kěbị e mang mate; u i kitẹ ini e tạbidạeng akẹ nạboso su ěntana, kụ sembeng tawe saụ i kaemong kapia. U Ruata e mal᷊aing tawe makawiahẹ̌ taumata nate; ual᷊ingu ene mal᷊owọko i Tuang makatawakal᷊i mapẹ̌bal᷊i u taumata wọu pangangingkateng.[34]

¹⁵Ěllang nẹ̌tahatěngon Tuangku e ual᷊ingu ěllang e kai sẹ̌sahẹ̌sekang pateěng u taumata. Bọu e ěllang e nẹ̌tiněnnạ e u mạpiaěngbe ěllang mẹ̌bisara eng Tuangku tadeạu apang kụ dědorongang u ěllang e, mambeng piạ antibẹ̌ u ěllang e mang makạtarimạ bọu i Tuangku.

¹⁶Ěllang e mạngěnna u, i Tuangku e mambeng dumaringihẹ̌ dingangu mapakasal᷊amatu, ěllang bọu taumata kụ měmal᷊ěndihẹ̌ mamate siạ dingangu anạku. U pandungang i sire e kai mapěngensọ i kami wọu ěntana nighẹ̌llị u Mawu Ruata su taumata-Ne.

¹⁷Ěllang e mambeng mangasagu rianding Tuangku mang makakahiking kasasal᷊amatu ěllang, batụu i Tuangku e tạbidạ eng malạekatu Mawu Ruata, kụ mạkạkoạ mapẹ̌dal᷊ahaeng mapia ringangu ral᷊akị.[35] Milumbạko MAWU Ruata Tuangku ruměndingang si Tuangku!”

¹⁸Ratu e simimbangke, ”Iạ e kai reng piạ takụ ipakiwal᷊o si kau, kụ simbahẹ̌ be ringangu katul᷊idẹ̌.” ”Botonge wue i Tuangku e mẹ̌bisara,” angkuěng u tau wawine ene.

¹⁹Ratu e nẹ̌berạ e, ”I Yoab ngae něndolohi kau?” Tau wawine simimbang, ”Baugu niawan Tuangku, ěllang tawe makatihọ u watangeng bọu kakiwal᷊on Tuangku.[36] Mamben těngadẹ̌ i Tuangku, i Yoab e napakasingkạ u apan takụ nikoạ dingangu takụ niwera.

²⁰I sie nakapěkoạ kerene, kai waugu makapěhanggosu apang i pẹ̌papangurusẹ̌ takadeạ u makoạ mapia, i Tuangku e kai matahuěnna kere malạekatu Mawu Ruata, hakịu nasingkạ u kěbị apang mạdiadi e.”

²¹Samuring ene, ratu nẹ̌kuịe si Yoab dingangu nẹ̌bera si sie, ”Kapulunu mambeng takụ iapakaghanapẹ̌. Kụ tẹ̌gatẹ e i Absalom e, wọu e wawa ramahi.”

²²I Yoab e nẹ̌tumpěkuhẹ̌ su těngon Daud mase nẹ̌bera, ”Milumbạko Mawu Ruata e měngal᷊amatẹ̌ si Tuang! Orasẹ̌ ini ěllang e masingkạ, batụu Ratu e lụlahimpuluang u ěllang batụu Ratu e seng dimaringihẹ̌ kakindoạ u ěllang.”

²³Bọu e nẹ̌buạ e i Yoab sol᷊ong Gesur mědeạu mẹ̌těgạ si Absalom mẹ̌sul᷊e sarang Yerusalem.

²⁴Kai ratu e tawe mapakawalang Absalom mẹ̌tanạ su istana. ”Iạ e tawe mapulu makasilo si sie,” angkuěng ratu e. Tangu i Absalom natěpasu wal᷊ene kụ tawe timatěngo ratu.

²⁵Su kaguwạ u wanuang Israel e tawẹ apa taumata kere i Absalom kal᷊ěnggihang u wadange. Hakịu i sie nakaěbạ daralo. Bọu pal᷊edu l᷊aede sorong pondol᷊u utạ e mang tawẹ kurang e.

²⁶Utạ e enẹ e mahěbung, hakịu sěntaung sěnsul᷊ẹ i sie měmotọ utạ e, watụ u su piněndangeng e kai tumanị u mawěhạ. Tumuhụ timbangengu ratu, ute wěhạ u utạ e wọu nipotọ e, l᷊imembo wọu ruang kilo.

²⁷I Absalom e piạ manga ahuse těllung katau esẹ arawe sěngkatau e wawine kụ masadadạ-sadadạ, arenge i Tamar.

²⁸Seng dua taung karengụ e i Absalom mạtanạ su Yerusalem, kai wẹ̌dang be tawe nẹ̌sẹ̌sombang u ratu.

²⁹Tangu piạ su sahěllo i sie nẹ̌kuị e si Yoab, baugu kai i rolohẹ̌ apẹ̌tahạtěngon datu, kai i Yoab e tawe ruměnta, i Absalom saụ kapia nẹ̌kui, kaiso i Yoab mal᷊aing tawe ruměnta.

³⁰Bọu e nẹ̌berạ e i Absalom su manga paparentaěng e, ”I kamene masingkạ, u waeli Yoab su sěmběkang baelẹ̌ku nịsasuangeng u ghẹ̌tung e? Tutungke waelẹ̌ ene.” Tangú i sire němpanutungke.

³¹Tangu i Yoab riměntạ e su wal᷊eng Absalom kụ nakiwal᷊o, ”Unụ e wue manga paparentaěngu kawe němpanutung baelẹ̌ku?”

³²Nisimbang i Absalom, ”Batụu i kau e kawe tawe naitụ su kakuiku. I kau e kai takụ i rolohẹ̌ pẹ̌těngon datu dingangu pelẹ̌habaru kakiwal᷊oku, ’Apawe gunane iạ niapaněntang u Gesur kụ niapẹ̌bal᷊ị damahi? Mạpiaěng be iạ matanạ e paise.’ ” Mase i Absalom nẹ̌berạ e l᷊ai, ”Pẹ̌tawakal᷊iko takadeạ u iạ e makapẹ̌těngon datu, ringangu kamageng iạ e wẹ̌dang i tẹ̌toke piạ sal᷊aku e, ute iạ e sadia pateěng.”

³³Bọu e i Yoab e nakoạ e sol᷊ong anun Datu i Daud e, naněpasu rorong i Absalom. Tangu ratu e nẹ̌kuịe si Absalom, kụ i Absalom e riměntạ e nẹ̌suba su těngon datu. Tangu ratu e naněnsomahẹ̌ dingangken darěngune.