Read Sangir SAMUEL KARUANE 15 Bible Online

SAMUEL KARUANE 15 - Sangir bible

SAMUEL KARUANE 15

¹Samurịeng ene i Absalom e nanadia waugu watangeng e karetang pẹ̌seketang dingangu kawal᷊o, ringangkewen tumatol᷊ene l᷊imam pul᷊o su kataune.

²Apang kal᷊aěllo i Absalom mẹ̌bẹ̌bangung bědang maral᷊ukadẹ̌, kụ dimarisị su wiwihu ral᷊eng, su maraning tẹ̌bang istana. Apan taumata kụ manowang urusang e su ratu, kẹ̌kuiang dingangu pakiwal᷊oěng i Absalom, angkuěnge, ”I kau e kai wọu asal᷊u kawanua sude?” Kamageng i sire sumimbahẹ̌, ”Kai wọu asal᷊u kawanua sini arau pai,”

³tangu i Absalom nẹ̌berạ u, ”Tumuhụ atorang e, i kamene mang nihino, katewe kạěngkěhang bue kawe tawẹ apa timbangu ratu hinong dumaringihẹ̌ kalakẹ̌ i kamene.”

⁴Bọu e i sie nẹ̌berạ e lai, ”Kěnang panal᷊ukạ. Kereu iạ makoạ měmamutusẹ̌, ute apang piạ u pẹ̌dědarendehang dingangu pananuntụ, ute wotonge wue ruměnta su anuku, kụ takụ koateng su katěngadẹ̌.”

⁵Kereu piạ taumata humaung si Absalom kụ mẹ̌suba si sie, i Absalom e maněgọeng l᷊imane, mase tau e lahěkutang kụ děnguang.

⁶Kerene kakoạ i Absalom su těngon taumatang Israel kụ apang měmpanowang pěrkaran sire su ratu, ringangu mang kerene i Absalom měngal᷊ạ naung u taumatang Israel.

⁷Nal᷊iu ěpạ[37] u taung, i Absalom e nẹ̌berạ e su Ratu i Daud, ”Amang apakawalako iạ makoạ sol᷊ong Hebron mapakasěhụ u riandiku su MAWU Ruata.

⁸Batụu su tempong iạ bẹ̌dang mạtanạ su Gesur wanuan Siria e, iạ kai nẹ̌diandi mẹ̌tahamawu MAWU su Hebron,[38] kereu i Sie mapakawalang iạ mapul᷊ẹ sol᷊ong Yerusalem.”

⁹Angkuěng ratu, ”Rakọ e ral᷊eng dingangu sal᷊amatẹ̌.” Tangu nẹ̌buạ e i Absalom sol᷊ong Hebron.

¹⁰Piněngal᷊amonang ene ute i sie kai seng něndingọ u manga rarolohang sol᷊ong kěbị ghal᷊ipohong Israel pinẹ̌bawa tatanata, ”Kereu i kamene makaringihẹ̌ tingihu slompretẹ̌ e, ute pěmpẹ̌bansagẹ̌ u, ’I Absalom e seng naratu su Hebron.’ ”

¹¹Dua hasụ su kataune wọu Yerusalem timol᷊e si Absalom sol᷊ong Hebron. I sire tawe nakaěnna sarang kadodọ, tumang u komol᷊ang i sire, ringangu i sire apang nahuntol᷊e e tawe nakatikạ.

¹²Bọu e těntal᷊ang i Absalom kạpẹ̌narakang e sasěmba, i sie něndingọ e lai rarolohang sol᷊ong Gilo apẹ̌kẹ̌kui si Ahitofel, sěngkatau měnanal᷊ěntihọ su Ratu i Daud. Komol᷊ang u rumal᷊awang datu mang kẹ̌katoghase, ringangu nahuntinambang kal᷊awọe tumatol᷊e si Absalom.

¹³Bọu ene sěngkatau mẹ̌bawawa habarẹ̌ nanurantungke si Daud, ”U tau Israel e kai manumběka wọi Absalom.”

¹⁴Kụ i Daud e nẹ̌berạ e su kěbị mělahal᷊ẹ̌ u kantorẹ̌ e su Yerusalem, ”Bọete i kitẹ deng měnggea. Kere ini ral᷊eng e mẹ̌gausu i kitẹ makakal᷊ingkạ bọi Absalom. Tawẹ kararěnane i sie kai seng masongo. Pakasahawụ, mẹ̌gausu i kitẹ tawe kasahusuang kụ ikawatạ, sarang be kěbị tumanạu soa e pateěng.”

¹⁵”Kerenẹ e, Tuang,” angkuěng i sire. ”I kami e sạdia měkoạ apang kapulung Tuang.”

¹⁶Bọu e rimal᷊engke ratu niringanengu kěbị ghal᷊ipohone, mělahal᷊ẹ̌ u kantorẹ̌ e, arawe rokạ i sire mapul᷊o nitěntang pẹ̌lẹ̌hapa istana.

¹⁷Su tempon datu ringangu manga rumaringange rimal᷊eng naněntang u soa e, i sire nangirul᷊e su maraning bal᷊e pangěnsueěnge.

¹⁸Kěbị apang mělahal᷊ẹ̌ u kantorẹ̌ ratu e rimarisị[39] su sěmbekane, piạ komol᷊ang u tumataking datu e mẹ̌bẹ̌barisẹ̌ limiu e. Piạ l᷊ai ěnnung hasụ su kataune tahapẹ̌sekẹ timol᷊e si sie wọu Gat mẹ̌bẹ̌barisẹ̌ su těngone.

¹⁹Kinasilon datu kerene, ute nẹ̌berạ e si Itai, mananěmbonang u ěnnungu hasụ su kataune tahapěsekẹ ene, ”Unụ e wue i kau timol᷊e lai ringangi kami? Mạpiaěng be i kau pěbal᷊ị katanạ dingangu ratu wuhu, batụu i kau e wal᷊inewe taumata raghị dingangu su tatal᷊angeng kụ nahae wọu soanu e.

²⁰Bẹ̌dang be ta nạdarěna i kau natanạ sini, kụ tumanị e wue i kau takụ iapatol᷊e aparal᷊eng dingangku? U iạ sẹ̌saku e tawe nakahěngang, měnsang sarạeng apạ e timonaku rụdal᷊eng. Pẹ̌bal᷊ị e kụ paringangke manga hapị u tamba wanua, milumbạko MAWU kuměndagẹ̌ dingangu mang masatia si kau.”[40]

²¹Kai i Itai e simimbahẹ̌ u, ”Su MAWU Ruata wiahẹ̌, dingangu ual᷊ingkeng pěbawihu Tuangku, ute suapang dal᷊engang i Tuangku, ěllang timol᷊e lai, walạewe tumatěngo papate.”

²²”Mapiạ e wue!” angkuěng i Daud, ”Pěmpẹ̌tamaị e!” Tangu rimal᷊engke i Itai ringangu komol᷊ang e, ringangkewe lai manga ghal᷊ipohone.

²³Kěbị kawanua e nahunsangị mal᷊aihạ piạ manga mẹ̌sasekẹ i Daud naněntang u soa. Bọu e ratu limẹ̌bạ Sal᷊ụ u Kidron, kụ nitol᷊eěng u manga mẹ̌sasekẹ e, kụ dimal᷊engke i sire nẹ̌timona kěhu l᷊inggi.

²⁴Imang i Zadok rẹ̌duang Imang i Abyatar ene sene,[41] ringangkeweng kěbị tau Lewi e, mẹ̌bebawa Petiʼm Pẹ̌darianding MAWU. Petiʼm Pẹ̌dariandi e nipěllọ,[42] kụ tawe hengketang kereu kěbị kawanua e tawe maněntang u soa ene.

²⁵Tangú ratu e nẹ̌berạ e si Zadok, ”Sul᷊eko Petiʼm Pẹ̌dariandi sol᷊ong soa e. Kereu MAWU e mahimpulu si siạ, ute iạ e iapakawala-Ne ipẹ̌bal᷊i, dingangu makasilo Petiʼm Pẹ̌dariandi dingangkewen tampạ pẹ̌tatanakeng e.

²⁶Kai kereu MAWU seng tawe mapulung iạ, ute pẹ̌bawiahẹ̌ku e i sarakangke su kapulunʼE.”

²⁷Těpase ratu e saụ e nẹ̌bera si Zadok, ”Sahiongeiko i Ahimaas anạ u ringangu i Yonatan anạ i Abyatar; pěmpẹ̌bal᷊ị e i kamene kụ pakarěmasẹ̌.[43]

²⁸Iạ hědọ e měngampal᷊ẹ̌ su maraning l᷊ěbateng u sal᷊ụ su kěhu linggi, sarang makatarimạ habarẹ̌ bọi kamene.”

²⁹Bọu e i Zadok rẹ̌duang Abyatar nẹ̌bawạ e Petiʼm Pẹ̌dariandi, kụ němpẹ̌bal᷊ị sol᷊ong Yerusalem kụ i sire něngkatanạ sene.

³⁰Bọu e i Daud něluạ e sapatune. I sie ringangkeweng kal᷊awọu tumatol᷊ene simaka Wukidʼu Zaitun kạpahungkiạ e, ringangu těmbo i sire piạ tatimbuhunge tatialang měhampugẹ̌.

³¹Su tempon nipakasingkạ si Daud[44] u i Ahitofel mal᷊ain timol᷊e ringangu komol᷊ang i Absalom, ute i Daud nẹ̌kal᷊iomanengke kerei, ”MAWU, milumbạ u kumbahang i apakasěhụ urihi Ahitofel!”

³²Su tempong i Daud nawunạ e su wowong bawul᷊udang e, su tampạ kụ kinanarangeng u taumata mempẹ̌tahamawu MAWU, i sie nitẹ̌gateng u hapị e masatia i Husai tau Arki. Lakụ i Husai naghaghědẹ, dingangu těmbọ e nisawuhang u awul᷊ẹ̌.

³³I Daud e nẹ̌berạ e si sie, ”Kereu i kau tumol᷊e ringangku, i kau kai makoạ bawawaěng si siạ.

³⁴I kau e makatul᷊ung si siạ kereu i kau mẹ̌bal᷊i sol᷊ong soa ringangu mẹ̌bera si Absalom, u i kau orasẹ̌ ini kai hinong mẹ̌tangkiang dingangu satia si sie, kerẹewe i kau e nạung mẹ̌tẹ̌tangkiang si amange kal᷊imona. Kereu kerene kakakoạ e, ute i kau e tamapakasěhụ u apạeng i lẹ̌urihi Ahitofel.

³⁵Imang i Zadok dẹ̌duang Abyatar e mal᷊aing ene sene. Papakasingkạko si rẹ̌dua e apang kụ kinaringihu su istana e.

³⁶I Ahimaas anạ i Zadok ringangu i Yonatan anạ i Abyatar mal᷊aing timol᷊e si amang i sire, ku i sire mal᷊aing sene. Manga rariọ ene, rolohẹ̌ko aparěnta sol᷊ong anuku, apaněpasu kal᷊awọu habarẹ̌ kụ apang i karingihu.”

³⁷Tangú nẹ̌bal᷊ị e i Husai hapị i Daud ene sol᷊ong Yerusalem, něhindọ u rarěntang Absalom sene.