Read Sangir SAMUEL KARUANE 16 Bible Online

SAMUEL KARUANE 16 - Sangir bible

SAMUEL KARUANE 16

¹ Piạ i Daud buhụ e nakal᷊iu pusungu wul᷊ude, sěngkalěndị u riměntạ e i Ziba ěllang i Mefiboset, nahangkaẹ̌bakengke ringange, apidu nẹ̌bawa kalide sěmparẹ̌ mẹ̌lẹ̌lurang u borotẹ̌ dua hasụ su waụ e, ringangu wuang anggorẹ̌ mahěgu mahasụ su pohọ e, bua-bua mapapaelẹ̌ mahasụ su eghẹ e, ringangu akẹ u anggorẹ̌ sěngkawihẹ̌.

²Ratu i Daud nakiwal᷊ọe si sie, ”Kai waugu apa tamaini e?” Angkuěng i Ziba, ”Manga kalide ini e, kai waugu sasakenang u manga ral᷊ohom bal᷊en Tuang, borotẹ̌ dingangu manga bua-bua ini e, waugu manga mẹ̌tatangkiang si Tuang, dingangu akẹ u anggorẹ̌ ini e kai waugu i sire apang něngkasaghedẹ̌ su kěhu l᷊inggi.”

³Bọu e ratu nakiwal᷊ọe si sie, ”Kai suapa i Mefiboset pulung i tuangu Saul?” ”I sie wědang mẹ̌natapẹ̌ su Yerusalem,” angkuěng i Ziba, ”batụu i sie maiaking u orasẹ̌ ini tau Israelẹ̌ e sarung měnul᷊eng kararatuang i Saul i upunge, si sie.”

⁴Tangu ratu něberạ e si Ziba, ”Manětạ bọu orasẹ̌ ini, kal᷊awọu tataghuaneng i Mefiboset makoạ tataghuanengu.” Angkuěng i Ziba, ”Tarimakasẹ Tuang.” ”Milumbạko i Tuang e sěntiniạ mal᷊uasẹ̌ su ěllange!”

⁵Su tempong i Daud nawunạ e su Bahurim, piạ e sěngkatau narěnta wọu tampạ ene apidẹ̌ dimẹ̌duhẹ̌ su komol᷊ang u ratu, kụ i sie něngane si Daud. Arengu tau e i Simei anạ i Gera bọu manga anạ u sěngkataung Saul.

⁶I Simei měngkatewe němahungu watu si Daud dingangu manga mělahal᷊ẹ̌ u kantorẹ̌ e, manilaing i Daud mạdal᷊iwung su manga taumatane ringangu manga těmbonang u tahapěsekẹ.

⁷I Simei nẹ̌ngane ringangu wawera, ”Rakọ e! Rakọ e! Tahapěmate! Tahapẹ̌koạ dal᷊akisẹ̌!

⁸I kau e kai nehampasẹ̌ kararatuang i Saul! Orasẹ̌ ini i kau kai seng i hukung u MAWU, u watụ u kai seng tumanị e mal᷊awo anạ u sěngkataung Saul e nipatenu. Kararatuang u kai seng nighěllị u MAWU su anạ u i Absalom. Orasẹ̌ ini mawihua i kau, ei taha pěmate!”

⁹I Abisai tuaring Yoab anạ i Zeruya, nẹ̌berạ e su ratu, ”Unụ e i Tuang niapakawalạeng měnggaghohaeng ěndaị mẹ̌ngane si Tuang? Apakawalako iạ ěllang měhoto lehẹ e!”

¹⁰Kai ratu nẹ̌bera si Abisai rěduang Yoab tuhange, ”Kumbahang pandungang. Balạ e i sie pěngane si siạ. Batụu kereu MAWU nangoro si sie, i sai wue wahani makiwal᷊o kawe unụ e i sie nẹ̌koạ kerene?”

¹¹Mase i Daud saụ e nẹ̌bera si Abisai ringangu su kal᷊awọu manga ěllange, ”Anạku tutune mẹ̌tẹ̌tatumẹ̌galẹ̌ mamate siạ; unụ e wue i kamene mạherang makasilo kakanoạ u tau Benyamin ini? Kai MAWU e něndolohẹ̌ si sie apẹ̌mate siạ; kụ kumbahang be pẹ̌kapuraěng i sie, měngkate wala i sie měngane si siạ.

¹²Aramanung MAWU e mẹ̌nẹ̌naung kasasịgěsạ[45] ini ringangu měngal᷊amatẹ̌ si siạ makoạ kere sasal᷊iu l᷊aane ene.”

¹³Bọu e i Daud ringangkewem manga tumatol᷊ene naněpasen daral᷊eng, arawe i Simei rimal᷊eng masahawụ timol᷊e si sire su l᷊engehu wul᷊ude, apịdu něngane ringangu němerengu u watu ringangu ěntana.

¹⁴Datu ringangu kal᷊awọu taumatane něngkasaghede piạ i sire nawunạ eng Sal᷊ụ u Yordan,[46] bọu e i sire nangirul᷊e sene.

¹⁵Těntal᷊ang kerene, i Absalom ringangkeweng kal᷊awọu tau Israel němpẹ̌tol᷊e si sie, němpẹ̌suẹ̌ su soang Yerusalem, ringangu i Ahitofel timol᷊e lai.

¹⁶Piạ i Husai hapị i Daud kụ satia ene nẹ̌sombang i Absalom, i Husai namohangke, ”Biahẹ̌ datu! Biahẹ̌ datu!”

¹⁷Kai i Absalom nakiwal᷊o si sie, ”Suapa satianu si Daud hapị u? Kawe unụ e i kau tawe timol᷊e ringange?”

¹⁸I Husai simimbahẹ̌ u, ”Makoạ be kereapa! Iạ e manumběka su taumata kụ seng nipilen MAWU, ual᷊ingken kal᷊awọu taumata tamai ini e, ringangkewen kěbị taumatang Israel. Taumata ene e sarung takụ tol᷊eěng.

¹⁹Saụ e wue, isaịewe lai takụ tangkianeng? Bal᷊inewe anạ i tuangku? Kerẹewe iạ seng bọu nẹ̌tangkiang si amang i Tuangku, kerene lai iạ e mẹ̌tangkiang si Tuangku orasẹ̌ ini.”

²⁰Samuring ene, nẹ̌berạ e i Absalom si Ahitofel, ”Berako apang hinong koateng i kitẹ e.”

²¹I Ahitofel simimbahẹ̌ u, ”Dakọ e sol᷊ong manga rokạ i amang i Tuangku, kụ nạung nitěntang pělẹ̌hapa istana, kụ pěmpẹ̌tikị e ringangi sire. Kěbị kawanuang Israel měngkasingkạ ual᷊ingkeng kakakoạ i Tuangku ene, kutẹu i Tuangku seng nakoạ sekẹ i amang i Tuangku, kụ kěbị apạeweng tumatol᷊e si Tuangku e, něngkawahani.”

²² Kụ baugi Absalom, nikoateng keng pẹ̌darasengang e su wowong atụ u istana su matenene. Bọu e su apan seng kinasilong kěbị taumata e i Absalom simuẹ̌ su pẹ̌darasengang ene e, kụ nẹ̌tikị e ringangu manga rokạ i Amange.

²³Su tempo ene, apan sasasang Ahitofel itẹtarimạ kere wawerang Mawu sẹ̌sane; baẹ be i Daud, i Absalom kewe lai mang tụtuhụ apang sasasane.