Read Sangir SAMUEL KARUANE 17 Bible Online

SAMUEL KARUANE 17 - Sangir bible

SAMUEL KARUANE 17

¹Tawe nararěnnạ wọu ene, i Ahitofel e něberạ e si Absalom u, ”Apakawalako iạ měmile mapul᷊o dua hiwu su kataune. Hědo hěbi iạ e tamai měnahusu si Daud.

²I sie e takụ aloěng těntal᷊ang i sie e reng bědang lupa ringangu nělome kal᷊okone. Iạ e sarung mapakahěkosi sie, sarạeweng kěbị taumatane měmpětal᷊ang u watangenge. Mang kětạ u Ratu i Daud e takụ pateěng.

³Arawe manga taumatane takụ iapẹ̌bal᷊ị sol᷊ong anung Tuangku kerẹewe sěngkatau kaghiang bawine mẹ̌sul᷊e su kawinge. Bal᷊inewe i Tuangku piạ kapulune u kawe tumbạ u niawang sěngkatau samatang?[47] Bal᷊inẹ e wue ute sarungbe tawe pẹ̌kapuraneng.”

⁴Sasasa ene kai pẹ̌pandaěng mapia kareạ i Absalom dingangu kal᷊awọu manga měnaněmbonang u Israel.

⁵Kai manịeng kerene, i Absalom e nẹ̌bera, ”Kuieko i Husai; kụ mahịe i kitẹ e rumaringihẹ̌, měnsang kereapa su ěbạ e.”

⁶Piạ i Husai riměnta e, i Absalom e mạpakasingkạ eng karaking Ahitofel, kụ nẹ̌berạ e, ”Tuhukang keng kitẹ ngae sasasa ene? Mạeng tala, ute pěgěllịkon těgu wal᷊ine.”

⁷I Husai simimbahẹ̌ u, ”Sasasang Ahitofel sěnsul᷊ẹ ini e kai ral᷊akị.

⁸I Tuang e seng nasahẹ masingkạ, u i Daud dingangu manga taumatane e kai sumasekẹ bawahani. I sire tạbidạ eng karal᷊ibutung běruang bawine kinailangeng u anạ e. Kerene lai i Daud e kai tahapěsekẹ pintarẹ̌, kụ tawe mẹ̌tatikị dingangu taumatane.

⁹Aramanung tempo ini i sie kai mẹ̌kẹ̌kěmbuni su ral᷊ungu liang, arau su tampạ bal᷊ine. Tangú kereu taumatang Tuang aloěng kareạ i Daud, kụ piạ u mawihua, ute waẹbe i sai kụ makaringihẹ̌ hal᷊ẹ̌ ene sarung makapẹ̌bera u, taumatan Absalom kinawatạ.

¹⁰Tangú apạeweng bawahani ringangu matatoelẹ̌ kere singa e, mang mal᷊ahẹ u měngkatakụ. Batụu kěbị tau Israel e masingkạ u i amang i Tuang e kawe wahaning pẹ̌seketang, dingangu manga taumatane e kawe mẹ̌sasekẹ mawawahani e.

¹¹Ual᷊ingu ene ute sasasaku e kerei: Kamol᷊ẹ̌ko kěbị tau Israel bọu kěbị soa e, tadeạu pẹ̌tatambaěng e kěbị e kere ěne su wiwihu sasị. Bọu e i Tuang sẹ̌sane paněmbonang si sire, kụ tamai měmpẹ̌bawuno.

¹²I kitẹ e sarung měsombang i Daud su apang i sie ene, ringangu i sie seketang i kitẹ těntal᷊ang i sie reng bědang ta nakạhěngang apa sarung mariadi. Tawẹ apa kụ mẹ̌kal᷊impẹ̌sohẹ̌, baẹ be i sie ore we lai manga taumatane.

¹³Kamageng i sie tumal᷊ang sol᷊ong dal᷊ung u soa sěmbaụ e, ute kal᷊awọu kawanuang kitẹ e měngal᷊ạ tal᷊i kụ měmol᷊eng soa ene[48] kụ iapakanawo sol᷊ong dal᷊ung u wal᷊ane karaniang e. Sarang batu sěmbaụ, tawẹ apa mal᷊ẹ̌mbe su wowom bul᷊ude ene.”

¹⁴I Absalom dingangu kěbị taumatang Israel nakaringihẹ̌ ene, i sire nempěberạ e, ”Sasasang Husai něngalembong kapiane wọu sasasang Ahitofel.” Mamben těngadẹ̌, u MAWU seng něnantu waugu tamapakasěhụ u sasasang Ahitofel kerẹ eng kapiane ene, takadeạ u i Absalom kahombangengu kasasịgěsạ.

¹⁵Samuring ene, i Husai něngalakẹ̌ e si Imang i Zadok dingangu su Imang i Abyatar, mạanụeng sasasang Ahitofel ringangu sasasane si Absalom dingangu su manga měnaněmbonang u Israel.

¹⁶Angkuěng i Husai, ”Pakasahawụ! Paul᷊ikeko i Daud, u kumbahang mẹ̌těngkahěbi su l᷊ẹ̌bateng u sal᷊ụ su kěhu l᷊inggi. I sie kai hinong l᷊ighạ apal᷊ebạ Sal᷊ụ u Yordan. Mạeng tala, i sie ringangkewen buntuang e iapakatuno.”

¹⁷Těntal᷊ang bědang kerene, i Yonatan anạ i Abyatar ringangu Ahimaas anạ i Zadok kapẹ̌ngampal᷊e su maraning simbul᷊u akẹ En-Rogel, su wiwihu soang Yerusalem. I sire tawe wahani sumuẹ̌ su soa e, batụu mạtakụ i kasilong taumata. Kerẹewe seng kinanarangeng, sěngkatau ěllang bawine maněpasẹ̌ si sire e, habarẹ̌ hinong i kalạkẹ̌ su Ratu i Daud.

¹⁸Arawe sěnsul᷊ẹ ene, i sire kai nẹ̌sarětạ u kinasilong dariọ esẹ, mase niapakasingkạ e si Absalom. Tangu i sire měngkatewe ringangu masahawụ tamai nẹ̌kěmbuni su wal᷊eng sěngkatau tumanạ u soa kadodọ arenge soan Bahurim, si rěduhu wal᷊e ene kai piạ pahighi kụ i sire měngkatewe simuẹ̌ su ral᷊unge.

¹⁹Kawingu taghuangu wal᷊e ene kai němilạ u hekạ su mohong u pahighi ene, ringangu něnawuhu gandung su wowone, sarạeweng pahighi ene tawe kinasilo.

²⁰Manga taumata rarolohang i Absalom diměnta su wal᷊e ene, kụ nakiwal᷊o su tau wawine kanini, ”Kai suapa i Ahimaas rẹ̌duang Yonatan e?” ”Wuhu-wuhu i sire l᷊imẹ̌ba sal᷊ụ,” angkuěng e. I sire e mẹ̌dẹ̌deạ umbaseng darua ene, kai i sire e tawe nahěnsombangeng, kụ bọu e i sire něngkapul᷊ẹ e sol᷊ong Yerusalem.

²¹I Ahimaas rẹ̌duang Yonatan e nahunsẹ̌bangke wọu pahighi e, mase i rẹ̌dua měngkatewe natamai ringangu masahawụ, nẹ̌sombang i Daud e, kụ kěbị e nasuẹ eng kalakẹ̌ e. Angkuěng i sire, u, ”I Ahitofel e kai něnasa si sire takadeạ u i sire e kai apạnekẹ si Tuang, kụ su tempo ini pěmpẹ̌buạ e pahul᷊iu sal᷊ụ.”

²²Tangú i Daud dingangu manga taumatane němpẹ̌liụ e Sal᷊ụ u Yordan, kụ nawunạ seng kalonge.

²³Sarětạ u i Ahitofel nakaěnnạ e u sasasane kai tawe nituhukang i sire, i sie měngkatewe němasẹ̌ u pul᷊angeng u kalidene, kụ bọu e napul᷊ẹ sol᷊ong soane. Bọuteng i sie napakaghanapu kěbị urusang, i sie nẹ̌těngkawiting u watangeng e, mase i sie nidal᷊ẹ̌bing su pěndal᷊ẹ̌bingang u ghal᷊ipohone e.

²⁴Piạ i Absalom limiu Sal᷊ụ u Yordan e, ute i Daud e nawunạ e su soan Mahanaim, kụ i Absalom e nitol᷊eěng tau Israel. (

²⁵I Absalom e něnduị eng Amasa niapěněmbonang gapaěng i sire nipěngganti si Yoab. I Amasa e kai anạ i Yitra tau Ismael;[49] i mamạ e arenge i Abigail anạ i Nahas, anạ u sěngkataune wawine i Zeruya i mamạ i Yoab.)

²⁶I Absalom dingangu manga taumatane e nẹ̌daseng su ěntanang Gilead.

²⁷Su tempong i Daud nawunạ su Mahanaim, i sie nitěgateng i Sobị anạ i Nahas bọu soan Raba su Amon, dingangu i Makhir anạ i Amiel bọu Lodebar, dingangu i Barzilai bọu Rogelim su Gilead.

²⁸I sire němpẹ̌bawa panganginumang, kaha, ringangu kama baugu i Daud ringangu taumatane, ringangkewe lai gandung, gětung, tapoěng, gol᷊opungu gandung sinanga, kacang mahamụ, kacang mahamụ gaghuwạ, gul᷊ang katiupang, keju, těmbọ u susu ringangu domba piram baụ. I sire masingkạ u i Daud dingangu taumatane kai něngkal᷊unusẹ̌, něngkorou, ringangu něngkal᷊oweng daral᷊eng su kěhu l᷊inggi.