Read Sangir SAMUEL KARUANE 18 Bible Online

SAMUEL KARUANE 18 - Sangir bible

SAMUEL KARUANE 18

¹Ratu i Daud e nangomol᷊eng kěbị taumatane, bọu e nịpapahiạ e, kụ nariadi piạ gapaěng u pẹ̌sěhiwu, ringangu pẹ̌tahạmahasụ su kataune. Mase něnduị eng matatěllang apạněmbonang manga ghapaěng ene.

²Bọu ene niapẹ̌buạ e i sire niapatamai pěmpẹ̌sekẹ su ral᷊ungu těllung komol᷊ang e; kụ apang komol᷊ang e, nitěmbonang keng Yoab, Abisai tuaring Yoab, dingangu i Itai wọu Gat. Ratu nẹ̌berạ e su manga taumatane angkuěng, ”Iạ e mal᷊aing tumol᷊e ringangi kamene.”

³Arawe i sire simimbahẹ̌ u, ”Kumbahang Tuang. Batụu kereu i kami sahěsekang tumal᷊ang, arau walạewe sěmběka wọi kami e mate, sekẹ bědang tawe nasahẹ, watụ u kai i Tuang rẹ̌deakeng i sire. I Tuang e mẹ̌sul᷊ung u i kami mapul᷊o hiwu su kataune arẹ̌gane. Ore we lai něngalembong kapiaěnge i Tuang e, měndingọ u sasumbala si kami wọu soa e.”

⁴Bọu e ratu nẹ̌berạ e, ”Mapiạ e, balạewe i kamene.” Bọu e i sie rimarisị su sěndihang u těbang soa, arawe kěbị manga ghapaěng e nẹ̌papangantehẹ̌ sol᷊ong l᷊ikude, kụ komol᷊ang keng pẹ̌tahạ sěhiwu ringangu pẹ̌taha mahasụ su kataune.

⁵Bọu e ratu e nẹ̌parentạ e si Yoab, Abisai ringangu si Itai, angkuěng, ”Kumbahang be i kamene iapal᷊esẹ i Absalom umbaseng ene ual᷊ingu iạ.” Kěbị gapaěng e nakaringihẹ̌ parentan Daud e.

⁶Bọu e nẹ̌buạ e wuntuang i Daud e simekẹ buntuang u Israel kụ i sire něbawuno su kěhung Efraim.

⁷Buntuang u Israel e nikawatạ kareạ u manga taumatang Daud; kawawatạ be masaria, hakịu 20.000 su kataune naoha su sahěllo ene.

⁸Pẹ̌sasekẹ nangělikụ kạguwạ u tampạ ene, dingangu lembong kal᷊awokang e taumata e nate su kěhu wọu apang nate nẹ̌bawuno.

⁹Piạ i Absalom simakẹ e su wagal᷊ẹ̌ e, i sie sěngkalěndị e nẹ̌sombang u manga taumatang Daud e. Bagalẹ̌ ene kai nasahe su al᷊ungu kalu masaria ringangu masanạ, ku těmbọ i Absalom e kai nasangkong su lelange. Bagalẹ̌ e naněpasu tatal᷊ange arawe i Absalom e natěntang dingangu nawiting sene.

¹⁰Sěngkatau wọu taumatang Daud nakasilo, ringangu něngalakẹ̌ si Yoab, ”Tuang, kanini iạ kai nakasilo si Absalom nasangẹ su kalu ghẹ̌guwạ!”

¹¹I Yoab simimbahẹ̌, ”Mambeng kinasilonu i sie? Kawe tawe l᷊igha nipatenu i sie? Angkueěngu i kau kai nakatarimạ mapul᷊ong kal᷊ěpa roitẹ̌ sal᷊aka ringangu papẹ̌gong u kal᷊uwaeng sěmbua.”

¹²Kai tau ene simimbahẹ̌ u, ”Baewe iạ gělikang u sěhiwu su kal᷊ěpane roitẹ̌ sal᷊aka e, kai iạ e tawe mapulu mapakasusang ahusu ratu e. I kami kěbị e kai nakaringihẹ̌ apang niparentan datu si Tuang, si Abisai ringangu si Itai u, kumbahang bue makal᷊esẹ si Absalom umbaseng e, baugu ratu.

¹³Kai manga i Absalom kanini takụ nipate, iạ mambeng kinasingkateng u ratu e, batụu kěbị e mang i karingihẹ̌ — dingangu i Tuang e tawe makatatawang si siạ.”

¹⁴”Kuhạ e! Masuẹ e tempo kětạ eng mẹ̌sẹ̌sasimbahẹ̌ dingangu e,” angkuěng i Yoab. Bọu e i Yoab něngal᷊a e těmbahẹ̌ těllum bua e, kụ tiněkạ e su sěbạ i Absalom su tempọ eng bẹ̌dang biahẹ̌ kạbawiting su kalu e.

¹⁵Samuring ene e, mapul᷊ong katau wọu taumatan Yoab němpẹ̌tatibulu kụ, němpěmate.

¹⁶I Yoab e napal᷊untingiheng slompretẹ̌, hakịu manga taumatane němpangědo něnahusu ghapaěng u Israel.

¹⁷Bọu e kasuang i Absalom nịlahengkẹ kụ niwahung su pahighi su kěhu. Bọu e pahighi nilaambungangu watu kareạ i sire niapakarangẹ. Kěbị buntuang u tau Israel e nahuntal᷊ang, kụ sěngkatau-sěngkatau e nasideạ bal᷊ene.

¹⁸Tental᷊ang i Absalom bẹ̌dang biahẹ̌ e, i sie kai niapararisị u watu tiala si Wal᷊ang Ratu, watụ u i sie e kai tawẹ anạ e esẹ baugu apạněpasu walạge. Batu tiala ene nisěbạ e tinuhụ su arenge sẹ̌sane, kụ sarạeweng ěllo ini e batu tiala ene kẹ̌kasingkateng kere watu Tialang Absalom.

¹⁹Bọu ene nẹ̌berạ e i Ahimaas anạ i Zadok si Yoab, ”Apakawalako iạ tumal᷊ang mẹ̌sombangu ratu e, kụ makapẹ̌bawa habaru ral᷊uasẹ̌, u MAWU niapakasal᷊amati i Tuang bọu rokạ e.”

²⁰”Kumbahang”, angkuěng i Yoab, ”hẹ̌dọ e mẹ̌saụ. Ěllo ini tawe wotonge i kau mẹ̌bawa habarẹ̌ u, ahusu ratu e kai napohong.”

²¹Bọu e i Yoab nẹ̌berạ e su sěngkatau ěllange tau Sudan e, ”Rakọko paul᷊ị su ratu e apạ eweng kinasilonu e.” Paparentaěng ene nẹ̌tumpěkuhẹ̌ kụ naněmba, wọu e natamaị e ringangu kạtal᷊ange.

²²Arawe i Ahimaas e, mạnahěsẹ si Yoab, ”Balạewe měnsang apa mariadi, apakawalako l᷊ai iạ mẹ̌bawa habarẹ̌.” ”Unụ e wue i kau e kereng kakětị e tamai ringang, anạku?” kakiwal᷊on Yoab. ”I kau tawe makatarimạ buang saghedu e waugu ene.”

²³”Tawe mẹ̌kapura,” angkuěng i Ahimaas kapia, ”Iạ e matamai.” ”Kamageng kerene ute rakọ e,” angkuěng i Yoab. Tangu timal᷊angke i Ahimaas měbẹ̌batụ dal᷊eng kụ lumiu Wal᷊ang Yordan, kụ ta nararěnnạ e i sie nakal᷊iu něngal᷊imona ěllang bọu Sudan kanini.

²⁴I Daud e kụkaiang su wělạ u těbang dal᷊unge ringangu těbang l᷊ikụdu soa e. Měndariagạ naawị e su wowoʼm meselẹ̌ dingangu rimarisị e su atụ u těba. Piạ i sie něhengkẹ u matane, ute kinasilone piạ e tau sěngkatau ramahi tụtal᷊ang.

²⁵Měndariagạ ene namohangke tanaẹ, kụ naul᷊ị u hal᷊ẹ̌ ene su ratu, kụ datu e nẹ̌berạ e, ”Kereu i sie sẹ̌sane, ute nasahẹ be habarẹ̌ mapia niwawane.” Piạ tau ene maranịeng mahumpạ,

²⁶měndariagạ ene nakasilọ e lai sěngkatau mal᷊aing tụtal᷊ang. I sie namohangke lai, ”Kakělla! Piạ l᷊ai tau sěngkatau ramahi tụtal᷊ang.” Ratu simimbahẹ̌ u, ”Mambeng těngadẹ̌, i sie mẹ̌bẹ̌bawa habarẹ̌ mapia l᷊ai.”

²⁷Měndariaga ene nẹ̌berạ e u, ”Tau humotong kanini e kai i Ahimaas. Ěllang e masingkạ u katataing u tatal᷊ange.” ”I sie taumata mapiạ,” angkuěng u ratu e, ”sahẹ e, i sie měbẹ̌bawa habarẹ̌ mapiạ.”

²⁸Němohangke i Ahimaas nẹ̌gěllị u adatẹ̌ su ratu, bọu e nẹ̌tumpěkuhẹ̌ ku nẹ̌bera, ”Dalo su MAWU Ruatan Tuang, kụ seng něnarakang si Tuang i sire apan němpẹ̌buntirisang si Tuangku!”

²⁹Ratu e nakiwal᷊ọe, ”I Absalom umbaseng ene e masalamatẹ̌ bue?” I Ahimaas simimbang, ”Tuang, kanini piạ ěllang e nirolohi Yoab, ěllang e nakasilo ghanohạ masaria, kaiso ěllang e wěga wue měnsang apa e nariadi.”

³⁰”Rarisịko pai su sěmběka,” angkuěng u ratu e; tangú i Ahimaas nakoạ e sarang sěndihange kụ dimarisị sene.

³¹Bọu ene nawunạ e taumatan Yoab e, dingangu nẹ̌berạ e su ratu, ”Ěllang e kai mẹ̌bẹ̌bawa habarẹ̌ mapia waugu i Tuang u; sahěllo ini e, MAWU e kai něgěl᷊lị si Tuang kal᷊auntung su kěbị taumata kụ nạung měmpělẹ̌hamokẹ̌.”

³²Ratu e nakiwal᷊ọ e si sie, ”Měnsang i Absalom umbaseng e, masalamatẹ̌ bue?” Tangu ěllang ene simimbahẹ̌ u, ”Kěbị apan sekẹ i Tuang, dingangu kěbị e kụ apạ eng měmpělẹ̌hamokẹ̌ si Tuang nakahombangke kasasahẹ u pẹ̌bawiahẹ̌ e kerẹewe su umbaseng ene.”

³³Nakaringihẹ̌ ene e, ratu l᷊imembong nasusa, wọu e naawị sarang loahe rasị si wowon sasuěkang e, apịdu simangị kụkiạ, ”Oh anạku! Anạku i Absalom! Absalom anạku! Mapiaěngbe iạ e nate něngal᷊uang si kau anạku, Absalom anạku!”