Read Sangir SAMUEL KARUANE 19 Bible Online

SAMUEL KARUANE 19 - Sangir bible

SAMUEL KARUANE 19

¹Si Yoab nipaul᷊ikang, u Ratu i Daud e simangị dingangu nělutu waugi Absalom.

²Tangu ral᷊uasu kal᷊auntung su sahěllo ene e, nẹ̌bal᷊ui nakoạ kasasusa su kal᷊awọu tahapẹ̌sekẹ i Daud e, batụu i sire nakaringihẹ̌ u, i Daud e kai susangị u ahuse.

³I sire měngkatewe ringangu marěmasẹ̌ němpẹ̌bal᷊ị sol᷊ong soa e, kerẹewe tahapẹ̌sekẹ kụ nakapěndang namea ual᷊ingu timal᷊ang u watangeng e wọu pẹ̌seketang.

⁴Ratu e něnimbuhung gatine ringangu kimiạ e maihạ, ”Oh anạku! Anạku i Absalom! Absalom, anạku!”

⁵I Yoab natamai timatěngo ratu kụ nẹ̌bera, ”Sahěllo ini i Tuange, niapakamean taumatan Tuang e, sěmbal᷊iau kawe i sire mapakasal᷊amatu niawang Tuang, niawang manga ahusi Tuang, kawing i Tuang dingangu manga kapapuěng i Tuang e.

⁶I Tuang e kụkěndagu apạ eng mạběnsing i Tuang e. Kai arawe i Tuang e, kawe mạběnsingu apang kụkěndagi Tuang. Mambeng seng mal᷊ahẹ, u i Tuang e seng napasilong manga matatěllang dingangu ilasu měsasekẹ i Tuang e, mang tawẹ mangal᷊ene sarang kadodọ si Tuang. Kaiso i Tuang mambeng luhudu mal᷊uasẹ̌ kereu sahěllo ini i Absalom e wiahẹ̌ ringangi kami kěbị e masue mate.

⁷I Tuang e pẹ̌bangungko ringangu rakọko sěbang baugu mapakal᷊enehu naungu manga taumatan Tuang. Ěllang e mẹ̌salu su těngon MAWU e, kereu i Tuang e tawe mẹ̌sombang i sire e, kụ tangu sěhěbi ini lai tawẹ u sarang sěngkatau mapulu rumingang si Tuang. Ene mambeng mạngawẹ sawěda kasariaěnge su kanandụ u pẹ̌bawiahi Tuang.”

⁸Bọu e nẹ̌bangungke ratu mase simẹ̌bang, kụ kimaiang su rěduhu těbang istana. Manga taumatane nakaringihẹ̌ u i sie kai ene sene kụ ute i sire kěbị nasue nahunděnta, kụ timatěngo si sie. Su tempo ene tangú, kěbị gapaěng u mẹ̌sasekẹ u Israel nasue nahuntal᷊ang u watangeng e, kụ napul᷊ẹ sol᷊ong bal᷊eng sěmbaụ-sěmbaụ.

⁹Bọu tal᷊oarang kěbị balagheng u Israel e, siměpụ e pẹ̌gaghanohạ. Angkuěng i sire u, ”Ratu i Daud e, niapakasal᷊amati kitẹ bọu tau Pilistin e, ringangu niapakapěllọ i kitẹ bọu manga sekẹ bal᷊ine e, arawe orasẹ̌ ini i sie seng timal᷊ang u watangeng e wọi Absalom ringangkeweng naněntang u soa ini e.

¹⁰I Absalom e ruikang i kitẹ iapakakoạ datu e, kai orasẹ̌ ini e i sie kai nawihua su pẹ̌bawunoěng. Unụ ewue tawẹ u sarang sěngkatau piạ tětehẹ̌ nẹ̌bawa Ratu i Daud apẹ̌bal᷊i?”

¹¹Bawera tamai ene timěpasẹ̌ lai sol᷊ong anun Datu i Daud.[50] Kụ ual᷊ingu ene ute, i sie něndoloheng Imang i Zadok rěduang Imang i Abyatar e, pinakiwal᷊o su manga těmbonang u Yehuda e kerei, ”Unụ e wue i kamene kawe nakoạ kasamuriange nẹ̌těgạ dingangu timol᷊e ratu nẹ̌bal᷊ị sol᷊ong istanane?

¹²Bal᷊inewe i kamene manga anạ u sěngkatauku e, ringangu ghal᷊ipohong hapịku? Tumanị e wue i kamene kụ kasamuriange nẹ̌gausẹ̌ takadeạ u iạ mapul᷊ẹ?”

¹³I Daud e mal᷊aing něndolohi sire niapẹ̌bera si Amasa angkuěng, ”Bal᷊inewe i kau e hapịku? Manětạ bọu ini iạ měnduị i kau makoạ měnaněmbonang u tahapěsekẹku e, ipěngganti si Yoab. Milumbạko Ruata e měmihua si siạ, kereu hal᷊ẹ̌ ene tawe takụ koateng.”

¹⁴Kerene i Daud mambeng nẹ̌barạuntung něngal᷊ạ naung u kěbị tau Yehuda e, hakịeweng i sire něndingọ u tatanata su ratu e, tadeạu mẹ̌bal᷊ị sol᷊ong istana e, ringangu kěbị apạeweng mělahal᷊ẹ̌ u kantorẹ̌ e.

¹⁵Tangu nẹ̌buạ e ratu, kụ nawunạ u Sal᷊ụ u Yordan, kụ těntal᷊ang ene, tau Yehuda e seng těbe nawunạ su Gilgal e, waugu měněnsomahẹ̌ datu, kụ tumaking si sie l᷊uměbạ sal᷊ụ ene.

¹⁶ I Simei anạ i Gera, tau Benyamin e, nẹ̌bawa sěhiwu su kataune wọu ghal᷊ipohong Benyamin e, mase ringangkeng masahawụ nahunděnta ringangu manga tau Yehuda e, němpaněnsomahẹ̌ datu. Kerene lai i Ziba paparentaěng i Saul ringangu i sire mapul᷊o l᷊ima su kataune anạ e esẹ, dingangu ruam pul᷊o su kataune manga paparentaěng e, i sire l᷊imẹ̌bạ Sal᷊ụ u Yordan e, těntal᷊ang datu e tanạděnta.

¹⁷

¹⁸I sire nẹ̌sasumbala niapal᷊ěbạ[51] u ratu i sire tahanạ e, apidẹ̌ mẹ̌kẹ̌koạ apang ipẹ̌parentan datu si sire. Su tempọ e i Daud l᷊uměbạ sal᷊ụ e, i Simei kai nẹ̌suba si sie apidẹ̌ nẹ̌bera,

¹⁹”Ěllang e mẹ̌gẹ̌gausẹ̌ milumbạko i Tuang e tawe mangěnna u ěllang e těbe piạ sal᷊ane. Apakawalako i Tuang mẹ̌timbul᷊eng apang nikakoạ u ěllang e, su ěllo i Tuang e naněntang u Yerusalem.

²⁰Ěllang e seng nakapěndang, batụu ěllang e seng nẹ̌koạ dosa, kụ ual᷊ingu ene, su tal᷊oarang manga walagẹ̌ mạtanạ su sawěnahẹ̌ e, kai ěllang e kakal᷊imonaěnge riměnta mẹ̌tẹ̌těgạ si Tuang e su sahěllo ini.”

²¹I Abisai anạ i Zeruya nakaringihẹ̌ ene e, nẹ̌berạ e, ”I Simei seng hinong i hukung u papate, batụu i sie kai něngane ratu pinilen MAWU e.”

²²Kai i Daud nẹ̌bera si Abisai ringangu si Yoab tuhang e, ”Kumbahang be mẹ̌těngkal᷊aụ. Unụ e i kamene mapakasusang iạ? Sahěllo ini iạ e saụ makoạ datung Israel, ringangu tawe wotonge piạ taumatang Israel i hukung u papate e.”

²³Bọu ene nẹ̌salụ e ratu e si Simei, ”Ia e mẹ̌pạdul᷊i, sarang be i kau sarung tawe i hukung u papate.”

²⁴ Mefiboset pulung i Saul e, mal᷊aing diměnta, waugu tumol᷊e mětěgạ datu e. I sie e tawe nanguhasẹ̌ l᷊aede, tawe němotọ bianggụe, tawe lai nangunsạ pakeange e, rongkẹewen Datu i Daud naněntang u Yerusalem e, sarạeweng lai i Daud nẹ̌bal᷊ị dingangu sal᷊amatẹ̌ e.

²⁵Su tempong i Mefiboset narěnta wọu[52] Yerusalem baugu mẹ̌těgạ datu e, tangu ratu e nẹ̌berạ e si sie, ”Mefiboset, kawe unụ e i kau tawe timol᷊e siạ su tempo ene?”

²⁶I sie simimbang, ”I Mawantugẹ̌, i Tuang masingkạ u ěllang e kai pengkadẹ̌. Ěllang e kai něndolohu mẹ̌tatangkiang ěllang, e pẹ̌nadia kalide kụ hinong sengkaneng baụgu tumol᷊e si Tuang. Kai ěllang nilahodateng u mẹ̌tatangkiang ene.

²⁷Ěllang e mal᷊aing niwěsohang su těngon Tuang. Kai i Tuang e tạbidạ eng malạekatu Mawu. Ual᷊ingu ene, koạ e apạeweng pẹ̌pěndangeng i Tuang mapia.

²⁸Kěbị apang ghal᷊ipohong amangku e, hinone makatarimạ u hukumang papate wọi Tuang, kaiso ěllang e kawe niapakawalang Tuang niapatol᷊e nẹ̌simokol᷊ẹ̌ su istana, kụ orasẹ̌ ini ěllang e tawe wahani saụ mẹ̌dorong, měnsang apạ e wọi Tuang e.”

²⁹Ratu e simimbahẹ̌, ”Tawahal᷊uasu i kau saụ mahumberang apa. U iạ e kai němutusẹ̌ u, mẹ̌gěllị u patikụ arětạ i Saul baụgi kau e, ringangu waụgi Ziba e.”

³⁰Tangú i Mefiboset simimbang u, ”Balạ e i Ziba e apěnarimạ kěbị. Ěllang e seng nakapěndang natatapẹ̌, ual᷊ingu i Tuang e seng nẹ̌bal᷊ị dingangu nasal᷊amatẹ̌.”

³¹ I Barzilai tau Gilead e, mal᷊aing diměnta wọu Rogelim e; baugu mahundingangu ratu luměbạ Sal᷊ụ u Yordan.

³²I Barzilai e kai sěngkatau seng tumanị e maghurang, umure seng ual᷊um pul᷊o su taunge. I sie kai sěngkatau kalạ, dingangu kạděngụ u ratu nạung mạtanạ su Mahanaim e, kai i Barzilai měnanadiane simokol᷊u ratu e.

³³Ratu e nẹ̌berạ e si sie angkuěng, ”Tol᷊eko ringangku sol᷊ong Yerusalem e, kụ apạ eng pandungang u e, hẹ̌dọ e sadiaěng kěbị paị sene.”

³⁴Kai i Barzilai simimbahẹ̌ u, ”Ěllang e seng ta makapẹ̌biahẹ̌ mararěna e, kụ apa we gunane iạ e mahundingang si Tuang sol᷊ong Yerusalem e?

³⁵Umuru ěllang e seng ual᷊um pul᷊o su taung e, ringangu seng tawẹ apa wẹ̌dang makakal᷊uasẹ̌ ěllang e. Ěllang e seng tawe saụ makatemang apa kanengang, ringangu apa inungang e, ringangu ěllang e seng tawe lai makaringihẹ̌ tingihu taumata měmpẹ̌kẹ̌kantarị. Ěllang e, kětạeng makoạ bawawaěngi Tuang.

³⁶Ěllang e seng ta hinong makatarimạ u sasewa masaria ene. Ěllang e kětạeng mapulu tumol᷊e si Tuang pirang kal᷊empang l᷊uměbạ Sal᷊ụ u Yordan e.

³⁷Masue ene tangú, apakawalạ e ěllang e mapul᷊ẹ sol᷊ong bal᷊e kụ maněntang su masandigu pěndal᷊ẹ̌bịngang u ghaghurang u ěllang e, kụ kai ini e anạ u ěllang e, i Kimham. Apakawalako i sie tumol᷊e si Tuang e, ringangu apẹ̌koạ e si sie apạ eng tinganeng i Tuang mapia e.”

³⁸Ratu e simimbang, ”Kimham e, takụ bawa ěng, dingangu takụ i urusẹ̌ kerẹewe i kẹ̌kapulunu e, ringangu kěbị apạeng dẹ̌dorongangu si siạ e, takụ iapakaghanapẹ̌.”

³⁹Bọu e i Daud e ringangkeweng kěbị taumatane e, liměbạ e Sal᷊ụ u Yordan. Tangú i Daud e, něnděngu si Barzilai e, ringangu nẹ̌tal᷊ei ringange. Nal᷊iung ene, i Barzilai napul᷊ẹ e sol᷊ong bal᷊ene.

⁴⁰Kěbị buntuang u tau Yehuda e, ringangu sěmběka wọu wuntuang u Israel e, nahuntol᷊e ratu e, l᷊iměbạ sal᷊ụ. Nal᷊iung ene e, ratu naněpasẹ̌ sol᷊ong Gilgal, ringangu i Kimham e timol᷊e si sie.

⁴¹Bọu ene narěntạ e kěbị tau Israel e nẹ̌tẹ̌ngon datu, kụ nẹ̌berạ e si sie, ”Tuang! kawe unụ e anạ u sěmbaụ i kami taumatang Yehuda e kai piạ ěnnan sire u, kai kětạ eng i sire piạ hakẹ̌ e mẹ̌těgạ dingangu rumingan Datu ringangu manga ral᷊ohoʼm bal᷊ene, ringangkewe lai manga taumatan Tuang e l᷊uměbạ Sal᷊ụ u Yordan e?”

⁴²Tangu tau Yehuda e simimbahẹ̌ u, ”Mang kerene, watụ u ratu e kai hapị i kami. Kawe unụ e i kamene l᷊imangehẹ̌? Apạ eweʼm makoạ pakẹ i kami kai tanggunang u ratu e tangu, arau i kami kai makatarimạ gaghěllị ngae?”

⁴³Tau Israel e simimbahẹ̌ u, ”Kai něngalembong kasariane wọu mapul᷊o sul᷊ẹ e, hakẹ̌ i kami su ratu e, wọu hakẹ̌ i kamene, kěbị manimbe ratu e kai hapị i kamene. Kawe unụ e i kamene kai tụtingangu sahene si kami? Abe kiwul᷊ei u, kai i kami kakal᷊imonaěng e něgěllị u těgu e, waugu mapẹ̌bal᷊ị u ratu e.” Kai tau Yehuda l᷊imembong kakětị e wọu tau Israel, mase i sire tawe mapulu karendehang.