Read Sangir SAMUEL KARUANE 2 Bible Online

SAMUEL KARUANE 2 - Sangir bible

SAMUEL KARUANE 2

¹Bọu ene i Daud nakiwal᷊o su MAWU, ”Měnsang i Kau MAWU mapulu iạ tamai měngawasa soa sěmbaụ su Yehuda?” ”Kerene,” angkuěng u MAWU. ”Soa sude?” angkuěng i Daud. MAWU simimbang, ”Sorong soang Hebron.”

² Bọu ene i Daud nakoạ sarang Hebron dingangu kawinge rarua: i Ahinoam tau wawine bọu Yisreel dingangu i Abigail bal᷊ung Nabal wawine bọu Karmel.

³Kerene lai apan tumatol᷊ene ringangu walagi sire sěngkatau-sěngkatau e timol᷊e si Daud, kụ bọu e i sire něnatapẹ̌ su Hebron nangělikụ e.

⁴ Samuring ene nahunděntạ e tau Yehuda su Hebron, kụ něhengkẹ si Daud nakoạ datu pěněmbonang kawanuang Yehuda. Su tempong i Daud nakaringihẹ̌ u tau Yabesh su Gilead kai měmpělěbing u maieti i Saul,

⁵i sie něndingọ u rarolohang apẹ̌něpasu tatanata, ”Mal᷊umbạko MAWU měngal᷊amatẹ̌ si kamene, batụu i kamene nanodẹ u kasasatiang kamene, siạ datung kamene kụ nělěbing maiete.

⁶Ual᷊ingu ene, mal᷊umbạko MAWU měnodẹ u kakěndagʼE ringangu satia-Ne si kamene. Ual᷊ingu kakanoạ i kamene kai mapia, ute iạ e mal᷊aing měkoạ mapia si kamene.

⁷Pakatatirěda naung i kamene, ringangu kěngkakoạko kere mẹ̌sasekẹ! I Saul ratung kamene mamben těngadẹ̌ seng napohong, arawe kal᷊awọu tau Yehuda e seng něnduị u iạ niapakakoạ datun sire.”

⁸Měnaněmbonang u mẹ̌sasekẹ i Saul, arenge i Abner anạ i Ner, kai timal᷊ang u wadange ringangi Isyboset anạ i Saul, sol᷊ong Mahanaim, su sěmbekan Sal᷊ụ u Yordan.

⁹Paị sene i Abner něhengkẹ si Isyboset nikoạ datung kawanuang Gilead, Asyuri,[2] Yisreel, Efraim dingangu Benyamin, ore lai su kaguwạ u Israel.

¹⁰Epạ u pul᷊o su taunge umuri Isyboset nihengkẹ nakoạ datun tau Israel, kụ i sie nẹ̌parenta dua taung kạrěngụ e. Arawe kawanuang Yehuda mang tatapẹ̌ satia si Daud,

¹¹mase i Daud nẹ̌parenta Hebron sěmbahageang bọu Yehuda e pitu taung sitenga kạrěngụ e.

¹²Su sahěllo i Abner e kai nakoạ sol᷊ong Mahanaim su soang Gibeon, niringaneng u manga ringangi Isyboset.

¹³Kerene lai i Yoab (i ninange i sẹ̌sěbạ si Zeruya), kai ringangu manga ringangi Daud nẹ̌timona soa ene. I sire ruang komol᷊ang kai nẹ̌darokạ gati tumatěngo l᷊aehu Gibeon; i Abner dingangu měnanumběkane su wiwihe sini, arawe i Yoab dingangkewen měnanumběkane su wiwihe pai.

¹⁴Bọu nẹ̌berạ e i Abner si Yoab u, ”Bọete i kitẹ měndolohẹ̌kon taumatang kitẹ i pẹ̌tanding!” ”Mapiạ e wue,” angkuěng i Yoab.

¹⁵Bọu ene němpẹ̌tamaị e mapul᷊o dua su kataune hěnton Benyamin piněngal᷊uang si Isyboset dingangu mapul᷊o dua su kataune bọu taumatan Daud.

¹⁶I sire tahạ pẹ̌sěngkatau měgẹ̌gaghambul᷊ẹ̌ utạ dingangu němpẹ̌tatěkạ su tiang i sire, hakị eweng i sire nate sěngkakate. Hakịu ene tampạ su Gibeon ene nisěbạ ”Bawaelang u Warạ”.

¹⁷Samuring ene nariadị e pẹ̌sasekẹ kụ i Abner ringangkewen manga sordadong Israel e nikawatạ kareạ u taumatan Daud.

¹⁸Anạ i Zeruya těllung katau; i Yoab, Abisai, Asael ene sene, kụ i Asael mạngawẹ tatal᷊ang u kijang kasahawụ e,

¹⁹tawẹ ědone manahusu si Abner.

²⁰I Abner něbihụ e sarang l᷊ikudẹ̌ kụ nakiwal᷊o, ”I kau i Asael?” I sie simimbang, ”Ore!”

²¹”Kumbahang manahusu si siạ!” angkuěng i Abner. ”Kěnangko pěnamẹ sordado sěngkatau, kụ al᷊ạko aghide.” Kai i Asael e mang těbe mẹ̌nahusu si sie.

²²I Abner e saụ nẹ̌bera sěnsul᷊e si sie, ”Kumbahang manahusu si siạ! Měntěhang i kau e, mambeng harusẹ̌ takụ pateěng. Tangú kai makoạ kereapa, kereu iạ makasilo ghating Yoab tuhang u e?”

²³Kutẹu i Asael kawe těbe tawe mangědọ, i Abner e něleang u wěngkone sarang l᷊ikudẹ̌,[3] kụ nihino su tiang i Asael timěpasu wěngkile. I Asael e nawatang kụ nate su tampạ ene. Kěbị taumata němpahunděnta su tampạ kinal᷊enggeěng e, kụ němpěngirul᷊e sene.

²⁴Arawe i Yoab rẹ̌duang Abisai naněpasu pěnanahusu si Abner. Su tempom matangěllo simědạ, nawunạ e i sire su Bukidu u Ama, kụ ene su sěmběkan daking Giah tụtatěngo wanua l᷊ingging Gibeon.

²⁵Sene manga taumata wọu kawanuang Benyamin nẹ̌saụ němpẹ̌tatamba ringangi Abner, bọu e němpẹ̌papangatorẹ̌ su wanggilu wul᷊ude sẹ̌mbaụ.

²⁶Bọu tampạ ene i Abner nẹ̌berạ e ringangu tingihe maihạ si Yoab, ”Mambeng sarang kạděngụ e i kitẹ mẹ̌sekẹ? Mang tawe kinahěnganeng u, pěsasakẹ ini kětạeng mẹ̌bẹ̌bawa sarang kapapaị? I kami e kai anạ u sěngkataunu tamba wanua. Relaing kạděngu e i kau mapulu měngampal᷊ẹ̌, těntal᷊ang i kau makapěngoro taumatanu tadeạu mangědọ měnahusu si kami?”

²⁷I Yoab simimbahẹ̌ u, ”Su Mawu Ruata kụ biahẹ̌, kereu i kau tawe měnětạ u wisaranu, ute taumataku e, mang tamai manahusu si kamene sarang diěllo mal᷊ukadẹ̌.”

²⁸Bọu e i Yoab něniụ slompretẹ̌, nakoạ tatiala su taumatane, tadeạu měmpangědo manahusu tau Israel, tangú naědọ e pẹ̌sasekẹ ene.

²⁹Sěhěbi tinalung i Abner dingangu taumatane mạl᷊aantehẹ̌ mạhundal᷊eng simahe Wal᷊ang Yordan, mase l᷊iměbạ Sal᷊ụ u Yordan, bọu e naněpaseng daral᷊eng i sire sarạeweng su kanandụ u ěllo tuhụ e, ute nawunạ e su Mahanaim.

³⁰Lěpasewe i Yoab nangědo nanahusu si Abner, i sie něngomol᷊ẹ̌ kěbị taumatane. Sul᷊iung i Asael, nal᷊ahẹ mapul᷊o sio su kataune wọi sire kụ nailang.

³¹Taumatan Daud e, seng nakapate těllu hasụ ěnnung u pul᷊o su kataune bọu sěngkomol᷊ang u taumatang Abner, bọu kawanuang Benyamin.

³²Samuri wọu ene i Yoab dingangkewen manga taumatane nělěke maieti Asael, kụ nilẹ̌bing i sire su pěndal᷊ebingang anạ u sěngkataune su Betlehem. Bọu e i sire rimal᷊eng su sẹ̌hěbi tinalung kụ nawunạ su Hebron sěngkariěllone mal᷊ukadẹ̌.