Read Sangir SAMUEL KARUANE 20 Bible Online

SAMUEL KARUANE 20 - Sangir bible

SAMUEL KARUANE 20

¹ Su soang Gilgal e, kai piạ sěngkatau taha pěndariha arenge i Seba. I sie anạ i Bikri, wọu pal᷊ahěntoʼm Benyamin. Su tempong ghapaěng u tumatol᷊e si Daud e riměntạ e, i Seba e nẹ̌tiụ e napiri kụ namohang u, ”I kitẹ e tawẹ kal᷊ahěmpukang e ringangi Daud. Apa wue gunane i kitẹ e tumol᷊e si sie? Ei tau Israel bọete i kitẹ mapul᷊ẹ.”

²Tangú tau Israel naněntang i Daud e, kụ timol᷊e si Seba. Arawe tau Yehuda e mang těbe satia tụtol᷊e si Daud bọu Sal᷊ụ u Yordan sarạewěng Yerusalem.

³ Sarạeng i Daud narěntạ e su wal᷊ene su Yerusalem e, mapul᷊ong katau kapapuěnge nạung nitěntang baugu pẹ̌lěhapa wal᷊ene ute kai nipěllọ su wal᷊e kụ piạ měndariagạ e. Kěbị apạ eng hinong makoạ pakẹ i sire e, nisadiane sengapạeweng kasukụ e, kụ i Daud e semben tawe nẹ̌saụ nẹ̌tikị dingang i sire. I sire e kai kạl᷊ahae, kụ pẹ̌bawiahi sire tạbidạ eng pẹ̌bawiahu taumata wal᷊u sarạeng papate.

⁴Bọu e ratu e nẹ̌parenta si Amasa u, ”Komol᷊ẹ̌ko tau Yehuda e, kụ damahiko rěnta ringangi sire su těllu ěllo ramahi e.”

⁵Tangú natamaị e i Amasa nangomol᷊eng sire e, kai arawe i sie e, tawe nẹ̌bal᷊ị su tempo nitantun datu e.

⁶Bọu e ratu nẹ̌berạ e si Abisai u, ”I Seba kai něngalembong makasusa si kitẹ e, bọi Absalom. Ual᷊ingu ene e, bawako manga taumataku, mase sahusuẹ e i sie, tadeạu i sie kumbahang be makakaiang suapan soa piạ tatěndạ e, ringangu i sie e makatal᷊ang bọi kitẹ e.”

⁷Tangú su pěnaněmbonang i Abisai, gapaěng i Yoab, dingangu ghapaěng u měndariagạ datu e, sarạeweng kěbị apang tahapẹ̌sekẹ bal᷊inẹ e, něbuạ e wọu Yerusalem němpěnahusu si Seba.

⁸Su tempọ eng i sire nawunạ u watu masaria su Gibeon, i Amasa e riměnta nẹ̌sombang i sire. Su tempo ene, i Yoab e kai nẹ̌pakẹ u pakeang u pẹ̌seketang dingangu pedang sire e kai piạ homane kạl᷊aehẹ su kal᷊uwaenge. Piạ i sie limempang ke tamai e, homang peda e kai napěllọ, sarang be pedane naal᷊ing su l᷊imane kaihi.

⁹I Yoab nẹ̌berạ e si Amasa, ”Kereapạ e habarẹ̌ hapị?” apidu něhěgo wianggụ i Amasa ringangu l᷊imane koaneng e, tạbidạu měnděngu si sie.

¹⁰I Amasa tawe nakasilo peda su l᷊imane kaihing Yoab e, sěngkalěndị e i Yoab e něněkạ u peda ene su tiang i Amasa e, hakịu ral᷊ohong tiange nasawuhẹ̌ su ěntana. I sie nawihua su tempo ene lai, hakịu i Yoab semben tawe nẹ̌saụ naněkạ. Bọu e i Yoab rẹ̌duang Abisai tuarine e, naněpasu pěnanahusu si Seba.

¹¹Sěngkatau wọu tahapẹ̌sekẹ i Yoab e rụdarisị si rẹ̌duhu maieti Amasa e, apidẹ̌ kạpẹ̌mohange u, ”I saing mạnumběka si Yoab rẹ̌duang Daud e, tol᷊ẹ e si Yoab.”

¹²Kasuang i Amasa narenọ u raha e, kạbawatedẹ̌ su wěntaʼn dal᷊eng. Tahapẹ̌sekẹ i Yoab kanini e nakasilo u kěbị taumata masahe sene mang maẹ̌dung. Tangú nịlahiude maiete sarang bawaelang e, kụ nilingkuwang u kahiwu.

¹³Saretạ u kasuang e niingkạ bọu ral᷊enge, ute kěbị taumata naněpaseng daral᷊eng i sire nahuntol᷊e si Yoab něnahusu si Seba e.

¹⁴I Seba e simahe kal᷊awọu kamonaěng u wanuang tau Israel e, mase nawunạ u soang Abel-Bet-Maakha e, nitol᷊eěng keng kěbị tau Bikri.[53]

¹⁵Manga taumatan Yoab nakaringihẹ̌ u i Seba e kai sene, tangú i sire e nẹ̌liwungke soa e. Likudu meselẹ̌ e měngkatewe nịlaěndukang u ěntana niapakal᷊ikụ kareạ i sire, ringangu něnetạ němpěmangkạ ěntana su al᷊ungu meselẹ̌ e mẹ̌gausu maopehẹ̌ e.

¹⁶Su soa ene kai piạ sěngkatau wawine matahuěnna, kụ i sie rimarisị su wowom meselẹ̌ e, bọu e i sie namohang u, ”Daringihẹ̌ko! Daringihẹ̌ko! Gauseko aparamahi i Yoab e, u iạ e kai mapulu mẹ̌bisaran sie.”

¹⁷Tangu narěntạ e i Yoab, mase nakiwal᷊ọ e tau wawine u, ”Kai i Tuang i Yoab?” ”Ore,” angkuěng i Yoab e. Angkuěng u tau wawine u, ”I Tuang e pẹ̌daringihẹ̌ko waweraku ini.” ”Mapiạ e wue,” angkuěng i Yoab e, ”iạ dumaringihẹ̌.”

¹⁸Angkuěng u tau wawine u, ”Nạung kạngerẹ e, biasang taumata e, kai mẹ̌bẹ̌bera kerei, ’Kamageng i kau e kai mẹ̌gausẹ̌ tatualagẹ̌ e, kakoạko sol᷊ong soan Abel’ — kụ mang kerene kẹ̌koateng i sire e.

¹⁹Soang kami Abel ini e, kai soa masaria, ringangu lai kai sěmbaụ soa kal᷊enehang e ringangu kasatiaěng e su ěntanang Israel e. Kawe unụ e i Tuang e kai piạ karaki mapakawinasa? Mapulu i Tuang mapakagholang u ěntana tataghuaneng u MAWU e?”

²⁰”Mamben tala,” angkuěng i Yoab e, ”iạ e mambeng těngadẹ̌ tawẹ karaki mapakagholang ringangu mapakagholọ u soanu e!

²¹Ene wal᷊inewe karaking kami. Kai arawe kụ sěngkatau i sẹ̌sěbạ si Seba anạ i Bikri asal᷊u wawul᷊udang u Efraim e, kai wọu něndariha su Ratu i Daud. Sarakangke i sie, wọu e iạ sumohọ bọu soa ini e.” Tau wawine nẹ̌berạ e u, ”Těmbọ u tau ene i wahung i kami si Tuang e, wọu tatěndạ ini e.”

²²Tangu ringangken pelẹesane tau wawine tamai naněpa su timonane su tumanạ u soa ene. Bọu ene tangú, těmbọ i Seba e nịbawusạ mase nịbawahung si Yoab. Samuring ene i Yoab nẹ̌tiụ e slompretẹ̌ kụ manga taumatane naněntangken soa e, kụ napul᷊ẹ sol᷊ong bal᷊eng sěmbaụ-sěmbaụ. I Yoab e napul᷊ẹ sol᷊ong Yerusalem timatěngo ratu e.

²³Kai ini e manga těmbonang nịlahengkẹ i Daud e: I Yoab e nakoạ těmbonang u kěbị buntuang u sumasekẹ u Israel e. Těmbonang u wuntuang arau opasi Daud e: i Benaya anạ i Yoyada.

²⁴Těmbonang u mělahal᷊ẹ̌ u sihasa e: i Adoram. I Yosafat anạ i Ahilud e, měndaresọ doitu wanua.

²⁵Su pěmohekang u wanua e: i Seya. Imang e: i Zadok rěduang Abyatar.

²⁶Imang su wal᷊en datu e: i Ira wọu soang Yair.