Read Sangir SAMUEL KARUANE 21 Bible Online

SAMUEL KARUANE 21 - Sangir bible

SAMUEL KARUANE 21

¹Su tempọ e i Daud mẹ̌pẹ̌parenta e, ute kai nihombangengu karal᷊unusẹ̌ arẹ̌gang těllu taung karengụ e. Tangú i Daud e nẹ̌dorong ke karal᷊ahẹ e su MAWU e, mạanung hal᷊ẹ̌ ene. Tangu MAWU e něhengetang u, ”Karal᷊unusẹ̌ e kai ual᷊ingu sol᷊ong Saul ringangu manga ghal᷊ipohone e, wạtu u i sire e kai němpěmate tau Gibeon e.”

² (Tau Gibeon e wal᷊inewe tau Israel e, kaiso i sire kai nataho su sěngkawahageaneng kadodọ bọu tau Amori. Tau Israel e kai nẹ̌diandi u, kai mẹ̌tahatanudẹ̌ si sire, kai i Saul e mang mẹ̌tawakal᷊i mapakatal᷊ang sire e, watụ u i sie kai mẹ̌tẹ̌tahuennang baugu tau Israel dingangu Yehuda e.) Wọu e i Daud nẹ̌kuị e tau Gibeon,

³kụ nakiwal᷊ọe si sire ungkuěng, ”Kai apạ e takụ ikakoạ baugi kamene? Iạ e mẹ̌meningu měnubusẹ̌ pẹ̌sasal᷊a kụ seng nikakoạ si kamene, tadeạu i kamene měngalamatẹ̌ umatu MAWU.”

⁴I sire simimbang u, ”Pěrkarang kami dingangi Saul sireng anạ u sěngkataune wal᷊inewe ensueěngu sal᷊aka arau wul᷊aeng, dingangu i kami e tawẹ kapulu mamate sěngkatau wọu tau Israel e.” Tangu i Daud nẹ̌berạ e u, ”Kamageng kerene ute, kai apa kapulung kamene hinong takụ koateng?”

⁵I sire simimbang, ”I Saul ratu pinileng MAWU e, kai piạ kapulune mapakawinasang kami kěbị e, kụ sarang be i kami matạdise wọu wanuang Israel e.

⁶Ual᷊ingu ene ute, sarakaneko pitung katau manga anạ esẹ bọu ghal᷊ipohone, tadeạu kai witingang i kami su těngon MAWU, su wul᷊udu Gibea soa en Saul Datu e.” Angkuěng u ratu e, ”Mapiạ e wue, kụ i sire e takụ i sarakang.”

⁷ Ual᷊ingu i Daud dẹ̌duang Yonatan e kai seng bọu němpẹ̌sasalu sěmbaụ su wal᷊ine, ute i Daud tawe měnarakang i Mefiboset anạ i Yonatan.

⁸ Arawe nial᷊ạ i Daud ute kawe i Armoni rẹ̌duang Mefiboset, irědua ahusi Saul kụ piněhěndingi Rispa anạ i Aya; ringangi i sire lima manga esẹ ahusi Merab sangiang i Saul, manga rariọ ene piněhěndingu pěkakawing i Merab dẹ̌duang Adriel anạ i Barzilai, tau Mehola ene.

⁹I sire nisarakang su tau Gibeon e, mase i sire pitu ene nịbawiting su wul᷊ude su těngọ en MAWU e, kụ nate e sěngkakate. Hukumang u papate ene e, kai nịkakoạ su panětakeng u i sire maměnsạ e.

¹⁰Tangú i Rispa kapapuěng i Saul e, nangěmpaheng karong baugi sie su wowoʼm batu, tampạ u manga maietẹ̌ ene mạl᷊aoha. I Rispa e tawe nangal᷊ing bọu ene nanětạ ewe wọu panětakeng u pěmaměnsạ sarang kewe rimasehẹ̌ su pangěnsueěng u pěmaměnsạ e. Manga maietẹ̌ e, tawe niapakawala nipakitemọ su manga manụ u winalangeng e, kereu su tempong ěllo, ringangu su manga binatang bawahani kereu su tempong hěbi e.

¹¹Sarạeng niapakasingkạ si Daud apạ eng kẹ̌koateng i Rispa e,

¹² i sie něngal᷊ạ e manga ruhing Saul dẹ̌duang Yonatan bọu manga tumanạ u soang Yabesh su Gilead. (I sire ene seng němpẹ̌tako ruhi ene wọu tanah lapang su soan Bet-San e tampạ u tau Pilistin němiting manga maietẹ̌ ene, wọuteng němatạ si Saul su Wul᷊udu Gilboa e.)

¹³Mangạ e ruhing Saul dẹ̌duang Yonatan e nịbawawa wọu ene, nikomol᷊ẹ̌ sěngkakomol᷊ẹ̌ dingangu ruhing sire pitu kạbawiting.

¹⁴Bọu e manga ruhi ene i, nidal᷊ěbing su pěndal᷊ẹ̌bingang i Kish i amang i Saul e su Zela su wanuang Benyamin. Sarạeng kěbị nịkakoạ kawe natuhụ su parentang datu e, tangu Mawu e rimaringihẹ̌ kakal᷊iomaneng i sire waugu soa ene.

¹⁵Piạ e pẹ̌sasekẹ su tal᷊oaran tau Israel dingangu tau Pilistin. I Daud dingangu manga taumatane e, natamai nẹ̌sekẹ dimokạ tau Pilistin. Su ral᷊ungu pẹ̌sasekẹ ene e, i Daud e kai limupa.

¹⁶Narěntạ e sěngkatau ansuang kụ arenge i Yisbi-Benob. Těmbahe kai nikoạ bọu timběha e, kụ běhạ e těllung kilo sitenga. I sie lai měngẹ̌ngehẹ pedane wuhu, dingangu su tiněnnane i sie e kai makapate si Daud e.

¹⁷Narěntạ e i Abisai anạ i Zeruya e nẹ̌tul᷊ung i Daud. Niseketangke ansuang ene kụ nịpapatene. Bọu ene mangạ e taumatan Daud mẹ̌dẹ̌dorong tadeạu i Daud e nẹ̌diandiu, seng tawe saụ tumol᷊e mẹ̌sekẹ. ”I Tuang e kai pěngumbalaěng u Israel, kụ i kami e madiri wue kailangeng, i Tuang,” angkuěng i sire.

¹⁸Mase nẹ̌saụ e lai nariadi pẹ̌sasekẹ dingangu tau Pilistin su Gob. Su ral᷊ungu pẹ̌seketang ene e, i Sibkhai tau Husa e němate ansuang sěngkatau arenge i Saf.

¹⁹Su pẹ̌seketangke we lai wal᷊ine, nědokạ u tau Pilistin su Gob e, i Elhanan anạ i Yair[54] bọu Betlehem e, němate si Goliat bọu Gat. Pul᷊ung těmbahi Goliat kạguwạ e kere kalu kakoạ kakahiwuang.

²⁰Nariadị e lai pẹ̌sasekẹ dimokạ tau Pilistin su Gat. Sene kai piạ sěngkatau ansuang kụ puluang mẹ̌sekẹ. Tal᷊imẹ̌dong l᷊aede ringangu limane tahạěnnung.

²¹I sie kai melẹ̌heghesẹ̌ tau Israel e, kụ ual᷊ingu ene i sie nịpapateng Yonatan anạ i Simea tuhangi Daud.

²²I sire ěpạ nịpapaten Daud e dingangkeng gapaěng e kai pal᷊ahěntong ansuang su Gat.