Read Sangir SAMUEL KARUANE 22 Bible Online

SAMUEL KARUANE 22 - Sangir bible

SAMUEL KARUANE 22

¹Sarạeng MAWU napakasal᷊amati Daud wọi Saul dingangu wọu kal᷊awọu sekẹ bal᷊ine e, i Daud e někentarị su těngon MAWU: [

²Iạ kuměndagị i Kau MAWU, u kai i Kau e kuatẹ̌ku.]

³MAWU e kai kere těndạ matoghasẹ̌ tampạ takụ pẹ̌sirungang. Ruataku e kai wukidẹ̌ batu tampạ u pẹ̌kakěllungangku. Kere sirung i pěnakạ si siạ takadeạ u iạ e matirěda hanesẹ̌.

⁴MAWU e kai hinong takụ ěnggahengu raralo, u kai i Sie něliung iạ bọu manga rokạku.

⁵Iạ e kạdal᷊ikụ su hombang u papate, ringangu su elehangu l᷊ěbang kawawinasa.

⁶Iạ e kạdal᷊ikụ su hombang u papate, sedẹ u papate e su těngoku.

⁷Su kasasẹ̌seku e, iạ l᷊uěnggo MAWU, iạ e mẹ̌mansagẹ̌ su Ruataku měgausẹ̌ tul᷊umang. Bọu wal᷊e-Ne e, i Sie makạdingihẹ̌ tingihẹ̌ku, dingangu mẹ̌nẹ̌naungbe kakahiorọku.

⁸Bọu e wanua e gimanuẹ̌ dingangu gimẹ̌guhẹ̌, manga wal᷊am bul᷊ude nal᷊engge dingangu kimendẹ e, ual᷊ingu l᷊ibutun Mawu Ruata!

⁹Pěpusẹ̌ e nasopạ e wọu ral᷊ungu irungʼE, putung dingangu tětuhẹ̌ siměbangke wọu mohongʼE.

¹⁰Langị e nibawěka-Ne, bọu e l᷊imintụ e i Sie, dingangu winawa marěndung su al᷊ungu l᷊aedʼE.

¹¹I Sie timělạ e simake kerub, i Sie mẹ̌tẹ̌tal᷊iong su panidu anging.

¹²I Sie nẹ̌těngkal᷊ingkubu watangenge su kararěndung; winawan děllang[55] masuwenehẹ̌ e nělikụ si Sie.

¹³Bọu kilạ su těngo-Ne, simẹ̌bangke winawa, tahiti watu, dingangu putung.

¹⁴Bọu e MAWU nẹ̌darělụ e wọu winangaeng, i Marangẹ niapararingiheng tingihʼE.

¹⁵I Sie něngěnạeng manga nanakeng, kụ niapẹ̌tal᷊eing manga rokạ e. I Sie mạpẹ̌nahedu kilạ masau, kụ nakariading sire nahuntal᷊ang.

¹⁶Běntang laudẹ̌ nawěngkal᷊ẹ̌, dingangu wal᷊an dunia nawualagẹ̌ su tempong MAWU e nẹ̌papagisu pẹ̌dune su manga rokạ e.

¹⁷Bọu wowone MAWU e nangul᷊uhu l᷊imane, niumbel᷊ẹ e iạ, nibawol᷊eng bọu akẹ maral᷊ung.

¹⁸I Sie napakasal᷊amatu iạ bọu rokạ matatoghasẹ̌, dingangu wọu manga taumata mạběnsingu iạ, batụu i sire e kai lembon matoghasẹ̌ bọu iạ e.

¹⁹I sire simekẹ si siạ su tempong iạ kinahombangeng e, kai MAWU nakoạ mẹ̌tatul᷊ung siạ.

²⁰I Sie nělěsọ u iạ bọu hombang dingangu napakasal᷊amatu iạ, batụu i Sie kai rul᷊ahimpulu si siạ.

²¹MAWU e mẹ̌malisẹ̌ kakanoạku su katěngadẹ̌, i Sie mẹ̌ngal᷊amatẹ̌ siạ e, batụu iạ e tawẹ sal᷊aku.

²²Iạ tụtuhụ parentang MAWU, dingangu tawe měngangensọ bọu Ruataku.

²³Kěbị apang i lẹ̌atore, takụ tẹ̌tahuěnnaěng, dingangu apang parenta-Ne e, tawẹ u ta katatuhukangku.

²⁴I Sie masingkạ u iạ e, tawẹ kakanoạ daral᷊akị dingangu iạ e matahu lingkadẹ̌ bọu kakanoạ sal᷊a.

²⁵Tangu MAWU e kai mạmal᷊isẹ̌ katěngadu kakanoạku, batụu i Sie masingkạ u iạ e tawẹ sal᷊aku.

²⁶MAWU! I Kau e kai satia su tau masasatia, dingangu mapia su taumata[56] kụ mapia.

²⁷Su těngon taumata susi e, i Kau mạpakal᷊ahẹ u kasasusi-Nu e, arawe kụ taumata raral᷊akị e, rẹ̌dokateng u.

²⁸Taumata kụ naunge masanạ e, iapakạsal᷊amatu, arawe taumata mal᷊aobotẹ̌ e, iapạkạěnsunu.

²⁹I Kau e mapạdaẹ u utụku, MAWU Ruataku mapạkatualagu kararěndungku.

³⁰I Kau Mawu mạpakatoghasu iạ baugu mapakawatạ u rokạku e; ual᷊ingu sumbalang Mawuku e, iạ nakaghoghahẹ̌ tatěndạ i sire.

³¹Kakakoạ u Mawu Ruata e, kai nasukụ, diandim MAWU mambeng pạngimangeng! I Sie kere kěllung su kěbị apạeng mẹ̌tẹ̌těngkal᷊indung si Sie.

³²Batụu kětạeng MAWU e Ruata; Ruata tumbạ tumatatawang si kitẹ.

³³I Sie Mawu Ruata mạpạkatoghasu iạ, dingangu mẹ̌kẹ̌koạ[57] dal᷊engku tạ sahaghene.

³⁴ I Sie mapạkatoghasu l᷊aedẹ̌ku kere l᷊aedu rusa e, dingangu mẹ̌lẹ̌hapa kasasalamatẹ̌ku su wawul᷊urang.

³⁵I Sie mạněntiro si siạ baugu měsekẹ e, hakịu iạ mapạkahatedu pulung matatoghasẹ̌.

³⁶MAWU! I Kau mạngěllung dingangu mapạkasal᷊amatu iạ, dingangu mạmal᷊insahẹ̌ siạ dingangu kawasa-Nu e, hakịu iạ nakoạ taumata timeleng ual᷊ingu pẹ̌kakoạʼU e.

³⁷I Kau mẹ̌lěhapa si siạ takadeạ u iạ e tawe i kataweng, dingangu iạ e tawe manawo.

³⁸Rumarokạ si siạ e, takụ sẹ̌sahusuang, dingangu i sire takụ iapakạbatạ, dingangu tawe su masohọ sarang kewe i sire měngkawinasa.

³⁹Takụ pẹ̌pahikang i sire sarang kewe tawe saụ makapẹ̌bawuạ kapia i sire něngkawatang tạ kěndịe su tengon l᷊aedẹ̌ku e.

⁴⁰I Kau něgěllị u kuate waugu iạ mẹ̌sekẹ, dingangu kal᷊auntung bọu kal᷊awọu rumarokạ siạ e.

⁴¹Manga rokạku e, mạhuntal᷊ang bọu iạ, dingangu apan taumata mạběnsing u iạ e, takụ iapakawinasa.

⁴²I sire měmpẹ̌mansagẹ̌, kai tawẹ u makatul᷊ung, i sire l᷊uěnggo MAWU e, kai MAWU tawe simimbahẹ̌.

⁴³I sire takụ lẹ̌lumadeng kere awul᷊ẹ̌ mạkakaesẹ̌ e, dingangu takụ kẹ̌kěkaheng kere lěbo su ral᷊eng.

⁴⁴I Kau něliung iạ bọu komol᷊angu taumata raral᷊akị e, ringangu niapakariading iạ iapẹ̌ngawasa manga wansa; wansa kụ sukawẹ̌gaku e, nakoạ ěllangku.

⁴⁵Manga taumata raghị e, kụkakoho si siạ, dingangu mararingihẹ̌ su laoroku.

⁴⁶Kawawahaning sire e, seng něngkailang; i sire němpẹ̌kende kụ nahunsěbang[58] bọu pẹ̌kakěllungang i sire e.

⁴⁷MAWU e wiahẹ̌! Kẹ̌karalong tumatatawang si siạ e. Pahul᷊esạkong kasariang Duata měnanal᷊amatẹ̌ku e!

⁴⁸I Sie něgěllị u kal᷊auntung si siạ bọu kal᷊awọu rumarokạ si siạ e, manga wansa e niapẹ̌těngkasumagʼE su těngoku e,

⁴⁹niapakasal᷊amatʼE iạ bọu manga rumarokạku e. MAWU! I Kau měgẹ̌gěllị si siạ kal᷊auntung bọu kalawọu rumarokạ siạ e, i Kau nẹ̌tahutěndạ u iạ bọu taumata mal᷊ahẹ̌gisẹ̌ e.

⁵⁰ Tangú iạ e lụl᷊esạ i Kau su tal᷊oarang manga wanua e, dingangu i Kau e takụ kantarikang u raralo e.

⁵¹Mawu e něgěllị u kal᷊auntung masaria su ratu e, nịlahengkẹʼE, dingangu i Sie tatapẹ̌ kụ kěndagu taumata pinilenʼE e, kụ i Daud dingangu manga pal᷊ahěntone sarạeweng kạděngụ e.