Read Sangir SAMUEL KARUANE 23 Bible Online

SAMUEL KARUANE 23 - Sangir bible

SAMUEL KARUANE 23

¹I Daud anạ i Isai e niapakaratu, dingangu nikoạ taumata masaria ual᷊ingu Mawu Ruatan Yakub. I sie nělanging kakantarị baugu Israel e, kụ i Daud nẹ̌sẹ̌bạeng bawera pangẹnsueěnge kerei:

²Rohkẹ̌ u MAWU e nẹ̌pakẹ u iạ apẹ̌bẹ̌bẹ̌ra u, tatanata ringangu urihẹ̌ e kai ene su wiwihẹ̌ku.

³Mawu Ruatan Yakub e nẹ̌bisara; si siạ měnanirung Israel e nẹ̌bera: ”Ratu nẹ̌parenta kawanua ringangu kaadilẹ̌, kụ naněmbonang dingangu tatuhụ e su MAWU e,

⁴I sie kere tualagu wěmbanaho nawingkahẹ̌ su mal᷊ukadẹ̌ e, su tempon l᷊angị matilang. I sie kere tualagu l᷊angị bọu nirasehang, nakariading děmpugẹ̌ melong kụ kerong maholẹ.”

⁵Kerene lai pal᷊ahěntoku nialamatengu Ruata e, riandi-Ne si siạ e tawe mẹ̌bawal᷊ui, riandi-Ne e kai sarang kạděngụ e, ringangu su kasasukụ, naatorẹ̌ su ral᷊ungu kěbị. Ruata e mapạtendang u kal᷊auntungku e, dingangu dumaraẹ kěbị apang kapulung dal᷊ungu naungku e.

⁶Arawe taumata kụ tatumatuhụ MAWU e, kai i sẹ̌sawuhẹ̌ kere larang. L᷊imang taumata kụ tawe makapangumbelẹ e;

⁷tawẹ u sarang sěngkatau mapulu manenggehẹ̌, kụ tawẹ aghide wọu kalu arau uase. I sire e kai pakasue pakịkaěng su putung.[59]

⁸Kai ini arengu manga mẹ̌sasekẹ i Daud timeleng: Kahumotongang e Ishbaal tau Hakhmoni, těmbonang u ”Katěllung kamonaěnge” (Komol᷊angu tahapẹ̌sekẹ těllung katau).[60] Su pẹ̌seketang sěnsul᷊ẹ e, i sie rimokạ ual᷊u hasụ su kataune, kụ i sire nasuẹ eng patene kareạ u wěngkone.[61]

⁹Taumata karuane su ral᷊ungu Komol᷊angu tahapẹ̌sekẹ těllung katau e ute, i Eleazar anạ i Dodọ bọu kawanuang Ahohi. I sie tụtataking si Daud e, tempon i sire timatěngo tau Pilistin su pẹ̌kakomol᷊ẹ̌ baugu měsekẹ. Su tempo ene e tau Israel e němpẹ̌sohọ,

¹⁰arawe i Eleazar něbal᷊ikěkasẹ̌ němamate tau Pilistin e, hakị u i sie nal᷊owe-lowe. Limane kai nahěme, hakịu i sie tawe nakapělọ u pedane. Su tempo ene MAWU nẹ̌gěllị u kal᷊auntung masaria su tau Israel. Buntuang u Israel kụ nạung bọu němpẹ̌sohọ e, saụ nẹ̌bal᷊ị sarang tampạ i Eleazar e, kụ němpẹ̌sekẹ e, wọu e němpeluạ e pakeangu pẹ̌seketang su manga kasuang sene.

¹¹Taumata katěllune wọu ral᷊ungu Komol᷊angu tahapẹ̌sekẹ těllung katau e, ute kai i Sama anạ i Age si Harari. Buntuang u tau Israel e wọu timal᷊ang, su tempon tau Pilistin e měmpẹ̌kẹ̌komol᷊ẹ̌ su Lěhi su piạ bawaelang u tumbuẹ mahamụ e.

¹²Arawe i Sama mang kapẹ̌sekẹ e němate ringangu němatạ e tau Pilistin, sarang be i sie nakatahutěndạ bawaelang ene. Kerene MAWU e něgěllị u kal᷊auntung masaria.

¹³Su ěllọ ewe lai wal᷊ine e, lụhaung ke tempong pěmaměnsạ e,[62] těllung katau wọu těllum pul᷊o su kataune tahapěsekẹ i Daud mal᷊ahorone e, limintụ sarang L᷊iangu Adulam. Tempo ene e, i Daud e kai su těndạ u l᷊iang ene. Tau Pilistin e němpẹ̌daseng su Wal᷊ang Refaim e, dingangu sěnggapaeng bọu i sire nakapẹ̌tumanạ su Betlehem.

¹⁵I Daud e rul᷊undangu soa katatanakenge kụ něberạ e, ”Oh! karimạko, iạ apanginung bọu akẹ u pahighi e sumaraning sasuěkang su Betlehem e.”

¹⁶Nakaringihẹ̌ ene tangu, i sire těllu riọ matěllang u tahapẹ̌sekẹ e, nẹ̌těngkal᷊ěhọ sarang pẹ̌darasengang u tau Pilistin e, bọu e nanaedẹ̌ akẹ u pahighi e, mase nibawawane sarang anung Daud e. Kai i Daud e tawe napulu nanginung, ěndọ beng nịbawosone nikoạ sasěmba su MAWU.

¹⁷I sie nẹ̌bera u, ”O MAWU! Iạ e tawe makainung akẹ ini! Kamageng takụ inungang tabidạ-bidạ u iạ nenginung dahang apan taumata kụ seng něnarakang u niawan sire.” Tangu i Daud e tawe napulu nanginung akẹ ene. Enẹ e tiwạ i sire těllu tumatohạ u sekẹ mawawahani ene.

¹⁸I sire těllum pul᷊o matatěllang tahapẹ̌sekẹ timeleng e, nisěbạ l᷊ai ”Komol᷊angu tahạ katěllum pul᷊o su kataune.”[63] Těmbonang i sire i Abisai tuaring Yoab e, anạ i Zeruya. I sie wọu l᷊ai němihua těllu hasụ su kataune kareạ u těmbahe. Ual᷊ingu ene i sie mal᷊aing nakoạ sěngkatau timeleng. Kai i sie wal᷊inewe kere kapiang ”Komol᷊angu tahapẹ̌sekẹ těllung katau”.

²⁰Matěllang u tahapẹ̌sekẹ lai sěngkatau i sẹ̌sěbạ si Benaya anạ i Yoyada tau Kabzeel. I sie mal᷊aing lemboʼm bahani. Ruang katau tumatohạ u pẹ̌seketang bọu Moab, nịpapatene. Bọu e su sahěllo e, kai nẹ̌tahiti watu, kụ i sie simuẹ̌ su ral᷊ungu lohang, bọu e němate singa sěmbaụ sene.

²¹I sie wọu l᷊ai němate sěngkatau tau Misirẹ̌ e, kụ sěngkatau wadange mapia, dingangu mẹ̌pẹ̌pangaghidu těmbahẹ̌. I Benaya timatěngọ e kẹ̌tạ en dingangu těking. Těmbahẹ̌ su l᷊iman tau Misirẹ̌ e nịpapul᷊ahone kụ nịpapakẹ e waugu piněmate tau ene.

²²Ene nakoạ tiwạ i Benaya e, sěngkatau wọu ”Komol᷊angu tahạ katěllum pul᷊o su kataune”.[64]

²³Su ral᷊ungu komol᷊ang ene, i Benaya e nakoạ kahoroěng e, kai i sie wal᷊inewe kere kapapiang ”Komol᷊angu tahapẹ̌sekẹ těllung katau” e. I Daud něhengkẹ i sie niapakakoạ těmbonang i sire tumataking batangeng e.

²⁴Dal᷊ohong ”Komol᷊angu tahạ katěllum pul᷊o su kataune” wal᷊ine e, ute kai: I Asael tuaring Yoab I Elhanan anạ i Dodo tau Betlehem I Sama rěduang Elika tau Harod I Heles tau Palti I Ira anạ i Ikes tau Tekoa I Abiezer tau Anatot I Mebunai tau Husa I Zalmon tau Ahohi I Maharai tau Netofa I Heleb anạ i Baana tau Netofa I Itai anạ i Ribai tau Gibea su sěmbahageang bọu wanuang Benyamin e I Benaya tau Piraton I Hidai tau manga wal᷊ang Gaas I Abialbon tau Araba I Azmawet tau Bahurim I Elyahba tau Saalbon Manga anạ i Yasyen I Yonatan I Sama tau Harari I Ahiam anạ i Sarar tau Harari I Elifelet anạ i Ahasbai tau Maakha I Eliam anạ i Ahitofel tau Gilo I Hezrai tau Karmel I Paerai tau Arbi I Yigal anạ i Natan tau Zoba I Bani tau Gad I Zelek tau Amon I Naharai tau Beerot, mẹ̌bawawa aghidi Yoab I Ira rẹ̌duang Gareb tau (...)