Read Sangir SAMUEL KARUANE 24 Bible Online

SAMUEL KARUANE 24 - Sangir bible

SAMUEL KARUANE 24

¹MAWU e nẹ̌saụ l᷊imangehẹ̌ su Israel e, kụ i Daud e nịlaologang e su timona kai mapakarěntang katatahuki su kawanua ene. MAWU nẹ̌bera si sie u, ”Pẹ̌koạko pěndarol᷊ẹ̌ su Israel dingangu su Yehuda e.”

²Bọu e nẹ̌bera e i Daud si Yoab těmbonang u pẹ̌seketang u, ”Rakọko ringangu manga sahen matěllang u mẹ̌sasekẹ e, kakoạko sol᷊ong kěbị pahiạ u wanuang Israel su kal᷊awọ u soa e, waugu pěndarol᷊ẹ̌ e. U iạ e kai mapulu masingkạ u kal᷊awọu rekenang i sire e.”

³Kai i Yoab e nẹ̌bera su ratu, ”Mal᷊umbạko MAWU Ruatan Tuang e mapakatendang u kawanuang Israel mahasụ su sul᷊ene wọu kěbị kal᷊awọ i sire orasẹ̌ ini e, ringangu mal᷊umbạko i Tuang e mang bẹ̌dang biahẹ̌, takadeạu makasilo. Kai waugu apa i Tuang mapulu piạ pěndarol᷊ẹ̌ ini?”

⁴Kai ratu e měngkai mẹ̌natapẹ̌ su parentane. Tangú i Yoab dingangu matatěllang u pẹ̌seketang e, nakoạ e sarang Israel baugu pěndarol᷊ẹ̌.

⁵Sarạeng bọu limẹ̌ba Sal᷊ụ u Yordan e, i Yoab dingangkeweng manga taumatane e, němpẹ̌daseng su sěmbekan timuhu Aroër, soa su tal᷊oaram bědạ u wanua bahageang i Gad.[65] Bọu ene i sire nakoạ sol᷊ong sawěnahẹ̌ sol᷊ong Yaezer,

⁶bọu e natěpasẹ̌ sarang Gilead dingangu sarang Kades, su wanuang tau Het.[66] Samurịeng ene i sire nakoạ sarang Dan, kụ bọu Dan nělenga sarang[67] bahẹ, sarang Sidon.

⁷Bọu ene i sire nakoạ sarang sěmběkan timuhẹ̌ sarang Tirus soa piạ sasahaghene ene. Těpase i sire nakoạ sarang kěbị soan tau Hewi dingangu tau Kanaan, dingangu pangěnsueěng e sarang Bersyeba su sěmbekan timuhu Yehuda.

⁸I sire lụl᷊uhu kěbị soa e, karěngu u sio wul᷊ang duam pul᷊o su ěllone. Sarětạeng bọu ene, nẹ̌bal᷊ị e i sire sarang Yerusalem kụ

⁹nělapurẹ̌ su ratu e, něnggạ eng pěndarekeng ene. Pẹ̌tatambaěngu manga esẹ apạeng nakasukụ atoru pẹ̌seketang e, arěgang ual᷊u hasụ hiwu su kataune su Israel, dingangu l᷊ima hasụ hiwung katau su Yehuda e.

¹⁰Saretạ u i Daud bọu něndekeng bansa ene, i sie kai nakapěndang nẹ̌sal᷊a, kụ nẹ̌berạ e su MAWU, ”MAWU! Iạ e lembong nẹ̌dosa. Ampungeko iạ e, batụu kakakoạku kai lembong l᷊ongong.”

¹¹MAWU e nẹ̌berạ e su Nabi i Gad kụ i sie nakoạ kal᷊ahěmpukang su tal᷊oarang Daud dingangu MAWU e, ”Rakọko kụ pẹ̌berako si Daud u, Iạ e měgěllị u tatěllu pakipile si sie. Kụ apam pinilene e, mang Takụ koateng.” Sěngkariěllone sarạeng i Daud nẹ̌bangung bọu nẹ̌tikị,

¹³i Gad e narěnta nẹ̌tahatěngo, dingangu něhabaren parentang MAWU si sie angkuěng, ”Sudẹ pilen Tuang: Soa ini iapakal᷊ununusẹ̌ těllu[68] taung, arau i Tuang tumal᷊ang kụ pakisahusue su sekẹ karěngụ u těllu wul᷊ang, arau apakarěnta eng sahindạ su soa ini karěngụ u těllu ěllo e? Pakasahẹko su orasẹ̌ ini e, apang kụ hinong takụ i těpasẹ̌ su MAWU e.”

¹⁴I Daud simimbahẹ̌ u, ”Irọ e! Kai nasilakạ iạ! Kai ěndọ beng i kitẹ měnarimạ papahang u MAWU, watụ u kai masaria tatal᷊ěntụe; sul᷊ungu manarimạ papahang u taumata e.”

¹⁵Tangú MAWU e niaparěntạ en sahindạ su tau Israel e, nanětạ bọu mal᷊ukadẹ̌, sarạeweng kạrěngụ u tempo nịlaatore. Bọu kal᷊awọu tau Israel e, pitum pul᷊o hiwu su kataune nate.

¹⁶Malạekatu MAWU niapẹ̌bawa sahindạ ene e, natěpaseng tampạ u pẹ̌tataěkang gandung i Arauna, tau Yebus e. Su tempong MAWU e nakasilo u malạekatẹ̌ e kai seng sadia waugu mapakasueng Yerusalem e, MAWU e napẹ̌bal᷊uịeng kasasahẹ u naungʼE, kụ niapěngědọeng papahang su wanua ene. Kụ i Sie nẹ̌berạ su malạekatẹ̌ ene u, ”Seng botonge! Pangědọ e!”

¹⁷I Daud nakasilo, u malạekatẹ̌ e kạpẹ̌matene kawanua ene, i sie nẹ̌berạ e su MAWU angkuěng, ”Kai iạ e nẹ̌dosa, batụu kai iạ e nẹ̌koạ pẹ̌sasal᷊a ene. Apạ e pẹ̌sasal᷊ang bansa ene? Pěhukungkeng iạ dingangu anạ u sěngkatauku e!”

¹⁸Su sahěllo ene lai, i Gad diměnta nẹ̌tahatěngo en Daud kụ nẹ̌berạ e si sie u, ”I Tuang e kai hinong awị sarang tampạ u pẹ̌tataěkang gandung i Arauna, kụ pěkoạ pěnaněmbaěng su MAWU e.”

¹⁹Tangú i Daud e natamaị e, kerẹewe su laorong MAWU kụ nitěpasi Gad si sie.

²⁰Nẹ̌sarětạ eng i Arauna dimal᷊inggohọ tanaẹ e, nakasilọ e ratu dingangkeweng manga tumatol᷊ene sarang anune. I Arauna e nẹ̌tumpěkuhẹ̌ su těngọ en Daud

²¹kụ nakiwal᷊o u, ”Apạ e tumang u rarěntang Tuang?” Angkuěng i Daud, ”Kai mamělli tampạ u pẹ̌tataěkang gandung ini e, u iạ e kai mapararisị u pěnaněmbaěng baugu MAWU e, tadeạu sahindạ e kai mangědo.”

²²Angkuěng i Arauna, ”Měngkate al᷊ạ i Tuang koạ sasěmba su MAWU apạ eweng su pěndangi Tuang mapia e. Manga sapi waugu sasěmba tẹ̌tutungang e, dingangu l᷊ahunụ e, i Tuang e pẹ̌pakẹ eng kauang u bajakẹ̌, dingangu manga pěpal᷊u pẹ̌tataěkang e.”

²³I Arauna e, nẹ̌gěllị eng kěbị ene su ratu e,[69] apidẹ̌ nẹ̌bera u, ”Mal᷊umbạko MAWU Ruatan Tuang dumaẹ sasěmbang Tuang e.”

²⁴Arawe ratu e kai nẹ̌bera u, ”Kumbahang! U kapuluku e kai waehang. Iạ e tawe mapulu mẹ̌gellị u sasěmba su MAWU Ruataku, kụ apạ eng takụ kinaěbakeng su tạ bawaehe.” Bọu e i Daud e němaehe tampạ u pẹ̌tataěkang gandung ene, dingangu manga sapi e, niwaehang u roitẹ̌ sal᷊aka l᷊imam pul᷊o su kal᷊ẹ̌pane.

²⁵Bọu e i Daud e napararisị em pěnaněmbaěng baugu MAWU ěndaị sene, kụ nẹ̌gěllị eng sasěmba waugu MAWU e, mangạ e sasěmba tẹ̌tutungang, dingangu sasěmbạeng pẹ̌darame. MAWU dimaraẹ kakal᷊iomaneng i Daud e, bọu e nangědọ e sahindạ ene su Israel.