Read Sangir SAMUEL KARUANE 4 Bible Online

SAMUEL KARUANE 4 - Sangir bible

SAMUEL KARUANE 4

¹ Pal᷊ahěnton Saul bal᷊ine ute kai i Mefiboset ahusi Yonatan. I sie kai pengkadẹ̌ dokeng umure l᷊ima taung, kụ něnětạ bọu kapapaten Saul děduang Yonatan. Batụu su tempọeng habaru papaten sire e narěnta wọu soan Yisreel, inang nẹ̌tangkuang si Mefiboset něningkul᷊u si sie kụ bọu e timal᷊ang, kaiso ual᷊ingu tau wawine ene tumanịu mawěsang, ute i Mefiboset nanawọ e kụ něpengkadẹ̌. Su tempong i Isyboset anạ i Saul nakaringihẹ̌ u i Abner e kai nipate su Hebron, nailangke kawawal᷊insahe, ringangu kěbị kawanuang Israel němpẹ̌gěnggang. Isyboset e kai piạ duang katau pěrwira kụ nakoạ měnaněmbonang u komol᷊ang u rumarokạ; sěngkatau i sẹ̌sěbạ si Baana, sěngkatau l᷊ai i sěsěbạ si Rekhab, i rẹ̌dua e kai anạ i Rimon bọu Beerot bọu kawanuang Benyamin. (Beerot kai narekeng su wanua paparentaěng i Benyamin. Tumanạe tutune kai seng nahuntal᷊ang sarang Gitaim, kụ nanětạ bọu ene kai seng něngkatanạ sene.)

⁵I rẹ̌dua manga pěrwira ene ute i Rekhab dẹ̌duang Baana e nakoạ sol᷊ong bal᷊eng Isyboset e, kụ něngkasongo ěllo marangẹ, su tempong i Isyboset bẹ̌dang mạngirul᷊e ěllo.

⁶Bawine měndariagạ bal᷊e e kai kẹ̌kahuntikilang, piạ i sie kạpẹ̌murěsine gandung e, kụ nẹ̌tikị e. Ual᷊ingu ene, i Rekhab rěduang Baana nakal᷊ikosẹ̌ simuẹ̌.[5]

⁷I rẹ̌dua simuẹ̌ sarạeweng tampạ u pẹ̌tatikilang i Isyboset e, piạ i sie mal᷊ěna-l᷊ěnabẹ̌, kụ i rẹ̌dua naněkạ si sie sarạeweng nate, těmbọ e nipentehẹ̌ kụ nibawawạeng rẹ̌dua. Sěhěbi tinalung i rẹ̌dua rụdal᷊eng sụsahe Wẹ̌dạ u Yordan.

⁸Bọu ene ute, i rẹ̌dua něnarakang u těmbọ i Isyboset si Daud su Hebron apidu nẹ̌bera, ”Ini těmbọ i Isyboset anạ i Saul rumararokạ Mawu Ratu, ringangu nạung piạ kapulu měmate Mawu Ratu e. Sahěllo ini MAWU němal᷊isẹ̌ kakanoạ i Saul ringangkewen pal᷊ahěntone su Mawu Ratu e.”

⁹Kai i Daud simimbang, ”MAWU e kụ wiahẹ̌ seng niapakasal᷊amatu iạ bọu kěbị hombang, masingkạ u apa sarung takụ iwera ini e kai kahěngang.

¹⁰ Su tempo nạung su Ziklag, kai piạ tau mạul᷊ị si siạ, mạanụeng papateng Saul, u su tiněnnane kai i sie mẹ̌bawa habarẹ̌ mapia. Kai i sie kawe takụ nisamẹ kụ nịpapate. Enẹ e wawaehe takụ nighěllị si sie kere wawal᷊isẹ̌ su habarẹ̌ nịbawawane.

¹¹Něngalembom mawěhạ bědang hukumang takụ i apakanawo su taumata raral᷊akị, kụ seng němpěmate taumata tawẹ sal᷊ane, ringangu wẹ̌dang mětẹ̌tikị su wal᷊ene sẹ̌sane! Kụ ini iạ měnuntụ bawal᷊isẹ̌ si kamene, ual᷊ingu pěmamateng kamene, mase iạ mapakatadiseng kamene wọu dunia ini.”

¹²Bọu ene i Daud nẹ̌parentạ e taumatane apẹ̌mate si Rekhab rěduang Baana. Sarạeng seng nipate, ute l᷊imane ringangu l᷊aede nipotọ i sire, kụ nisangẹ su rěduhu l᷊iwuạ e. Arawe těmbọ i Isyboset e nial᷊ạ, mase nilẹ̌bing su soa ene su pěndal᷊ẹ̌bingang i Abner.