Read Sangir SAMUEL KARUANE 5 Bible Online

SAMUEL KARUANE 5 - Sangir bible

SAMUEL KARUANE 5

¹Samuri wọu ene, narěntạ e kěbị apan těmbonang u komol᷊ang u Israel su anun Daud su Hebron, kụ nẹ̌bera si sie, ”I kami ini ghal᷊ipohonu.

²Rongkeng kạngerẹ, sarang be lai i Saul bẹ̌dang mẹ̌pěpẹ̌parenta si kami, datu mal᷊aing mẹ̌němbonang tahapẹ̌sekẹ u Israel, kụ sěntiniạ tamai mẹ̌sekẹ, mase lai MAWU kai nẹ̌diandi u kai i kau maněmbonang taumata-Ne, ringangu mariadi ratung sire.”

³I Daud e nẹ̌koạ pẹ̌dariandi ringangu měnaněmbonang u tau Israel ene su Hebron, mase i sire něnduị i sie nariadi ratung Israel.

⁴ Umuri Daud nariadi ratu e, těllum pul᷊o su taunge, mase i sie něparenta ěpạ u pul᷊o su taunge karěngụ e.

⁵I sie nẹ̌parenta Yehuda su Hebron, pitu taung maloara, su Yerusalem i sie nẹ̌parenta Israel dingangu Yehuda e, těllum pul᷊o těllu su taunge karěngụ e.

⁶ Piạ e su sahěllo Ratu i Daud kai něbuạ dingangu taumatane, su měnekẹ Yerusalem. Katihọ u tau Yebus tumanạ u soa ene, i Daud tawe makawatạ Yerusalem. Ual᷊ingu ene, i sire nẹ̌berạ e si sie, ”I kau tawe makasuẹ̌ damahi; taumata wuta, ringangu taumata kempal᷊ẹ̌ e wotong e makapěnokol᷊ẹ̌ si kau.”

⁷I Daud nẹ̌berạ e su manga taumatane, ”Sini piạ taumata mạběnsing u tau Yebus, kerẹewe iạ mạběnsing i sire? Kawawěnsing i sie seng nasukụ ngae, sarang be kapulun sie mambeng kahěngang mẹ̌mate si sire? Kamageng kerene, pěmpěsuẹ̌ e wọu liang u akẹ těpasẹ̌ e, mase seketẹ e manga taumata wuta, pengkadẹ̌ kụ apang takụ i kẹ̌kawěnsing.” (Ual᷊ingu ene piạ taumata nakapẹ̌bera u, ”Taumata pengkadẹ̌ dingangu taumata wuta e, tawe wotonge makasuẹ̌ su Wal᷊en MAWU e.”)[6] I Daud e nẹ̌bera untung, kụ nakapẹ̌hampasẹ̌ těndạ u Sion, apidu nipẹ̌tumanakeng e. Soa ene nisẹ̌bạ e ”Soan Daud”. Soa ene nilikutang u tatěndạ e ěntana niapakarangẹ, nitětạ bọu sěmběkang daking bul᷊ude nipakarange dingangu ěntana.

¹⁰I Daud e mangkeng kẹ̌katoghase, batụu MAWU Ruata Makawasa mětẹ̌tul᷊ung si sie.

¹¹I Hiram datung soan Tirus, něndingọ u manga rarolohang sarang anun Daud, dingangu kalung cěmarang Libanon, ringangu manga mělahal᷊ẹ̌ u kalu, manga mělahal᷊ẹ̌ u watu, apẹ̌mẹ̌mětị bal᷊en datu.

¹²Ual᷊ing u ene, i Daud nakapěndang u, kai MAWU e niapakariadin sie nakoạ datung Israel, dingangu nanoghasẹ̌ kararatuange, baugu taumatan MAWU.

¹³Bọu teng i Daud něngal᷊ing bọu Hebron sarang Yerusalem, ute pirạeng katau l᷊ai wawine saụ nakoạ kawinge, ringangu pirạeng katau l᷊ai nakoạ dokạ e, kụ nahuntinambạ e manga anạ e esẹ dingangu wawine.

¹⁴Manga anạ e esẹ niwantelẹ̌ su Yerusalem e: i Syamua, i Sobab, i Natan, i Salomo,

¹⁵i Yibhar, i Elisua, i Nefeg, i Yafia,

¹⁶i Elisama, i Elyada dingangu i Elifelet.

¹⁷Su tempon tau Pilistin nakaringihẹ̌ u, i Daud e kai niapakariadi ratu su Israel, ute i sire riměnta měgausu měnamẹ si sie. Saretạ u i Daud nakaringihẹ̌ hal᷊ẹ̌ ene, ute i sie kai nakoạ sol᷊ong tampạ piạ tatěndạ e.

¹⁸Tau Pilistin e kai nasal᷊iawuhẹ̌ sol᷊ong Běda u Refaim, kụ nětumanạ sene.

¹⁹Tangú i Daud nakiwal᷊o su MAWU, ”Iạ mambeng sumekẹ tau Pilistin? I Kau sarung be měgěllịu kal᷊auntung si siạ?” ”Seketẹ e!” angkuěngu MAWU. ”Iạ e měgěllị u kal᷊auntung si kau!”

²⁰Samurịeng ene natamaị e i Daud sol᷊ong Baal-Perasim,[7] kụ sene tau Pilistin kinawatạ. Bọu e i sie nẹ̌berạ e, ”MAWU e něnggoghahẹ̌ tatěndạ u sumasekẹ siạ, kere, lěba naněnehẹ̌ patikụ sabarang sěngkakondạ.” Ual᷊ingu ene, tampạ ene nisěbạ Baal-Perasim.

²¹Komol᷊ang u tau Pilistin timal᷊ang, kụ tawe nakawawa manga tul᷊adang mahang duatan sire, i Daud ringangkewen manga taumatane, něngal᷊a e manga tul᷊ada ene.

²²Tawe nararěnnạ, wọu ene tau Pilistin e něsaụ diměnta nẹ̌tumanạ su Wal᷊ang Refaim.

²³Něsaụ sěnsul᷊e i Daud nẹ̌dorong urihẹ̌ bọu MAWU. MAWU e simimbang, ”Kumbahang sumekẹ si sire wọu ini e, kaiso pahundal᷊engke, kụ těnungko sarang l᷊ikudi sire e, kụ seketẹ e pai wọu maraning manga kakaluangu murbei.

²⁴Kereu i kamene makaringihẹ̌ tingihẹ̌ kere tarěntungu taumata mal᷊aantehẹ̌ su pusungu kakaluang e, ute pěmpẹ̌tamaị e, u Iạ e rumal᷊eng su těngonu, mamatạ tahapẹ̌sekẹ u Pilistin.”

²⁵I Daud někoạ e apang ipẹ̌parentaěng u MAWU e, kụ mambeng nebarauntung nakapěliwuahẹ̌ tau Pilistin, hakịu němpẹ̌sohọ bọu Geba sarang Gezer.