Read Sangir SAMUEL KARUANE 6 Bible Online

SAMUEL KARUANE 6 - Sangir bible

SAMUEL KARUANE 6

¹Samuri wọu ene i Daud saụ e nẹ̌kui tahapẹ̌sekẹ u Israel mapapia e, niapẹ̌komol᷊ẹ̌, ku pinẹ̌tatambaěnge těllum pul᷊o hiwu su kataune.

² I sie niahạ e nětimona Baale-Yehuda,[8] baugu měngal᷊ạ, Petiʼm Pẹ̌dariandi kụ i sẹ̌sěbạ dingangu arengu MAWU makawasa kụ kai mạintol᷊ang su wowong kerub.[9]

³ Petiʼm Pẹ̌dariandi ene nial᷊ạ bọu wal᷊eng Abinadab su wowom bul᷊ude, mase nịsasengkang sarang dal᷊ungu kěreta wuhu ene. Bọu e, i Uza rěduang Ahio manga anạ i Abinadab měmpẹ̌tol᷊e kěreta ene; i Uza rụdal᷊eng su sěndihange,

⁴i Ahio rụdal᷊eng su těngone.

⁵I Daud ringangkeweng kal᷊awọu kawanuang Israel e rụdal᷊eng su těngom Peti, apidu kạpẹ̌sal᷊aine marehe[10] ringangu měmpẹ̌kẹkentarị mẹ̌ngadatẹ̌ MAWU. I sire mẹ̌nẹ̌nalangu kěcapi, gambus, arabanạ, gul᷊intang dingangu kapuracạ.

⁶Su tempọeng i sire nawunạ su pẹ̌tataěkang u gandung i Nakhon, manga sapi měmpẹ̌mol᷊eng kěreta e kai nẹ̌kal᷊iondohẹ̌, kụ i Uza něngul᷊uheng limane piněngumbelẹ Petiʼm Pẹ̌dariandi e mạdiring manawo.

⁷Su tempo ene lai, MAWU l᷊imangehẹ̌ si Uza, ual᷊ingu kakanoạ e ene kai mạngawẹ pělahinakang[11] su MAWU. I Uza e nịpapate-Ne su tampạ ene su rẹ̌duhu Petiʼm Pẹ̌dariandi.

⁸Tangú nanětạ bọu tempo ene tampạ ene nisěbạ Peres-Uza.[12] I Daud e kai nẹ̌pědu ual᷊ingu MAWU e kai niapakawinasang Uza.

⁹Kai i Daud e mal᷊aing natakụ su MAWU, kụ něbera, ”Kai kereapa orasẹ̌ ini, Petiʼm Pẹ̌dariandi e takụ i kawawa?”

¹⁰Ual᷊ingu ene, i sie e sembeng tawe saụ mapulu mẹ̌bawa Petiʼm Pẹ̌dariandi sarang Yerusalem, kaiso kai i resọ su wal᷊en Obed-Edom tau Gat.

¹¹ Petiʼm Pẹ̌dariandi ene nitěntang sene, těllu wul᷊ang karěngụ e, kụ MAWU něngal᷊amatẹ̌ si Obed-Edom dingangu manga anạ u sěngkataune.

¹²Ratu i Daud nakaringihẹ̌ u MAWU e kai něngal᷊amatẹ̌ si Obed-Edom ringangu manga tataghuanenge ual᷊i en Petim Pẹ̌dariandi ene. Tangú i sie nakoạ e sol᷊ong bal᷊en Obed-Edom něngal᷊ạ Petim Pẹ̌dariandi kụ nịlaal᷊inge sarang Yerusalem dingangkeng pal᷊ahul᷊uasẹ̌ masaria.

¹³Piạ i sire něhengkẹ Petim Pẹ̌dariandi kụ seng dudal᷊eng su kaěnnung u lempang e, i Daud nẹ̌parentạ e si sire mangirul᷊e. Mase i sie něgěllị eng sasěmba su MAWU, sapi esẹ ringangu anạ u sapi niapakatawa.

¹⁴Bọu ene i Daud napenẹ eng dal᷊uasẹ̌ kụ mẹ̌sẹ̌sal᷊ai mẹ̌ngadatẹ̌ MAWU. Su tempo ene i sie kẹ̌tạeweng nẹ̌pakẹ u kahiwu lenen manimbụ piněmẹ̌gong kal᷊uwaenge.

¹⁵Kerene i Daud dingangu kěbị kawanuang Israel němpěngal᷊ingu Petim Pẹ̌dariandi ene sarang Yerusalem apidu kạpạhul᷊uase ringangu tingihu slompretẹ̌.

¹⁶Su tempo e Peti kạbawawa i sẹ̌suẹ̌ su soa e, i Mikhal anạ i Saul bawine nẹ̌pahimang bọu tẹ̌ba bọu e němanda Ratu i Daud rụl᷊insọ apidu mẹ̌sěsal᷊ai waugu měngadatẹ̌ MAWU, kụ i Mikhal nakapěndang nawiagẹ̌ nakasilo si Daud.

¹⁷Petim Pẹ̌dariandi ene nịpapěllọ su tampạ e su ral᷊ungu tenta, ku seng bọu nipasẹ̌ i Daud baugu Peti. Bọu ene i Daud e něgěllị u sasěmba tẹ̌tutungang, dingangu sasěmbang pẹ̌darame su MAWU.

¹⁸Bọu e něngal᷊amatẹ̌ kawanuang Israel su arengu MAWU Ruata Makawasa.

¹⁹ Samurịeng ene, i sie nẹ̌pahahiạ u kaěng si sire. Apạewen taumata kụ ene sene, baebe manga esẹ arau manga wawine, nighělikang u ghěsing binatang tinapa,[13] borotẹ̌ dingangu kukise kismisẹ̌. Bọu ene i sire něngkapul᷊ẹ kěbị sol᷊ong bal᷊eng sěngkatau-sěngkatau.

²⁰Piạ i Daud napul᷊ẹ sol᷊ong istana, kụ nẹ̌gěllị u adatẹ̌ su anạ u sěngkataune, i Mikhal simẹ̌bang naněnsomahẹ̌ si Daud apidu nẹ̌bera, ”Ěllo ini ratung Israelẹ̌ e těnga-těngadẹ̌ nẹ̌koạ batangenge lẹ̌adateng! I sie kai nẹ̌těntol᷊e tabidạu tau longong, kụ tawe namea su těngon manga ěllang bawine tataghuanengu manga wobatong istana!”

²¹I Daud simimbang, ”Iạ nẹ̌sal᷊aị e, kai waugu mẹ̌ngadatẹ̌ MAWU, kụ nạung tawe něnarimạ i amangu ringangu ghal᷊ipohone, bọu e němile siạ nariadi těmbonangu kawanuang Israel, umatʼE. Iạ e mang mẹ̌salai waugu měngadatẹ̌ MAWU.

²²Ore! Iạ mẹ̌sẹsasadia hinakaneng něngalembọ wọu kanini. I kau[14] wotonge wue mapakasanạ u iạ, arawe anạ u manga ěllang kanini e, kai mẹ̌ngarěgang iạ.”

²³I Mikhal, ahusi Saul wawine tawe něhanạ kạrěngụ u pẹ̌bawiahe.