Read Sangir SAMUEL KARUANE 7 Bible Online

SAMUEL KARUANE 7 - Sangir bible

SAMUEL KARUANE 7

¹MAWU e něnirung Datu i Daud e wọu u kěbị sasahagheng sekẹ e, sarang be i sie měngkai mạtanạ tatapẹ̌ su ral᷊ungu wal᷊ene.

²Tangú ratu e nẹ̌berạ e su Nabi Natan, ”Kakělla, iạ mẹ̌bẹ̌bal᷊e su wal᷊e kalung cěmarang Libanon, arawe Petim Pẹ̌dariandim Mawu e, kẹ̌tạeng su raseng.”

³I Natan simimbang, ”Koạ e apang karakịnu, u MAWU mẹ̌tul᷊ung si Tuang.”

⁴Arawe su sěhẹ̌bi ene, MAWU e kai nẹ̌bera si Natan,

⁵”Dakọ e kụ těpasẹ̌ko tatanataku ini su ěllang-Ku i Daud, ’Tumanị u i kau kụ mapararisị u wal᷊e-Ku.

⁶Rongkeng tau Israel Takụ niapakal᷊iwirẹ̌ bọu Misirẹ̌, sarang orasẹ̌ ini, Iạ bẹ̌dang be tawe nạtanạ su ral᷊ungu wal᷊e sěmbaụ kaiso Iạ mang hanesẹ̌ su ral᷊ěnganeng kụ mạtanạ su pẹ̌darasengang sěmbaụ.

⁷Karěngụ u Iạ rul᷊ẹ̌ngang dingangu kawanuang Israel e, Iạ e bẹ̌dang be ta nakịbal᷊o su měnaněmbonang[15] Takụ nipile, měnsang ual᷊ingu apa i sire tawe nakapěndarisị u wal᷊e wọu kalung cěmarang Libanon baugu Iạ!’

⁸Ual᷊ingu ene, i Natan, apakasingkạko su ěllang-Ku i Daud, u Iạ e kai MAWU Makawasa, nẹ̌bera si sie, ’I kau e kai Takụ nial᷊ạ bọu hal᷊ẹ̌ u mělẹ̌lukadẹ̌ domba su wawaelang kụ Takụ nihengkẹ nariadi ratung taumata-Ku Israel.

⁹Iạ seng diměndingang si kau, walạewe sarang apa i kau rumal᷊eng, dingangu kal᷊awọu sekẹ seng Takụ nipunasẹ̌ piạ i kau mẹ̌sẹ̌sekẹ. I kau kai sarung Takụ i apateleng nangělembo, kerẹewe měnaněmbonang kasariaěng e su dunia ini.

¹⁰Kerene lai su taumata-Ku su Israel, seng bọu Takụ nisadiaěng u tampạ, ku Takụ nioro i sire, pẹ̌natapẹ̌ sene, tadeạu i sire kai makapẹ̌biahẹ̌ mal᷊enehẹ̌, kụ seng ta saụ sahagheěng. Nanětạ surarěntang sire su ěntana ini e kạngerẹ, kụ Iạ něhengkẹ měnaněmbonang baugi sire, kụ i sire e kai wọu niseketang u taumata mal᷊ahimpulu su l᷊ahěgisẹ̌, kai apan tamai ene tawe nariadi. Iạ mẹ̌diandi u i kau e sarung mal᷊enehẹ̌ kụ tawẹ u makapẹ̌nahaghe, ringangu i kau Takụ gělikangu pal᷊ahěnto.

¹²Kereu i kau seng mate, kụ i kau i lěbing su pěndal᷊ebingang i tetẹu, ute sěngkatau wọu ahusu esẹ e, Takụ al᷊akeng iapakariadị ratu. I sie sarung mapararisị u wal᷊e-Ku. Kararatuange Takụ i pakatoghasẹ̌ sarang karěngu e, kụ sěngkatau wọu pal᷊ahěntone sarung mẹ̌parenta kere sěngkatau ratu.

¹⁴ Iạ e makoạ i amange, i sie sarung makoạ ahusẹ̌-Ku. Kereu i sie mẹ̌koạ pẹ̌sasal᷊a e, Takụ i hukung kere pělahukung u sěngkatau i amang su anạ e.

¹⁵Kai Iạ e tatapẹ̌ mẹ̌koạ mapia si sie, kerẹwe Takụ pinẹ̌diandi. Pẹ̌dariandi-Ku si sie sarung tatapẹ̌ Takụ lẹ̌umbeleěng, bal᷊inewe kere nikoạ-Ku si Saul, kụ Takụ niapěmeho wọu kal᷊aianeng e, tadeạu i kau wotonge mariadi ratu.

¹⁶I kau e sẹ̌ntiniạ mang mẹ̌naghuang pal᷊ahěntonu, kararatuangu Takụ iapakeraragẹ̌ sarang kạrěngụ e. Sěngkatau wọu hěntonu e Takụ i pẹ̌parenta kere sěngkatau ratu e sarang kạrěngụ e.’ ”

¹⁷Bọu ene i Natan, napasingkạ si Daud, kal᷊awọu apan nilahẹ u Mawu si sie.

¹⁸Bọu ene simuẹ̌ e Ratu i Daud su Tentan MAWU. Kụ i sie kimaiang nẹ̌kaliomaneng, ”MAWU Limembong Karangetange, i kami anạ u sěngkatau tawẹ hinone makatarimạ u kěbị kapia kụ i todẹʼU u si siạ karěngụ u ini.

¹⁹Ore lai apan nikoạ u něngalembo wọu ene, oh MAWU Limembong Karangetange; i Kau seng nẹ̌diandi mạanụem pal᷊ahěntoku baugu tempo ramahi, i Kau napasilong hal᷊ẹ̌ ene si siạ maniẹng iạ e kai taumata,[16] oh MAWU Limembong Karangetange!

²⁰Apạ e lai wẹ̌dang takụ i wera si Kau? I Kau masingkạ u kěbị apang kakakoaụ ěllangʼU ini.

²¹Ual᷊ingu riandi-Nu ringangu kapulu-Nu sẹ̌sanu, i Kau nẹ̌koạ hal᷊ẹ̌ masasěllahẹ̌ ene baugu paněntiro ěllangʼU ini.

²²Mambeng masaria i Kau! oh MAWU Ruata! Kẹ̌tạeng i Kau Mawu, tawẹ apa mẹ̌sul᷊ung i Kau. I kami masingkạ u ene, batụu kai seng niapakasingkạ dongkeng kal᷊amona.

²³Su kạguwạ u dunia e, tawe apa wansa kere Israel. Kětạeng Israel niapakal᷊iwiru wọ u pẹ̌tatahuěllang baugu mariadi taumata-Nu hala. Kěbị kakakoạ u masasěllahẹ̌ dingangu makạdal᷊inaụ si sire e,[17] nakariadin arengʼU timeleng su kạguwạ u dunia. Manga wansa wal᷊ine ringangu manga mahan duatan sire nitokolʼU[18] piạ e taumata-Nu němpẹ̌sekẹ.

²⁴Kawanuang Israel seng niapakariadi-Nu taumata-Nu sẹ̌sanu baugu sarang karěngụ e, ringangu i Kau MAWU mariadi Ruatan sire.

²⁵Kụ orasẹ̌ ini, o MAWU Ruata, karimạko i Kau reng měnoghasẹ̌ sarang karěngụ e, diandi kụ seng niweranʼU mạanung batangengku ringangu hiteku. Karimạko reng mẹ̌koạ apang seng nipẹ̌diandinʼU ene.

²⁶Balạewe suapa, taumata e mang sěntiniạ rul᷊esạ u arengʼU kạpẹ̌berane, ’MAWU Makawasa e kai Ruatang Israel.’ Tangú kai waugu sarang karěngụ e sěngkatau wọu pal᷊ahěntoku sarung mẹ̌parenta kere sěngkatau ratu su wanua ini.

²⁷MAWU Makawasa! Iạ mẹ̌tumbahaning batangeng mapaawị u kakal᷊iomaneng ini si Kau, batụu kai i Kau sẹ̌sanu napakasingkạ si siạ u anạ pulungku mẹ̌bẹ̌bawěllasẹ̌ iapakariadi-Nu ratu su kawanua ini.

²⁸MAWU Limembong Karangetange, i Kau e Ruata; kěbị diandi-Nu nipakasěhụ u, ringangkeweng apang mal᷊ěnggihẹ̌ ene seng niriandi-Nu si siạ.

²⁹Ual᷊ingu ene iạ e mẹ̌gausẹ̌, karimạko měngal᷊amatẹ̌ pal᷊ahěntoku, tadeạu sarang karěngụ e i sire mang makatemang kakěndagu. Oh MAWU Limembong Karangetange, kěbị e seng pinẹ̌diandi-Nu, tangú pal᷊ahěntoku e mang al᷊amatengʼU baugu sarang karěngụ e.”