Read Sangir SAMUEL KARUANE 8 Bible Online

SAMUEL KARUANE 8 - Sangir bible

SAMUEL KARUANE 8

¹Pirạ en tempo nal᷊iu, Ratu i Daud nẹ̌saụ simekẹ tau Pilistin. I sire kinawatạ e, mase měmul᷊aho ěntanan sire.[19]

²I Daud e mal᷊aing němatạ tau Moab. I sire nịlaoro niaparal᷊oka su ěntana, bọu e i sie němate ruang katau wọu tal᷊oarang tahạ těllung katau. Tau Moab e kimakoho si Daud, kụ němaehẹ̌ denda si sie.

³Těpase i Daud němatạ Datu Hadadezer anạ i Rehob mẹ̌pẹ̌parenta su Zoba, sěmbaụ kararatuang maraning Damsyik. Su tempo ene i Hadadezer e kai suraral᷊engang, měngẹ̌ngul᷊ị sěmbahageang bọu wanua kẹ̌kawasaěnge su maraning ul᷊un Sal᷊ụ u Efrat.

⁴I Daud něnaweng sěhiwu pitu hasụ su kataune tahapěsekẹ su kawal᷊o, ringangu tahapẹ̌sekẹ 20.000 su kataune mạhundal᷊eng. I sie napakapehong kěbị kawal᷊o, liune ute, sěmbahageang kụ makasukụ baugu karetang pẹ̌seketang mahasụ.

⁵Tau Siria wọu Damsyik e, něndingọeng tahapěsekẹ baugu apẹ̌tul᷊ung u Ratu i Hadadezer. Kai i Daud e němatạ si sire, kụ něnaweng duam pul᷊o dua hiwu su kataune wọi sire.

⁶Bọu ene i Daud niapararisịeng manga tentan tahapẹ̌sekẹ su ral᷊ungu[20] wahageang i sire, mase i sire kimakoho, kụ němpěmaehẹ̌ denda si sie. MAWU měgěgěllị u kal᷊auntu si Daud balạewe i sie mẹ̌sekẹ.

⁷Manga kěllung bul᷊aeng bọu nipakẹ u tahapẹ̌sekẹ u Hadadezer, nịlaahọ en Daud, kụ niwawa sol᷊ong Yerusalem.

⁸Sul᷊ikudu ene, i Daud něngal᷊ạ e lai pera mal᷊awọ bọu Betah ringangu Berotai, manga soa kụ nạung kẹ̌kawasaěng i Hadadezer.

⁹Ratu i Tou wọu Hamat nakaringihẹ̌ u kal᷊awọu tahapẹ̌sekẹ i Hadadezer kai nikawatạ u Ratu i Daud.

¹⁰Tangú i sie kai něndolohi Yoram anạ e esẹ ipẹ̌něpasu habaru adatẹ̌ su Ratu i Daud dingangu nẹ̌bera en sal᷊amatẹ̌ ual᷊ingu kal᷊auntung e, batụu i Hadadezer e kai masau mẹ̌sekẹ dingangi Tou. I Yoram narěntạ e anung Daud kụ nakaul᷊e ghaghěllị l᷊awọ bọu wul᷊aeng, sal᷊aka, ringangu tambaga.

¹¹Kěbị gaghěllị ene nisarakang su MAWU nikoạ sasěmba kareạ u Ratu i Daud, kụ i pakẹ su pẹ̌tatahamawu. Kerene lai kěbị apal᷊iwụ bul᷊aeng, sal᷊aka kụ apạ ewen nihampasẹ̌ si Hadadezer ringangu wọu apam bansa kinawatạ e, Edom, Moab, Amon, Pilistin ringangu Amalek.

¹³ Areng Daud něngalembo timeleng piạ i sie nawal᷊ị bọu němatạ mapul᷊o ual᷊u hiwu su kataune taumatang Edom su Wal᷊ang Asin.

¹⁴I sie niapararisịeng manga tentan tahapěsekẹ[21] su kaguwạ u Edom, kụ taumatan Edom e kimakoho si sie. MAWU něgěllị u kal᷊auntung si Daud suapa ewen i sie měsekẹ.

¹⁵Kerene i Daud nẹ̌parenta su kaguwạ u Israel kụ něndiagạ anạ u kawanuane, kěkoateng e hanesẹ̌ i kẹ̌koạ su kạadilẹ̌ dingangu kapapia.

¹⁶Kai ini e manga těmbonang apạ ewen mararangẹ, nihěngkẹ i Daud: Ul᷊ụbal᷊ang: i Yoab anạ i Zeruya; Měmamohẹ su katatanakeng u ratu: i Yosafat anạ i Ahilud; Manga Imang: Zadok anạ Ahitub, ringangu i Ahimelekh anạ i Abyatar; Měmamohẹ u wanua: i Seraya

¹⁸Tembonang[22] u riagạ u ratu: i Benaya anạ i Yoyada; Manga imang u pẹ̌tatumanakeng u ratu: manga ahusi Daud.