Read Sangir MANGA RATU HUMOTONG 1 Bible Online

MANGA RATU HUMOTONG 1 - Sangir bible

MANGA RATU HUMOTONG 1

¹Ini e Ratu i Daud seng maghurang-gurang. Maningbe i sie seng nikokosu hekạ masuwenehẹ̌, kaiso i sie mang těbe mạdarung.

²Ual᷊ingu ene manga mělahal᷊ẹ̌ e měmpẹ̌bẹ̌bera, ”Mawu Ratu lěadateng, mapiawe i kami mědeạ sěngkatau mahuala kụ pẹ̌tanạ dingangi Tuang kụ pẹ̌tangkuang si Tuang. I sie sarung mẹ̌tikị dingangi Tuang tadeạu i Tuang deng makapěndang masal᷊umighang.”

³Mase nireakeng sěngkatau mahuala maholẹ su kasěllahu Israelẹ̌ e. Tangú su Sunem nikaěbakengke sěngkatau mahuala masadadạ-sadadạ arenge i Abisag. I sie niwawa su anun datu, bọu e i sie mělẹ̌hapa ratu ringangu mẹ̌tatangkuange. Kai ratu e tawe nẹ̌sěngkapẹ̌tikị dingange.

⁴

⁵ Ual᷊ingu i Absalom seng nate, tangu i Adonia, ahusi Daud karuane nakoạ kaiakanenge. I ninange isẹ̌sěbạ si Hagit. I Adonia e kai taumata mal᷊epatẹ̌. I Amange tawẹ běke reng limangehẹ̌ kereu i sie nẹ̌koạ pẹ̌sasal᷊a. I Adonia e mapulu-pulu kahěngang makoạ datu, tangú i sie něndiahi waugu watangenge karetan sekẹ dingangu sordadone piạ kawal᷊one ringangkewelai limam pul᷊o su kataune lukadu watangenge.

⁶

⁷Bọu ene i sie tamai nẹ̌dal᷊ahintau ringang i Yoab dingangu Imang i Abyatar. I ninang i Yoab arenge i Zeruya. I Yoab dingangu Imang i Abyatar kimire waugu měnongkạ karadiahang i Adonia.

⁸Arawe Imang i Zadok, i Benaya anạ i Yoyada, Nabi Natan, Simei, Rei ringangu lukadu Ratu i Daud tawe nanumběka si Adonia.

⁹Piạ sěhěllo su tampạ isẹ̌sẹ̌bạ Batu Těmpu maranin simbul᷊u akẹ En-Rogel, i Adonia něnarakangu sasěmba domba, sapi esẹ dingangu anạu sapi matatawa. I sie nẹ̌gausẹ̌ manga ahusʼu Ratu i Daud bal᷊ine, ringangu manga mělahal᷊ẹ̌ u istana bọu hěnton Yehuda sol᷊ong sal᷊imbang u sasěmba ene.

¹⁰Arawe i Salomo tuarine, ringangu Nabi i Natan ore lai i Benaya ringangu lukadu watangeng Ratu i Daud tawe nighausange.

¹¹ Tangú Nabi i Natan dimal᷊eng nẹ̌sombang i Batsyeba, i ninang i Salomo, bọu e nẹ̌bera si sie, ”Apa i Wawụ datu wědang tawe nakạdingihẹ̌ u i Adonia, ahusʼi Hagit, seng nẹ̌těngkahengkẹ u watangenge nakoạ datu, arawe Ratu i Daud wěgawe maěllị-ěllị hal᷊ẹ̌ ene tangú?

¹²I Wawụ datu mapulu tadeạu i Salomo ringangu i Wawụ datu hala e maambang, ute iạ maněgu

¹³lighạko pẹ̌těngon Datu i Daud, kụ pẹ̌bera kere ini si sie: ’Kai wal᷊inewe i Tuang sẹ̌sane seng nẹ̌salu su těngoku u ahusẹ̌ku i Salomo sarung makoạ datu měngaweng si Tuang? Kụ ini e, unụ e i Adonia e nakoạ datu?’ ”

¹⁴Angkuěng i Natan tuhụ e, ”Hědọ e, kamagengu i Wawụ datu mẹ̌bẹ̌bisara ringangu ratu, iạ sarung sumuẹ̌ mẹ̌noghasẹ̌ apan seng nịbawerang Bawụ datu.”

¹⁵Tangú tamai e i Batsyeba nẹ̌těngon datu su ral᷊ungu kamare. Datu tempo ene seng enẹ e maghurang, dingangu i Abisag, mahuala wọu Sunem ene, mẹ̌tatangkiange.

¹⁶I Batsyeba e nẹ̌tumpěkuhẹ̌ su těngon datu, kụ datu e nakiwal᷊o, ”I kau e mapulung a?”

¹⁷I Batsyeba e simimbang, ”I Tuang Lẹ̌adateng, i Tuang seng nẹ̌salu su těngoku ringangu areng u MAWU, Ruatan Tuang, u ahusẹ̌ku i Salomo sarung makoạ datu měngaweng si Tuang.

¹⁸Arawe orasẹ̌ ini e tawe sukasingkạ i Tuang, i Adonia e seng nakoạ datu.

¹⁹I sie seng něněmban domba l᷊awọ, sapi esẹ dingangu anạ u sapi matatawa. I sie selaing nẹ̌gausẹ̌ manga ahusu Ratu e, ringangu Imang i Abyatar ore lai i Yoab, mol᷊ensekẹ u wuntuangu sekẹ i Tuang sarang sal᷊imbang ene. Kaiso i sie tawe nẹ̌gausẹ̌ si Salomo.

²⁰I Tuang Lẹ̌adateng, kal᷊awọu kawanuang Israel orasẹ̌ ini e měngẹ̌ngampal᷊ẹ̌ putusang bọi Tuang e měnsang i sai sarung měngaweng si Tuang makoạ datu.

²¹Kereu i Tuang tawe mẹ̌gěllịu putusang ene, nal᷊ahẹ u tawẹ kạděngụ e samurin Tuang e mapul᷊e asal᷊ẹ̌, iạ dingangu ahusẹ̌ku sarung koateng kere taha kontiang.”

²²Těntal᷊ang i Batsyeba e kapẹ̌bẹ̌bisarane, Nabi i Natan narol᷊ong sene.

²³Bọu e ratu nipaul᷊ikangu rarěntang Natan. I Batsyeba siměbang, mase i Natan nasuẹ̌, kụ nẹ̌tumpěkuhẹ̌ su těngon datu.

²⁴I Natan nẹ̌bera, ”I Tuang Lẹ̌adateng, apa i Tuang seng něhabarẹ̌ u i Adonia sarung měngaweng si Tuang makoạ datu?

²⁵Ěllo ini lai i sie seng něnarakangu domba l᷊awọ, sapi esẹ, dingangu anạ u sapi matatawa. Kal᷊awọu ahusi Tuang seng ninotẹ̌ e. Kerene lai manga mol᷊ensekẹ u wuntuang i Tuang piạ aghide ringangu Imang i Abyatar. I sire orasẹ̌ ini e kapẹ̌sẹ̌sal᷊iwange ringange kụ kạpahul᷊uase, ’Biahẹ̌ Datu i Adonia!’

²⁶Arawe i sie tawe něnotẹ̌ u iạ. Imang i Zadok dingangi Benaya ore lai i Salomo mal᷊ain tawe ninotẹ̌ e.

²⁷Apa měnsang i Tuang něndolohu i sie apẹ̌kẹ̌koạ patikụ ini e, tawẹ habare su manga mělahal᷊ẹ̌ i Tuang měnsang i sai wue měngaweng si Tuang?”

²⁸Ratu i Daud něbera, ”Kuieko i Batsyeba.” Tangú Nabi i Natan siměbang dingangu i Batsyeba nẹ̌sul᷊e kapia nẹ̌těngon datu.

²⁹Bọu e angkuěng u Ratu si sie, ”Iạ e mambeng nẹ̌kědo si kau e su arengu MAWU, Ruatang Israel, u i Salomo ahusu sarung měngaweng si siạ makoạ datu. Kụ tangu orasẹ̌ ini e iạ nẹ̌kědo si kau su arengu MAWU kụ biahẹ̌ e, kụ seng něliwiru iạ bọu kal᷊awọu kasasěsẹku, u suěllo ini e lai iạ sarung mapakasěhụ u kědoku si kau.”

³⁰

³¹Tangú nẹ̌tumpěkuhe i Batsyeba apidu nẹ̌bera, ”Biahẹ̌ Lěadateng Datu e sarang marěngụ-děngụ!”

³²Bọu e Ratu i Daud dimolohẹ̌ nipẹ̌kui si Zadok, i Natan dingangi Benaya.

³³Sarangke i sire narěntạ e, nẹ̌berạ e ratu e si sire, ”Kuịe kal᷊awọu pěrwiraku e kụ dakọ e tamai ringang i sire kakoạ sol᷊ong anun Salomo ahusẹ̌ku e. Apasakẹko i sie su wowong bagal᷊ẹ̌ku hala kụ ahạko i sie sol᷊ong simbul᷊u akẹ u Gihon.

³⁴Sene i Zadok dẹ̌duang Natan harusẹ̌ měnduị i sie makoạ datung Israel. Bọu ene i kamene hinong mapahěteng napiri kụ pěmpẹ̌giong, ’Biahẹ̌ Datu i Salomo!’

³⁵Bọu ene takineko i sie pẹ̌sul᷊e sol᷊ong ini baugu apakaiang su kal᷊aianengku, u kai i sie sen takụ pinile makoạ datu ipěngaweng si siạ baugu mẹ̌parenta Israel dingangu Yehuda.”

³⁶”Kerenẹ e, i Lẹ̌adateng,” sasimbang i Benaya, ”mal᷊owọko MAWU Ruatan Tuang mapakatoghasu parentan Tuang ene e.

³⁷Kerẹewe MAWU e seng diměndingang si Tuang, mal᷊owọko i Sie mal᷊aing duměndingang si Salomo. Mal᷊owọko MAWU e mapakariading pẹ̌paparentane něngalembong kapiane wọu pẹ̌paparentan Tuang.”

³⁸Tangú i Zadok, i Natan, i Benaya ringangu lukadu watangeng u ratu napasaken Salomo e su wowong bagal᷊u ratu e, bọu ene i sire němpěngahạ i sire sol᷊ong simbul᷊u akẹ u Gihon.

³⁹Bọu e i Zadok něngal᷊ạ tampạ u lanang zaitun kụ seng niwawane wọu Tentaʼm MAWU, mase i sie nělanisẹ̌ si Salomo e kụ nẹ̌pakẹ u l᷊ana ene. Slompretẹ̌ e mal᷊aing nipahěte mase apạeweng seng narěnta sene němpẹ̌giọ e, ”Biahẹ̌ Datu i Salomo!”

⁴⁰Bọu ene i sire kěbị timaking si sie kapia apidu kapẹ̌gione kụ napahẹ̌ten suling, hakịu ěntana e tabidạeng mahěngẹ ual᷊ingu pilisirẹ̌ ene.

⁴¹I Adonia ringangu kal᷊awọu sakene buhụ ewe nasueng sal᷊iwang e, piạ i sire nakaringihẹ̌ pilisirẹ̌ ene. Su tempong i Yoab nakaringihẹ̌ tingihu slompretẹ̌, i sie nakiwal᷊o, ”Kai apa nariadi su soa hakịu kawe kerẹeng karamene?”

⁴²I Yoab bědangbe lain tawe nạsuem bisarane, sěngkianu narěntạ i Yonatan, anạ u Imang i Abyatar, ”Ěndaịko suẹ̌,” angkuěng i Adonia, ”I kau e taumata mapia, nal᷊ahẹu ul᷊enu e ute habarẹ̌be mapia l᷊ai.”

⁴³”Kạěngkěhang bue, bal᷊inewe habarẹ̌ mapia,” nisimbang i Yonatan. ”Datu i Daud kai seng něhengkẹ i Salomo nakoạ datu!

⁴⁴I Zadok, i Natan, i Benaya ringangu lukadu watangeng u ratu e seng nioro apạtaking si Salomo. I sire kai seng napasakeng sie su wowon sihingu bagal᷊u ratu,

⁴⁵dingangu i Zadok ore lai i Natan seng něhengkẹ i sie su simbul᷊u akẹ u Gihon. Orasẹ̌ ini e i sire seng němpẹ̌sul᷊e kapia sol᷊ong soa apidu kạpahul᷊iage maghahẹ-gahẹ, kụ kasěllahu soa e nẹ̌gěgahẹ. Seng ene e pilisirẹ̌ kụ nikaringihʼi kamene kanini.

⁴⁶I Salomo orasẹ̌ ini e seng nakoạ datu.

⁴⁷Sarangkewe manga pěrwiran datu e němpẹ̌berạeng sal᷊amatẹ̌ su Ratu i Daud. I sire nẹ̌bera u, ’Mal᷊owọko Ruatan tuang e mapakariadin Salomo e něngalembo timeleng bọu i tuang; mal᷊owọko pẹ̌paparentan Salomo e limembong kapiane wọu pẹ̌paparentan tuang.’ Bọu ene su tampạ pělẹ̌hědangeng e Ratu i Daud nẹ̌tumpěkuhẹ̌ nẹ̌suba Ruata,

⁴⁸kụ nẹ̌kal᷊iomaneng, ’Karaloko i Kau, o MAWU, Ruata isẹ̌sěmban tau Israel. Sěhěllo ini sěngkatau wọu hiteku e seng nihengkẹʼU nakoạ datu, něngaweng si siạ. Kụ i Kau e seng napakawalang iạ e mẹ̌biahẹ̌ baugu mẹ̌sahiding ene e!’ ”

⁴⁹Manga sakeng Adonia e něngkatakụ, hakịu i sire kěbị e němpẹ̌darisị kụ němpẹ̌dal᷊eng, sěngkatau-sěngkatau e nasịdal᷊engu-ral᷊enge.

⁵⁰Tangú měngkate apa matakụ-takụ i Adonia e si Salomo, hakịu i sie timal᷊ang sol᷊ong Tentam MAWU e kụ měngkate mạngumpaedẹ̌ manga pondol᷊u pananěmbaěng[1] sene.

⁵¹Taumata e němpěhabaru hal᷊ẹ̌ ene su Ratu i Salomo. I sire němpěhabarẹ̌ u ual᷊ingu i Adonia e měngkate apa matakụ-takụ si Salomo, tangú i sie seng nakoạ sol᷊ong tampạ pananěmbaěng kụ mạngumpaedẹ̌ manga pondol᷊u pananěmbaěng ene apidu kapẹ̌bẹ̌berane u, ”Iạ e tawe měngal᷊ing bọu ini těntal᷊ang i Salomo e reng tawe nẹ̌salu si siạ u i sie tawe měmate si siạ e.”

⁵²I Salomo e simimbang, ”Kereu i sie mẹ̌koạ mapia, i sie tawe měhukung sarang kadodọ-dodọ; kai kamageng u i sie mẹ̌koạ dal᷊akị, i sie harusẹ̌ pateěng.”

⁵³Bọu e ratu rimolohu taumata pěngal᷊ạ si Adonia e wọu pananěmbaěng ene. Tangú narěntạe i Adonia e nẹ̌těngon datu, kụ nẹ̌tumpěkuhẹ̌ su těngone. Bọu e ratu nẹ̌bera, ”I kau e wotonge mapul᷊ẹ!”