Read Sangir MANGA RATU HUMOTONG 10 Bible Online

MANGA RATU HUMOTONG 10 - Sangir bible

MANGA RATU HUMOTONG 10

¹ Datun soan Syeba wawine e nakaringihẹ̌ teleng u Ratu i Salomo. Tangú i sie riměnta sol᷊ong Yerusalem mědeạu měmanikạ si Salomo ringangu kakiwal᷊o makakětị.

²I sie riměnta piạ dingange tumataking si sie sěnggiuma ringangu ontane napenẹ u manga rampa, batum paramata, ringangu wul᷊aeng mal᷊awọ-l᷊awọ. Su tempong nẹ̌sombang i Salomo, datu wawine ene něngukahẹ̌kong kakiwal᷊one haghi nikatiněnnane.

³Kal᷊awọu kakiwal᷊o ene nikasimbaheng i Salomo, kụ tawẹ u sarang sěmbaụ kụ tumanịu makětị su tiněnnane.

⁴Datu wawine ene nẹ̌sahidi hala kai apạ e pelesa i Salomo e. I sie nakasilo istana nipětị i Salomo,

⁵atoru hal᷊ẹ̌ u manga sawohị u istanane, ringangu pakeangu hal᷊ẹ̌ i sire mẹ̌sul᷊ung dingangu pẹ̌bawal᷊eěng i sire. I sie nakasilo kaěng dingangu inumang sẹ̌sadiaěng, dingangu kakakoạ u manga kokị měmpẹ̌siliwirẹ̌ su pesta, dingangu manga sasěmba nisěmbang Salomo e su Wal᷊em MAWU. Kěbị ene e nakakaherang datun soan Syeba wawine e ringangu rimal᷊inaụ.

⁶Tangú nẹ̌berạe i sie su Ratu i Salomo, ”Kal᷊awọu apang takụ kinaringihẹ̌ su wanuaku e mạanung kakakoạ i Tuang dingangu kapelesan Tuang, mambeng kahěngang!

⁷Nạung kạngerẹ e iạ tawe mangimang, kaiso sarangke iạ e narěntạ e ringangu nakasahidi kěbị e ringangu mataku hala, wuhụewe iạ maiaking. Mahunẹu kal᷊awọu apan dingihẹ̌ku ene e reng tanakạ mal᷊oara apan takụ kinasilo orasẹ̌ ini e. Kụ kai luhudu kapelesa ringangu kakakalạ i Tuang e kai apa limembong masaria marau wọu apang nipaul᷊ị si siạ e.

⁸Apạ e mauntu manga kawing i Tuang! Dingangu kai apạ e kapia pal᷊edu manga sawohị kụ měngkai sěntiniạ mạmunara waugʼi Tuang hakịu nakaringihẹ̌ bọu i Tuang hala kal᷊awọu těntirong kapelesa!

⁹Karaloko MAWU, Ruatan Tuang! Ual᷊ingu něhengkẹ i Tuang nakoạ datung Israel, MAWU e nělahẹ u kai apạ e kal᷊uase i Sie si Tuang, tawe kakawusangu kakěndage i Sie su tau Israel; ual᷊ingu ene i Sie něhengkẹ i Tuang nakoạ datun sire tadeạu i Tuang e makawewẹbe toratẹ̌ dingangu kạadilẹ̌.”

¹⁰Bọu ene ratun soan Syeba wawine ene e něnarakang si Salomo manga ghaghěllị kụ niwawane, kụ kai wul᷊aeng něngalembo wọu 4.000 su kilone, ringangu watum paramata e mal᷊awọ dingangu l᷊ai manga rampa. Tawẹ běke lai i Salomo e nakatarimạ u manga rampa kereng kal᷊awọe kere nạung nionggọu ratun soan Syeba wawine ene si sie. (

¹¹Manga kapal᷊u Hiram kụ nẹ̌bawa wul᷊aeng bọu Ofir baugʼi Salomo, nẹ̌bawako l᷊ai watum paramata ringangu kalun cěndana mal᷊awọ-l᷊awọ.

¹²Kalu ene nipakẹ i Salomo ipẹ̌koạ manga tarali su Wal᷊em MAWU ringangu istanan datu; ipẹ̌koạ l᷊ai kěcapi ringangu gambus baugu mẹ̌kakantarị. Manga kalu ene ute kai kalun cěndana kal᷊ěnggihange kụ seng bọu nạung niaparěnta sol᷊ong Israel; kụ semben tawẹ u saụ nakasilo kalu kereng kapiane ene.)

¹³Sul᷊iung manga poroseěng nighěllị i Salomo e, i sie mal᷊ain nẹ̌gěllị su ratu wawine wọu soan Syeba ene, kal᷊awọu apan dẹ̌dorongange. Bọu ene napul᷊ẹ e ratu wawine ene sol᷊ong banuane ringangu kěbị apan tumatakinge.

¹⁴Apan taung Datu i Salomo e rimaẹ bul᷊aeng maraning 23.000 su kilone,

¹⁵tawe narekeng untune wọu pal᷊ahumbal᷊ụ, dingangu manga pajaku apang mẹ̌dẹ̌dagang, manga ratung Arabẹ̌ ore lai manga guběrnurẹ̌ u Israel.

¹⁶I Salomo něněsal᷊ẹ̌ kěllung bul᷊aeng gagherẹ arěgang 200 su waụ e. Bul᷊aeng nipakẹ baugu apang kěllung[11] ene piạ u manga něngalembo wọu pitung kilo.

¹⁷I sie lai něněsal᷊ẹ̌ kěllung bul᷊aeng 300 kụ diọ dararodọ ene. Bul᷊aeng kụ nipakẹ baugu apang kěllung dararodọ ene e piạ u manga ruang kilo wěhạ e, kụ kěbị e wul᷊aeng sěsal᷊ẹ̌. Kal᷊awọu kěllung ene nipěllọe su wal᷊eng pẹ̌kakomol᷊ang arenge Wal᷊eng Kěhung Libanon.[12]

¹⁸I sie lai nẹ̌koạ kạderang kararatuang gẹ̌guwạ sěmbaụ kụ niěmboěngu sunge, ringangu nilẹ̌gahengu wul᷊aeng sahị.

¹⁹Kadera ene piạ takiahe, ringangu su ruam běka e piạ tul᷊adan singa. Su l᷊ikudu kadera ene piạ tul᷊adan těmbọu sapi. Kadera ene mal᷊aing piạ tumbal᷊atunge ěnnung.

²⁰Su pondol᷊e kaihi ringangu pondol᷊e koaneng, suapang darangenang, piạ tul᷊adan singa — kěbị e mapul᷊o dua su waụ e. Tawẹ běke u kai nạung piạ kaderang kararatuang mẹ̌sul᷊ungu ene su kararatuang sude.

²¹Kal᷊awọu apal᷊iwụ u panganginungang i Salomo e nikoạ bọu wul᷊aeng, dingangu kal᷊awọu apal᷊iwụ su Wal᷊eng Kěhung Libanon mal᷊aing kinoạ bọu wul᷊aeng sahị. Tawẹ apa kụ nikoạ bọu sal᷊aka, batụu su tempon Salomo e taumata mạngiral᷊ing u sal᷊aka e tawẹ arẹ̌gane.

²²I Salomo e piạ kapal᷊e ghaghuwạ mal᷊awọ tụtondo sěngkatondo ringangu manga kapal᷊u Ratung Hiram. Těllu taung sěnsul᷊e manga kapal᷊ẹ̌ ene mẹ̌sẹ̌sul᷊e kụ měbẹ̌bawa wul᷊aeng, sal᷊aka, sunge, waha, ringangu manga manụ měrak.

²³Datu i Salomo e limembong kalạ, dingangu limembom pelesa wọu kěbị datu su dunia.

²⁴Kěbị taumata su dunia e mẹ̌tẹ̌tawakal᷊i mẹ̌sombang i Salomo waugu rumaringihẹ̌ těntirong kapelesa kụ nionggọ u Ruata e si sie.

²⁵I sire sěngkatau-sěngkatau e nahunděnta nẹ̌bawa poroseěng baugʼi Salomo. I sire nẹ̌gěllịu manga apal᷊iwụ sal᷊aka, wul᷊aeng, pakeang, aghidẹ̌, manga rampa, kawal᷊o ringangu wagal᷊ẹ̌. Kerene kakakoạ e apan taung.

²⁶ I Salomo e nẹ̌koạ buntuangu sekẹ bọu karetan sekẹ 1.400 su waụ e, ringangu sordado piạ kawal᷊one mapul᷊o dua su hiwune kal᷊awọe. Sěngkamonaěng nipěllọ e su Yerusalem mase lěmbene, su manga soa wal᷊ine.

²⁷ Su l᷊imang paparentaěng i Salomo, su Yerusalem sal᷊aka e kai seng nakoạ, barang biasa kere watu, ringangu kalun cěmarang Libanon maral᷊awọ kere kalung ara wiasa.

²⁸ Limium manga měmamunaran datu e naparěntang kawal᷊o wọu Misirẹ̌ dingangu Kilikia,

²⁹ringangu manga karetan sekẹ bọu Misirẹ̌. Arěgang kawal᷊o sěmbaụ e mahasụ limam pul᷊o su kal᷊ěpane roitẹ̌ sal᷊aka, dingangu arěgang karetan sekẹ sěmbaụ e ěnnung u hasụ su kal᷊ẹ̌pane roitẹ̌ sal᷊aka. Bọu ene lumiung manga mẹ̌mamunara ene lai manga kawal᷊o, ringangu manga karetan sekẹ ene e niwal᷊ụ lai su manga ratung Het dingangu manga ratun Siria.