Read Sangir MANGA RATU HUMOTONG 11 Bible Online

MANGA RATU HUMOTONG 11 - Sangir bible

MANGA RATU HUMOTONG 11

¹ Datu i Salomo tụtal᷊ěntụ u manga wawine raghị mal᷊awọ. Su l᷊iung sangiangu ratum Misirẹ̌, i Salomo mal᷊aing nẹ̌kawingu manga wawineng Het, Moab, Amon, Edom dingangu Sidon.

² MAWU e seng nẹ̌parenta, u tau Israelẹ̌ e tawe wotonge mẹ̌kawing mẹ̌dal᷊aụ u manga wansa ene e, batụu i sire e kai sarung makakariadin tau Israel maněmba manga ruata wal᷊inẹ. Maningbe kerene, i Salomo e mal᷊aing nẹ̌kawingu manga wawine raghị.

³I sire pitu hasụ su kataune manga wawine papuěng e pinẹ̌kawingang i Salomo e, ringangu piạ lai rokạ i sire těllu hasụ su kataune. Kụ i sire manga wawine tamai ene e nakakariadin Salomo e naněntang u Mawu,

⁴hakịewen su tempong i sie seng naghurang, i sire nakasahionge naněmba ruata wal᷊ine. I Daud i amang i Salomo, masatia su MAWU, Ruatane, arawe i Salomo e wal᷊inewe kere i amange.

⁵I Salomo e naněmba Asytoret, duatan tau Sidon, bawine e ringangu lai i Molokh duata makạmuta, isẹ̌sěmban tau Amon.

⁶Kerene i Salomo e nẹ̌dosa su těngom MAWU. I Daud, i amang i Salomo e timol᷊e MAWU ringangu kạguwạu ral᷊ungu naung, arawe i Salomo e wal᷊inewe kerene.

⁷Su wowom bul᷊ude su sěmběkan dakị wọu Yerusalem, i sie něndarisị u tampạ pěnaněmbaěng baugʼi Kamos, duatan tau Moab, dingangu waugʼi Molokh, duatan tau Amon — irẹ̌dua kěbị e kai ruata makạmamuta.

⁸I Salomo e mal᷊aing napararisị u manga tampạ u marehokang tau raghị makạpanutung buwụ, dingangu měmpạněmbang sasěmba waugu manga ruatan sire hala.

⁹Seng karua sul᷊ene Ruatang Israel, nẹ̌těngkatodẹ u watangengʼE si Salomo makịtahěndung i sie u i sie tawe wotonge maněmba manga ruata wal᷊ine, kaiso i Salomo e tawe rimaringihẹ̌ MAWU. I sie mal᷊ạbe naněntangu MAWU, hakịu MAWU e limangehẹ̌ si sie.

¹⁰

¹¹MAWU e něhengetang, ”Ual᷊ingu kawe pinẹ̌tatudẹ i kau e nělandang kirenu ringang-Ku e ringangu tawe rimaringihẹ̌ kal᷊awọu tita-Ku e, tangú Iạ e sarung měhampasẹ̌ kararatuang ene e wọu i kau, ringangu měnarakang su sěngkatau wọu manga sawohị u.

¹²Maningbe kerene, baugi amangu i Daud, Iạ e tawe mẹ̌koạ hal᷊ẹ̌ ene karěngụewen pẹ̌bawiahu. Su tempong pẹ̌paparentan ahusu e, wuhụewe Iạ mẹ̌koạ ene e.

¹³Kaiso wal᷊inewe kal᷊awọu kararatuang ene e sarung Takụ hampaseng bọʼi sie. Baugu ěllang-Ku e i Daud, dingangu waugu Yerusalem kụ seng Takụ pinakariadi soa-Ku ene e, Iạ e sarung mělěmbeng ghal᷊ipoho sěmbaụ baugu ahusu e.”

¹⁴Tangú MAWU e napakariading Hadad, sěngkatau hiten datung Edom, nanědụ su Ratu i Salomo.

¹⁵Marěngụ kal᷊amonang ene e, samurin Datu i Daud namatạ Edom, i Yoab, panglimang buntuangu mẹ̌sasekẹ u Ratu i Daud, nakoạ sol᷊ong Edom mělěbing u taumatane apang nate. Ěnnungu wul᷊ang karěngụ e i sie ringangu manga taumatane nẹ̌tanạ su Edom. Kụ su ral᷊ungu tempo ene i sire němpěmate kal᷊awọu apang manga esẹ sene.

¹⁶

¹⁷Arawe i Hadad, kụ su tempo ene wědang mangudạ, seng timal᷊ang sol᷊ong Misirẹ̌ dingangu i sire pira wọu Edom, mẹ̌tatangkiang si amange.

¹⁸I sire e kai nẹ̌buạ bọu Midian, mase nakoạ sol᷊ong Paran. Sene piạ l᷊ai taumata wal᷊ine pirang katau nẹ̌těngkal᷊aụ dingang i sire kụ bọu ene nakoạ sol᷊ong Misirẹ̌ nẹ̌sombangu ratum Misirẹ̌. Datu ene nẹ̌gěllịu wal᷊e si Hadad ringangu ěntana waụgu pẹ̌tatanakeng dingangu pẹ̌bawiahẹ̌.

¹⁹Tangú i Hadad mal᷊aing nakoạ hapịu ratu mapia, hakịu ratu e nẹ̌gěllịu ipage hala e, kụ kai tuarin sangiang, i Tahpenes, si Hadad tadeạu makoạ kawinge.

²⁰Bọu e kawing i Hadad ene němantelu sěngkatau rariọ esẹ nisěbạe si Genubat. Dariọ ini nipakasariang sangiang hala ringangu nẹ̌tanạ su istana ringangu manga kasilin datu.

²¹Piạ i Hadad nakatarimạ habaru Ratu i Daud kawe seng nairị, dingang i Yoab panglimam buntuangu mẹ̌sasekẹ u Israel selain naněntang, kụ nẹ̌berạe i Hadad su ratum Misirẹ̌, ”Pakawalako iạ deng mẹ̌sul᷊e sol᷊ong banuane.”

²²”Unụe?” ratu nakiwal᷊o. ”Kai nikakawusange tangú i kau sini e, hakịu i kau kawe mapulu mẹ̌sul᷊e kapia sol᷊ong banuanu?” ”Iạ e tawe nikakawusang u apa,” sasimbang i Hadad, ”kaiso walạekere iạ e man dumal᷊eng.” Tangú nẹ̌sul᷊ẹ e i sie sol᷊ong banuane.[13]

²³Duata e mal᷊aing napakariadin Rezon, anạ i Elyada, nanekẹ si Salomo. I Rezon kai ěllang kụ timal᷊ang u watangenge wọu anung mawune kụ kai Ratu i Hadadezer bọu Zoba.

²⁴Datu i Daud e nạung bọu němatạ si Hadadezer ini e kụ němate manga hapị i Hadadezer bọu Siria. Su tempo ene i Rezon timal᷊angu watangenge wọu Hadadezer kụ něnampungu taumata kụ bọu ene nakoạ těmbonang u rumarokạ. I sie ringangu manga hapị e něngkakoạ sol᷊ong Damsyik kụ němpẹ̌tanạ su soa ene. Sene apan taumatane něhengkẹ i sie nakoạ datu su Siria.

²⁵Kerẹewe i Hadad, Datu i Rezon mal᷊aing něnekẹ Israel karěngụeweng biahi Salomo, kụ něnggohaeng su wanua ene.

²⁶Taumata wal᷊ine kụ němpěnggohaeng dimokạ si Salomo e ute kai sěngkatau wọu sawohị e isẹ̌sěbạ si Yerobeam. I sie kai anạ i Nebat bọu Zereda su Efraim. I ninange kai sem bal᷊u, isẹ̌sěbạ si Zerua.

²⁷Mase tuhụ e ini ute wěkeng pěnggaghohaeng i Yerobeam. Piạ e ěntana su sěmběkan timuhẹ̌ bọu Wal᷊em MAWU kụ nẹ̌sarětạ e lai lẹ̌ambungang, dingangu meselu soa e lẹ̌ul᷊ikang,

²⁸i Yerobeam mal᷊aing mělẹ̌hal᷊ẹ̌ sene. Piạ i Salomo e nakasilo u i Yerobeam e mahal᷊ẹ̌ dingangu tawẹ irul᷊ene, tangú i sie něngonggọeng bawawaěng si sie apěnẹ̌nahimata hal᷊ẹ̌ u sihasa su wanuang hěnton Manasye ringangu Efraim.

²⁹Piạ su sěhěllo i Yerobeam siměbang bọu Yerusalem. Sutal᷊oaran dal᷊eng su wanua l᷊inggi e i sie nirěntaěng u Nabi i Ahia wọu Silo kụ su tempo ene mẹ̌pẹ̌pakẹ u kakingkaeng e wuhu.

³⁰Mase i Ahia něměllọu kakingkaenge, ringangu něnggaghaghehẹ nakoạ mapul᷊o dua su pědine.

³¹Bọu e nẹ̌berạe i sie si Yerobeam, ”Pěngal᷊ạe mapul᷊om pědi waugu watangengu, batụu MAWU Ruatang Israelẹ̌ e něhengetang kirini si kau, ’Iạ e sarung měngaho kararatuang ini wọʼi Salomo, ringangu měngonggọu hěnto mapul᷊o si kau.

³²Hěnto sěmbaụ e sarung tatapẹ̌ si Salomo, baugu ěllang-Ku i Daud, dingangu waugu i Yerusalem, kụ seng Takụ nipile wọu kasěllahu wanuang Israel nakoạ soa-Ku.

³³Iạ e sarung měkoạ ene, watụ u i Salomo e seng naněntang u Iạ dingangu naněmba manga mahan duata, kụ: i Asytoret, mahang duatan tau Sidon bawine; Kamos mahang duatan tau Moab; dingangu Milkom, mahang duatan tau Amon. I Salomo e tawe timuhụ kapulu-Ku. I sie wal᷊inewe kere i amange i Daud kụ mararingihẹ̌ si Siạ kụ mẹ̌kẹ̌koạ apang laoro-Ku.

³⁴Manimbe kerene Iạ e sarung tawe měngal᷊ạ kasěllahu kararatuang ene e wọu i sie. I sie sarung Takụ ipakawala pẹ̌kawasa karěngụu pẹ̌bawiahe. Hal᷊ẹ̌ ene Takụ koateng baugu ěllang-Ku i Daud, seng Takụ nipile, dingangu apan tụtuhụ manga tita-Ku ringangu hengetang-Ku.

³⁵Kararatuang ini e sarung Takụ al᷊akeng bọu anung kasilin Salomo e ringangu hěnto mapul᷊o e sarung Takụ ionggọ si kau.

³⁶Arawe hěnto sěmbaụ e Takụ iwala si sie, tadeạu hanesẹ̌be piạu sěngkatau wọu hěntong ěllang-Ku i Daud kụ mẹ̌pẹ̌parenta waugu Iạ e su Yerusalem, soa e Takụ nipile nakoạ tampạ u pẹ̌kakal᷊iomanengang si Siạ.

³⁷Dingangu i kau, Yerobeam, sarung Takụ ipakariadi ratung Israel dingangu Takụ ipakawala pẹ̌parenta kasěllahu wanua ikẹ̌kapulunu.

³⁸Kereu i kau, mẹ̌sul᷊ungu ěllang-Ku i Daud, mararingihẹ̌ kahěngang si Siạ e ringangu měbẹ̌biahẹ̌be tụtuhụ manga tita-Ku, ringangu makạl᷊uasẹ̌ dal᷊ungu naung-Ku, ual᷊ingu mẹ̌kẹ̌koạ kal᷊awọu apan Takụ ilẹ̌oro si kau, tangú Iạ e sarung duměndingang si kau sěntiniạ. Iạ e sarung měhengkẹ i kau e makoạ datu su Israel. Iạ e sarung manongka tadeạu hitenu e sarung makoạ datung Israel měngaweng si kau, mẹ̌sul᷊ungu sen Takụ nikoạ baugʼi Daud.

³⁹Batụu i Salomo e nẹ̌dosa, kụ Iạ e sarung měhukungu hiten Daud, kaiso wal᷊inewe sarang marěngụ-děngụ.’ ”

⁴⁰Su tempoeng habarẹ̌ ene e nahumpạ e si Salomo, tangú i sie nẹ̌tawakal᷊i němate si Yerobeam. Kaiso i Yerobeam timal᷊ang sol᷊ong anun Datu i Sisak su Misirẹ̌, kụ nẹ̌tanạ sene sarang i Salomo e napohong.

⁴¹Běke wal᷊ine mạanung Salomo, hal᷊ẹ̌ u kal᷊awọu apang nikoạ e ringangu mạanung kasingkạ e, seng niwohẹ su ral᷊ungu bukẹ̌ u Wěkem Pẹ̌bawiahi Salomo.

⁴²Ěpạ u pul᷊o su taunge karěngụ e i Salomo nẹ̌parenta su Yerusalem baugu kasěllahu Israel.

⁴³Bọu ene i sie napohong kụ nilěbing su Soan Daud. Bọu e i Rehabeam ahuse naratu nangaweng si sie.