Read Sangir MANGA RATU HUMOTONG 12 Bible Online

MANGA RATU HUMOTONG 12 - Sangir bible

MANGA RATU HUMOTONG 12

¹I Rehabeam nakoạ sol᷊ong Sikem, ual᷊ingu patikụ kawanuang Israelẹ̌ su sěmběkan sawěnahẹ̌ e seng nẹ̌tampung sene měmpěhengkẹ i sie nakoạ datu.

²Su tempo ene i Yerobeam anạ i Nebat bědang ene su Misirẹ̌ ual᷊ingu tụtal᷊angu watangenge wọu anun Datu i Salomo. Piạ i sie nakaringihẹ̌ kakakoạ i Rehabeam, i sie nẹ̌sul᷊e sol᷊ong Israel.

³Kawanua su sěmběkan sawěnahẹ̌ e nẹ̌gausẹ̌ si Yerobeam, kụ i sire nẹ̌dingang i sie nakoạ sol᷊ong anung Rehabeam. Angkuěng i sire,

⁴”I Salomo i amang u Ratu e seng něngonggọu wawawaěng mawěhạ si kami. Orasẹ̌ ini kereu i Tuang mapakahaěngu wawawaěng dingangu měnggaing tědụ i kami e, i kami e sarung měmunara waugʼi Tuang.”

⁵I Rehabeam simimbang, ”Iạ harusẹ̌ mẹ̌tiněnna kal᷊imona. Saụko pẹ̌sul᷊e těllu ěllo kapia.” Tangú něngkapul᷊ẹ e taumata l᷊awọ ene.

⁶Mase i Rehabeam nẹ̌dorong sasasa su maghaghurang kụ nạung bọu nakoạ měnanasa si Salomo, i amang i Rehabeam. ”Kereapa iạ e harusẹ̌ sumimbang si sire ene?” kakiwal᷊ong Rehabeam, ”Kai a sasasang kamene?”

⁷I sire simimbang, ”Kereu i Tuang kahěnga-hěngang lụěnningu mẹ̌tangkiang kawanua, ute tarimạko rorong i sire, kụ i sire makapẹ̌tangkiang si Tuang sarang marěngụ-děngụ.”

⁸Kaiso manga sasal᷊ěntihọ u maghaghurang ene e tawe rararingihang i Rehabeam. Su sěmběkane, i sie nakoạ sol᷊ong anung sire apang mangangudạ sěndědagẹ̌ dingange kụ orasẹ̌ ini e lụontol᷊ẹ̌ si sie.

⁹I sie nakiwal᷊o si sire, ”Unụe sasal᷊ěntihọ i kamene si siạ e waugu sumimbang kawanua e mědẹ̌dorong tadeạu iạ mapakahaěngu wawawaěng i sire e?”

¹⁰I sire simimbang, ”Kere ini e hinone iwerang Tuang si sire, ”Maningbe kereapa karal᷊omeku e, kai iạ e wědangbe něngalembong katoghase wọu i amangku!”[14]

¹¹I amangku e něngonggọu wawawaěng mawěhạ si kau, arawe iạ sarung měngonggọu limembong kawěhạ e lai. I sie němahesu cambokẹ̌ pinaměbahẹ̌ si kamene, kaiso iạ e sarung měmahesu cambokẹ̌ piạ hanggange uase si kamene!”

¹²Těllu ěllo samuring ene i Yerobeam dingangu kal᷊awọu taumata ene e nẹ̌sul᷊e nẹ̌těngon Datu i Rehabeam, mẹ̌sul᷊ung kere seng niorone.

¹³Nẹ̌darol᷊eng beng sasal᷊ěntihọ u maghaghurang ene, kawanua apang diměnta su anune e pinẹ̌beraěnge matětogẹ̌.

¹⁴Natol᷊e kerẹewe su sasal᷊ěntihọ u apang mangangudạ, i sie nẹ̌bera, ”I amangku e něngonggọu wawawaěng mawěhạ si kamene, kaiso iạ e sarung mapahuntinambang kawěhạ e lai. I sie e měmahesu cambokẹ̌ si kamene kaiso iạ e sarung měměbahu cambokẹ̌ piạ hanggange uase si kamene!”

¹⁵Dorongu kawanua e tawe nipandungange. Kaiso ene e mambeng kapulung MAWU. Apang nipěhengetangu MAWU e wọu mohongu Nabi i Ahia e wọu Silo mạul᷊ị u i Yerobeam anạ i Nebat harusẹ̌ mariadi.

¹⁶ Piạ e kawanua nakasilo u ratu e tawe mapulu rumaringihẹ̌ si sire, tangú i sire němpẹ̌bansagẹ̌, ”Tawahal᷊uasu pandungang i Daud dingangu manga hitene! I sire e tawẹ běke rem bọu nẹ̌koạ manga apa waugʼi kitẹ e. Kawanuang Israel, bọete mapul᷊ẹ i kitẹ! Balạete i Rehabeam ene e apangurusẹ̌ badange hala!” Tangú něngkapul᷊ẹ e kawanuang Israel,

¹⁷dingangu i Rehabeam e nakoạ datu samatang baugu ěntanang Yehuda.

¹⁸Maningbe kerene Datu i Rehabeam bědangko l᷊ai něndolohi Adoniram, sěngkatau těmbonangu hal᷊ẹ̌ u rodi, mědeạu mapakal᷊enehu kawanua. Kaiso i sire němereng si sie ringangu watu sarang nate. Nakasilo hal᷊ẹ̌ ene i Rehabeam masahawụ-sahawụ nawị su karetane, kụ timal᷊angu watangenge sol᷊ong Yerusalem.

¹⁹Nanětạ bọu orasẹ̌ ene kawanua su wahageang sawěnahẹ̌ bọu kararatuangu Israel hanesẹ̌ mẹ̌gěnggohaeng miěbạ manga ratu hěnton Daud.

²⁰Su tempong kal᷊awọu kawanuang Israel nakaringihẹ̌ u i Yerobeam seng nẹ̌sul᷊e wọu Misirẹ̌ e, i sire nẹ̌gausẹ̌ si sie sol᷊ong piạ sěmbaụ pẹ̌sasombang kụ něhengkẹ i sie nakoạ datung Israel. Tumbạeng kawanuang hiten Yehuda samatang tatapẹ̌ satia su hěnton Daud.

²¹Piạ nạung Datu i Rehabeam narěnta su Yerusalem, i sie něngomol᷊ẹ̌ sordadone 180.000 su kataune kal᷊ěnggihange wọu hěnton Yehuda ringangu i Benyamin baugu sumekẹ tau Israel dingangu měngul᷊ị kawasane waugu manga hěnto su Israel sěmběkan sawěnahẹ̌.

²²Kaiso Mawu Ruata e rimolohu Nabi i Semaya

²³piněhabaru habarẹ̌ ini e si Rehabeam, dingangu su patikụ hěnton Yehuda ringangu i Benyamin,

²⁴”Kumbahang mẹ̌sekẹ u manga anạu sěmbaụ u tau Israel. Kapul᷊ẹ e! Apan seng nariadi ene e kai kapulu-Ku.” Tangú i sire kěbị e dimaringihẹ̌ hengetangu MAWU e, kụ něngkapul᷊ẹ sol᷊ong bal᷊eng sěmbaụ-sěmbaụ.

²⁵Sarangke nakoạ datung Israel, i Yerobeam nanoghase soan Sikem su wawul᷊urang u Efraim, bọu ene nẹ̌tanạ sene kadodọ tempo. Bọu ene i sie saụ dimal᷊eng bọu tampạ ene kụ nanoghasẹ̌ soam Pnuel.

²⁶I sie mạngěnna kere ini su naunge, ”Kereu kawanua e těbewe mạkoạ sol᷊ong Yerusalem měnarakangu sasěmba laonggọ su Wal᷊em MAWU e mẹ̌sul᷊ungu nạung nikoạ i sire orasẹ̌ ini, i sire sarung mẹ̌sul᷊e kapia měnongkạ si Rehabeam, datung Yehuda kụ měmate si siạ.”

²⁸ Bọuten nẹ̌timbangu hal᷊ẹ̌ ene tangú, i sie nẹ̌koạ tul᷊ada sapi wul᷊aeng darua, bọu e nẹ̌bera su kawanua, ”Tau Israel! Selaing piạ karěngụ e i kamene nakoạ sol᷊ong Yerusalem mẹ̌kal᷊iomaneng. Orasẹ̌ ini e, seng ini e manga ruatang kamene kụ seng naněbang i kamene wọu Misirẹ̌!”

²⁹Mase i Yerobeam naměllọu sapi wul᷊aeng sěmbaụ ene su Betel dingangu sěmbaụ e wue su Dan.

³⁰Tangú kawanua e mal᷊aing němpẹ̌dosa, batụu i sire kawe nakoạ sol᷊ong Betel dingangu sol᷊ong Dan baugu mẹ̌kal᷊iomaneng.

³¹I Yerobeam mal᷊aing napararisị u tampạ u pẹ̌kakal᷊iomanengang bal᷊ine su manga pusigu wawul᷊urange, mase i sie něnduị u manga imang bọu tal᷊oarang anạu sěngkataune kụ bal᷊ine hěnton Lewi.

³² Bọu ene i Yerobeam naměllọu manga imang ene e su Betel waugu ipěmunara paị sene ringangu i sie hala měnarakang u laonggọ su manga sapi wul᷊aeng ene e kụ seng nikoạ e. Mase i sie němoěngu tanggalẹ̌ mapul᷊o l᷊ima wul᷊ang kaual᷊une kere ěllo ghẹ̌guwạ baugu Israel, mẹ̌sul᷊ungkeweng ěllo ghẹ̌guwạ su Yehuda. Su ěllo ene i Yerobeam nakoạ sol᷊ong Betel kụ něnarakangu sasěmba ghaghěllị baugu mamantugẹ̌ ěllo ghẹ̌guwạ kụ seng nitantune ene.