Read Sangir MANGA RATU HUMOTONG 13 Bible Online

MANGA RATU HUMOTONG 13 - Sangir bible

MANGA RATU HUMOTONG 13

¹Su tempo ene piạ sěngkatau nabi su Yehuda. I sie nirolohu MAWU apakakoạ sol᷊ong Betel. Nabi ene nahumpạ sene piạ i Yerobeam dụdarisị su těngom pananěmbaěng baugu maněmbang laonggọ.

² Ual᷊ingu parentam MAWU e tangú nẹ̌berạe nabi ene su pananěmbaěng ene, ”Ei pananěmbaěng, ei pananěmbaěng! Kere ini angkuěng u MAWU, ’Sěngkatau rariọ sarung isěbạ si Yosia e sarung ikawantelẹ̌ su ral᷊ungu walagʼi Daud. Su wowonu ei pananěmbaěng, i sie sarung měmate manga imang kụ měmpěmunara su manga tampạ u pẹ̌kakal᷊iomanengang su manga mahan duata, dingangu selaing naněmbang laonggọ su wowonu e. Dingangu lai su wowonu i sie sarung manongkạ manga ruhin taumata.’ ”

³Waweran nabi ene, tuhụ e, ”Pananěmbaěng ini e sarung maopehẹ̌, dingangu awu su wowone sarung mạboso. Ene ute tialane iạ nirolohu MAWU.”

⁴Su tempong i Yerobeam nakaringihẹ̌ manga wawera ene, i sie naněbọ nabi ene kụ bọu ene němansagu, ”Samẹko tau ěndaị ene!” Kai apidu turusẹ̌ takiahi Yerobeam natětogẹ̌ hakịu i sie seng tawe saụ maul᷊e kapia.

⁵Pananěmbaěng ene sěngkianu naopehẹ̌ kụ awu su wowone e nạboso su ěntana, kerẹewe seng nipaul᷊ị u nabi ene ual᷊ingu laorom MAWU.

⁶Bọu ene nẹ̌berạe Datu Yerobeam su nabi ene, ”Tul᷊ungko pẹ̌kal᷊iomaneng su MAWU Ruatanu waugu Iạ. Pẹ̌gausẹ̌ko tul᷊umange waugu mapakapiang takiahẹ̌ku.” Nabi ene mal᷊aing nẹ̌kal᷊iomaneng baugu MAWU, mase nul᷊ẹ e takiahu ratu.

⁷Bọu e ratu nẹ̌bera su nabi ene, ”Bọete kumaěng su wal᷊eku. Iạ e kai mapulu měngonggọu poroseěng si kau.”

⁸Nabi ene simimbang, ”Manilaing i Tuang měngonggọu sěmběka wọu kakakalạ i Tuang, kai iạ e tawe tumol᷊e kumaěng dingangu manginung dingang i Tuang.

⁹Iạ e nakahombang laoro wọu MAWU mědeạu tawe kumaěng arau tawe manginung, dingangu tawe mapul᷊ẹ tumol᷊e ral᷊eng takụ niral᷊engang su tempong narěnta.”

¹⁰Kerene nabi ene rimal᷊eng timol᷊e ral᷊eng bal᷊ine.

¹¹Su tempo ene piạ sěngkatau nabi maghurang kụ mạtanạ su Betel. Manga anạ e něhabarẹ̌ si sie kakakoạ u nabi wọu Yehuda ene. I sire němpẹ̌běkeng apa nikoạ e su Betel ěllo ene, dingangu apang niwerane su Ratu i Yerobeam.

¹²Mase nakiwal᷊ọ e nabi maghurang ene e, ”Nabi wọu Yehuda ene e timol᷊e ral᷊eng sude piạ i sie napul᷊ẹ?” Tangú i sire e něnodẹeng dal᷊eng ene si sie.

¹³Mase i sie něngoro si sire pěnẹ̌nakẹ u kal᷊aianeng su kalidene. Bọu ene i sie nawị kalidene kụ tamai

¹⁴něnahusu nabi ene wọu Yehuda ene. I sie nẹ̌sombang u nabi ene kụkaiang su al᷊ungu kalu ghẹ̌guwạ. ”I kau e nabi wọu Yehuda e?” kakiwal᷊ong nabi maghurange ene. ”Kahěngang,” angkuěng u tau ene.

¹⁵”Bọete kumaěng su wal᷊eku,” angkuěng u nabi maghurang ene.

¹⁶Kai nabi wọu Yehuda ene e simimbangu, ”Mẹ̌dorong ampung! Iạ e tawe makaitụ gaghausʼi Tuang mědeạu tumol᷊e sol᷊ong bal᷊eng Tuang. Iạ e mal᷊aing tawe kumaěng arau manginung sini ringang i Tuang.

¹⁷MAWU e něngoro si siạ mědeạu tawe kumaěng dingangu tawe manginung dingangu tawe mapul᷊ẹ tumol᷊e ral᷊engu nisongoěng.”

¹⁸Tangú nabi maghurang bọu Betelẹ̌ e mal᷊aing nẹ̌konti si sie, kụ nẹ̌bera, ”Iạ e mal᷊aing nabi kere i Kau. Ual᷊ingu parentam MAWU e sěngkatau malaekatẹ̌ e seng něngoro si siạ apạněnsomahẹ̌ dingangu apẹ̌sẹ̌siliwirẹ̌ si Kau su wal᷊eku.”

¹⁹Tangú nabi wọu Yehuda ene timol᷊e sol᷊ong bal᷊eng nabi maghurang ene kụ kimaěng dingange.

²⁰Ene i sire kạpahungkaiange kụkaěng, MAWU e něhengetang su nabi maghurang ene,

²¹hakịu i sie něnasa su nabi wọu Yehuda ene, angkuěnge, ”MAWU e něhengetang si Kau, u i Kau e kai tawe rimaringihẹ̌ si Sie. I Kau e tawe nẹ̌koạ apang laoronʼE si Kau.

²²I Kau e seng nẹ̌sul᷊e kụ kimaěng dingangu nanginung, sumbal᷊iau i Kau e seng nisěding mẹ̌koạ hal᷊ẹ̌ ene. Ual᷊ingu ene i Kau e sarung pateěng, dingangu maietu e tawe ilěbing su pěndal᷊ěbingangu pamilinu e.”

²³Ene i sire nasuẹeng kaěnge, nabi maghurang ene e něnakẹ e kal᷊aianeng su kaliden nabi wọu Yehuda ene,

²⁴mase nẹ̌buạ e nabi ene. Suraral᷊engang i sie nitěmboěngu singa sěmbaụ, kụ nate nitěmboěng. Maiete nal᷊engge sural᷊eng kụ kalidene rụdarisị su rěduhe. Singa ene mal᷊aing dụdarisị sene.

²⁵Taumata apang masahe, makạsilo maietẹ̌ dingangu singa ene sene. Bọu e i sire nakoạ sol᷊ong Betel kụ něhabaru apang kinasilon sire.

²⁶Ené nabi maghurang ene nakaringihe hal᷊ẹ̌ ene, i sie nẹ̌bera, ”Nal᷊ahẹ u nabi ene e, kai nabi tawe rumararingihẹ̌ parentam MAWU! Ual᷊ingu ene MAWU něndingọ u singa ene apěněmbo ringangu apěmate si sie mẹ̌sul᷊ungkeweng seng niwerang MAWU kal᷊imona.”

²⁷Bọu e nẹ̌berạ e nabi maghurang ene su manga anạ e, ”Saketengkong kal᷊aianeng su kalideku.” Ene nasengkangke su wowong kalidene, i sie apidu nẹ̌buạ.

²⁸I sie nakahombang sěngkakakěllane maietu nabi wọu Yehuda ene wědang kạpapěllọ sural᷊eng ringangu kalide ore lai singa su rěduhe. Singa ene tawe něněmbo kalide ene; dingangu tawe lai kiminạ maietẹ̌ ene.

²⁹I sie něhengkẹ maietẹ̌ ene kụ něměllọ su wowong kalidene, mase nẹ̌bawa kapia sarang Betel mědeạu lungkaneng, dingangu lěbingang.

³⁰Nabi maghurang ene hala e něngubul᷊ẹ̌ nělěbing maietẹ̌ ene su pěndal᷊ẹ̌bingangu pamili e, wọu e i sie ringangu manga anạ e němpahungkiạ u maietẹ̌ ene e. I sire nẹ̌bera, ”Kasiang i kau anạ u sěngkatauku nakatatal᷊ěntụ bue!”

³¹Bọu e angkuěngu nabi maghurang ene su manga anạ e, ”Kereu iạ mairị, ute iạ lěbing su pěndal᷊ẹ̌bingang ini su sěndihangu nabi ene.

³²Apang nạung niwerane ual᷊ingu parentam MAWU mihino su pananěmbaěng su Betel ene ringangu su kěbị tampạ u pẹ̌kakal᷊iomanengang suapan soang Samaria e mang sarung mariadi.”

³³Datu i Yerobeam těbe tawe mapulu maněntangu kakanoạ e ral᷊akisẹ̌. Baugu měngurusẹ̌ kal᷊awọu tampạ u pẹ̌kakal᷊iomanengang kụ seng nirarisị e ene, i sie měngkai tatapẹ̌ namile manga imang bọu manga walagẹ̌ biasa. Walạewe i saing mapulu ihengkẹ e makoạ imang.

³⁴Kakanoạ e ral᷊akisẹ̌ e nakasumbinaẹ manga hitene nawihua ringangu nawinasa marihutu.