Read Sangir MANGA RATU HUMOTONG 14 Bible Online

MANGA RATU HUMOTONG 14 - Sangir bible

MANGA RATU HUMOTONG 14

¹Su tempo ene anạ i Yerobeam esẹ e isẹ̌sẹ̌bạ si Abia e nasakị.

²Tangú nẹ̌berạ e i Yerobeam su kawinge, ”Pẹ̌dariahiko kakoạ sol᷊ong Silo wal᷊eng Nabi Ahia nạung kal᷊imona e nẹ̌bera u iạ e sarung makoạ datung Israel. Kaiso pẹ̌těngkaunide tadeạu taumata e wěga wue měnsang i sai i kau e.

³Panondako borotẹ̌ mapul᷊om baụ si sie, kukisẹ̌ kadodọ, dingangu madu sěmbotol᷊ẹ̌. Pakiwal᷊oko si sie kai apa sarung mariadi si Abia, anạ i kitẹ. Nabi ene sarung měhabaru ene si kamene.”

⁴Tangú tamaị e kawing i Yerobeam sol᷊ong bal᷊eng Nabi i Ahia su Silo. Nabi ene tawe lai makasilo ual᷊ingu i sie seng maghurang-gurang.

⁵Arawe MAWU e něhabarẹ̌ si sie, u kawingi Yerobeam kạděntane mědeạu makiwal᷊ong anạ e masakị. Kụ MAWU e mal᷊aing naul᷊ị su Nabi i Ahia, apang sarung iwerane. Piạ e kawing i Yerobeam nasongo paịsene, i sie nẹ̌těngkakoạ kere taumata wal᷊ine.

⁶Kai sarangke Nabi i Ahia e nakaringihẹ̌ tingihu ral᷊empange su tukadẹ̌ e, i sie nẹ̌bera, ”Ěndaị e suẹ̌, iạ masingkạ u i kau e kai kawingʼi Yerobeam. Tawahal᷊uasu měmělle. Piạ habarẹ̌ dal᷊akị baugʼi kau.

⁷Kapul᷊ẹ e kụ pěhabarẹ̌ si Yerobeam u kai ini wawerang MAWU e, Ruatang Israel, ’I kau e Takụ nipile wọu tal᷊oarang kawanua kụ Takụ kinoạ mangangawasa waugu umatẹ̌-Ku Israel.

⁸I kau e seng Takụ nionggotangu kararatuang Takụ nipul᷊aho wọu hiten Daud. Kai i kau e wal᷊inewe kere ěllang-Ku i Daud. I sie satia kahěngang si Siạ dingangu mararingihẹ̌ su parenta-Ku. I sie kětạeng mẹ̌kẹ̌koạ apan Takụ ipakạbala.

⁹Arawe i kau e kai měkẹ̌koạ karal᷊akisẹ̌ limembong kasariane wọu apang kẹ̌koateng i sire apang mẹ̌pẹ̌parenta kal᷊imonang kau. I kau e naněntangu Iạ dingangu nakawodaị dal᷊angehẹ̌-Ku ual᷊ingu nẹ̌koạ mahan duata ringangu manga patong bọu manga uada mědeạu subaěng.

¹⁰ Ual᷊ingu ene Iạ e sarung maparěntang silakạ baugu ral᷊ohom bal᷊enu. Patikụ apang hitenu manga esẹ e walạewe měnsang apa pangkate, sarung pateěng. Iạ e sarung měngupu anạu sěmbaụ u mẹ̌sul᷊ungu měngaehẹ̌ onasẹ̌, pakawarěsi.

¹¹Anạ u sěmbaụ u apan nate su soa sarung kinasengu asu, ringangu apan nate su l᷊ikudu soa e sarung kinasengu manụ u winalangeng. Pẹ̌tahěndung, Iạ e kai MAWU mělẹ̌hengetang!’ ”

¹²Bọu ene Nabi i Ahia e nẹ̌bera su kawingʼi Yerobeam, ”Ho, kapul᷊ẹ e ini e! Su tempong i kau kạsuẹ̌ e su soa, anạu e sarung mairị.

¹³Kal᷊awọu kawanuang Israel sarung mělutu kụ měmpělěbing. Seng i sie e sěmbaụ nasowa ral᷊ohom balagʼi Yerobeam kụ sarung ilẹ̌bing tuhụ adate, u watụ u samatang i sie makạl᷊ahimpulu naungu MAWU, Ruatang Israel.

¹⁴Israel sarung onggotangu MAWU sěngkatau ratu kụ sarung mangěnsue kal᷊aianengu hěntong Yerobeam kere ratu. Ěllone seng nidating! Manětạ orasẹ̌ ini

¹⁵MAWU e sarung měhukungu Israel hakịu mẹ̌kẹ̌kambol᷊asagẹ̌ kere lotạ su ral᷊ungu akẹ. MAWU e sarung maněbang u kawanuang Israelẹ̌ e bọu wanua mal᷊ěnggihẹ̌ ini e kụ nionggọʼE su manga i upung i sire. I Sie sarung mapẹ̌kal᷊iaesʼi sire sol᷊ong sěmběkan Sal᷊ụ u Efrat, batụu i sire seng nakawodaị dal᷊angehʼE ual᷊ingu pẹ̌kakoạ tul᷊adang duata wawine i Asyera.

¹⁶MAWU sarung maněntangu Israel ual᷊ingu i Yerobeam seng nẹ̌dosa ringangu nakawodaị tau Israelẹ̌ e mal᷊aing nẹ̌dosa.”

¹⁷Bọu ene nẹ̌buạ e kawing i Yerobeam sol᷊ong Tirza. Su tempo ene i sie simuẹ̌ su wal᷊ene, anạ e naminsul᷊u singongone.

¹⁸Kawanuang Israel němpělutu mase něngubul᷊ẹ̌ kere nibawerang MAWU limiu Nabi i Ahia, ěllange.

¹⁹Běkene wal᷊ine mạanun Datu Yerobeam, kụ su kawasane ringangu pẹ̌sasekẹ kụ niahạ e, seng niwohẹ su bukẹ̌ u Wěkem Mararatung Israel.

²⁰Duam pul᷊o dua su taunge karěngụ e i Yerobeam mẹ̌pẹ̌parenta kere sěngkatau ratu, mase i sie nairị dingangu nilěbing. Anạ e isẹ̌sẹ̌bạ si Nadab ute něngaweng si sie nakoạ datu.

²¹Piạ i Rehabeam anạ i Salomo, nakoạ datung Yehuda, umbure natimu ěpạ u pul᷊o ěsa su taunge. I sie nẹ̌parenta mapul᷊o pitu su taunge karěngụ e su Yerusalem. Bọu kasěllahu Israel, soa ene e seng nitani waugu MAWU kere tampạ u pẹ̌kakal᷊iomanengang si Sie. I ninang i Rehabeam ute i Naama wọu wansang Amon.

²²Bansang Yehuda e nẹ̌koạ dal᷊akisẹ̌ su matam MAWU e. Kakanoạ i sire e mạbae su makạl᷊angehẹ MAWU sul᷊ungu mẹ̌koạ kal᷊awọu munaram manga i upung i sire.

²³ Su wowong manga wul᷊ude ringangu su al᷊ungu manga kakaluang gaghuwạ e, i sire namětị tampạ u pananěmbaěng mahan duata, ringangu napararisị u manga měnara, ringangu manga tul᷊adang duata wawine i Asyera baugu pẹ̌subaěng.

²⁴ Su manga tampạ ene i sire nẹ̌koạ pẹ̌sasasundal᷊ẹ̌ tabidạu pananěmba su mahan duata. Kutẹu manga esẹewe lai mal᷊aing nẹ̌těngkakoạ tahakawuang. Tau Yehuda měmpẹ̌kẹ̌koạewe kal᷊awọu katatingkaị apạeweng kẹ̌koatengu manga wansa seng nitokol᷊u MAWU su tempon tau Israel sụsuẹ̌ su wanua ene.

²⁵ Su taung kal᷊imane su paparentaěng i Rehabeam, i Sisak, datung Misirẹ̌ něngalo Yerusalem.

²⁶ I sie něhampasẹ̌ kal᷊awọu apal᷊iwụ maral᷊ěgadẹ̌ su ral᷊ungu Wal᷊em MAWU ringangu istanan datu, ringangu manga kěllung bul᷊aeng kụ nikoạ i Salomo.

²⁷Tangú nakoạ laawenge Datu i Rehabeam nẹ̌koạ manga kěllung bọu tambaga, kụ niumbalane su manga pěrwira měndaringọ su pasěllangengu wal᷊en datu.

²⁸Masaun sul᷊ene datu e sol᷊ong Bal᷊em MAWU manga lukade němpẹ̌bawa manga kěllung ene, wọu e němpěnul᷊e sol᷊ong tampạ u riagạ.

²⁹Běkene wal᷊ine mạul᷊ịu Ratu i Rehabeam ute seng niwohẹ su ral᷊ungu bukẹ̌ u Wěkem Mararatun Yehuda.

³⁰Su tempong paparentaěng i Rehabeam dingangu i Yerobeam, hanesẹ̌ piạ pẹ̌sasekẹ su wěllạ i Rehabeam dẹ̌duang Yerobeam.

³¹Bọu ene i Rehabeam napohong kụ nilěbing su pěndal᷊ẹ̌bingangu mararatu su Soan Daud. I Abiam ahuse, něngaweng si sie nakoạ datu.