Read Sangir MANGA RATU HUMOTONG 15 Bible Online

MANGA RATU HUMOTONG 15 - Sangir bible

MANGA RATU HUMOTONG 15

¹Su taung kapul᷊o ual᷊une su kawasang parentan Datu i Yerobeam su Israel, i Abiam nakoạ datung Yehuda

²ringangu nẹ̌parenta karěngụ u těllu taung su Yerusalem. I ninange ute i Maakha anạ i Abisalom.

³I Abiam nẹ̌koạ kal᷊awọu rosa mẹ̌sul᷊ung i amange. I sie tawe natinalung dal᷊ungu naunge kụ mẹ̌těngkasatia su MAWU Ruatane, nẹ̌darol᷊eng Daud, i upunge.

⁴ Kaiso baugu Ratu i Daud, tangú MAWU e, Ruata kụ sẹ̌sěmbaěng i Daud, seng nẹ̌gěllịu anạ sěngkatau si Abiam baugu ipěngaweng si sie pẹ̌parenta su Yerusalem dingangu mẹ̌tahutěndạ u soa ene.

⁵ MAWU e mẹ̌kẹ̌koạ ene e ual᷊ingu i Daud e makạl᷊ahimpulu naungʼE. I Daud e tawẹ běke kụ tawẹ agise su manga titam MAWU e, tabeạu katewe su ral᷊ungu sidarạ i Uria ringangu tau Het ene.

⁶ Pẹ̌sasekẹ i Rehabeam dimokạ si Yerobeam e nitětạ su tempong Rehabeam mang bědang kạdal᷊enge karěngụeweng pẹ̌paparentang Abiam.

⁷Běkene wal᷊inewe mạul᷊ị u i Abiam e seng niwohẹ su bukẹ̌ u Wěkem Mararatun Yehuda.

⁸I Abiam e napohong dingangu nilěbing su Soan Daud. I Asa anạ e nakoạ datu něngaweng si sie.

⁹Su taung karuam pul᷊one su paparentaěngu Ratu i Yerobeam su Israel, i Asa e nakoạ datung Yehuda.

¹⁰I sie nẹ̌parenta ěpạ u pul᷊o ěsa su taunge karěngụ e su Yerusalem. I nenẹ e ute i Maakha, anạ i Abisalom.

¹¹Mẹ̌sul᷊ungu i Daud, i upunge, i Asa e makạl᷊ahimpulu MAWU.

¹² Kal᷊awọu tahapẹ̌sundal᷊ẹ̌ e kụ měmẹ̌munara suapan tampạ u pěnaněmbaěng mahan duata e niupune, ringangu kal᷊awọu pakal᷊uang kụ nirarisị u manga ratu apang měpẹ̌parenta kal᷊amonan sie e, niěmụ e pinakasue wọu kal᷊awọu wanua e.

¹³I nenẹ e i Maakha, nilohose wọu kal᷊aianenge kere sěngkatau inang kakakěllaěng, batụu i sie kai seng nẹ̌koạ tul᷊adang sundal᷊ẹ̌ baugu i Asyera duata wawine waugu katatawang ěntana e. I Asa e tangú nělengge mahan duata ene e ringangu napakahěngisẹ̌ su Wal᷊ang Kidron.

¹⁴Maningbe wal᷊ine kěbị tampạ u pananěmbaěng tul᷊ada e nighoghahi Asa e, kaiso i sie těbewe satia su MAWU kanandung biahe.

¹⁵Kal᷊awọu wul᷊aeng dingangu sal᷊aka e kụ seng nisěmbang amange su MAWU, niwawane sol᷊ong Wal᷊em MAWU, kerene lai wul᷊aeng dingangu sal᷊aka, sasěmbane hala e.

¹⁶Karěngụu pẹ̌paparentan Datu i Asa wọu Yehuda ringangu Ratu i Baesa wọu Israel sěntiniạ mang piạ pẹ̌sasekẹ sutal᷊oaran datu rarua ene.

¹⁷I Baesa něngalo Yehuda ringangu napakatoghasu soan Rama waugu pěhěping dal᷊eng masuẹ̌ masěbang u Yehuda.

¹⁸Ual᷊ingu ene Ratu i Asa e něngal᷊ạ e wul᷊aeng kěbị e ringangu sal᷊aka kụ bědang piạ su Wal᷊em MAWU ringangu wal᷊en datu e wọu e niringọ e sol᷊ong Damsyik su anun datun Siria i Benhadad, ahusʼi Tabrimon, pulung i Hezion. Manga apal᷊iwụ ene nịdaringọ e pinakiwawa su manga sawohị u wal᷊en datu e pirang katau, piạ tatanatane kere ini,

¹⁹”Mapiawe i kitẹ měngikị pěral᷊ahapị kere nạung seng nịkakoạ u manga ghaghurang i kitẹ. Dingangu ini e tangú iạ e měndingọ u wul᷊aeng dingangu sal᷊aka kere poroseěng, dingangu měhawụ si tuang paměsụko kal᷊ahěmpukangu e ringangi Baesa ratung Israel, tadeạu i sie měnul᷊e kapia wuntuangu sordadone wọu wanua su l᷊imaku.”

²⁰I Benhadad kimire su rorong ene kụ bọu e rimolohu manga pěrwirane ringangu wuntuang i sire e apěngalo su manga soang Israel. I sire e namatạ Iyon, Dan, Abel-Bet-Maakha ringangu Kinerot su rěduhu Ranong Galilea ringangu kal᷊awọu wanuang Naftali.

²¹Piạ i Baesa nakarěndengelẹ̌ hal᷊ẹ̌ ene, i sie něngědo něnoghasẹ̌ Rama. I sie nakoạ sol᷊ong Tirza ringangu kadodọ tempo niěndunge tawẹ apa pẹ̌sasekẹ.

²²Bọu ene, kal᷊awọu taumata su kasěllahu Yehuda e niparehe tawe nilěmbe niparentaěng u Ratu i Asa e apělẹ̌hengkẹ batu ringangu kalu kụ paketang i Baesa su Rama baugu ipěnoghasẹ̌ soa ene. Kakoạ e tamai ene e nipakẹ i Asa ipěnoghasẹ̌ soang Mizpa ringangu Geba, soa sěmbaụ su wanuang Benyamin.

²³Běkene wal᷊ine mạanun Datu i Asa e, nạung mạanụeng kawawahanine ringangu manga soa niapakatoghase, seng niwohẹ su bukẹ̌ u Wěkem Mararatun Yehuda. Su tempọeng kaghaghurang i Asa e nikaěbakengkeng sakị su l᷊aede ruam běka.

²⁴I sie napohong kụ nilěbing su pěndal᷊ěbingangu mararatu su Soan Daud. I Yosafat, ahuse nakoạ datu něngaweng si sie.

²⁵Su taung karuane, su parentan Datu i Asa su Yehuda, i Nadab anạ i Yerobeam nakoạ datu su Israel dingangu nẹ̌parenta kụ dua taung karěngụ e.

²⁶Mẹ̌sul᷊ungu nạung i amang e nẹ̌parenta kal᷊imona, i sie mal᷊aing nẹ̌koạ dal᷊akisẹ̌ su matam MAWU hakịu nakawodaị tau Israel nẹ̌koạ pẹ̌sasal᷊a.

²⁷I Baesa, anạ i Ahia, wọu hěntong Isakar nẹ̌gihingang dimokạ si Nadab, bọu e němate si sie. Su tempo ene i Nadab dingangu wuntuange kạpěngalone soang Gibeton su ěntanang Pilistin.

²⁸Ene e nariadi su katěllu taunge su parentan Datu i Asa e su Yehuda. Kerene i Baesa nikoạ datung Israel něngaweng si Nadab.

²⁹ Tawe nararěnnạ sarangke i Baesa e naratu, i sie němate kal᷊awọu walagʼi Yerobeam. Natuhụewe kere pinẹ̌berang MAWU e wọu ěllangʼE, Nabi i Ahia wọu Silo e, tangú kal᷊awọu walagʼi Yerobeam e pinate, kụ tawẹ u nal᷊ěmbe.

³⁰I Yerobeam e nẹ̌dosa kụ nakawal᷊insahẹ̌ tau Israel e mal᷊aing němpẹ̌dosa. Kụ ual᷊ingu kerene tangu i Yerobeam e nakasongkahẹ̌ dal᷊angehu MAWU, Ruata isẹ̌sěmban tau Israel.

³¹Bẹ̌kene wal᷊ine mạanun Nadab seng niwohẹ su ral᷊ungu bukẹ̌ u Wěkem Mararatung Israel.

³²Karěngụu parentan Datu i Baesa wọu Israel, pẹ̌sasekẹ e mang hanesẹ̌ mạdiadi sutal᷊oarang Baesa ringangu Ratu i Asa wọu Yehuda.

³³Su taung katěllune su parentan Datu i Asa su Yehuda e, i Baesa anạ i Ahia e nakoạ datu su kasěllahu Israel. I sie nẹ̌parenta su Tirza ruam pul᷊o ěpạ su taunge.

³⁴Mẹ̌sul᷊ungu Ratu i Yerobeam kụ nẹ̌parenta kal᷊imona e, Ratu i Baesa e mal᷊aing nẹ̌dosa su MAWU ringangu nakawodaị tau Israelẹ̌ e mal᷊aing němpẹ̌koạ pẹ̌sasal᷊a.