Read Sangir MANGA RATU HUMOTONG 16 Bible Online

MANGA RATU HUMOTONG 16 - Sangir bible

MANGA RATU HUMOTONG 16

¹Tangú něhengetangke MAWU e su Nabi i Yehu anạ i Hanani, angkuěngʼE, ”Habarẹ̌ko si Baesa tatanata-Ku ini e,

²’Nạung kal᷊amona i kau e wal᷊inewe apa, kaiso i kau e seng Takụ nihengkẹ nakoạ měngangahạ baugu umatẹ̌-Ku Israel. Ini e i kau seng nẹ̌dosa mẹ̌sul᷊ungu i Yerobeam dingangu nakawodaị umatẹ̌-Ku Israelẹ̌ e nẹ̌dosa, hakịu nakasongkang dal᷊angehẹ̌-Ku.

³Ual᷊ingu ene Iạ e sarung mapakatadiseng kau ringangu walagu e mẹ̌sul᷊ungu nạung Takụ nikoạ baugʼi Yerobeam.

⁴Anạu sěmbaụ u kụ nate su soa e sarung kinaseng u asu, ringangu i sire nate su l᷊ikudu soa e sarung kinaseng u manụ u winalangeng.’ ”

⁵Tatanatam MAWU e si Baesa ringangu ral᷊ohom bal᷊ene e nihabaru Nabi i Yehu ual᷊ingu i Baesa e seng nẹ̌koạ dal᷊akisẹ̌ su matam MAWU e, i Baesa nakasongkahẹ̌ dal᷊angehu MAWU, bal᷊inewe tumbạeng ual᷊ingu i sie seng němate kal᷊awọu walagʼi Yerobeam. Běkene wal᷊ine mạanung Baesa e, narekeng lai katatumbahanine e seng naketạ su ral᷊ungu bukẹ̌ u Wěkem Mararatung Israel. I Baesa e napohong kụ bọu ene nilěbing su Tirza. I Ela, ahuse něngaweng si sie nakoạ datu.

⁸Su taung karuam pul᷊o ěnnunge su parentan Datu i Asa su Yehuda e, i Ela anạ i Baesa e nakoạ datu su Israel. I sie nẹ̌parenta su Tirza rua taung karěngụ e.

⁹I Zimri, sěngkatau pěrwira kụ naněmbonang sěngkaruang kapahiakeng bọu wuntuangu piạ karetane, nẹ̌gihingang dimokạ si Ela. Piạ sěhěllo su Tirza, i Ela nẹ̌papanginung su wal᷊eng Arza e sarang niwukang, těmbonangu ral᷊ohom bal᷊en datu.

¹⁰Bọu e i Zimri e simuẹ̌ dingangu němate si Ela, wọu e nakoạ datu něngaweng si Ela. Ene e nariadi su taung karuam pul᷊o pitune su parentan Datu i Asa waugu Yehuda.

¹¹Tawe nararěnnạ wọuten i Zimri e nakoạ datu, i sie němate kal᷊awọu walagu Ratu i Baesa. Hakịu l᷊ai sarang kěbị manga anạu sěmbaụ i Baesa manga esẹ dingangu manga hapị u anạ u sěngkataune e mal᷊aing tawẹ apa kụ nal᷊iwirẹ̌.

¹²Natuhụ e kere su hengetang u MAWU e si Baesa wọu Nabi i Yehu, kal᷊awọu anạu sěmbaụ i Baesa kinapate.

¹³I Baesa rěduang Ela, anạ e němpaněmba manga mahang duata ringangu nakawodaị tau Israel nẹ̌koạ dosa. Ual᷊ingu ene i sire nakawodaị dal᷊angehu MAWU e, Ruata e kụ hinong sěmbaěng u tau Israel.

¹⁴Běke lai wal᷊ine mạanung Ela e, seng nikětạ su ral᷊ungu bukẹ̌ u Wěkem Mararatung Israel.

¹⁵Su taung karuam pul᷊o pitune su parentan Datu i Asa waugu Yehuda e, i Zimri nakoạ datung Israel dingangu nẹ̌parenta su Tirza karěngụ u pitu ěllo. Su tempo ene sordadong Israel kapạngalone Gibeton, soan tau Pilistin.

¹⁶Ene i sire nakaringihe u i Zimri e seng němpẹ̌gihingang dimokạ datu, kụ seng nipaten sie, kụ su ěllo ene lai su pẹ̌darasengang i sire ene, i sire kěbị e něhengkẹ si Omri, dokol᷊u mol᷊ensekẹ i sire e nakoạ datung Israel.

¹⁷Bọu e i Omri ringangu wuntuange naněntangu Gibeton kụ dimal᷊eng němpěliwung Tirza.

¹⁸Su tempong i Zimri nakasilo nạung soa ene kawe seng nipul᷊aho, i sie simuẹ̌ su ral᷊ungu istana kụ němpěnutung istana ene sěngkatutung dingangu watangenge, tangú naněntangke i sie.

¹⁹Ene nariadị e, kai ual᷊ingu i sie kawe nẹ̌koạ dal᷊akị su matam MAWU. Mẹ̌sul᷊ungu Ratu i Yerobeam, i Zimri e mal᷊aing nẹ̌sal᷊a su MAWU, ringangu nakawodaị tau Israel mal᷊aing nẹ̌dosa.

²⁰Běke wal᷊ine mạanun Zimri e, nasowa kamonaěngu mẹ̌tatul᷊a kụ nịlahingide, seng niketạ su ral᷊ungu bukẹ̌ u Wěkem Mararatung Israel.

²¹Nariadị e pẹ̌sasilontahẹ̌ su ral᷊ungu wansang tau Israel ual᷊ingu piạ u mẹ̌měnning u tadeạu i Tibni anạ i Ginat makoạ datu, kaiso piạ u l᷊ai mạpulung Omri e makoạ datu.

²²Pěngěnsueěnge i sire apang mạnumběka si Omri e makauntu. I Tibni e nairị arawe i Omri e nakoạ datu.

²³Ene e nariadị su taung katěllum pul᷊o ěsane su parentan Datu i Asa su Yehuda. I Omri e mẹ̌pẹ̌parenta mẹ̌sul᷊ungu ratu su Israel mapul᷊o dua su taunge karěngụ e. Karěngụu ěnnungu taung humotong i sie nẹ̌parenta su Tirza.

²⁴Arawe wọu ene i sie němělli wul᷊ude sěmbua arěgang 6.000 su kal᷊ěpane roitẹ̌ sal᷊aka wọu sěngkatau isẹ̌sẹ̌bạ si Semer. Bọu e i sie němětị soa sěmbaụ su wul᷊ude ene kụ nisěbạ e Samaria, timuhụewe areng Semer, mananaghuang bul᷊ude ene marěngụ e.

²⁵I Omri nẹ̌koạ kal᷊awọu rosa limembong kawěhạ e wọu apang nịkakoạ u manga ratu apang mẹ̌pẹ̌parenta kal᷊amonang sie.

²⁶Mẹ̌sul᷊ungu i Yerobeam, i Omri e nẹ̌sal᷊a mase nakawodaị tau Israel kụ mal᷊aing nẹ̌sal᷊a ringangu němpaněmba mahang duata. Ual᷊ingu ene i sire nakasongkahẹ̌ dal᷊angehu MAWU, Ruata kụ hinong isěmbang tau Israel.

²⁷Běkene lai wal᷊ine mạanung Datu i Omri, ringangu kěbị apan nikoạ e seng niketạ su ral᷊ungu bukẹ̌ u Wěkem Mararatung Israel.

²⁸Sarang i Omri nairị dingangu nilěbing su Samaria e, i Ahab ahuse nakoạ datu něngaweng si sie.

²⁹Su taung katěllum pul᷊o ual᷊une su parentan Datu i Asa su Yehuda, i Ahab anạ i Omri e nakoạ datung Israel dingangu nẹ̌parenta su Samaria ruam pul᷊o dua su taunge karěngụe e.

³⁰I sie nẹ̌koạ kal᷊awọu rosa něngalembong kasěllahe su matam MAWU e wọu manga ratu nạung kal᷊amona e.

³¹Bědang tawe lai nạsukụ si sie mẹ̌biahẹ̌ mahunsal᷊a kere Ratu i Yerobeam, i sie katewe sarang nẹ̌kawing i Izebel anạu Ratu i Etbaal bọu Sidon, kụ i sie mẹ̌kẹ̌kal᷊iomaneng su Baal.

³²I sie něndarisị u wal᷊eng pẹ̌kakal᷊iomanengang su Samaria waugu Baal, dingangu su ral᷊ungu wal᷊em pẹ̌kakal᷊iomanengang ene e i sie nẹ̌koạ pananěmbaěng sěmbaụ e waugu mahan duata ene.

³³I sie mal᷊aing nẹ̌koạ tul᷊adang mahan duata wawine i Asyera. I sie nẹ̌koạ pẹ̌sasal᷊a limembong kal᷊awọe wọu nikoạ u kěbị datung Israel apang nẹ̌parenta kal᷊amonang sie. Ual᷊ingu ene i sie nakasongkahẹ̌ dal᷊angehu MAWU, Duata e kụ hinong sěmbaěng u tau Israel.

³⁴ Su tempong pẹ̌paparentang i Ahab, soang Yerikho nipětị kapia kahiang Hiel tau Betel. Kaiso kerẹewe seng niwera kal᷊imona kahiang MAWU wọʼi Yosua anạ i Nun, i Hiel kinailangengu anạ e rarua: i Abiram kaiakanenge nate su tempong i Hiel měmẹ̌měllọu watu pinẹ̌bukuangu soa, dingangu i Segub kahembokange nate su tempong i Hiel měnẹ̌nakẹ manga tukadu pasěllangengu soa ene.