Read Sangir MANGA RATU HUMOTONG 17 Bible Online

MANGA RATU HUMOTONG 17 - Sangir bible

MANGA RATU HUMOTONG 17

¹ Piạko sěngkatau nabi arenge i Elia. I sie kai wọu Tisbe, soa sěmbaụ su wanuang Gilead. Piạ sěhěllo i sie riměnta su anun Datu i Ahab dingangu nẹ̌bera, ”Baugu MAWU kụ biahẹ̌ e, Duata e sẹ̌sěmbaěng u tau Israel kụ takụ tẹ̌tangkianeng, iạ e maul᷊ị si Tuang u karěngụ rarua arau těllu taung tuhụ e ini e sarung tawẹ apa namuhẹ̌ arau tahiti maning kadodọ, tabeạu katewe kereu iạ e mẹ̌berang ene.”

²Bọu ene MAWU e nẹ̌bera si Elia,

³”Těntangke tampạ ini, kụ kakoạko sol᷊ong dakị sol᷊ong sěmběkan Sal᷊ụ u Yordan kụ pěkẹ̌mbuni paị sene su rěduhu anạ u Sal᷊ụ u Kerit.

⁴I kau makainung bọu anạu sal᷊ụ ene, kụ manụ gaga e sarung Takụ irolohẹ̌ apěngěntudu kaěng si kau.”

⁵I Elia timuhụ laorom MAWU ene, kụ tamai sol᷊ong anạu Sal᷊ụ u Kerit ene, kụ nẹ̌tanạ sene.

⁶I sie něnginung bọu anạu sal᷊ụ ene, ringangu kụkaěng borotẹ̌ ore lai kụkinạ gẹ̌sim binatang ilẹ̌ěntudu manụ gaga ene apang kamal᷊ukadẹ̌ e ringangu apang kawawěllọe.

⁷Sarangke nararěnnạe, anạu sal᷊ụ ene namarạe ual᷊ingu tawẹ apa tahiti.

⁸Bọu ene MAWU e něhengetang si Elia,

⁹ ”Orasẹ̌ ini e i kau harusẹ̌ kakoạ sol᷊ong soan Sarfat, maraning Sidon kụ katanạ sene. Iạ e seng dimolohu sěngkatau wawine wal᷊u sene tadeạu i sie mẹ̌gěllịu kaěng si kau.”

¹⁰Tangú tamaị e i Elia sol᷊ong Sarfat. Nahumpạeng tukadu soa ene e, i sie nakasilo sěngkatau wawine wal᷊u kạpangomol᷊eng kalum putung. Bọu e angkuěng i Elia e su tau wal᷊u ene, ”Inang tul᷊ungko al᷊ake akẹ u inumang kadodọ baugu iạ e.”

¹¹Piạ e wawine wal᷊u ene e kạdal᷊enge měngal᷊ạ akẹ e, i Elia e kimui, ”Inang, bawaiko l᷊ai borotẹ̌ kadodọ.”

¹²Bal᷊u ene simimbang, ”Su arengu MAWU kụ biahẹ̌, Duata kụ sẹ̌sěmbaěng i Tuang, iạ mẹ̌salu u si siạ e tawẹ apa borotẹ̌. Si siạ kětạeng piạ tapoěngu tuhigu sěhěngkung su ral᷊ungu lainumang, dingangu lanang zaitun kạdodọ su ral᷊ungu wotol᷊ẹ̌. Iạ e kạpěnẹ̌nampunge kalum putung baugu ipěnasạ kakoạ e kadodọ ene, tadeạu iạ dingangu anạku e makakaěng. Seng ene e kaěng i kami e pěngěnsueěnge; kụ bọu ene i kami e hědọ e sahuneng měngampal᷊ẹ̌ mate.”

¹³”Abe ghěnggang inang!” angkuěng i Elia si sie, ”I ninang měngkate pẹ̌koạ kaěng i rua tahanạ. Kai kal᷊amonang ene e pẹ̌koạko kal᷊imona borotẹ̌ kạdodọ sěmbaụ bọu tapoěng dingangu l᷊ana ěndaị e, kụ bawako ramahi.

¹⁴Ual᷊ingu MAWU, Ruata kụ sẹ̌sěmbaěng u tau Israel, měbẹ̌berau lainumang ene e sarung hanesẹ̌ piạ lohone tapoěng, dingangu wotol᷊ẹ̌ ene e hanesẹ̌ sarung piạ lohone lana sarang tempone MAWU e maparasehu tahiti e su wowon dunia.”

¹⁵Mase rimal᷊engke wawine wal᷊u ene, nẹ̌koạ e apang niwerang Elia e. Tangú i sire těllu e piạ diahine kaěng natimu waugu ěllo piạ kararěnane.

¹⁶Dingangu kerẹewe seng piněhengetangu MAWU si Elia, lainumang ene e sěntiniạ měngkate piạ lohone tapoěng, dingangu wotol᷊ẹ̌ ene e mal᷊aing sěntiniạ piạ lohone lana.

¹⁷Pira tempo samuring ene e, anạu wawine wal᷊u ene e nasakị e. Kakạděngụ e kakạtědụ e sakị e sarang i sie naminsul᷊u singongone.

¹⁸Mase angkuěngu wawine wal᷊u ene si Elia, ”Ěllangu Mawu, unụe i Tuang nẹ̌koạ hal᷊ẹ̌ ene si siạ? Apa i Tuang diměnta waugu makakariading Duata e makatahěndung dosaku, hakịu anạku e hinong mate tangu?”

¹⁹I Elia simimbang, ”Bawạe rariọ ene ramahi.” Bọu e i Elia něngal᷊ạ dariọ esẹ ene wọʼi ninange, mase niwawane sol᷊ong huange su wowone rasị, su kamarẹ̌ dẹ̌dal᷊okaěng i Elia. I Elia e naparal᷊okang dariọ ene e su wowong dal᷊okaěng,

²⁰bọu e nẹ̌kal᷊iomaneng u tingihe maihạ, ”O MAWU Ruataku, unụe i Kau e naparěntang silakạ ini e su wawine wal᷊u ini e? I sie seng napěnumpang u iạ kụ ini e i Kau e kawe měmate anạe!”

²¹ Bọu ene těllu sul᷊e i Elia dimarěmmạu wadange su wowon dariọ ene, apidu nẹ̌kal᷊iomaneng, ”O MAWU Ruataku, mal᷊owọko rariọ ini e reng apẹ̌biahu!”

²²MAWU e rimaringihẹ̌ kakal᷊iomaneng i Elia; rariọ ene e nanětạ e simindạ kụ nẹ̌biahẹ̌ kapia.

²³Bọu e i Elia limintụ bọu kamare kapangěntude rariọ ene si ninange kụ nẹ̌bera, ”Inang, ini anạ i Ninang! I sie seng nẹ̌biahẹ̌ kapia!”

²⁴Bal᷊u ene simimbang, ”Orasẹ̌ ini e iạ masingkạ u i Amang kai ěllangu Mawu ringangu waweran Amang e mamben těngadẹ̌ bọu anum MAWU!”