Read Sangir MANGA RATU HUMOTONG 18 Bible Online

MANGA RATU HUMOTONG 18 - Sangir bible

MANGA RATU HUMOTONG 18

¹Nal᷊iung pira tempo karěngụ e, su taung katěllune tempong musungu něhangu e, MAWU něhengetang si Elia, ”Dakọ e pẹ̌těngon Datu i Ahab, tạ kararěnnane, Iạ e sarung maparasehu tahiti.”

²Tangú nẹ̌buạ e i Elia. Su tempo ene karal᷊unusẹ̌ e seng nẹ̌dahenesang su Samaria.

³Ual᷊ingu ene i Ahab nẹ̌kui si Obaja mědeạu apạděnta pẹ̌tẹ̌těngọ. (I Obaja e kai těmbonangu ral᷊ohom bal᷊en datu. I sie kai sěngkatau kahěnga-hěngang makěhagẹ̌ mẹ̌kal᷊iomaneng su MAWU.

⁴Su tempong Izebel němate manga nabing MAWU e, i Obaja ini e nẹ̌tul᷊ung nabi mahasụ su kataune kụ němunin sire su ral᷊ungu liang — limam pul᷊o su kataune su ral᷊ungu liang sěmbaụ — mase napakaěng i sire ringangu niapěnginung.)

⁵I Ahab nẹ̌bera si Obaja, ”Bọete i kitẹ měměpidẹ̌[15] kasěllahu wanua ini kụ mẹ̌deạ simbul᷊u akẹ arau sal᷊ụ. Aramanung i kitẹ e sarung makahombang děmpugẹ̌ kụ dembeng makaambang kawal᷊o ringangu wagal᷊ẹ̌ tadeạu seng tawahal᷊uasu i kitẹ měmate sarang sěmbaụ bọu manga binatang i kitẹ e.”

⁶Sarangke nẹ̌gaghelareng banua sarung luhuang ene e, i sire tangú nẹ̌buạ e. I Ahab timonane sěmbaụ arawe i Obaja e nẹ̌timona wal᷊ine.

⁷Sutal᷊oaran dal᷊eng tangú i Obaja e nẹ̌sombang i Elia. Sarangke nakakiral᷊a si Elia e, i Obaja nẹ̌tumpěkuhẹ̌ něngadatẹ̌ si sie, apidu nakiwal᷊o, ”Kahěngang, ini e i Tuang Elia?”

⁸”Kahěngang, iạ e i Elia,” angkuěng e. ”Dakọ e pěhabarẹ̌ su ratunu u iạ e sini.”

⁹I Obaja simimbang, ”Apa iạ e nẹ̌sal᷊a hakịu i Tuang kawe mapulu měnarakang u iạ si Ahab mědeạu pateěng?

¹⁰Baugu MAWU e kụ biahẹ̌, Duata kụ sẹ̌sěmbaěng i Tuang, iạ e mělahẹ u ratu e seng dimolohu iạ apědẹ̌deạ si Tuang balạe měnsang suapa. Kereu su wanua sěmbaụ e měngangawasane maul᷊ịu i Tuang kawe tawẹ dise sene, ute i Ahab měnuntụ tadeạu měngangawasa wanua ene e pẹ̌salu u i Tuang e mamben tawe pinẹ̌sombang sene.

¹¹Kụ orasẹ̌ ini i Tuang e mapulu tadeạu iạ makoạ sol᷊ong anune kụ mẹ̌bera u i Tuang kawe ene sini tangú?

¹²Kereu iạ měngal᷊ing bọu ini, Rohkẹ̌ u MAWU e aramanung sarung měngahạ i Tuang sol᷊ong tampạ kụ tawe takụ kinahěnganeng. Dingangu kereu iạ e měhabarẹ̌ si Ahab u i Tuang e ene sini, bọu e i sie tawe mẹ̌sombang i Tuang, nal᷊ahẹu i sie sarung měmate si siạ. Kasingkạko i Tuang u iạ ini e kahěnga-hěngang mẹ̌kẹ̌kal᷊iomaneng su MAWU e nạung den dariọ!

¹³Apa i Tuang bědang tanakạdingihẹ̌ u piạ i Izebel němate manga nabing MAWU, iạ e němuni mahasụ su kataune wọi sire su ral᷊ungu liang — limam pul᷊o su kataune su ral᷊ungu liang sěmbaụ — mase napakaěng dingangu napěnginung i sire?

¹⁴Ini e, kawe unụe i Tuang dimolohu iạ pělẹ̌habarẹ̌ su ratu u i Tuang kawe ene sini tangu? Nal᷊ahẹ u i sie sarung měmate si siạ!”

¹⁵I Elia simimbangu, ”Baugu MAWU Makawasa kụ takụ tẹ̌tangkianenge, iạ mẹ̌kědo sarung duměnta hala mẹ̌těngon datu e su sěhěllo ini e lai.”

¹⁶Tangú tamaị e rimal᷊eng i Obaja naul᷊ị su ratu, dingangu i Ahab mal᷊aing dimal᷊eng mědeạu mẹ̌sombang i Elia.

¹⁷Su tempong i Ahab nakasilo si Elia, i Ahab nẹ̌kiạ, ”Seng i sie ini e měnggaghohaeng su Israel!”

¹⁸”Iạ e wal᷊inewe měnggaghohaeng,” angkuěng i Elia, ”kaiso kawe i Tuangku hala. Seng i Tuang dingangu ral᷊ohom bal᷊en Tuange měnggaghohaeng, ual᷊ingu pěnanal᷊e kal᷊awọu mahan duatan Baal, ute i Tuang seng limampa kal᷊awọu titam MAWU e.

¹⁹Kụ ini e pěngoroko kal᷊awọu kawanuang Israel mědeạu pẹ̌sombangu iạ e su Wul᷊udu Karmel. Bawako l᷊ai i sire ěpạ u hasụ limam pul᷊o su kataune nabiʼm Baal dingangu i sire ěpạ u hasụ su kataune nabiʼn duata wawine i Asyera e kụ seng niwaehangu sangiangu ratu arenge i Izebel!”

²⁰Tangú i Ahab napasěbang u patikụ kawanua ringangu kal᷊awọu manga nabiʼm Baal ene sol᷊ong Bul᷊udu Karmel.

²¹Mase i Elia himaung kawanua ene ringangu nẹ̌bera u, ”Sarang kạděngụ e i kamene měngkai kạtatanạ mělẹ̌lelang darua su naung i kamene? Kereu MAWU e kai Ruata, ute paněmbako MAWU! Kereu Baalẹ̌ ene kawe Ruata ute paněmbako Baalẹ̌!” Kawanua apan natampung sene e měngkai kạtatanạ tawẹ kědị e.

²²Bọu e i Elia nẹ̌bera, ”Sutal᷊oaram manga nabim MAWU e kětạembeng iạ nal᷊ěmbe sumbal᷊iau sini e kawe piạ ěpạ u hasụ limam pul᷊o su kataune nabim Baalẹ̌.

²³Kụ ini e ěntudẹ̌ko ramahi sapi esẹ darua. Pěngoroko manga nabiʼm Baalẹ̌ apěngal᷊ạ sěmbaụ kụ potọ, bọu ene pakasue ruru kụ pěllọ su wowong kalum putung. Kaiso i sire tawe wotonge maparěllịu putung sene. Sapi lai sěmbaụ e sarung takụ diahiang kerene lai. Iạ hědo měmotọ dingangu měndaruru mase ipěllọ su wowong kalum putung. Kai iạ e mal᷊aing tawe měhunụ putung sene.

²⁴Balạete manga nabiʼm Baalẹ̌ ene e pẹ̌kal᷊iomaneng su mahang duatan sire, ringangu iạ e mal᷊ain sarung mẹ̌kal᷊iomaneng su MAWU. Sumasimbange ringangu měndaringọ u putung ute kai i Sie Ruata.” Kal᷊awọu kawanua e němpẹ̌simbangu tingihʼi sire maihạ, ”Kerenẹ e!”

²⁵Bọu e angkuěng i Elia su manga nabiʼm Baalẹ̌ ene, ”Ual᷊ingu i kamene kawe mal᷊awọ, ute pěmilẹ e kal᷊imona i kamene sapine kụ diahị e, kaiso kumbahang i kamene měmpěhunụ u putung su kalune. Bọu ene ute pẹ̌kal᷊iomanengke su ruatanu.”

²⁶Tangú i sire němilẹ e sapi sěmbaụ kụ niriahin sire. Bọu ene i sire nẹ̌kal᷊iomaneng su Baal bọu mal᷊ukadẹ̌ sarang ěllo rangẹ kạpěmẹ̌mansage, ”Simbaheko i kami e, Baal!” I sire měkẹ̌koạ kerene apidu kapẹ̌sẹ̌sal᷊aine mạngělikụ pananěmbaěng i sire. Kaiso tawẹ sasimbange marihutu.

²⁷Su tempong ěllo mal᷊ětu nanětạe i Elia nělangehẹ̌ si sire. ”Pẹ̌kal᷊iomanengko lai pakaihạ i kamene! I sie ruata arau ěng? Tikạku i sie kai manga tụtungul᷊ẹ̌, arau simea. Arau kai kạdal᷊enge! Arau kai manga kinahuntikilang, kụ i kamene harusẹ̌be pěmuko si sie!”

²⁸Manga nabi e nẹ̌kal᷊iomaneng něngalembong lai kaihạ e. Dingangu mẹ̌sul᷊ungkeweng nạung kere nikoạ i sire, i sire měmpẹ̌ngẹ̌ngěhị badang i sire ringangu horong peda ringangu wěngko sarang dahane tumědọ.

²⁹Kerene kakakoạ i sire tawẹ potọ e saram bawěllo, mẹ̌sul᷊ungu taumata nisawelange. Kaiso tawẹ u sumimbahẹ̌, tawẹ u němpẹ̌pandung.

³⁰Bọu e angkuěng i Elia su kal᷊awọu kawanua ene, ”Mahiko pakarěduhẹ̌!” I sire kěbị němpẹ̌tampung něliwung si sie, bọu e i sie nanětạ e němpěngul᷊ị pananěmbaěng su MAWU kụ seng naopehẹ̌.

³¹ I sie něngal᷊ạ e watu mapul᷊o dua, kụ apam batu e něngal᷊uang sěmbaụ bọu hěnto mapul᷊o dua hěnton Yakub, kụ kai tau seng nighěllirangu arenge i Israel kahiam MAWU.

³²Kụ manga watu ene nipakẹ i Elia pinamětị kapia pananěmbaěng, tampạu pẹ̌kakal᷊iomanengang su MAWU. Su pananěmbaěng ene mạngělikụ e i sie němangka songe riọ gẹ̌guwạ hakịu makatampung manga akẹ mapul᷊o l᷊ima su litere.

³³I sie něnampung kalum putung su wowom pananěmbaěng, wọu e sapi sěmbaụ ene e pinẹ̌papotọ e mase nilěngkange su wowong kalu ene. Bọu ene i sie nẹ̌bera, ”Lohoiko wěnsadẹ̌ ěpạ e ringangu akẹ saram pakapenẹ, mase sěbohẹ̌ko akẹ ene su wowon sasěmba ringangu kalune.” Bọuteng i sire nẹ̌koạ hal᷊ẹ̌ ene,

³⁴i sie nẹ̌bera, ”Sěnsul᷊ẹko l᷊ai,” kụ bọu ene i sire nẹ̌koạ ene. ”Sěnsul᷊ẹko l᷊ai,” angkuěng i Elia, kụ i sire saụewe nẹ̌koạ kerene.

³⁵Tangú rimal᷊engke akẹ nạngělikụ pananěmbaěng ene, kụ songene měngkai apạ e nahěmbungu akẹ.

³⁶Ene nịdatingken tempone mẹ̌gěllịu sasěmbaʼm bawěllo, Nabi Elia e himaungke pananěmbaěng, bọu e nẹ̌kal᷊iomaneng, ”O MAWU, Ruata sẹ̌sěmbaěng i Abraham, i Ishak dingangu i Yakub, lahẹko su orasẹ̌ ini u seng i Kau e Ruata su Israel dingangu iạ e kai ěllangʼU. Lahẹko l᷊ai kěbịewe apang takụ nikoạ ini e ute kai ual᷊ingu titanʼU.

³⁷Simbahẹ̌ko MAWU! Simbahẹ̌ko si siạ tadeạu kawanua ini e masingkạ u i Kau e MAWU, kai Ruata, ringangu kai i Kau e napẹ̌bal᷊ị i sire suanu-Nu.”

³⁸Bọu e MAWU naparěntam putung bọu l᷊angị kụ nakahěngisẹ̌ sasěmba ene ringangu kalune, manga watune ringangu ěntanane ringangu nasuen lanụ e akẹ su ral᷊ungu songe ene.

³⁹Su tempong kawanua nakasilo hal᷊ẹ̌ ene, i sire měngkate apa nẹ̌těngkasumagẹ̌ su ěntana kapẹ̌berane, ”MAWU e kai Ruata! Mamben těngadẹ̌ MAWU e kai Ruata!”

⁴⁰Tangú nẹ̌berạe i Elia, ”Samẹko manga nabiʼm Baal ene! Abe pakawala piạu sarang sěngkatau makal᷊ěsọ!” Tangú taumata e němpěnamẹ e manga nabiʼm Baal ene e, bọu e i Elia nẹ̌bawa si sire sol᷊ong Sal᷊ụ u Kison kụ sene tangu i sie němate si sire kěbị.

⁴¹Bọu ene nẹ̌berạe i Elia su Ratu i Ahab, ”Kụ ini e tangú mapiawe i Tuan Datu e rakọ pẹ̌simokol᷊ẹ̌! Tạ karararěnane wanua ini e rumasehẹ̌, batụu ghal᷊ěgehe seng ikẹ̌karingihẹ̌.”

⁴² Ene i Ahab tamaị e nẹ̌simokol᷊ẹ̌, arawe i Elia e simakạe sol᷊ong bowom Bul᷊udu Karmel. Dasị sene i sie nẹ̌těngkasumagu ghatine sol᷊ong ěntana su wěllạu wukune ruam běka.

⁴³I sie nẹ̌bera su mělahal᷊ẹ̌ anune u, ”Awị e sol᷊om bul᷊ude kụ pěmandako sol᷊ong laudẹ̌.” Ěllang ene nawị e, bọu e nẹ̌sul᷊e kụ nẹ̌bera, ”Iạ e tawe nakasilo apa-apa.” Sarang pitu sul᷊e i Elia rimolohu ěllange mal᷊intụ-marangeng mědeạu měmanda.

⁴⁴Su kapitu sul᷊ene ěllang e ene nẹ̌sul᷊e kụ nẹ̌bera, ”Iạ e nakasilo winawa kadodọ kere pal᷊edu lima rarěntane wọu l᷊audẹ̌.” Tangú i Elia nẹ̌bera su ěllange, ”Dakọ e sol᷊ong anun Datu i Ahab, pěngoroko si sie apasake su karetane kụ kapul᷊ẹ kal᷊amonang i sie masahaghen tahiti.”

⁴⁵Su ral᷊ungu sěngkakondạ langị e nalělubẹ̌, mase nitiukangu anging maihạ dingangu tahiti lawọ e nanětạ e rimasehẹ̌. I Ahab simakẹ e su karetane wọu e napul᷊ẹ sol᷊ong Yisreel.

⁴⁶Tempo ene i Elia e nakahombangke katoghasẹ̌ bọu anun MAWU e. I sie něngal᷊engkengke kakingkaenge kụ nịdarehọ e su kal᷊uwaenge wọu ene timal᷊ang něngal᷊imona si Ahab kanandun dal᷊eng sol᷊ong tukadu pasěllangeng u soan Yisreel.