Read Sangir MANGA RATU HUMOTONG 19 Bible Online

MANGA RATU HUMOTONG 19 - Sangir bible

MANGA RATU HUMOTONG 19

¹Datu i Ahab něběke si Izebel kawinge, patikụ apang nikoạ i Elia, kerene lai kereapa i Elia němate kal᷊awọu nabiʼm Baal.

²Tangú Izebel timanatang habarẹ̌ ini si Elia, ”Mal᷊owọko manga ruata e měhukung, mịdatingu měmate si siạ, kereu rịěllo su tempo kere ini iạ tawe mẹ̌koạ si kau kere i kau e niěbạ u manga nabi Baal ene.”

³I Elia e natakụ, kụ bọu ene timal᷊ang tadeạu tawe pateěng. I sie rimal᷊eng dingangu ěllange sol᷊ong Bersyeba su Yehuda. Sene i sie naněntangu ěllange ene,

⁴ mase liměngang sol᷊ong banua l᷊inggi ghěnnangu sěhěllo ringangu něngirol᷊o suěllungu kalu sěmpuěng mahěbung. I sie naiangke sene, kụ seng mapulụ e mate. ”Iạ seng tawe makararagẹ̌ MAWU!” angkuěnge su MAWU. ”Al᷊ạ e singongoku. Iạ bal᷊inewe limembong kapiane wọu i upungku!”

⁵Mase i sie rimal᷊oka suěllungu kalu ene kụ kinahuntikilang. Sěngkianụ e piạ malạekatẹ̌ sěngkatau něněnggehẹ̌ si sie kụ nẹ̌bera, ”Pẹ̌bangungke Elia!, kaěngko!”

⁶I Elia e němandạ e nal᷊ikụ e, kụ nakasiloko borotẹ̌ tinongkạ sěmpotọ dingangu wohogẹ̌ lohong akẹ. I sie kimaěngke ringangu něnginung, bọu ene i sie saụ dimal᷊oka.

⁷Karua sul᷊ene malaekatu MAWU e saụ simongo něnenggehẹ̌ si sie apidu nẹ̌bera, ”Pẹ̌bangungke Elia, kaěngko, tadeạu i kau mararagẹ̌ mẹ̌daral᷊eng marau.”

⁸I Elia nẹ̌bangung, kụ bọu e kimaěng dingangu něnginung. Tangú i sie natoghasẹ̌ kụ nakaral᷊eng karěngụu ěpạ u pul᷊o su ěllone sol᷊ong Bul᷊udu Sinai,[16] tampạu Mawu nẹ̌těngkatodẹ u watangengʼE.

⁹I Elia nẹ̌tikị sene su ral᷊ungu liang. Mase MAWU něhengetang si sie, ”Elia kai mẹ̌kẹ̌kapura i kau e sini?”

¹⁰I Elia e simimbang, ”O MAWU, Ruata Makawasa, iạ e sěntiniạ mang měmẹ̌munara waugu watangengʼU e hala. Kaiso umatu Israelẹ̌ e limampa pẹ̌kakědon sire e ringangʼU. I sire něnongkahẹ̌ manga pananěmbaěngʼU dingangu němpamate manga nabi-Nu. Kate iạ sẹ̌saku nal᷊ěmbe, mase orasẹ̌ ini e i sire mapulu měmate si siạ!”

¹¹”Sěbangko wọu liang ene e,” angkuěng u MAWU si sie, ”dingangu rarisịko tatěngo si Siạ su wowom bul᷊ude.” Bọu e MAWU simahe sene, nikal᷊imonaěngu anging timiụ maihạ-ihạ hakịu manga wul᷊ude nal᷊ahěngẹ dingangu manga wul᷊ude watu e nawawěka. Kaiso MAWU e tawe nẹ̌těngkal᷊ahẹ u watangenge su ral᷊ungu anging ene. Sarạeng anging ene e nal᷊ẹ̌da, ute nělinuhe, kaiso su ral᷊ungu linuhẹ̌ ene lai MAWU e tawe nẹ̌těngkatodẹ u watangengʼE.

¹²Bọu ene narěntạe putung, kaiso MAWU e mal᷊aing tawẹ dise su ral᷊ungu putung ene. Bọu ene kai sěngkianu narěmasẹ̌, kụ kai kinaringihẹ̌ko piạ tingihẹ̌ diọ masikome.

¹³Ene piạ i Elia nakaringihẹ̌ tingihẹ̌ ene, i sie něnakạ gatine ringangu kakingkaenge, bọu e siměbang kụ dimarisị su mohongu liang ene. Tangú kinaringihẹ̌ko tingihẹ̌ nẹ̌bera u, ”Elia kai mẹ̌kẹ̌kapura i kau e sini?”

¹⁴ I Elia e simimbang, ”MAWU Ruata Makawasa, iạ e sěntiniạ mang měmẹ̌munara waugʼi Kau e sěmatang. Arawe umatu Israelẹ̌ e limampa pẹ̌kakědon sire e ringangʼU. I sire němpěmungkaesẹ̌ manga pananěmbaěngʼU ringangu němpěmate manga nabi-Nu. Kate iạ sẹ̌saku nal᷊ěmbe, kụ ini e i sire mapulu měmate si siạ!”

¹⁵ MAWU e něhengetang, ”Pẹ̌sul᷊ẹ e sol᷊ong banua l᷊inggi su rěduhu Damsyik! Bọu e kakoạko sol᷊ong soa, kụ sěbohẹ̌ko l᷊ana su těmbọ i Hazael kere tatialan pělahengkẹ i sie makoạ datu su Siria.

¹⁶ Pẹ̌koạko kerene lai si Yehu anạ i Nimsi, tadeạu i sie makoạ datung Israel, dingangu si Elisa anạ i Safat bọu Abel-Mehola, tadeạu i sie makoạ nabi měngaweng si kau.

¹⁷Balạewe měnsang i sai tawe pateěng i Hazael, sarung pateěng i Yehu, dingangu i sire apang nakapěllọ bọʼi Yehu sarung pateěng i Elisa.

¹⁸ Kaiso pitu hiwu su kataune taumata su Israelẹ̌ e sarung ipakasal᷊amatẹ̌, kụ kai i sire apan satia si Siạ dingangu tawe němpaněmba tul᷊adam Baal arau měndarěngu si sie.”

¹⁹Tangú nẹ̌buạ e i Elia kụ nakaěbạ si Elisa e kapẹ̌mangkane ěntana ringangu wawajakẹ̌. Mapul᷊o dua su hongkạ e sapi su těngone ringangu i Elisa sẹ̌sane nạmungkaesẹ̌ ěntana ringangu hongkạ u sapi pěngěnsueěnge. Piạ i Elia e nasahe su rěduhʼi Elisa, i Elia e něměllọu kakingkaenge ringangu niěmpahe su wěmbangi Elisa.

²⁰Tangú i Elisa e něněntangu manga sapine kụ timal᷊ang něnahusu si Elia, apidu nẹ̌bera, ”Balako iạ e reng mẹ̌paramisi su ghaghurangku kal᷊imona, kụ buhụ e iạ tumol᷊e si Tuang.” Angkuěng i Elia, ”Dakọe. Iạ tawe mẹ̌sěding i kau.”[17]

²¹I Elisa e nẹ̌sul᷊e kapia sol᷊ong dahamine, mase němotọ manga sapine. Kalum bawajakẹ̌ piněhunụ e putung piněnasạ gěsing manga sapi ene. Bọu e pinẹ̌papahiạ e manga ghẹ̌sine su taumatane kụ i sire němpẹ̌kinạ. Bọu ene i Elisa e rimal᷊eng timol᷊e si Elia e nakoạ lumaontol᷊e.