Read Sangir MANGA RATU HUMOTONG 2 Bible Online

MANGA RATU HUMOTONG 2 - Sangir bible

MANGA RATU HUMOTONG 2

¹Ene maranịeng kapapohonge, i Daud kimui si Salomo, ahuse, kụ něhabareng manga tatanatane pangěnsueěnge.

²I Daud nẹ̌bera, ”Seng tempone iạ e maněntangu dunia. Pakaiaking bue i kau e ringangu pakawahani.

³Pẹ̌kẹ̌koạ bue apang ilẹ̌orom MAWU Ruatanu e si kau. Tuhuke wue kal᷊awọu tita dingangu hengetangʼE mạbawohẹ su ral᷊ungu Bukẹ̌ i Musa, tadeạu walạewe sol᷊ong apa ral᷊engangu e sarungbe piạ ual᷊ine su apang kakěpal᷊u patikụ munaranu.

⁴Kereu i kau e matuhụ su MAWU, i Sie sarungbe mapakasěhụ u kědo-Ne u hiteku sarung mẹ̌parenta Israel, asal᷊u i sire ringangu kaguwạu naung dingangu kasěllahu sipirang sěntiniạ mang satia tumuhụ kal᷊awọu titanʼE.

⁵ Piạ lai hal᷊ẹ̌ sěmbaụ! I kau e nal᷊ahẹ u makatahěndung apan seng nikoạ i Yoab si siạ kụ měmate si rẹ̌dua pěrwirang Israel, kụ i Abner anạ i Ner dẹ̌duang Amasa anạ i Yeter. I sie němate si sire su tempong maghaghighilẹ̌ baugu měmal᷊isẹ̌ pẹ̌papapate kinoạ i sire su tempong pẹ̌sasekẹ. I sie němate taumata tawẹ sal᷊ane kaiso ini e seng iạ sẹ̌saku harusẹ̌ měnal᷊udẹ̌ kakanoạ e ringangu kawe iạ e nasigěsạ.[2]

⁶Ho! anạku, i kau harusẹ̌ pẹ̌kakanoạ baugu iạ tuhụewe apang nạung suěnnanu e mapia wue; kětạembeng abe wala i sie mairị tạ sungkal᷊ene apa.

⁷ Arawe mihino su manga anạ i Barzilai esẹ bọu Gilead ute kěnnangko pěmpẹ̌koạ mapia. I kau harusẹ̌ měngganapẹ̌ apang gausang i sire měllo-měllo, u i sire kai seng nẹ̌koạ mapia si siạ piạ nạung iạ nělingkạ u watangengku e wọu anung tuhangu i Absalom.

⁸ Nihino si Simei anạ i Gera wọu soang Bahurim su wanuang Benyamin, piạ lai tatanataku si kamene. Su ral᷊ungu raral᷊engku sol᷊ong Mahanaim, i Simei e nạung kal᷊imona kai něngane si siạ matědụ. Kai wọu ene, piạ e nạung i sie simongo naněnsomahẹ̌ si siạ su Sal᷊ụ u Yordan, iạ e nẹ̌salu si sie su arengu MAWU u iạ e tawe měmate si sie.

⁹Kai seng ini e tatanataku si kamene: abe pakawala i sie mal᷊iwirẹ̌ bọu hukumang. Iạ masingkạ u i kau pelesa; kụ maningbe i sie seng maghurang, reạko ral᷊enge tadeạu i sie ihukung u papate.”

¹⁰Bọu e i Daud nate kụ nilěbing su Soan Daud.

¹¹ I sie naratu su Israel karěngụ u ěpạ u pul᷊o su taunge; pitu taung i sie kal᷊aianenge su Hebron, dingangu těllum pul᷊o těllu su taunge su Yerusalem.

¹² Bọu ene i Salomo naratu něngaweng si Daud i amange. Kawasang Salomo kere sěngkatau ratu e enẹ e matoghasẹ̌.

¹³Piạ sěhěllo, i Adonia nakoạ sol᷊ong anum Batsyeba. Nakiwal᷊ọ e i Batsyeba si Adonia, ”Apa pẹ̌tatiwonu ini e piạbe timonane mapia?” ”Ore,” sasimbang i Adonia.

¹⁴Bọu e i sie něnambako l᷊ai, ”Piạko mapulu takụ dorongang bọu i ninang.” ”Kai a?” angkuěng i Batsyeba.

¹⁵I Adonia simimbang, ”I ninang masingkạ u kawe seng iạ e hinong makoạ datu; ene seng lěharapeng u kal᷊awọu tau Israel. Kaiso mariadi kawe nawal᷊i; kawe nạung tuariku nakoạ datu, ual᷊ingu MAWU e kawe mapulu kerene.

¹⁶Ini e piạ dorongku sěmbaụ, mal᷊owọko i ninang abe pẹ̌kunsinging.”

¹⁷ ”Kai a rorongu?” angkuěng i Batsyeba. I adonia simimbang, ”Iạ mělẹ̌harapẹ̌ mal᷊owọko i ninang mapulu mẹ̌dorong su Ratu i Salomo rembeng mapakawalang iạ mẹ̌kawing dingangi Abisag, mahuala wọu Sunem ene. Iạ maiaking u i Salomo e ren tawe mẹ̌kunsinging u rorong i ninang.”

¹⁸”Ho, kerenẹ e,” angkuěng i Batsyeba. ”Iạ hědo mahumbisarang hal᷊ẹ̌ ene dingangu ratu e waugʼi kau.”

¹⁹Tangu rimal᷊engke i Batsyeba sol᷊ong anun datu piạ timonane mapulu mahumbisarang hal᷊ẹ̌ ene waugʼi Adonia. Datu rimarisị naněnsomahẹ̌ si ninange ringangu nẹ̌tumpěkuhẹ̌ si sie, mase naiang kạpia su kaderang kararatuange. Bọu ene i sie rimolohu taumata nipěnadia kadera su sěmběkane koaneng baugʼi ninange.

²⁰Ene nakaiangke, nẹ̌berạ e i Batsyeba, ”I ninang kai mapulu piạ barang dorongang kadodọ si kau kadiongke. I ninang mělẹ̌harapẹ̌ u i kau e ren tawẹ kawawěhạ e manarimạ.” ”Kai apa ene, Inang?” angkuěng i Salomo. ”Iạ e tawẹ kabaratange.”

²¹I Batsyeba simimbang, ”Apakawalako i Adonia, tuhangu e apẹ̌kawing dingangi Abisag.”

²²”Kawe unụe i Ninang měgẹ̌gausẹ̌ hal᷊ẹ̌ ene si siạ?” kakiwal᷊ong Salomo. ”Ene měngkate mẹ̌sul᷊ung u mẹ̌dorong tadeạu iạ mẹ̌gěllịu kal᷊aianengu kararatuang ini e si sie. Kai wal᷊inewe tuhangku e tangu i sie? Kutẹu lai Imang i Abyatar dingangu i Yoab manumběka si sie!”

²³Bọuten nẹ̌bera kerene nẹ̌salụ e i Salomo ringangu arengu MAWU, ”Balạekere maning iạ kahinoěngu l᷊aaneng MAWU, kereu iạ tawe měhukung u papate si Adonia ual᷊ingu roronge ene!

²⁴MAWU e seng naněgadẹ̌ kal᷊aianengku e su kal᷊aianeng i amangku e, i Daud. MAWU e seng napakasěhụ u kědonʼE ringangu seng něngonggọu kararatuang ini e si siạ dingangu manga hiteku. Iạ e mẹ̌salu su arengu MAWU e wiahẹ̌ u i Adonia e sarung mate lai su sahěllo ini!”

²⁵Tangú Ratu i Salomo e nẹ̌parenta si Benaya, kụ i Benaya e tamai němate si Adonia.

²⁶ Bọu ene nẹ̌berạe Ratu i Salomo su Imang i Abyatar, ”Dakọko sol᷊ong soang kamene tutune su Anatot. I kau ihukungu papate, kai sahěllo ini e iạ tawe měmate si kau, watụ u su piạ i kau e wědang dingangi amangku e, i kau e mal᷊aing nakapěndang dingang kal᷊awọu sigěsạ e. Dingangu i kau l᷊ai něngurusẹ̌ Petim Pẹ̌dariandim MAWU.”

²⁷ Bọu e i Salomo nělohosʼi Abyatar kere sěngkatau imang. Ual᷊ingu kakanoạ i Salomo ene e apang kụ piněhengetangu MAWU e su Silo mạanung hiteng Imang i Eli e seng limětạ mal᷊ahẹ.

²⁸I Yoab nakaringihẹ̌ hal᷊ẹ̌ kěbị ene nariadi. I sie kai natakụ ual᷊ingu i sie kai nanumběka si Adonia. Kaiso, nạung kal᷊imona i sie tawe nanumběka si Absalom. Tangú i sie timal᷊ang sol᷊ong Tentam MAWU kụ něngumpaedẹ̌ manga pondol᷊u pananěmbaěng.[3]

²⁹Habarẹ̌ ini niul᷊ị su Ratu i Salomo. Tangú ratu e něndolohi Benaya piněmate si Yoab.

³⁰I Benaya nakoạ sol᷊ong Tentam MAWU kụ nẹ̌bera si Yoab, ”Datu e něngoro si kau apạsěbang bọu ene!” ”Tala,” angkuěng i Yoab. ”Iạ kai mapulu mate sini.” I Benaya nẹ̌sul᷊e kụ něhabaru hal᷊ẹ̌ ene su ratu.

³¹Nakaringihẹ̌ ene datu e nẹ̌bera, ”Dakọe kụ koạko apang niwerane ene. Pateko i sie ringangu lěbingko i sie, tadeạu iạ dingangu kal᷊awọu hiteng amangku e selain tawe měnal᷊udẹ̌ pěmamate kinoạ i Yoab su taumata tawẹ sal᷊ane.

³²MAWU e sarung měhukung i sie ual᷊ingu pěmamate nikoạ e tawe su kasingkạ i amangku. I Abner pěrwirang tau Israel, dingangu i Amasa pěrwirang tau Yehuda e, i rẹ̌dua kěbị tawẹ sal᷊ane. I sire něngalembong kapiane wọu i Yoab sẹ̌sane, kaiso i sie němate si sire.

³³Hukumang ual᷊ingu papateng pěrwira rarua ene sarung tal᷊udang i Yoab dingangu hitene sarang marěngụ-děngụ. Arawe kal᷊awọu hiteng amangku apang nakoạ datu e, sěntiniạ mang al᷊amateng u MAWU — i sire sarung mẹ̌barauntu.”

³⁴Tangú rimal᷊engke i Benaya sol᷊ong Tentam MAWU ringangu němate si Yoab sene. Bọu e i Yoab nilěbing su wal᷊ene su l᷊ikudu soa.

³⁵Mase ratu e něhengkẹ i Benaya nakoạ mol᷊ensekẹ u wuntuang piạ aghide pinẹ̌ngaweng si Yoab, bọu e i Zadok nihengkẹ nakoạ imang piněngaweng si Abyatar.

³⁶Bọu ene ratu e kimui si Simei kụ nẹ̌bera si sie, ”Pěmětịko wal᷊enu su Yerusalem ini. Katanạko sene ringangu abe sěbang bọu soa.

³⁷Kereu i kau wahani suměbang dingangu lumiu lelangu Sal᷊ụ u Kidron, i kau e harusẹ̌ pateěng; dingangu i kau sẹ̌sanu měnal᷊udẹ̌ pẹ̌sasal᷊anu e.”

³⁸”Kerenẹe, i Tuangku Lẹ̌adateng,” angkuěng i Simei. ”Iạ e tumuhụ parentan Tuang.” Tangú natanạ e i Simei su Yerusalem riọ nararěnnạ tempone.

³⁹Sarangke těllu taung nariadị e hal᷊ẹ̌ ini: Duang katau ěllang darolohang i Simei e nahuntal᷊ang sol᷊ong Gat sol᷊ong anun Datu i Akhis ahusʼi Maakha. Piạ i Simei e pinaul᷊ikang u hal᷊ẹ̌ ene,

⁴⁰i sie něnakẹ e kal᷊aianeng su kalidene, kụ bọu ene nakoạ sol᷊ong anun Datu i Akhis su Gat kụ mẹ̌deạ si rẹ̌dua rarolohang ene. I sie nakareạ si rẹ̌dua e kụ němaringang si rẹ̌dua pinakapul᷊ẹ.

⁴¹Piạ i Salomo nakaringihẹ̌ apan nikoạ i Simei e,

⁴²i sie něngoro pinẹ̌kui si Simei wọu e nẹ̌bera, ”Iạ e seng napakariading kau e někědo su arengu MAWU u i kau e tawe maněntangu Yerusalem. Ringangu iạ mal᷊aing seng něnumbal᷊ung si kau kụ kamagengu i kau e suměbang bọu Yerusalem, i kau e harusẹ̌ mate. Kụ i kau e seng nẹ̌kědo ringangu mal᷊uasẹ̌ tumuhụ titaku arau ěng?

⁴³Kai kawe unụe i kau e nělanda kirenu ene ringangu nělampa titaku e ěng?

⁴⁴I kau e masingkạ-singkạ u patikụ karal᷊akisu e si amangku. Baugu ene tangú MAWU e sarung měhukung i kau,

⁴⁵arawe iạ e sarung al᷊amatengʼE ringangu kararatuang i amangku e sarung iapakateine sarang marěngụ-děngụ.”

⁴⁶Bọuten něhengetang kerene, datu e něngoro si Benaya kụ dimal᷊engke i Benaya e tamai němate si Simei. Orasẹ̌ ini e i Salomo tinalung kawasane su ral᷊ungu kararatuange.